ᓄᓇᕗᒥ ᐸᕐᓇᐃᔩᑦ ᑐᑭᑖᕈᑎᖓᑦ ᐹᕕᓐᓛᓐᑯᑦ ᑐᖏᓕᐊᓂ ᐱᓕᕆᐊᔅᓴᖓᑕ ᒥᔅᓵᓄᑦ
ᑕᒫᓂ ᐱᓇᓱᐊᕈᓯᕐᒥ ᐱᒋᐊᙵᕐᓂᖏᓐᓂ, ᓄᓇᕗᒥ ᐸᕐᓇᐃᔩᑦ ᓴᖅᑭᑎᑦᑎᓚᐅᕐᖓᑕ ᐅᓂᒃᑳᓂᑦ ᐊᒻᒪᓗ ᐊᑐᓕᖁᔨᔾᔪᑎᖏᓐᓂᒃ ᐹᕕᓐᓛᓐ ᓴᕕᕋᔭᔅᓴᒥᒃ ᐅᔭᕋᓐᓂᐊᖅᑏᑦ ᑐᔅᓯᕋᐅᑎᖓᓐᓂᒃ ᐋᖅᑭᒋᐊᖅᑕᐅᖁᔨᓪᓗᑎᒃ ᕿᑭᖅᑖᓘᑉ ᐅᐊᓐᓇᖓᓂ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᓂᑦ.
ᕿᒥᕐᕈᓂᖏᓐᓂ ᑖᓐᓇ ᑐᔅᓯᕋᐅᑦ ᐱᔾᔪᑎᒋᓪᓗᒍ, ᑲᑐᔾᔨᖃᑎᒌᒃᑯᑦ ᓂᓪᓕᐊᔾᔪᑎᖃᔪᔪᑦ ᓄᓇᓕᓐᓂᑦ ᐱᖃᑕᐅᔭᕆᐊᖃᕐᓂᖏᓐᓂᒃ, ᐃᓚᒋᔭᐅᓪᓗᑎᒃ ᐃᓄᓕᒫᖅᑎᑦᑎᓗᑎᒃ ᓈᓚᓐᓂᖃᕆᐊᖃᕐᓂᖏᓐᓂᒃ, ᑕᒪᓐᓇ ᑲᔪᓯᓚᐅᕐᓯᒪᔪᖅ ᑎᓯᐱᕆ 2017ᖑᑎᓪᓗᒍ ᒥᑦᑎᒪᑕᓕᒻᒥ.
ᑲᑐᔾᔨᖃᑎᒌᒃᑯᑦ ᖁᔭᓐᓇᒦᖅᑐᑦ ᐸᕐᓇᐃᔨᓂᑦ ᓴᖅᑭᑎᑦᑎᒻᒪᑕ ᐅᓂᒃᑳᓂᑦ. ᐱᖃᑕᐅᖏᓐᓇᖃᑦᑕᕐᓂᐊᕋᑦᑕ ᑲᒪᒋᕙᓪᓕᐊᓂᐊᖅᑕᖏᓐᓂ ᐱᔾᔪᑎᓕᓐᓂᑦ ᐹᕕᓐᓛᓐ ᓴᕕᕋᔭᔅᓴᒥᒃ ᐅᔭᕋᓐᓂᐊᖅᑎᑦ ᑐᔅᓯᕋᐅᑎᖓᓐᓂᒃ ᐋᖅᑭᒋᐊᖅᑕᐅᖁᔨᓂᕐᒧᑦ ᕿᑭᖅᑖᓘᑉ ᐅᐊᓐᓇᖓᓂ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᓂᑦ.
ᐸᕐᓇᐃᔩᑦ ᐊᑐᓕᖁᔨᔾᔪᑎᓕᐅᔪᒻᒪᑕ ᑲᓇᑕᐅᑉ ᒐᕙᒪᒃᑯᖏᓐᓄᑦ, ᓄᓇᕗᑦ ᒐᕙᒪᒃᑯᖏᓐᓄᑦ ᐊᒻᒪᓗ ᓄᓇᕗᑦ ᑐᙵᕕᒃᑯᓐᓄᑦ ᐋᖅᑭᒋᐊᖅᑕᐅᖁᓪᓗᒋᑦ ᕿᑭᖅᑖᓘᑉ ᐅᐊᓐᓇᖓᓂ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑏᑦ.
