24-ᓂᑦ ᐅᑭᐅᓕᒃ ᐋᓇ ᓛᒻ ᑕᕐᕆᔮᑦᓴᓕᐅᕐᑎᓄᑦ ᐱᓐᖑᐊᖃᑦᑕᓕᓚᐅᕐᓯᒪᔪᖅ ᐅᑭᐅᖃᕐᑐᓂ 15ᓂᑦ ᐃᓚᒋᔭᐅᓚᐅᕐᑐᓂ ᐃᓅᓱᑦᑐᑦ ᐆᑦᑐᕋᕐᑎᑕᐅᑎᓪᓗᒋᑦ ᑕᕐᕆᔮᑦᓴᓕᐅᕆᓂᖕᒧᑦ ᐃᓕᓐᓂᐊᕐᓯᓐᓈᑦ ᑲᑎᒪᔪᓂ ᑕᕐᕆᔮᓕᐅᓛᓕᕐᑎᓪᓗᒋᑦ The Grizzlies (ᐊᒃᖤᐃᑦ). ᐃᓕᓐᓂᐊᕐᓯᓐᓈᑦ ᑲᑎᒪᔪᑦ ᐃᖃᓗᓐᓃᓚᐅᕐᓯᒪᔪᑦ ᐊᓯᖏᓐᓂᑦ ᐃᓅᓱᑦᑐᓂᑦ ᓯᓚᕐᔪᐊᑦᑕ ᑲᔾᔨᖓᓂᕐᒥᐅᑦ ᐊᒡᒍᕐᓯᒪᔪᑦ ᐊᑕᐅᑦᓯᒥ ᑲᑎᑦᑎᓪᓗᒋᑦ. ᐱᓇᓱᐊᖃᑕᐅᓪᓗᓂ ᐊᒻᒪ ᐃᓂᑖᖅᑎᑕᐅᓪᓗᓂ “ᐅᐱᕐᖔᖅ” ᐊᑎᓕᒻᒥᑦ. The Grizzlies ᑕᕐᕆᔮᓕᐊᖑᓚᐅᖅᓯᒪᔪᑦ ᓄᓗᐊᓕᒻᒧᑦ ᐊᖅᓴᒥᑦ ᐊᓇᐅᓕᒑᕐᑎᓐᖑᐊᖑᓪᓗᑎᑦ ᐅᕕᒃᑲᑦ ᐃᓄᐃᑦ ᑯᕐᓗᖅᑑᒥᐅᑕᑦ. ᑲᑎᓚᐅᕐᓯᒪᔪᑦ ᖁᕐᕙᕐᑎᕆᔪᒪᓪᓗᑎᑦ ᓴᓐᖓᑦᑎᖃᑦᑕᐅᑎᓪᓗᑎᓪᓗ ᑕᐃᑦᓱᒪᓂ ᐊᒥᓱᕐᔪᐊᑦ ᐃᓅᓯᕐᒥᓂᖕ ᑭᐱᓯᔪᑦ ᐱᓗᐊᓐᖑᐊᕐᑎᓪᓗᒋᑦ ᓄᓇᖓᓂ.
ᖁᕕᐊᒋᔭᐅᕐᔪᐊᓚᐅᕐᑎᓪᓗᒍ The Grizzlies, ᐋᓇ ᐃᓕᓐᓂᐊᕐᑕᒥᓂᖕ ᐃᓕᓐᓂᐊᕐᕕᐊᓗᖕᒥ ᐱᔭᕇᕐᑐᓂ ᐊᒻᒪ ᑭᖑᓂᐊᒍᑦ ᐋᑐᕚ ᓯᓚᑦᑐᖅᓴᕐᕕᔾᔪᐊᖓᓄᑦ ᐃᓕᓐᓂᐊᕆᐊᓕᕆᓪᓗᓂ ᓯᓚᕐᔪᐊᒥ ᐱᕙᓪᓕᐊᔪᓂᑦ ᐃᓕᓐᓂᐊᕐᑐᓂ.
