ᕕᓐᓴᓐᑦ ᑎᕉᓯᐅ

ᔫᓂ 8 ᐅᓪᓗᕆᔭᐅᒻᒪᑦ ᐊᑕᐅᓯᐅᖃᑎᒌᑦᑐᓄᑦ ᓄᓇᓕᒐᓴᖁᑎᓕᓐᓄᑦ ᓄᓇᕐᔪᐊᓕᒫᒥ ᐃᒪᕖᑦ ᒥᔅᓵᓄᑦ ᐅᓪᓗᖃᕐᓂᕐᒧᑦ. ᑕᒫᓂ ᐊᕐᕌᒍᒥ ᐱᔾᔪᑎᓖᑦ ᐋᖅᑭᒋᐊᕐᓯᓂᖅ ᓄᑖᖑᓂᕐᓴᓄᑦ ᐋᖅᑭᐅᒪᑎᑕᐅᑦᑎᐊᖁᓪᓗᒋᑦ ᐃᒪᕖᑦ. ᕿᑭᖅᑕᓂ ᓄᓇᕗᒥ, ᐃᒪᕖᑦ ᒥᔅᓵᓄᑦ ᐅᓪᓗᖓᓐᓂ ᖁᕕᐊᓲᑎᖃᕐᕕᐅᔪᓐᓇᕐᖓᑦ ᐃᖅᑲᓇᐃᔮᕆᓯᒪᔭᑦᑎᓐᓂᒃ ᐋᖅᑮᓂᕐᒧᑦ ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᐃᒫᓂ ᓴᐳᔾᔨᕕᒻᒥᒃ ᐊᒻᒪᓗ ᓴᐳᔾᔨᕕᐅᑲᐃᓐᓇᖁᓪᓗᒍ ᑐᕙᐃᔪᐃᑦᑐᖅ ᐃᒫᓂ ᓴᐳᔾᔨᕕᒃ. ᑕᒪᕐᒥᒃ ᑲᑎᑦᑐᒋᒃ, ᑕᓪᓗᕈᑎᐅᑉ ᐃᒪᖓ ᐊᒻᒪᓗ ᑐᕙᐃᔪᐃᑦᑐᖅ ᐊᖏᓂᖃᕐᖓᑦ ᐅᖓᑖᓂ 427,000 ᑭᑉᐹᕆᑦᑐᓂᑦ ᑭᓛᒥᑕᓂᑦ, ᑖᓐᓇ ᐊᖏᓂᕐᓴᐅᓪᓗᓂ ᓂᐅᕙᓐᓛᓐᒥᑦ ᓛᐸᑐᐊᒥᓪᓗ. ᑖᒃᑯᐊ ᐊᖏᖃᑎᒌᒍᑎᐅᓯᒪᔫᒃ ᐱᔾᔪᑎᒋᓪᓗᒋᒃ, ᑕᒫᓂ 14 ᐳᓴᓐᑎᖏᓐᓂ ᐊᖏᓂᓕᒻᒥᒃ ᑲᓇᑕᐅᑉ ᐃᒪᕕᖁᑎᖓ ᓴᐳᑎᔭᐅᓕᖅᑯᖅ.

ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᐃᒫᓂ ᓴᐳᔾᔨᕕᒃ ᐋᖅᑭᑦᑕᐅᓪᓚᑦᑖᔪᔪᖅ ᐋᒡᒌᓯ 2019ᖑᑎᓪᓗᒍ ᐊᑎᓕᐅᖅᑕᐅᓪᓗᑎᒃ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑏᑦ (ᐊᖏᖃᑎᒌᒍᑏᑦ) ᑖᒃᑯᓇᙵᑦ ᕿᑭᖅᑕᓂᒃᑯᓐᓂᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓂᑦ. ᐊᖏᖃᑎᒌᒍᑏᑦ ᑎᑎᕋᕐᓯᒪᔪᖅᑕᓖᑦ ᓴᐳᔾᔨᕕᐅᑲᐃᓐᓇᖁᓪᓗᒍ ᑐᕙᐃᔪᐃᑦᑐᖅ ᐃᒫᓂ ᓴᐳᔾᔨᕕᒃ.