ᐸᕐᓇᐅᑏᑦ ᐋᖅᑭᒋᐊᖅᑕᐅᔾᔮᖏᒻᒪᑕ ᑕᐃᒃᑯᐊ ᐃᓚᐅᔪᑦ ᐊᖏᓚᐅᙱᓐᓂᖏᓐᓂ, ᐅᕝᕙᓘᓐᓃᑦ ᕿᐱᓗᒍᑎᖃᓚᐅᙱᓐᓂᖏᓐᓂ ᐊᑐᓕᖁᔨᔾᔪᑕᐅᓯᒪᔪᓂᑦ ᐸᕐᓇᐃᔨᒃᑯᓐᓂᑦ. ᖃᐅᔨᒪᙱᓇᑦᑕ ᐃᓚᐅᔪᑦ ᖃᓄᖅ ᑐᑭᑖᕈᑎᖃᕐᓂᐊᕐᒪᖔᑕ.
ᑲᑐᔾᔨᖃᑎᒌᒃᑯᑦ ᓱᓕ ᕿᒥᕐᕈᒻᒪᑕ ᑎᑎᕋᕐᓯᒪᓂᖏᓐᓂᒃ ᐊᑐᓕᖁᔨᔾᔪᑕᐅᓯᒪᔪᓂᑦ ᐸᕐᓇᐃᔨᓂᑦ.
ᑕᐃᒫᔅᓴᐃᓐᓇᖅ, ᑲᑐᔾᔨᖃᑎᒌᒃᑯᑦ ᖃᐅᔨᒪᑦᑎᐊᕈᒪᓂᐊᕐᒥᒻᒪᑕ ᐱᔪᓐᓇᐅᑎᖏᑦ ᐊᒻᒪᓗ ᐃᓱᒪᒋᔭᖏᑦ ᓄᓇᓖᑦ ᐊᑦᑐᖅᑕᐅᓯᒪᔪᑦ ᓄᓘᔮᓕᕆᓂᕐᒧᑦ ᑭᒡᒐᑐᖅᑕᐅᑦᑎᐊᕋᓗᐊᕐᒪᖔᑕ ᐊᒻᒪᓗ ᐃᓱᒪᒋᔭᐅᓯᒪᒐᓗᐊᕐᒪᖔᑕ.
ᑲᑐᔾᔨᖃᑎᒌᒃᑯᑦ ᖃᐅᔨᒪᒍᒪᓂᐊᕐᒥᒻᒪᑕ ᑐᑭᓯᔭᐅᑦᑎᐊᕋᓗᐊᕐᒪᖔᑕ ᐃᓄᓕᒫᓄᑦ ᑖᒃᑯᐊ ᐅᓂᒃᑳᑦ ᐃᒫᒃ ᑐᑭᖃᙱᒻᒪᑕ ᑐᖏᓕᐊᓂ ᐱᓕᕆᐊᖅ ᐊᖏᖅᑕᖅ.
ᑐᑭᑖᕈᑎᖃᓚᐅᙱᓐᓂᖏᓐᓂ ᐊᖏᖅᑕᐅᓂᐊᕐᒪᖔᖅ ᐊᖏᖅᑕᐅᔾᔮᖏᒻᒪᖔᕐᓘᓐᓃᑦ ᑐᖏᓕᐊᓂ ᐱᓕᕆᐊᔅᓴᖅ ᐊᕙᑎᓕᕆᓂᕐᒥᒃ ᖃᐅᔨᓴᕈᑎᖃᕆᐊᖃᕐᓂᐊᕐᖓᑕ ᓄᓇᕗᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ.
ᑖᓐᓇ ᓱᓕ ᐱᒋᐊᕐᓯᒪᙱᒻᒪᑦ.
ᑖᓐᓇ ᐱᒋᐊᖅᑲᑦ, ᐊᒥᓱᓂᑦ ᐱᓇᓱᐊᕈᑎᔅᓴᖅᑕᖃᕐᓂᐊᕐᖓᑦ ᖃᐅᔨᒪᑦᑎᐊᕆᐊᖃᕐᓂᐊᕐᖓᑕ ᐃᓄᐃᑦ ᐃᓱᒪᒋᔭᖏᑦ ᑐᓴᖅᑕᐅᓯᒪᖁᓪᓗᒋᑦ ᐱᓕᕆᐊᖑᔪᒪᔫᑉ ᑐᔅᓯᕋᐅᑕᐅᓯᒪᔫᑉ ᒥᔅᓵᓄᑦ.