ᐅᔾᔨᕆᓕᓚᐅᕋᒥᐅᖕ ᓴᓐᖏᔪᐊᓘᓂᖓ ᑕᕐᕆᔮᑦᓴᑦ ᑕᓚᕖᓴᒃᑯᓪᓗ ᓴᖅᑭᔭᕐᑎᑕᐅᓂᖅ ᐅᓂᑳᑦᑐᐊᒃᑯᑦ ᐅᖃᐅᓯᖃᕐᓂᒃᑯᑦ The Grizzlies ᒥᑦᓵᓄᑦ ᐱᓇᓱᐊᓚᕿᓕᓚᐅᕐᒥᔪᖅ ᐱᓐᖑᐊᕋᑦᓴᒥᑦ ᑕᐃᔭᐅᓪᓗᓂ “Trickster”, ᓰᕕᓰ CBC TV ᑕᑯᓐᓇᒐᑦᓴᓕᐊᖑᕙᑦᑐᑦ ᑭᖑᓕᕇᑦ ᐅᓂᒃᑳᓖᑦ ᐅᐃᕖᕐᕆᔨᐅᑉ ᐃᕐᖕᓂᖓᓂᑦ ᑎᑎᕋᕐᑕᒥᓂᖏᑦ ᐄᑎᓐ ᕋᐱᓐᓴᓐ. ᐋᓇ ᐃᓂᑖᖅᑎᑕᐅᓪᓗᓂ “ᓯᐊᔭᒥᑦ” ᑖᒃᑯᓇᓂ ᑕᕐᕆᔮᓕᐊᓂᕐᒥ. ᑭᖑᓂᐊᒍᑦ ᐋᓇ ᐃᓱᒪᓕᓚᐅᕐᑐᖅ ᑕᕐᕆᔮᑦᓴᐃᑦ ᑕᓚᕖᓴᒃᑯᓪᓗ ᐱᓇᓱᐊᕐᓂᖅ ᐅᓂᑦᓯᒪᒍᑎᒋᑐᐃᓇᓚᖓᒻᒪᒋᑦ.
ᐸᕐᓇᒐᓱᐊᓕᕐᓱᓂ ᐃᓂᖓᓄᑦ ᓯᕗᓕᕐᑎ ᒥᑕᑦᑐᓄᑦ ᑕᕐᕆᔮᑦᓴᓕᐊᓂ, North to North ᐊᑕᐅᓯᐊᑯᓗᑐᐃᓐᓇᕐᓗᓂ. ᐅᖃᓕᒫᕐᐸᑦᑐᒋᑦ ᑎᑎᕋᕐᓯᒪᔪᑦ ᐃᔾᔪᐊᕐᑕᐅᓂᐊᕐᑐᑦ ᐃᓄᑦᑕᕆᓂᐊᕐᑕᖏᑦ ᑐᑭᓯᓇᓱᑦᑐᒋᑦ, ᐃᒻᒥᓂᖕ ᓂᐱᓕᐅᕐᐸᑦᑐᓂ ᐆᑦᑐᕋᕐᑐᓂ ᐊᓯᖏᓐᓂᓪᓗ ᑕᖅᑮᑦ ᑎᓴᒪᕈᕐᒪᕆᓚᐅᕐᑐᑦ ᐆᑦᑐᕋᐃᓐᓇᕐᑐᓂ. ᐊᑦᓱᕈᕐᓇᑦᓯᐊᕐᑐᓂ ᐃᓂᖓᓂᑦ ᐱᔪᒪᓪᓚᕆᓚᐅᕋᒥ. ᐅᖃᓚᐅᕐᑐᖅ ᐆᑦᑐᕋᒥ ᑭᓇᓐᖑᐊᖑᓂᐊᕐᓂᕐᒥᓂᖕ 110% ᐳᓴᑦᑎᒥᑦ ᑕᐃᓐᓇᓐᖑᐊᖑᓇᓱᑦᑐᓂ ᐅᑉᐱᕆᒐᒥᐅᖕ ᐱᔪᓐᓇᕐᓂᓕᒫᒥᒍᑦ ᐆᑦᑐᕋᓱᓐᖏᒃᑯᓂ ᐊᓯᐊᓄᑦ ᐊᔪᓐᖏᓂᕐᓴᒧᑦ ᐱᔭᐅᑐᐃᓐᓇᕐᓂᐊᕐᖓᑦ.
