ᓇᐃᓈᖅᑐᑦ: “ᐃᑲᔪᕈᒪᓂᖅ ᐊᒻᒪ ᐅᑕᖅᑭᑐᐃᓐᓇᕐᓂᖅ ᐃᑲᔪᕈᒪᓂᕐᒥᒃ” ᐋᓐᓂᐊᖅᓯᐅᑏᑦ ᕿᑭᖅᑕᓂ ᓄᓇᓕᖕᖕᓂᑦ ᐅᖃᐅᓯᖃᖅᑐᑦ ᐃᖅᑲᓇᐃᔮᕆᔭᖏᑕ ᒥᒃᓵᓄᑦ
ᒫᓐᓇ ᐱᓗᐊᙳᐊᓕᖅᑐᒥᒃ, ᖁᕕᐊᓲᑎᖃᖅᑐᒍᑦ ᖁᔭᓕᓗᒋᓪᓗᒍ ᐋᓐᓂᐊᖅᓯᐅᑎᑦ ᐅᕙᑦᑎᓐᓂ ᑲᒪᑦᑎᐊᖃᑦᑕᖅᑐᓂᒃ ᐊᑲᐅᑦᑎᐊᙱᑎᓪᓗᑕ. ᒪᕐᕉᓂ ᐋᓐᓂᐊᖅᓯᐅᑎᓂ ᐅᖃᓕᒪᖃᑎᖃᓚᐅᕋᑦᑕ ᕿᑭᖅᑕᓂ ᓄᓇᓕᖕᓃᑦᑐᓂ ᐃᖅᑲᓇᐃᔮᕆᔭᖏᑕ ᐋᓐᓂᐊᖅᓯᐅᑏᑦ ᐱᓇᓱᐊᕈᓯᖓᓂ 2020ᒥ.
ᓄᕝᕕᔭ ᐃᓄᐊᕋᖅ
ᑕᐃᒪᙵ ᐃᖅᑲᐅᒪᒍᓐᓇᖅᓯᑎᓪᓗᒍ, ᓄᕝᕕᔭ ᐃᓄᐊᕋᖅ ᐋᓐᓂᐊᖅᓯᐅᑎᐅᓂᕐᒥᒃ ᐃᖅᑲᓇᐃᔮᖃᕈᒪᓯᒪᐃᓐᓇᓚᐅᖅᑐᖅ. ᑲᔪᖏᖅᓴᖅᑕᐅᓚᐅᖅᓯᒪᔪᖅ ᐊᔭᖓᓄᑦ/ᐊᑦᑕᖓᓄᑦ ᑐᓵᔨᐅᔪᒥᒃ ᑲᖏᖅᑐᒑᐱᖕᒥ ᐋᓐᓂᐊᕐᕕᖕᒥ.
“ᐊᓯᖏᑦᑎᑐᑦ ᐃᑲᔪᖃᑕᐅᒍᒪᓚᐅᕋᒪ ᐅᑕᖅᑭᑐᐃᓐᓇᖅᖢᖓᓗ ᐃᑲᔪᖅᑕᐅᔪᒪᔪᓂᒃ,” ᐅᖃᖅᑐᖅ ᐃᓄᐊᕋᖅ, “ᑕᒪᒃᑯᐊ ᑕᕝᕙ ᐱᒋᐊᒃᑲᓐᓂᕈᑎᒋᓲᒃᑲ ᐃᑲᔪᕈᒪᓂᓐᓂ ᐃᓄᖕᓂᑦ ᐊᒻᒪᓗ ᖁᕕᐊᓲᑎᖃᖅᑎᓪᓗᒋᑦ ᖁᕕᐊᓱᖃᑎᒋᔪᒪᓪᓗᒋᑦ ᐊᒻᒪᓗ ᐊᒃᓱᕈᓐᓇᖅᑐᒃᑰᓕᖅᑎᓪᓗᒋᑦ ᐃᑲᔪᕈᒪᓪᓗᒋᑦ.”
