ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓂᕈᐊᖅᑎᑦᑎᓂᖃᓚᐅᕐᒪᑕ ᑎᓯᐱᕆ 2020−ᐅᑎᓪᓗᒍ ᐊᒥᓱᓄᑦ ᐃᓂᒃᓴᕆᔭᐅᔪᓄᑦ ᐱᖃᓯᐅᔾᔭᐅᓪᓗᑎᑦ ᓄᓇᓕᖕᓂ ᑲᑎᒪᔨᐅᔪᑦ ᐅᑯᓄᖓ ᓄᓇᓕᐅᔪᓄᑦ ᐃᒃᐱᐊᕐᔪᒃ, ᐸᖕᓂᖅᑑᖅ, ᐊᒻᒪᓗ ᕿᑭᖅᑕᕐᔪᐊᖅ. ᓄᑖᕐᒥᒃ ᓄᓇᓕᖕᓂ ᑲᑎᒪᔨᑖᖅᑲᐅᔪᖃᕐᒥᔪᖅ ᒥᑦᑎᒪᑕᓕᖕᒥ, ᐅᕝᕙ ᐅᑯᐊ ᐃᓚᖏᑦ ᑐᑭᓯᒋᐊᕈᑎᖏᑦ ᓄᑖᑦ ᑲᑎᒪᔨᑖᖅᑲᐅᖑᔪᑉ.

ᔨᐅᕆᒥ ᑑᕐᖔᓗᒃ − ᐃᒃᐱᐊᕐᔪᒃ

ᔨᐅᕆᒥ ᑑᕐᖔᓗᒃ ᓄᑖᖑᕗᖅ ᓄᓇᓕᖕᓂ ᑲᑎᒪᔨᐅᓕᖅᖢᓂ ᐃᒃᐱᐊᕐᔪᖕᒧᑦ.

ᑑᕐᖔᓗᒃ ᐃᓅᓚᐅᖅᓯᒪᔪᖅ ᐱᕈᖅᓴᓚᐅᖅᓯᒪᓪᓗᓂᓗ ᐃᒃᐱᐊᕐᔪᖕᒥ. ᐱᓕᕆᐊᖃᕈᒪᐃᓐᓇᓲᖅ ᓂᕈᐊᖅᑕᐅᓗᓂ ᑲᑎᒪᔨᐅᖃᑕᐅᖃᑦᑕᖅᖢᓂ, ᐃᖅᑲᓇᐃᔭᖅᑐᖅ ᒪᓕᒐᓕᐅᖅᑎᒧᑦ ᐃᑲᔪᖅᑎᒋᔭᐅᓪᓗᓂ ᒪᓕᒐᓕᐅᖅᑎ ᐊᕿᐊᕈᕐᒧᑦ. ᓂᕈᐊᖅᑕᐅᓚᐅᖅᓯᒪᒻᒥᔪᖅ ᐃᒃᐱᐊᕐᔪᖕᒥ ᕼᐊᒻᓚᒃᑯᑦ ᑲᑎᒪᔨᖏᖕᓄᑦ 2019-ᖑᑎᓪᓗᒍ. ᑑᕐᖔᓗᒃ ᓴᓇᙳᐊᖅᑎᐅᕗᖅ ᐊᒻᒪᓗ ᓇᒡᒍᐊᕐᒥᕈᓘᔭᓕᐅᓲᖅ ᓯᐅᒻᒥᐅᑕᓂᓗ ᐊᓯᖏᓪᓗ ᓴᓇᙳᐊᖅᖢᓂᒋᑦ ᑑᒑᕐᓃᙶᖅᑐᓂᑦ ᓴᓇᓲᖑᓪᓗᓂ, ᖁᕕᐊᒋᔭᓕᒻᒪᕆᐅᕗᖅ ᐊᐅᓪᓚᖅᓯᒪᓪᓗᓂ ᐊᖑᓇᓱᖦᖢᓂ ᓂᕐᔪᑎᓂᑦ.

ᑑᕐᖔᓗᒃ ᑲᑎᑎᑕᐅᓚᐅᖅᓯᒪᔪᖅ ᑎᐊᕕ ᑑᕐᖔᓗᖕᒧᑦ ᐊᐅᔭᐅᓚᐅᖅᑐᖅ ᐃᓱᓕᑦᑎᓕᖅᑎᓪᓗᒍ, ᑎᓴᒪᓂᑦ ᕿᑐᕐᖓᓖᒃ, ᓇᐃᑦ, ᓯᐊᕋ−ᓗᐊᕋ, ᔫᐃ ᐊᒻᒪᓗ ᐊᐃᕗᕆ.