ᐋᓇ ᖃᖓᑕᓲᒧᑦ ᐃᑭᕋᑖᖅᑐᓂ ᐅᑎᓕᕐᑐᓂ ᐃᖃᓗᓐᓄᑦ ᐱᓇᓱᐊᕈᓯᓕᒫᖅ ᐋᑐᕚ ᓯᓚᑦᑐᖅᓴᕐᕕᔾᔪᐊᖓᓃᓚᐅᕐᑐᓂ. ᐊᒻᒪ ᖃᖓᑦᑕᓂᐊᑦᓯᐊᓕᕐᑎᓪᓗᒋᑦ, ᐅᖄᓚᕕᐅᓪᓗᓂ ᐊᕿᓱᐃᔨᐅᓚᐅᕐᑐᓂᒃ ᑕᕐᕋᔭᒐᒃᓴᒧᑦ ᓯᑕᐃᓯ ᐋᒡᓗᒃ ᒪᒃᑖᓄᑦ ᐊᒻᒪᓗ ᐊᓖᓯᐊ ᐊᕐᓇᖁᕐᒃ−ᐳᕆᐊ, ᑕᕐᕆᔮᑦᓴᓕᐅᕐᑏᑦ, ᐃᓂᖓᒎᖅ ᓵᓚᒋᔭᖓ ᐱᔪᒪᑐᐊᖅᐸᒍ.
ᐋᓇ ᖁᕝᕕᐅᓯᑲᐅᑎᒋᓪᓗᓂ ᕿᐊᓕᖅᑐᓂ ᖁᐊᖅᓵᑐᑦᓴᐅᔪᒥᓃᑦ ᖃᖓᑕᖃᑎᖏᑦ ᓂᓪᓕᑳᓪᓚᒃᑲᒥ, ᑭᓯᐊᓂᓕ ᐊᑯᓂᐊᓘᖕ ᑕᐃᒪᐃᓐᓂᐊᕐᓯᒪᒐᒥ ᑎᑭᑕᐃᓐᓇᕐᖓᑦ. ᐃᒻᒥᓄᑦ, ᖁᕕᐊᑦᑕᓐᓂᐊᓗᖕ ᐊᒻᒪ ᖃᓱᓪᓗᓂ ᐅᑕᖅᑭᔾᔮᕈᓐᓃᕋᒥ, ᑕᕝᕙᑲᐅᑎᒋᓗ ᑲᑉᐱᐊᑦᑕᑦᑐᓂ ᖁᐃᓕᖅᑕᓇᖅᑐᒥᓪᓗ ᖁᕕᐊᑦᑕᑦᑐᓂ ᓂᕆᐅᓐᓂᖕᒥᑦ ᐊᑐᕐᓂᐊᑐᐃᓐᓇᕐᑕᒥᓂᖕ.
ᐋᓇ ᐅᖃᓚᐅᖅᑐᖅ ᑕᕐᕆᔮᑦᓴᓕᐅᕐᓂᖅ ᐊᑦᓱᕈᕐᓇᖃᑦᑕᓚᐅᖅᑐᖅ ᖁᕕᐊᑦᑕᓇᕐᑐᓂᓗ ᐊᒻᒪ ᑕᐃᒫᑎᒋ ᐱᖃᑕᐅᓚᐅᕐᓯᒪᓐᖏᑦᑐᖅ ᑕᕐᕆᔮᑦᓴᓕᐅᕐᕕᒻᒥ North of North ᐃᓂᖓᑎᑐᑦ. ᑕᕐᕆᔮᑦᓴᓕᐅᕐᓂᖅ ᐅᖓᓯᑦᑐᒥ ᓄᓇᓕᕋᓛᖑᓂᕐᓴᓂ ᐃᓚᒌᓕᕐᓇᖅᑐᖅ ᑕᕐᕆᔮᑦᓴᓕᐊᖑᖃᑎᒌᑎᒍᑦ ᐊᒻᒪ ᑕᕐᕆᔭᓕᐅᕐᑏᑦ ᐃᖅᑲᓇᐃᔭᕐᑎᓕᒫᖏᑦ ᖃᐅᑕᒫᑦ ᑕᑰᑎᕙᑦᑐᑕ − ᐃᖅᑲᓇᐃᔭᕐᓇᐅᖏᒃᑲᓗᐊᕐᑎᓪᓗᒍᓘᓐᓃᑦ.
