ᓄᓇᓕᖕᒥᐅᑦ ᐅᖃᓚᐅᖅᑐᑦ ᓇᒥᑐᐃᓐᓇᖅ ᓄᓇᓂᒃ ᑭᓱᑖᕋᓱᒃᐸᖕᒪᑕ ᓂᕐᔪᑎᓂᒃ ᐱᕈᖅᑐᓂᒡᓘᓐᓃᑦ, ᑕᕆᐅᕐᒥ ᐊᖑᓇᓱᒡᕕᖃᕋᓗᐊᖅᑎᓪᓗᒋᑦ. ᐅᑯᐊ ᐃᓚᒋᔭᐅᓪᓗᑎᒃ, ᑐᒃᑐᑦ, ᐊᒪᕈᑦ, ᑎᕆᒐᓂᐊᑦ, ᐅᑲᓖᓪᓗ, ᑎᕆᒐᓂᐊᑦ ᐊᕕᙵᓪᓗ, ᐊᓯᖏᓪᓗ ᑎᖕᒥᐊᑦ, ᑲᖑᑦ, ᐊᕿᒡᒌᑦ, ᒥᑏᑦ, ᑑᓕᒡᔪᐊᑦ ᑎᖕᒥᐅᓪᓗ ᒪᓐᓂᖏᑦ, ᐃᓄᐃᑦ ᐅᖃᓚᐅᕐᒥᔪᑦ ᐱᕈᖅᑐᓂᒃ ᐳᑯᒃᐸᖕᓂᖏᓐᓂᒃ ᑭᒍᑕᖏᓐᓇᕐᓂᒃ ᖁᖑᓕᕐᓂᓪᓗ.

ᑭᒍᑕᖏᕐᓇᑦ…ᐳᑯᒃᐸᒃᑕᕗᑦ (ᐊᕝᕗᖅᐸᒃᑕᕗᑦ)..ᐊᖑᑏᑦ ᐊᕐᓇᓂᒃ ᐊᐅᓪᓚᕈᔾᔨᓪᓗᑎᒃ ᐊᐃᑉᐸᕇᖕᓂᕐᒧᑦ ᑲᔾᔮᕐᓇᖅᑐᐊᓗᒃ…ᑭᒍᑕᖏᕐᓇᖅᑕᖃᓕᖅᑎᓪᓗᒍ, ᓯᑎᐱᕆᒥ, ᐋᒡᒌᓯᒥ. ᓯᑎᐱᕆ. (A14, 05 ᓄᕕᐱᕆ 2020, ᖃᓪᓗᓈᑎᑑᓕᖅᓯᒪᔪᖅ)

ᐃᓄᐃᑦ ᓄᓇᓕᖏᓐᓂᕐᒥᐅᑕᓂᒃ ᑐᓴᖅᑐᒍᑦ ᓄᓇᒥ ᐊᖑᓇᓱᖕᓂᕐᒥᒃ, ᓲᕐᓗ ᑕᕆᐅᕐᒥ ᐊᖑᓇᓱᖕᓂᑦ, ᐃᓅᓂᕐᒧᑦ ᐱᒻᒪᕆᐅᖕᒪᑕ. ᖃᓄᖅ ᐊᖑᓂᒃᐸᖕᒪᑕ ᓂᕿᒃᓴᓂᒃ, ᐊᒥᒃᓴᓂᒃ ᐊᓯᖏᓐᓄᓪᓗ ᐊᑐᖅᑕᐅᔪᒃᓴᓂᒃ ᓂᕐᔪᑎᒥᖔᖅᑐᓂᒃ ᐊᓐᓇᐅᒪᓇᓱᖕᓂᕐᒧᑦ ᐃᓕᓴᕆᔭᐅᔾᔪᑎᒋᔭᖏᓐᓄᓪᓗ.

… ᑐᒃᑐᑦ ᐱᒻᒪᕆᐅᔪᑦ ᖃᐅᔨᒪᒐᑦᑎᒍᑦ. ᓂᕿᒋᓪᓗᑎᒍᓪᓗ ᑕᐃᒪᙵᓕᒫᖅ. ᖃᐅᔨᒪᔭᐅᓕᖅᓯᒪᔪᑦ ᑭᖑᕚᖏᓐᓂᒃ ᐃᓕᑕᐅᕙᓪᓕᐊᓪᓗᑎᒃ ᖃᐅᔨᒪᓂᖅᑖᕆᔭᐅᓪᓗᑎᒃ ᐊᓐᓄᕋᔾᔨᐅᕐᓂᕐᒧᑦ ᐱᒻᒪᕆᐅᓛᒧᓪᓗ ᓴᓇᕐᕈᑎᓕᐅᕐᓂᕐᒧᑦ, ᑭᓱᒃᓴᓕᐊᖑᓂᕐᒧᑦ, ᐃᕙᓗᒃᓴᓕᐅᕐᓂᕐᒧᑦ ᑐᒃᑐᒥᖔᖅᑐᑦ. ᐊᒥᖓᓗ ᐊᓐᓇᐅᒪᔾᔪᑎᐅᓂᑰᓪᓗᓂ ᐊᓐᓄᕌᕇᔭᐅᓪᓗᓂ ᐄ, ᑕᒪᓐᓇ ᐱᒻᒪᕆᐅᔾᔪᑎᔪᖅ. (C14, 21 ᐅᑐᐱᕆ 20, ᖃᓪᓗᓈᑎᑑᓕᖅᓯᒪᔪᖅ)