ᓵᓕ ᖁᒻᒧᐊᑦᑐᖅ − ᐸᖕᓂᖅᑑᖅ

ᓵᓂ ᖁᒻᒧᐊᑦᑐᖅ ᓄᑖᖑᕗᖅ ᓄᓇᓕᖕᓂ ᑲᑎᒪᔨ ᐸᖕᓂᖅᑑᕐᒧᑦ.

ᐃᓅᓚᐅᖅᓯᒪᔪᖅ ᐱᕈᖅᓴᓚᐅᖅᓯᒪᓪᓗᓂᓗ ᐸᖕᓂᖅᑑᕐᒥ. ᐃᓕᓐᓂᐊᕇᕋᑖᓚᐅᖅᑐᖅ ᐊᕙᑎᓕᕆᓂᕐᒧᑦ ᐃᓕᓐᓂᐊᖅᑕᐅᓲᕐᒥᒃ ᓄᓇᕗᑦ ᓯᓚᑦᑐᓴᕐᕕᖓᓂ ᐃᖃᓗᖕᓂ ᐊᒻᒪᓗ ᒫᓐᓇ ᐆᒪᔪᕐᓂᐊᖅᑎᐅᓕᖅᑐᖅ ᐸᖕᓂᖅᑑᕐᒥ.

ᖁᒻᒧᐊᑦᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᓄᓇᓕᖕᓂ ᑲᑎᒪᔨᐅᔪᒧᑦ ᐱᓇᓱᐊᓚᐅᖅᑐᖅ ᐃᓄᖕᓂᑦ ᐃᑲᔪᕈᒪᓪᓗᓂ, ᑕᐃᒪᐃᓐᓂᖓᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ ᐱᓕᕆᐊᖃᖃᑕᐅᓕᓚᐅᖅᖢᓂ.

ᐃᒡᓗᒥᐅᑕᐅᖃᑎᓕᒃ ᓄᓕᐊᕐᒥᖕᓂᒃ ᓇᐃᔫᒥ. ᐱᖓᓱᓂᑦ ᕿᑐᕐᖓᓖᒃ. ᖁᒻᒧᐊᑦᑐᖅ ᓄᓇᑐᐃᓐᓇᕐᒦᑦᑕᕆᐊᒃᓴᖅ ᖁᕕᐊᒋᔭᓕᒃ, ᐊᒻᒪᓗ ᓂᖅᑎᐅᖅᖢᓂ ᐃᓄᐃᑦ ᓂᕿᖏᖕᓂᒃ ᖁᕕᐊᒋᔭᖃᕐᒥᔪᖅ.

 ᓯᑏᕕ ᐊᐅᓚᕿᐊᖅ − ᕿᑭᖅᑕᕐᔪᐊᖅ

ᓯᑏᕕ ᐊᐅᓚᕿᐊᖅ ᓄᑖᖑᕗᖅ ᓄᓇᓕᖕᓄᑦ ᑲᑎᒪᔨᐅᓕᖅᖢᓂ ᕿᑭᖅᑕᕐᔪᐊᕐᒧᑦ. ᐸᖕᓂᖅᑑᕐᒥ ᐃᓅᓚᐅᖅᓯᒪᔪᖅ ᑭᓯᐊᓂᓕ ᐱᕈᖅᓴᔪᕕᓂᐅᓪᓗᓂ ᕿᑭᖅᑕᕐᔪᐊᕐᒥ ᐃᓚᒌᑦ ᓅᑦᑐᕕᓂᐅᓪᓗᑎᑦ ᕿᑭᖅᑕᕐᔪᐊᕐᒧᑦ.

ᐊᐅᓚᕿᐊᑉ ᐱᖓᔪᒋᓕᖅᑖ ᑲᑎᒪᔨᐅᓕᖅᖢᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᓄᓇᓕᑉ ᑲᑎᒪᔨᐅᔪᒧᑦ ᓂᕈᐊᖅᑕᐅᓯᒪᓪᓗᓂ, ᒪᕐᕈᐊᖅᑎᕐᓗ ᓂᕈᐊᖅᑕᐅᓯᒪᓂᑰᓚᐅᖅᓯᒪᕗᖅ ᓄᓇᓕᖕᓂ ᑭᒡᒐᖅᑐᐃᔨᐅᓪᓗᓂ ᑕᐃᒪᙵᓂᑦ ᐱᒋᐊᖅᖢᓂ 2008−ᒥ.

ᐊᐅᓚᕿᐊᖅ ᓄᓇᓕᖕᓂ ᐃᓕᓐᓂᐊᕐᕕᖓᑕ ᐃᓅᓯᓕᕆᔨᐅᓯᒪᓕᖅᑐᖅ ᑕᓪᓕᒪᓄᑦ ᐊᕐᕌᒍᓄᑦ. ᐊᐅᔭᒃᑯᑦ ᐃᓕᖅᑯᓯᕆᔭᐅᔪᓄᑦ ᐆᒪᔪᓕᕆᔨᐅᕗᖅ ᐅᒥᐊᕐᔪᐊᑦ ᑲᒻᐸᓂᖏᖕᓄᑦ, ᐳᓚᕋᑦᑎᑦᑎᕙᖦᖢᓂ ᓂᐅᕐᕈᐊᓂᑦ.