ᐅᖃᕆᓪᓗᓂ ᐊᑦᓱᐊᓗᖕ ᑕᑯᕋᕐᓂᖃᑦᑕᓚᐅᕐᑐᑦ ᖃᓄᖅᑑᒃᑲᐅᓂᖏᑦ ᑕᒫᓐᖓᑐᐃᓐᓇᖅ ᖃᓄᖅᑑᕈᓘᔭᕐᐸᑦᑐᑎᓪᓗ ᐊᓯᐊᓄᑦ ᓵᑉᐸᑦᑐᑎᑦ ᐊᐳᕋᐃᒐᒥ ᐊᑦᓱᕈᕐᓇᕐᑐᓄᑦ ᐱᖁᑎᑎᒍᑦ ᐊᐅᓚᔾᔪᑎᑭᒧᑦ ᑕᐃᒪᓐᓇᑎᒋ ᐊᖏᑎᒋᔪᒥᑦ ᑕᕐᕆᔮᓕᐅᕐᑎᓪᓗᒋᑦ.
ᐋᓇ ᐅᖃᖅᑐᓂ ᐃᓚᒋᔭᐅᓂᖅ ᑕᕐᕆᔮᓕᐅᕐᑐᓄᑦ ᑭᖑᓕᕇᓪᓗᑎᑦ ᑕᕐᕆᔭᕐᑕᐅᔪᑦᓴᓂᑦ ᖁᕐᕙᕈᑎᒋᓪᓗᓂᐅᖕ ᐊᒻᒪ ᐃᖅᑲᓇᐃᔭᖃᑎᖃᒃᑲᓐᓂᕈᓐᓇᕋᒥ ᐊᓖᓯᐊᒥᑦ ᐊᒻᒪᓗ ᓯᑕᐃᓯᒥᑦ. ᐃᓚᓪᓗᒍ ᓈᒻᒪᓈᓪᓗᐊᕆᓪᓗᓂ ᑕᕐᕆᔮᑦᓴᓕᐊᖑᖃᑎᖓ ᒪᐃᑲ ᕼᐋᐳᕐ, ᓃᕕ, ᓯᐊᔭᐅᑉ ᐊᓈᓇᖓ.
ᑖᑯᐊ ᒪᕉᒃ ᑲᑎᓚᐅᕐᓯᒪᓐᓂᕋᒥ ᔮᒪᓃᑦ ᓄᓇᖓᓂ ᑖᑦᓱᒥᖓᑦᓴᐃᓐᓇᖅ ᐃᓂᑦᓴᒧᑦ ᐱᓇᓱᐊᕐᑐᒥᓃᖕ ᑕᕐᕆᔮᑦᓴᓕᐊᓂ ᐊᓯᖏᓐᓂ, ᐊᒻᒪ ᓂᕈᐊᕐᑕᐅᓂᓐᖏᑦᑑᖕ ᓇᓕᖅᓯᑐᐃᓐᓇᖅ. ᔮᒪᓂᒦᑎᓪᓗᒋᑦ ᐋᔩᖃᑎᒌᑦᑐᓐᓇᕐᓯᓪᓗᑎᖕ ᓄᓇᖃᖅᑳᖅᓯᒪᔪᑦ ᑕᕐᕆᔮᑦᓴᓕᐊᖑᕙᓐᓂᖏᑦ ᑕᕐᕆᔭᓕᐊᓂ ᐊᒻᒪ ᑕᑯᔪᒪᓪᓚᕆᓐᓂᕋᕐᑐᑎᑦ ᑕᕐᕆᔮᓕᐊᒥᓂᕐᓂᑦ ᐃᓄᐃᑦ ᐃᓕᖅᑯᓯᖓᑎᑐᑦ ᒥᑕᐅᓯᖏᓐᓂᑦ.