ᖃᐅᔨᒪᔭᐅᔾᔪᑎᖃᖅᑐᓂ ᐅᑭᐅᖅᑕᖅᑐᒥ ᓯᕕᑐᔪᐊᓘᓪᓗᓂ ᓂᕐᔪᑎᖃᕐᕕᐅᓂᖓᓂᒃ, ᑕᓪᓗᕈᑎᐅᑉ ᐃᒪᖓ ᐃᓅᕕᐅᕙᒻᒪᑦ ᐊᒻᒪᓗ ᓇᔪᒐᐅᕙᒻᒪᑦ ᐃᓘᓐᓇᓕᒫᐸᓗᑦᑎᐊᖏᓐᓄᑦ ᐆᒪᔪᓄᑦ ᐅᑭᐅᖅᑕᖅᑑᑉ ᑲᓇᓐᓇᖓᓃᑉᐸᑦᑐᓄᑦ. ᑐᕙᐃᔪᐃᑦᑐᖅ, ᐃᒫᒃ ᑐᑭᓕᒃ “ᑐᕙᖓ ᐊᐅᔪᐃᑦᑐᖅ” ᐃᓄᒃᑎᑐᑦ, ᑕᒪᓐᓇ ᐊᕙᑎᖓ ᐊᑑᑎᖃᓪᓚᕆᒻᒪᑦ ᓯᑯᑐᖃᖃᕐᓂᖓᓄᑦ, ᐃᔾᔪᔪᐊᓗᒻᒥᒃ, ᖃᑦᑎᑐᐃᓐᓇᕐᓂᑦ ᐊᕐᕌᒍᓂᑦ ᓯᑯᑐᖃᖃᑦᑕᖅᑐᓂ. ᐆᒪᓂᓖᑦ ᑕᒫᓂᒥᐅᑕᐃᑦ ᐊᒥᓱᕐᔪᐊᕌᓘᒻᒪᑕ ᖃᓄᐃᑦᑐᑐᐃᓐᓇᑦᑎᐊᖑᓪᓗᑎᓪᓗ ᐊᒻᒪᓗ ᐆᒪᔾᔪᑕᐅᕙᑦᑐᑎᒃ ᐆᒪᔪᕕᓐᓄᑦ ᓲᕐᓗ ᐊᐃᕕᕐᓄᑦ ᐊᒻᒪᓗ ᐅᒡᔪᓐᓄᑦ. ᐊᕙᑖᓃᑦᑐᑦ ᐊᑑᑎᖃᓗᐊᙳᐊᖅᑐᑦ ᐅᑭᐅᖅᑕᖅᑑᑉ ᐊᕙᑖᓂ ᐱᒻᒪᕆᐅᓯᓗᐊᓛᕐᖓᑕ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᐊᐅᑉᐸᓪᓕᐊᓯᑉᐸᑦ ᑐᕙᖓ. ᓯᑯᑐᖃᖅ ᐊᖅᑯᑎᓪᓚᕆᐅᖃᑦᑕᕐᓯᒪᒻᒪᑦ ᐊᐅᓪᓚᖅᑐᓄᑦ ᐊᒻᒪᓗ ᐊᖑᓇᓱᑉᐸᑦᑐᓄᑦ ᐃᓄᓐᓄᑦ ᑕᒫᓂᒥᐅᓄᑦ.

ᑕᓪᓗᕈᑎᐅᑉ ᐃᒪᖓ ᐊᒻᒪᓗ ᑐᕙᐃᔪᐃᑦᑐᖅ ᐋᖅᑭᐅᒪᑎᑦᑎᓯᒪᔪᖅ ᐃᓄᓐᓂᑦ ᑕᐃᒪᙵᓂᑐᖄᓗᒃ. ᐊᖅᑯᑎᐅᒻᒪᑕ  ᑲᓲᒪᑎᑦᑎᓪᓗᑎᒃ ᓄᓇᓕᓐᓂᑦ ᐊᒻᒪᓗ ᐃᖏᕐᕋᕕᐅᔪᓐᓇᖃᑦᑕᕐᓯᒪᓪᓗᓂ ᖁᑦᑎᑦᑐᒥ ᓇᒥᑐᐃᓐᓇᖅ. ᐃᒃᐱᐊᕐᔪᒃ, ᑲᖏᖅᑐᒑᐱᒃ, ᐊᐅᓱᐃᑦᑐᖅ, ᒥᑦᑎᒪᑕᓕᒃ ᐊᒻᒪᓗ ᖃᐅᓱᐃᑦᑐᖅ ᑖᒃᑯᐊ ᓄᓇᓖᑦ ᖃᓂᒋᔭᖃᕐᖓᑕ ᑕᓪᓗᕈᑎᐅᑉ ᐃᒪᖓᓂ.