ᐅᖃᖅᑐᖅ ᓄᓇᓕᖕᒥ ᖃᓂᒌᒃᑐᓂᒃ ᐃᖅᑲᓇᐃᔭᖅᖢᓂ ᐊᒃᓱᕈᕐᓇᕐᓂᖅᐹᖑᔪᖅ ᐋᓐᓂᐊᖅᓯᐅᑎᐅᓗᓂ.
“ᖃᐅᔨᒪᓇᖃᑦᑕᙱᒻᒪᑦ ᑭᓇ ᐃᑎᕐᓂᐊᕐᒪᖔᑦ ᒪᑐᒃᑯᑦ ᑭᖑᓂᐊᓃᑦᑐᒥᒃ, ᓄᑲᕋᐅᒍᓐᓇᖅᑐᖅ, ᐊᔭᒐᐅᔪᓐᓇᖅᑐᑦ, ᐱᖃᑎᒐᐅᔪᓐᓇᖅᑐᖅ ᐃᓚᒋᔪᓐᓇᖅᑕᕋ ᑖᒃᑯᐊ ᑕᕝᕙ ᐱᔾᔪᑎᒋᓪᓗᒋᑦ ᐆᒻᒪᑎᒐ ᐊᒃᓱᐊᓗᒃ ᑎᓪᓕᖅᑕᓕᓲᖑᕗᖅ..”
ᒥᐊᓂᕆᖃᑦᑕᖅᖢᒋᑦ ᐃᑲᔪᖅᑕᐅᔭᕆᐊᓖᑦ ᐱᒻᒪᕆᐅᔪᑦ ᐃᓄᐊᕋᕐᒧᑦ, ᐃᕐᓂᒥᓂᒃ ᐃᖅᑲᐃᑎᑦᑎᖃᑦᑕᖅᑐᑦ ᕿᓂᖃᑦᑕᖁᓪᒋᑦ ᐃᑲᔪᕈᒪᔪᓂᒃ ᓄᓇᓕᖕᒥ.
ᐃᓕᓐᓂᐊᕌᓂᓚᐅᖅᑎᓪᓗᒍ ᓄᓇᕗᒥ ᐋᓐᓂᐊᖅᓯᐅᑎᐅᓂᕐᒥ ᐃᓕᓐᓂᐊᕐᓂᕐᒥᒃ 2017ᒥ, ᐃᓄᐊᕋᖅ ᐊᔾᔨᒌᙱᑦᑐᓂᒃ ᐃᖅᑲᓇᐃᔭᕐᕕᓂᒃ ᐃᖅᑲᓇᐃᔭᖃᑦᑕᖅᓯᒪᔪᖅ ᕿᑭᖅᑕᓂ ᐋᓐᓂᐊᕐᕕᖕᒥ ᐃᖃᓗᓐᓂ.
ᐅᓖᐱᑲ ᓛᖕᓯᑎᐊᓪ
ᐱᓕᕆᐊᒃᓴᖃᐃᓐᓇᐅᔭᕐᓇᖅᑐᖅ ᐃᖅᑲᓇᐃᔭᕐᓗᓂ ᐋᓐᓂᐊᕐᕕᖕᒥ. ᑕᒪᓐᓇ ᐅᓖᐱᑲᐅᑉ ᐅᔾᔨᕆᓕᓚᐅᖅᓯᒪᔭᖓᑦ ᐱᓕᕆᐊᒃᓴᖃᐃᓐᓇᐅᔭᕐᓂᖓᓂᒃ ᕿᑭᖅᑕᓂ ᐋᓐᓂᐊᕐᕕᖕᒥ ᐃᖅᑲᓇᐃᔭᓕᓵᖅᑎᓪᓗᒍ 2006ᒥ. ᐱᒋᐊᖅᑎᓪᓗᖓ ᐋᓐᓂᐊᔪᒥᒃ ᑲᒪᒋᐊᖃᕋᓱᒋᓪᓗᖓ ᓱᓇᐅᕝᕙ ᐅᐸᓗᖕᓇᖅᓯᔪᒥᒃ ᐱᓕᕆᒋᐊᖃᓚᐅᖅᓯᒪᔪᖓ ᐃᓄᑑᔾᔨᓪᓗᖓ ᐃᕐᓂᓱᒃᑎᑦᑎᓚᐅᖅᓯᒪᔪᖓ. a dull
“ᖁᔭᓕᒍᑎᒋᓪᓗᒍ, ᐃᖅᑲᐅᒪᓂᐊᖅᑕᕋ ᐃᓅᓯᓕᒫᓐᓂ,” ᐅᖃᖅᑐᖅ, “ᑭᖑᓂᐊᒍᑦ ᐃᓚᒌᓂᒃ ᑕᑯᒐᒪ, ᐃᓱᒪᓪᓗᖓ ᑖᓐᓇ ᐃᕐᓂᓱᓚᐅᖅᑕᕋ ᐱᐊᕋᖓ ᐃᓅᔪᒪᓪᓗᓂ ᕿᓚᒥᐊᓘᓚᐅᖅᓯᒪᖕᒪᑦ!”