ᐅᑯᐊ ᓇᐃᓈᕐᓯᒪᓪᓗᒋᑦ ᑎᑎᕋᖅᑕᐅᓯᒪᒧᑦ ᓄᓇᕗᒥ ᐸᕐᓇᐃᔩᑦ ᓇᓗᓇᐃᕈᑎᒋᓯᒪᔭᖏᓐᓂ ᐅᓂᒃᑳᖏᓐᓂ:
- ᐸᕐᓇᐃᔩᑦ ᐊᑐᓕᖁᔨᔾᔪᑎᖃᕐᓯᒪᔪᑦ ᓄᓇᓯᐅᑎᑯᑖᕐᒧᑦ ᐊᑐᕆᐊᔅᓴᒥᒃ ᐊᑐᖅᑕᐅᑎᑕᐅᒍᓐᓇᕐᓂᐊᕆᐊᔅᓴᖓᓂᒃ ᒫᓐᓇ ᐃᖏᕐᕋᖃᑦᑕᖅᑐᓄᑦ ᐊᖅᑯᑕᐅᕙᑦᑐᒥ ᐊᑐᕆᐊᓕᐊᖑᓯᒪᔪᒥ.
ᐃ. ᐅᖃᕐᓯᒪᔪᑦ ᐃᑲᔪᕐᓰᓂᕋᖅᑐᑎᒃ ᐸᕐᓇᐃᔩᑦ ᓯᕕᑐᔪᒧᑦ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᖏᓐᓂ ᑐᕌᒐᓕᐊᕆᓯᒪᔭᖏᓐᓂᒃ ᐋᖅᑭᔅᓱᐃᓂᕐᒧᑦ ᒪᑭᑕᑦᑎᐊᖅᑐᓂᑦ ᓄᓇᓕᓐᓂᑦ ᐊᒻᒪᓗ ᐃᑲᔪᕐᓂᕐᒧᑦ ᐋᖅᑭᐅᒪᑎᑕᐅᖏᓐᓇᓂᐊᖅᑐᓂᑦ ᒪᑭᒪᔾᔪᑎᔅᓴᓂᑦ ᐱᕙᓪᓕᐊᑎᑦᑎᓂᕐᒥᒃ.
- ᐸᕐᓇᐃᔩᑦ ᐊᑐᓕᖁᔨᔾᔪᑎᖃᕐᓯᒪᔪᑦ ᐲᖅᑕᐅᖁᓪᓗᒍ ᑕᐃᔭᐅᓯᒪᔪᖅ ᓯᑯᓯᐅᕐᓗᑎᒃ ᐊᒻᒪᓗ ᐅᑭᐅᒃᑯᑦ ᐅᓯᑲᑦᑕᖃᑦᑕᓂᕐᒥᒃ ᐃᖏᕐᕋᖃᑦᑕᖅᑐᓄᑦ ᐊᖅᑯᑕᐅᕙᑦᑐᒥ ᕿᑭᖅᑖᓘᑉ ᐅᐊᓐᓇᖓᓂ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᓂᑦ.
ᐃ. ᒫᓐᓇ ᐃᖏᕐᕋᖃᑦᑕᖅᑐᓄᑦ ᐊᖅᑯᑕᐅᕙᑦᑐᖅ ᒪᑯᓄᖓᑐᐊᖅ ᐊᑐᖅᑕᐅᖃᑦᑕᕆᐊᖃᕐᖓᑦ ᐊᑐᕆᐊᓄᑦ, ᓄᓇᓯᐅᑎᑯᑖᑦ ᐊᖅᑯᑎᖏᓐᓄᑦ ᐊᒻᒪᓗ ᐃᒪᐅᓕᖅᑎᓪᓗᒍ ᐅᓯᑲᑦᑕᖃᑦᑕᓂᕐᒧᑦ.