ᐱᙳᖅᑎᑕᐅᑎᓪᓗᒋᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑏᑦ, ᕿᑭᖅᑕᓂᒃᑯᑦ ᖃᐅᔨᓕᔪᔪᑦ ᐃᓱᒪᒋᓯᒪᔭᒥᓂᖏᓐᓂᒃ ᐃᓄᐃᑦ ᓯᕗᓕᖅᑏᑦ ᓴᐳᑎᔭᐅᖁᓯᒪᑎᓪᓗᒋᑦ ᑕᒪᒃᑯᓂᖓ ᐃᒪᖏᓐᓂᑦ 1960ᖏᓐᓂ ᐱᒋᐊᖅᑐᑎᒃ ᐱᕙᓪᓕᐊᖏᓐᓇᙳᓱᑦᑎᓪᓗᒍ ᐅᖅᓱᐊᓗᓕᕆᓂᖅ.

ᓇᐅᑦᑎᕐᓱᖅᑏᑦ, ᐅᕝᕙᓘᓐᓃᑦ ᐃᓄᐃᑦ ᓇᐅᑦᑎᕐᓱᖅᑏᑦ, ᐃᔨᒋᔭᐅᒻᒪᑕ ᓯᐅᑎᒋᔭᐅᓪᓗᑎᓪᓗ ᑕᓪᓗᕈᑎᐅᐃ ᐃᒪᖓᓂ ᑲᓇᑕᒥ ᐃᒫᓂ ᓴᐳᔾᔨᕕᒻ, ᓇᐅᑦᑎᕐᓱᖅᑎᐅᒻᒪᑕ ᓄᓇᒥᑦ ᐃᒪᖓᓂᓪᓗ ᑕᒫᓂ ᕿᑭᖅᑕᓂ ᐊᒻᒪᓗ ᐊᖑᓇᓱᑉᐸᑦᑐᑎᒃ ᓄᓇᓕᖏᑦ ᐱᔾᔪᑎᒋᓪᓗᒋᑦ.

ᐅᖃᖃᑎᒋᕋᑖᔪᒐᑦᑎᒍ ᓚᐃᓴ ᐊᐅᓪᓚᓗᒃ−ᐅᐊᑦᓯᑰ ᐊᐅᓱᐃᑦᑐᕐᒥᐅᑕᖅ, ᑖᓐᓇ 15ᓂᑦ ᐊᕐᕌᒍᓂᑦ ᓄᓇᖓᓐᓂ ᑐᓴᐅᒪᑎᑦᑎᔨᐅᓚᐅᖅᑐᖅ, ᒫᓐᓇ ᐃᖅᑲᓇᐃᔮᖅᑖᕋᑖᕐᓯᒪᔪᖅ ᐃᓄᓐᓂᑦ ᓇᐅᑦᑎᕐᓱᖅᑎᓄᑦ ᓄᓇᖓᓐᓂ ᑐᑭᒧᐊᒃᑎᑦᑎᔨᐅᓂᕐᒥᒃ.

“ᐃᓕᑉᐸᓪᓕᐊᒐᑦᑕ ᐱᕙᓪᓕᐊᓂᑦᑎᓐᓂ,” ᐅᖃᖅᑐᖅ, “ᐃᑲᔪᕈᓐᓇᕈᒪ ᑭᓇᑐᐃᓐᓇᕐᒥᒃ ᑕᕝᕙᓂ ᐃᖅᑲᓇᐃᔮᕆᓕᖅᑕᕐᓂᒃ ᐃᑲᔪᕋᓱᐊᕈᒪᓂᐊᕐᒥᒐᒪᑦᑕᐅᖅ ᓄᓇᖅᑲᑎᑦᑎᓐᓂᒃ.”