ᑕᐃᒪ ᑕᒪᒃᑯᐊ ᐊᒃᓱᐊᓗᒃ ᖁᔭᓕᔾᔪᑎᒋᓯᒪᔭᖏᑦ ᐅᓖᐱᑲᐅᑦ ᐅᖃᖅᖢᓂ ᐋᓐᓂᐊᖅᓯᐅᑎᙳᓕᓚᐅᕐᒪᑦ ᐃᑲᔪᕈᒪᓪᓗᓂ ᐱᔨᑦᓯᕋᕈᒪᓪᓗᓂᓗ ᐊᓯᖏᓐᓂ. ᐊᑐᖅᖢᓂ ᓱᕐᓗ ᐃᕐᓂᓱᒃᓰᓂᕐᒥᒃ ᐃᓱᒪᒃᑯᑦ ᐋᖅᑭᐅᒪᑎᑦᑎᓇᖅᑐᖅ ᓱᕐᓗ ᐊᒃᓱᕈᓐᓇᖅᑐᓕᕆᑲᐃᓐᓇᖃᑦᑕᖅᖢᑕ ᖁᕕᐊᓇᖅᑐᓕᕆᑲᐃᓐᓇᓕᖅᖢᑕ ᐊᔾᔨᒌᒃᐸᙱᑦ ᑕᑲᓇᖃᓗᐊᖅᑎᓪᓗᒍ ᐃᑲᔪᖅᖢᓂ ᐋᓐᓂᐊᖅᑐᓂᒃ ᐃᓚᒋᔭᖏᓪᓗ ᐊᒃᓱᕈᓐᓇᖅᑐᒃᑰᖃᑦᑕᖅᑎᓪᓗᒋᑦ.
“ᓂᕆᐅᒋᔭᖃᖅᑐᖅ ᐅᒻᒪᑎᓐᓂ ᑎᒍᒥᐊᕈᓐᓇᕐᓗᒍ ᐋᓐᓂᐊᖃᕐᓇᙱᑦᑐᓕᕆᓂᖅ ᐱᐅᓯᒃᑲᓐᓂᖁᓪᓗᒍ ᐃᓄᐃᑦ ᓄᓇᓕᖕᓃᑦᑐᑦ ᐃᑲᔪᖅᑕᐅᑦᑎᐊᒃᑲᓐᓂᕈᓐᓇᖅᓯᓗᑎᒃ,”.
“ᐱᐅᓂᖏᑦ ᐊᒃᑐᐃᒍᑕᐅᔪᓐᓇᖅᑐᑦ ᐋᓐᓂᐊᖅᓯᐅᑎᒥᑦ ᐃᓄᖕᓄᑦ ᒥᑭᔪᑯᓗᒃ ᐊᖏᔪᐊᓘᒍᓐᓇᖅᖢᓂ,” ᐅᖃᕆᐊᒃᑲᓐᓂᖅᑐᖅ.