ᐱ. ᐸᕐᓇᐃᔩᑦ ᐅᖃᕐᓯᒪᔪᑦ ᐊᑕᐅᓯᑐᐊᕐᒥᒃ ᐃᖏᕐᕋᖃᑦᑕᖅᑐᓄᑦ ᐊᖅᑯᑎᖃᖁᔨᓪᓗᑎᒃ ᖃᓄᐃᑦᑐᑐᐃᓐᓇᕐᓄᑦ ᐃᖏᕐᕋᕙᑦᑐᓄᑦ, ᑕᐃᒫᒃ ᐊᖅᑯᑕᐅᖔᕈᓐᓇᖅᑐᑦ ᑐᔅᓯᕋᐅᑕᐅᓯᒪᙱᑦᑐᑦ ᐅᕝᕙᓘᓐᓃᑦ ᐃᓱᒪᒋᔭᐅᓯᒪᙱᑦᑐᑦ.
- ᐸᕐᓇᐃᔩᑦ ᐅᖃᕐᓯᒪᔪᑦ ᐱᓕᕆᐊᖑᔪᒪᔪᑦ, ᐃᓚᒋᔭᐅᓪᓗᓂ ᓴᓇᓂᖅ ᓄᓇᓯᐅᑎᑯᑖᕐᒧᑦ ᐊᖅᑯᑎᔅᓴᒥᒃ, ᑐᔅᓯᕋᐅᑕᐅᓯᒪᔪᒥᒃ ᐱᓕᕆᐊᔅᓴᕐᒥᒃ ᕿᒥᕐᕈᒍᑕᐅᔭᕆᐊᖃᕋᔭᕐᖓᑦ ᓈᒻᒪᒃᑲᓗᐊᕐᒪᖔᖅ ᕿᑭᖅᑖᓘᑉ ᐅᐊᓐᓇᖓᓂ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᓄᑦ.
ᐃ. ᐃᒫᒃ ᑐᑭᓕᒃ ᓄᓇᓯᐅᑎᑯᑖᕐᒧᑦ ᐊᖅᑯᑎ ᓴᓇᔭᐅᔪᓐᓇᔾᔮᖏᑦᑐᖅ ᐊᖏᖅᑕᐅᒋᐊᒃᑲᓂᕐᓯᒪᑎᓐᓇᒍ ᓄᓇᕗᒥ ᐸᕐᓇᐃᔨᓂᑦ ᐊᒻᒪᓗ ᓄᓇᕗᒥ ᐊᕙᑎᓕᕆᓂᕐᒧᑦ ᑲᑎᒪᔨᓄᑦ.
- ᓄᓇᕗᒥ ᐸᕐᓇᐃᔩᑦ ᐅᖃᕐᓯᒪᔪᑦ ᐹᕕᓐᓛᓐᑯᑦ ᐅᓂᒃᑳᖃᕐᓯᒪᒻᒪᑕ ᓈᒻᒪᑦᑐᓂᑦ ᑐᑭᓯᔾᔪᑎᔅᓴᓂᑦ ᐸᕐᓇᐃᔩᑦ ᕿᒥᕐᕈᒍᑎᒋᓂᐊᖅᑕᖏᓐᓂᒃ ᑐᔅᓯᕋᐅᑎᖓᓐᓂᒃ.
ᐃ. ᐅᖃᕐᓯᒪᓪᓗᑎᓪᓗ ᓱᕐᕋᐃᒍᑎᒋᓗᐊᕋᔭᖅᑕᖏᑦ ᓄᓇᓯᐅᑎᑯᑖᑉ ᐊᖅᑯᑎᖓᑕ ᓲᕐᓗ ᐊᖑᓇᓱᑦᑎᐅᑉ ᓅᓯᒪᖃᑦᑕᕐᓂᖓᓄᑦ ᐃᓱᒪᒋᔭᐅᒋᐊᕋᔭᖅᑐᑦ ᓱᕐᕋᐃᓂᕆᓂᐊᖅᑕᖏᓐᓂᒃ ᕿᒥᕐᕈᓕᖅᑲᑕ ᐊᕙᑎᓕᕆᔨᒃᑯᑦ.