ᓄᓇᓕᓐᓂᑦ ᑐᑭᒧᐊᒃᑎᑦᑎᔩᑦ ᓯᕗᓕᖅᑎᐅᓂᕐᒧᑦ ᐃᖅᑲᓇᐃᔮᖑᒻᒪᑕ ᑲᒪᒋᔭᖃᕐᐸᑦᑐᑦ ᐃᓘᓐᓇᓕᒫᖏᓐᓂᒃ ᓇᐅᑦᑎᕐᓱᖅᑎᓕᕆᓂᕐᒨᖓᔪᓂᑦ ᐊᐅᓱᐃᑦᑐᕐᒥ, ᐃᒃᐱᐊᕐᔪᒻᒥ, ᖃᐅᓱᐃᑦᑐᕐᒥ, ᒥᑦᑎᒪᑕᓕᒻᒥ ᑲᖏᖅᑐᒑᐱᒻᒥᓗ. ᑲᒪᒋᔭᖃᕐᐸᑦᑐᑦ ᐸᕐᓇᐃᖃᑦᑕᓂᕐᒥᒃ ᐊᒻᒪᓗ ᑐᑭᒧᐊᒃᑎᑦᑎᖃᑦᑕᓂᕐᒥᒃ ᐱᓕᕆᐊᕐᒥ ᑲᒪᒋᔭᐅᖃᑦᑕᓂᐊᖅᑐᓂᑦ, ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᐃᑲᔪᖅᑎᐅᓂᕐᒥᒃ ᓇᐅᑦᑎᖅᓱᖅᑎᐅᖃᑎᒌᓂᑦ, ᑐᑭᒧᐊᒃᑎᑦᑎᖃᑦᑕᓂᕐᒥᒃ ᐃᓅᓱᑦᑐᓄᑦ ᐱᓕᕆᐊᔅᓴᓂᑦ ᐊᒻᒪᓗᑦᑕᐅᖅ ᐊᐅᓚᑦᑎᖃᑦᑕᓂᕐᒥᒃ ᓱᓇᒃᑯᑖᓂᑦ, ᑎᑎᖅᑲᓂᑦ ᐅᓂᒃᑳᓕᐅᖃᑦᑕᓂᕐᒥᓪᓗ.

ᐊᐅᓪᓚᓗᒃ−ᐅᐊᑦᓯᑰ ᐅᖃᖅᑐᖅ ᐃᖅᑲᓇᐃᔮᕆᓚᐅᖅᑕᖓ ᑐᓴᐅᒪᑎᑦᑎᔨᐅᓂᕐᒧᑦ ᑐᙵᕕᖃᕈᑎᒋᑦᑎᐊᓚᐅᕐᖓᒍ ᑕᒪᑐᒥᖓ ᐃᖅᑲᓇᐃᔮᖃᕐᓂᕐᒧᑦ ᐊᒻᒪᓗ ᓂᕆᐅᑦᑐᓂ ᐊᑐᖃᑦᑕᕐᓂᐊᕆᐊᔅᓴᖅ ᓄᑖᓂᑦ ᐃᓕᑕᖏᓐᓂᒃ ᓅᓯᒪᖃᑦᑕᕐᓗᓂ. ᐱᒃᑯᒍᓱᑦᑐᖅ ᐊᖑᓂᑦᑕᒥᓂᖏᓐᓂᒃ ᐊᓯᒥᓄᑦ ᐃᑲᔫᑎᖃᖃᑦᑕᕆᐊᔅᓴᖅ ᒫᓐᓇ ᐃᓕᓐᓂᐊᖅᑎᑕᐅᓂᕆᓚᐅᖅᑕᖓᓂᒃ ᐱᔭᕇᕐᓯᒪᓕᖅᑎᓪᓗᒍ. ᓂᕆᐅᑦᑐᖅ ᐱᕈᕐᐸᓪᓕᐊᓂᐊᕐᓂᖓᓂᒃ ᐱᕙᓪᓕᐊᓂᐊᕐᓂᖓᓂᓪᓗ ᓇᐅᑦᑎᕐᓱᖅᑎᓕᕆᓂᖅ ᐊᐅᓱᐃᑦᑐᕐᒥ.

ᕕᓐᓴᓐᑦ ᑎᕉᓯᐅ