ᐃᓄᐃᑦ ᐅᖃᓚᐅᖅᑐᑦ ᑕᖕᒫᖃᑦᑕᓚᐅᕐᒪᑕ ᑐᒃᑐᓄᑦ ᖃᓂᒃᓴᕋᓱᒃᖢᑎᒃ ᐃᓂᒋᕙᒃᑕᖏᑦ ᓇᔪᕐᕕᒋᔭᖏᓪᓗ. ᓂᕐᔪᑏᑦ ᐃᓕᖅᑯᓯᖏᑦ, ᐃᓂᒋᕙᒃᑕᖏᓪᓗ ᐃᓕᓐᓂᐊᕈᑕᐅᖃᑦᑕᕐᒪᑕ ᖃᐅᔨᒪᓂᖅᑖᕆᔭᐅᓪᓗᑎᓘ ᐃᓄᖕᓂᒃ ᑭᖑᕚᕇᓄᑦ. ᓄᓇᓕᖕᒥᐅᑦ ᑐᓴᕐᒥᔭᕗᑦ ᒪᕐᕉᖃᑦᑕᕐᒪᑕ ᑐᒃᑐᑦ ᓄᒃᑕᕐᕕᖏᑦ ᕿᑭᖅᑖᓗᖕᒥ (ᓄᓇᐃᓐᓇᕐᒥ ᕿᑭᖅᑕᒥᓪᓗ), ᑎᐱᖏᒃ ᐊᔾᔨᒌᖏᑦᑐᑦ.

ᓂᒋᖅᐸᓯᖓᓃᑦᑐᑦ ᐅᐊᖕᓇᖓᓂᓪᓗ (ᕿᑭᖅᑖᓘᑉ), ᑕᐃᑲᓂ ᓄᓇᖃᖅᑎᓪᓗᑕ (ᓂᒋᖅᐸᓯᐊᓂ ᕿᑭᖅᑖᓘᑉ) ᑐᒃᑐᑉᐸᓚᐅᕋᑦᑕ, ᒪᒪᕐᓂᖅᓴᐅᖅᑰᔨᕙᓚᐅᖅᑐᑦ (ᕿᑭᖅᑖᓘᑉ ᑐᓄᕕᐊᓃᑦᑐᓂᒃ.) ᒪᒪᖅᑐᐊᓗᓪᓗᑎᒃ ᑎᐱᑦᑎᐊᕆᒃᖢᑎᒡᓗ. ᐃᖃᓗᖕᒥ ᐸᕐᓇᖅᑑᒥ ᐃᒡᓗᓕᖕᒥᓪᓗ ᑭᓯᐊᓂ ᐅᓄᕈᓐᓂᖅᐸᓪᓕᐊᖏᓐᓇᕐᒪᑕ, ᒥᑎᓐᓂᖅᓴᐅᕙᓪᓕᐊᖅᑰᔨᓪᓗᑎᒡᓗ ᐊᔾᔨᒋᔪᓐᓃᖅᑕᖏ, ᒪᒪᕐᓂᖓᓘᓐᓃᑦ ᐊᔾᔨᒋᔪᓐᓃᖅᑖ. (P11, 06-ᕖᕗᐊᕆ-19)

ᐊᐱᖅᓱᐃᑎᓪᓗᖃ, ᓄᓇᓕᖕᒥᐅ ᐅᖃᐅᓯᖃᓚᐅᖅᑐᖅ ᖃᓄᕈᓘᔭᖅ ᐊᒥᕐᓂᒃ ᕿᓯᖕᓂᓪᓗ ᐊᓐᓄᕋᔾᔨᐅᕈᓯᖃᓚᐅᕐᓂᖏᓐᓂᒃ, ᐊᒥᓕᕆᓂᖅ ᐱᓕᕆᑦᑎᐊᑕᐅᔭᕆᐊᓘᓚᐅᖅᑐᑦ ᐊᑑᑎᖃᑦᑎᐊᖁᓪᓗᒍ. ᐃᓕᓯᒪᔪᒍᑦ ᓂᕐᔪᑏᑦ ᐊᔾᔨᒌᖏᓐᓂᖏᓐᓂᒃ ᐊᔾᔨᒌᖏᑦᑐᓂᒃ ᐅᑭᐅᖃᖅᑎᓪᓗᒋᑦ ᐊᑐᖅᑕᐅᔾᔪᑎᒃᓴᖏᓐᓄᑦ, ᓇᓴᓕᐅᒐᒃᓴᑦ, ᑲᒥᓕᐅᕈᑎᒃᓴᑦ, ᐊᐅᒻᒥᓯᒃᓴᑦ, ᐸᕐᕆᐊᒃᓴᓪᓗ.