ᐋᓇ ᐅᖃᕆᓪᓗᓂ ᑕᐸᐃᕐᓇᓚᐅᕐᑐᖅ ᐃᓂᑖᖅᑎᑕᐅᓐᓂᕋᒥᖕ ᑕᒪᒃᑮᖕ ᐊᓈᓇᓐᖑᐊᖑᓪᓗᓂ ᐸᓂᓐᖑᐊᖑᓪᓗᓂᓗ ᑕᕐᕆᔮᑦᓴᓕᐊᓂ North of North.
ᐋᓇᒧᑦ, ᑕᕐᕆᔭᕐᑕᐅᖃᑦᑕᓂᐊᕐᑐᑦ ᓴᖅᑭᑕᐅᕋᑖᖅᑎᓪᓗᒋᑦ, ᓇᓗᓚᐅᖅᑐᖅ ᖃᓄᐃᑦᓴᓂᐊᕐᒪᖔᑕ ᐃᓄᐃᑦ. ᐃᑉᐱᒍᓱᓚᐅᕐᑑᒐᓗᐊᖅ ᖁᕕᐊᒋᔭᐅᓂᐊᕆᐊᖓ ᑭᓯᐊᓂᓕ, ᓯᕘᕋᓇᐃᓐᓇᕐᑐᓂ ᑐᓴᓚᐅᓐᖏᒧᑦ. ᓇᓗᖅᑯᑎᒍᓐᓃᓚᐅᕐᑐᖅ ᐃᑦᓯᕙᓕᕋᒥ ᑕᕐᕆᔭᕐᕕᒻᒥ ᑐᕌᓐᑐᒥ ᐃᖃᓗᓐᓂᓗ ᐊᒻᒪ ᐃᓪᓚᖅᓯᖃᑦᑕᕐᑐᓂᑦ ᐃᓄᓐᓂᑦ ᑐᓴᖃᑦᑕᓕᕋᒥ, ᑕᐸᐃᖅᑐᓂᑦ ᖃᐃᒐᓪᓚᑦᑐᓂᓪᓘᓐᓃᑦ ᑕᕐᕆᔭᕐᑕᒥᓄᑦ ᖁᕕᐊᑦᑕᓪᓚᕆᑦᑐᐊᓘᓕᕐᑐᓂ ᖃᓱᔾᔫᒥᓪᓗᓂᓗ
ᐋᓇ ᓇᓗᓚᐅᕐᑑᒐᓗᐊᖅ ᓯᕗᓕᕐᑎᐅᓗᓂ ᐃᔪᖅᓵᖅᑐᓂ ᑕᕆᔭᓕᐅᕈᓐᓇᕐᓂᐊᕐᒪᖔᕐᒥ ᑭᓯᐊᓂᓕ ᐃᑲᔪᕐᑐᐃᔾᔪᐊᕐᓂᖏᓐᓄᑦ ᑕᕐᕆᔮᓕᐅᖃᑎᖏᑦ ᐃᖅᑲᓇᐃᔭᕐᑏᓪᓗ ᑕᕐᕆᔭᓕᐅᕐᑐᑦ ᐱᔭᕆᐊᑭᓪᓕᖃᑦᑕᓚᐅᕐᑐᖅ.
North of Northᒥ ᑕᕐᕆᔮᓕᐅᓚᐅᕐᑐᓂ ᓇᓗᖅᑯᑎᒍᓐᓃᕐᓯᒪᔪᖅ ᐊᒻᒪ ᑐᑭᓯᐅᒪᓂᕐᓴᐅᓕᕐᑐᓂ ᖃᓄᖅ ᐃᔪᖅᓵᖅᑐᓂᑦ ᑕᕐᕆᔮᓕᐅᓲᖑᒻᒪᖔᑕ. ᐋᓇ ᐅᖃᖅᓯᒪᔪᖅ ᑕᕐᕆᔮᑦᓴᓕᐅᕋᓱᓐᓂᖅ ᐊᑦᓱᐊᓗᖕ ᑕᖃᓇᕐᖓᑦ ᐱᓗᐊᕐᑐᖅ ᐊᔪᐃᓐᓈᖃᓚᐅᕋᓗᐊᕐᑐᓂ ᐃᓂᑖᕆᔪᒪᔭᒥᓂᖕ ᐱᓐᖏᒐᐃᒐᒥ, ᐊᒥᓱᐃᖅᓱᖅᑐᓂ ᐊᑭᓕᖅᓱᖅᑕᐅᒐᓂ ᐊᒻᒪ ᐱᓕᒻᒪᑦᓴᕆᐊᖃᕐᑐᓂ ᐃᓂᖓᓄᑦ.