ᐱ. ᑕᐃᒪᐃᒻᒪᑦ, ᐸᕐᓇᐅᒻᒥᑦ ᓴᓇᓂᐊᕐᓂᕐᒧᑦ ᓄᓇᓯᐅᑎᑯᑖᕐᒧᑦ ᐊᖅᑯᑎᔅᓴᒥᒃ ᕿᒥᕐᕈᔭᐅᒋᐊᖃᕋᔭᕐᒥᔪᖅ ᐊᕙᑎᓕᕆᔨᒃᑯᓐᓄᑦ ᑲᔪᓯᒋᐊᕈᓐᓇᕐᓯᓚᐅᙱᓐᓂᖏᓐᓂ.
- ᐸᕐᓇᐃᔩᑦ ᐅᖃᖅᑐᑦ ᐅᓪᓗᒥ ᑐᑦᑐᓂᑦ ᓴᐳᔾᔨᓯᒪᒋᐊᕈᑕᐅᔪᑦ ᐊᖏᕈᑕᐅᓯᒪᔪᑦ ᑖᒃᑯᓇᙵᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᐹᕕᓐᓛᓐᑯᑦ ᓴᓇᒋᐊᖃᖅᑎᑦᑎᒍᑕᐅᙱᒻᒪᑕ ᐊᒻᒪᓗ ᐊᐅᓚᓂᖃᕆᐊᖅᑎᑎᙱᒻᒪᑕ ᐃᓱᒫᓗᓇᖅᑐᓄᑦ ᑐᑦᑐᐃᑦ ᓄᕐᕆᐅᕐᕕᒋᕙᑦᑕᖏᓐᓄᑦ ᓄᕐᕆᐅᕐᓇᐅᑎᓪᓗᒍ.
ᐃ. ᐸᕐᓇᐃᔩᑦ ᐅᖃᖅᑐᑦ ᐊᓯᔾᔨᖅᑕᐅᓂᐊᕆᐊᔅᓴᖏᑦ ᑐᑦᑐᓂᑦ ᓴᐳᔾᔨᓯᒪᒋᐊᕈᑕᐅᔪᑦ ᐃᓱᒪᒋᔭᐅᓚᐅᙱᒻᒪᕆᑦᑐᑦ ᑖᔅᓱᒧᖓ ᑐᔅᓯᕋᐅᒻᒧᑦ.
ᐱ. ᐊᓯᔾᔨᖅᑐᖃᕆᐊᖃᖅᑲᑦ ᓴᐳᔾᔨᓯᒪᑦᑎᐊᕈᑎᔅᓇᓂᑦ ᑐᑦᑐᓂᑦ ᐅᖃᐅᓯᐅᔭᕆᐊᓖᑦ ᐃᓛᒃᑰᖓᔪᒥ ᑐᔅᓯᕋᐅᒻᒧᑦ ᐋᖅᑭᒋᐊᖅᑕᐅᖁᔨᔾᔪᑕᐅᓯᒪᔪᒧᑦ ᕿᑭᖅᑖᓘᑉ ᐅᐊᓐᓇᖓᓂ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᓄᑦ.
ᑎ. ᑖᓐᓇ ᐃᓚᓕᐅᔾᔭᐅᒍᓐᓇᖅᑐᖅ ᑎᑎᕋᖅᑕᐅᒋᐊᙵᕐᓯᒪᔪᓄᑦ ᓄᓇᕗᒥ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᓄᑦ ᐅᕝᕙᓘᓐᓃᑦ ᐃᓚᓕᐅᔾᔭᐅᓗᓂ ᓇᓪᓕᐊᓐᓄᑐᐃᓇᖅ ᓄᓇᕗᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᐊᖏᕐᓯᒪᔭᖏᓐᓂᒃ. ᑲᑐᔾᔨᖃᑎᒌᒃᑯᑦ ᖃᐅᔨᓇᓱᐊᖅᑐᑦ ᑖᒃᑯᓂᖓ ᓇᓖᕌᕋᔅᓴᓂᑦ ᐃᓱᒪᒋᓪᓗᒋᑦ ᐱᒻᒪᕆᐅᓂᖏᑦ ᑐᑦᑐᓂᑦ ᓴᐳᔾᔨᓯᒪᒍᑕᐅᔪᑦ ᐃᓄᐃᑦ ᐱᔾᔪᑎᒋᓪᓗᒋᑦ.