ᐊᓰᓇ ᐃᓪᓚᐅᑦ
ᐳᕝᕕᕆᓂᕐᒧᑦ ᖃᓂᒪᓇᖅᑐᖅ ᓄᓇᕐᔪᐊᓕᒫᒥ ᓯᐊᒻᒪᐸᓪᓕᐊᓯᒪᔪᖅ ᐊᓯᔾᔩᓯᒪᒻᒪᑦ ᐋᓐᓂᐊᖅᑐᓕᕆᔨᐅᕙᑦᑐᓄᑦ ᐊᒻᒪᓗ ᐊᒥᓱᐊᓗᐃᑦ ᓂᑲᒍᓱᓐᓂᖏᓐᓂᒃ ᑕᑯᔅᓴᐅᑎᑦᑎᖃᑦᑕᖅᑐᑎᒃ. ᑕᖅᑭᐅᓚᐅᖅᑐᒥ, ᐸᓖᓯᒃᑯᑦ, ᒪᓕᒐᕋᓛᓕᕆᔩᓪᓗ, ᖃᑦᑎᕆᔩᓪᓗ ᐊᓯᖏᓪᓗ ᐃᑲᔪᖅᑕᐅᔭᕆᐊᓕᓐᓂᑦ ᑲᒪᔨᐅᖅᑳᐸᑦᑐᑦ ᑲᑎᔪᒻᒪᑕ ᕿᑭᖅᑕᓂ ᐋᓐᓂᐊᕕᒻᒥ ᐃᑲᔪᕐᓰᓂᖏᓐᓂᒃ ᑕᑯᑎᑦᑎᔭᖅᑐᖅᑐᑎᒃ. ᐊᓰᓇ ᐃᓪᓚᐅᑦ, ᐋᓐᓂᐊᓯᐅᖅᑎᐅᓕᖅᑐᖅ 2004ᒥ ᐱᒋᐊᓚᐅᕐᓯᒪᔪᖅ, ᐃᓚᒋᔭᐅᔪᒻᒪᑦ ᐃᖅᑲᓇᐃᔭᖃᑕᐅᓪᓗᓂ ᑕᐃᔅᓱᒪᓂ.
“ᑕᑯᓪᓗᒋᑦ ᓄᓇᓯᐅᑎᒃᑯᑦ ᑐᖏᓕᕇᑦᑐᑎᒃ ᐃᖏᕐᕋᔪᑦ ᓯᕗᓪᓕᕐᐹᖑᓪᓗᑎᒃ ᐃᑲᔪᕆᐊᕐᐸᑦᑐᑦ ᖁᔭᓐᓇᒦᖅᑐᑎᒃ, ᐃᖅᑲᓇᐃᔭᒃᑲᓐᓂᕈᒥᓇᖅᑐᐊᓘᒻᒪᑦ ᑕᐃᒫᒃ ᑕᑯᓪᓗᓂ,” ᐅᖃᖅᑐᖅ, “ᒥᑭᓪᓕᑎᓚᐅᖅᑐᖓ ᐱᒃᑯᒍᓱᑦᑐᖓᓗ, ᖁᕕᐊᓇᖅᑐᐊᓘᓚᐅᖅᑐᖅ!”
ᐃᓪᓚᐅᑦ ᓂᓪᓕᐅᔾᔭᐅᒐᓚᐃᓐᓇᖅᑐᖅ ᖁᕕᐊᒋᔭᐅᓪᓗᓂ ᖁᔭᒋᔭᐅᓪᓗᓂᓗ ᑭᒃᑯᑐᐃᓐᓇᕐᓂᑦ ᑲᓇᑕᒥ ᐋᓐᓂᐊᓯᐅᖅᑏᑦ ᒥᔅᓵᓄᑦ ᐱᓇᓱᐊᕈᓯᖃᖅᑎᓪᓗᒋᑦ, ᐅᖃᖅᑐᖅ ᑭᐅᔾᔪᑕᐅᓯᒪᔪᑦ ᐃᑲᔫᑎᓖᑦ ᑲᔪᓯᑎᑦᑎᒋᐊᒃᑲᓂᖅᑐᑎᒃ ᐃᖅᑲᓇᐃᔮᖓᓂᒃ ᑕᒪᑐᒥᖓ ᐱᔭᕆᐊᑐᔪᒥᒃ ᐊᑐᖅᑎᓪᓗᑕ.