ᐊᐅᓚᕿᐊᖅ ᐃᒡᓗᒥᐅᑕᐅᖃᑎᓕᒃ ᓄᓕᐊᕐᒥᓂᒃ, ᒥᐊᕆ. ᒪᕐᕉᖕᓂᒃ ᐃᕐᓂᖃᖅᑐᖅ ᐊᒻᒪᓗ ᒪᕐᕈᒃᑲᓐᓃᓐᓂᒃ ᐃᕐᖑᑕᖃᖅᖢᓂ. ᓂᕆᒍᓐᓇᐅᕗᖅ ᖁᕕᐊᒋᔭᖃᓲᖑᓪᓗᓂ ᐊᖑᓇᓱᒋᐊᒃᓴᖅ ᐃᓄᐃᑦ ᓂᕐᔪᑎᖏᖕᓂᒃ.

ᑲᑐᕇᓇ ᐸᓪᓗᖅ − ᒥᑦᑎᒪᑕᓕᒃ

ᑲᑐᕇᓇ ᐸᓪᓗᖅ ᓄᑖᖑᕗᖅ ᓄᓇᓕᖕᓂ ᑲᑎᒪᔨ ᒥᑦᑎᒪᑕᓕᖕᒧᑦ.

ᐸᓪᓗᖅ ᐃᓅᓚᐅᖅᓯᒪᕗᖅ ᐊᒻᒪᓗ ᐱᕈᖅᓴᔪᕕᓂᐅᓪᓗᓂ ᒥᑦᑎᒪᑕᓕᖕᒥ.

ᓯᕗᓪᓕᖅᐹᕆᙱᓛ ᐃᖅᑲᓇᐃᔭᖅᖢᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ, 2016-ᒥᓂᑦ ᐸᓪᓗᖅ ᐊᕐᓇᓂᑦ ᑭᒡᒐᖅᑐᐃᔨᐅᓪᓗᓂ ᑲᑎᒪᔨᐅᓚᐅᖅᓯᒪᕗᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ.

ᐸᓪᓗᖅ ᒫᓐᓇ ᐃᖅᑲᓇᐃᔭᕈᓐᓃᖅᑐᖅ, ᐃᖅᑲᓇᐃᔮᖃᕈᓘᔭᖃᑦᑕᕐᓂᑰᓪᓗᓂ ᓲᕐᓗᒃ ᐃᖅᑲᖅᑐᐃᕕᒃᑯᓐᓄᑦ ᒪᓕᒋᐊᖃᓕᖅᑎᑕᐅᓯᒪᔪᓂᑦ ᑲᒪᔨᐅᓯᒪᓪᓗᓂ, ᓄᓇᓕᒻᒥᐅᑕᓂᑦ ᐃᖅᑲᓇᐃᔭᖃᑎᖃᖅᑎᐅᓚᐅᖅᓯᒪᓪᓗᓂ, ᐋᓐᓂᐊᕐᕕᖕᒥ ᑐᓵᔨᐅᓚᐅᖅᓯᒪᓪᓗᓂ, ᒪᒃᑯᑦᑐᓄᑦ ᐃᓄᓕᕆᔨᐅᕙᓚᐅᖅᓯᒪᔪᖅ, ᐊᒻᒪᓗ ᐊᓪᓚᑦᑎᐅᓪᓗᓂ ᑐᓵᔨᐅᓚᐅᖅᓯᒪᓪᓗᓂᓗ ᐳᑭᖅᑕᓕᒃᑯᓐᓄᑦ.

ᐅᐃᖓ ᐃᓅᒍᓐᓃᖅᓯᒪᔪᖅ ᐊᒻᒪᓗ ᐃᕐᓂᒃᑯᖏᓐᓂᒥᐅᑕᐅᓪᓗᓂ, ᐃᕐᓂᖓᑕᓗ ᐊᐃᑉᐸᖓ ᐊᒻᒪᓗ ᐃᕐᖑᑕᖓᓗ. ᑕᓪᓕᒪᓂᑦ ᐃᓐᓇᐅᓕᖅᑐᓂᑦ ᕿᑐᕐᖓᓕᒃ, ᑎᓴᒪᓂᑦ ᐃᕐᖑᖃᑕᖅᖢᓂ, ᐊᒻᒪᓗ ᐃᓗᓕᒃᓴᖃᓕᕐᒥᔪᖅ.