ᐋᓇᐅᑉ ᑐᓴᖅᑕᐅᖁᔭᖓ ᐃᓄᓐᓄᑦ ᑕᕐᕆᔮᑦᓴᓂ ᐱᓐᖑᐊᕐᑎᐅᓂᖕᒧᑦ ᑕᐃᒫᖕ ᓇᓗᓇᖅᑐᐹᓘᒻᒪᑦ ᐃᓚᖓᒍᑦ ᐊᒻᒪ ᐋᒡᒑᕐᑕᐅᑲᑕᖃᑦᑕᕐᑐᓂ ᐊᑦᓱᐊᓗᒃ ᓴᐱᓕᕐᔫᒥᓇᕐᖓᑦ ᑭᓯᐊᓂᓕ, ᐃᖅᑲᓇᐃᔮᕆᓪᓗᒍ ᐊᑦᓱᐊᓗᖕ ᖁᕕᐊᑦᑕᓇᕐᑐᖅ ᐊᒻᒪ ᐊᓯᑦᑎᓐᓂᑦ ᐃᓄᓐᓂᑦ ᑲᑎᓯᓐᓇᕐᑐᓂ ᐊᒻᒪ ᓂᐅᕐᕈᓇᕐᑐᓂ ᓇᒧᑐᐃᓐᓇᖅ ᐅᓂᒃᑳᑦᓴᓕᐊᓘᓕᕐᓇᖅᑐᖅ ᐊᑐᖅᓯᒪᔭᒥᒍᑦ.
ᐊᒻᒪ ᐆᑦᑐᖃᑦᑕᕐᑐᓂ ᑭᓯᐊᓂ ᐆᑦᑐᕐᓂᖏᒃᑯᑦᓯ ᐊᐃᑦᑖᖃᑦᑕᓂᐊᓐᖏᓇᑦᓯ ᐅᒡᒍᐊᒧᑦ. ᐊᒻᒪ ᐃᒻᒥᓄᑦ, ᐆᑦᑐᓚᐅᓐᖏᒃᑯᓂ The Grizzliesᑯᓐᓄᑦ, ᐅᓪᓗᒥ ᐊᑐᓕᕐᑕᒥᓂ ᑕᒫᓂᒃᑲᔭᓐᖏᑦᑐᖅ.
ᐋᓇ ᐅᖃᕆᓪᓗᓂ ᑕᕐᕆᔮᖅᓴᓕᐅᖅᑏᑦ ᐱᑦᑎᐊᖃᑦᑕᖅᓯᒪᓐᖏᒻᒪᑕ ᐃᓄᓐᓄᑦ ᐅᓂᒃᑳᕐᑐᐊᖏᑦ ᓂᐱᖏᓪᓗ ᑕᐃᒫᕈᓗᑐᐃᓐᓇᖅ ᐊᑐᕐᓂᓪᓗᒃᑕᐅᑐᐃᓐᓇᕐᑐᑎᑦ.
ᐅᖃᖅᑐᓂ ᓄᓇᖃᖅᑳᖅᓯᒪᔪᑦ ᑕᕐᕆᔮᑦᓴᓕᐅᕐᑎᖏᓐᓂ, ᐊᑕᐅᑦᓯᒃᑰᕐᑕᖅᑐᑎᑦ ᒪᑭᑉᐸᓪᓕᐊᖃᑦᑕᐅᑎᕙᒻᒪᑕ, ᐸᖅᑭᖃᑦᑕᐅᑎᓪᓗᑎᑦ, ᐅᓂᒃᑳᕐᕕᒻᒥᓂ ᓴᖅᑭᔮᖃᑦᑕᐅᑎᕙᑦᑐᑎᑦ ᐊᒻᒪ ᖁᕐᕙᖅᑎᖃᑦᑕᐅᑎᕙᑦᑐᑎᑦ ᐊᓪᓗᕆᐊᕐᓂᑕᒫᑦ.