20ᓂᒃ 30ᓂᒡᓘᓐᓃᑦ [ᑐᒃᑐᑕᐅᔪᑦ] ᐊᐅᔭᑕᒫᑦ ᑐᒃᑐᑉᐸᒃᑐᒍᑦ ᕿᖕᓂᓪᓗᒋᓪᓗ….. ᑕᐃᔅᓱᒪᓂ ᐅᓄᖅᑐᓂᒃ ᑐᒃᑐᒐᓱᒃᐸᓚᐅᕐᒪᑕ ᐊᒥᖏᑦ, ᖁᓕᑦ ᐃᓯᒐᒍᑎᐊᕆᔭᐅᓗᑎᒡᓗ (P04, 05-ᕖᕗᐊᕆ-19, ᐃᓄᒃᑎᑑᑦ ᓂᐱᓕᐅᖅᑕᐅᓯᒪᔪᖅ)

ᐃᓕᓯᒪᔪᒍᑦ ᑐᒃᑐᑦ ᐱᒻᒪᕆᐅᒋᔭᐅᖕᒪᑕ ᓂᕿᖏᑦ ᐊᒥᖏᓪᓗ, ᐃᓄᐃᑦ ᑕᒪᐃᓐᓂᒃ ᑕᓪᓕᒪᓂᒃ ᓄᓇᓕᖕᓂ ᒥᑭᒋᐊᖅᑎᐅᕙᓚᐅᕐᒥᖕᒪᑕ ᐊᖑᓇᓱᒃᑕᐅᓪᓗᑎᒃ ᓱᕐᓗ ᐊᒪᖅᑯᑦ, ᑎᕆᒐᓂᐊᑦ, ᐊᓯᖏᓪᓗᑦᑕᐅᖅ ᑎᖕᒥᐊᑦ, ᒪᓐᓂᒃᑕᖅᑕᐅᕙᒃᖢᑎᒡᓗ. ᐊᒪᕐᕉᑉ ᑎᕆᒐᓂᐊᓪᓗ ᐊᒥᖏᑦ ᐱᐅᒋᔭᐅᓛᖑᖃᑕᐅᔪᑦ, ᒪᓐᓂᑦ ᒪᒪᕆᔭᐅᓛᖑᒋᓪᓗᑎᒃ ᐅᓄᖅᑐᓄᑦ ᓂᕿᒋᔭᐅᓪᓗᑎᒃ.

ᐅᐱᕐᖓᓵᖑᕌᖓᑦ ᐊᐅᓪᓛᖅᓯᒪᕝᕕᓂᒃ, ᒪᓐᓂᒃᑕᖅᐸᓚᐅᖅᑐᑦ. ᕿᑭᖅᑕᓂ…ᐃᒪᕐᒥᐅᑕᓂᒃ ᑎᖕᒥᐊᓕᐊᓘᓚᐅᕐᒪᑦ…ᓇᐅᔭᑦ ᒪᓐᓂᖏᑦ, ᖃᖁᓪᓗᐃᑦ ᒪᓐᓂᖏᑦ, ᒥᑏᑦ ᒪᓐᓂᖏᑦ … ᑲᖑᐃᑦ ᒪᓐᓂᖏᑦ, ᐊᓯᖏᑕᓗ ᑎᖕᒥᐊᑦ ᒪᓐᓂᖏᑦ.  (I13, 28-ᒪᐃ-19, ᐃᓄᒃᑎᑑᖅᓯᒪᔪᒥᖔᖅᑐᖅ)

ᓄᓇᓕᖕᒥᐅᓂᒃ ᐅᖃᐅᔾᔭᐅᓚᐅᖅᑐᒍᑦ ᐊᖑᓇᓱᖃᑦᑕᕐᓂᖅ ᓂᕿᒃᓴᖃᑦᑎᐊᕈᑎᐅᖕᒪᑦ, ᓂᕿᑦᑎᐊᕙᐅᓪᓗᑎᒡᓗ ᐃᓄᖕᓄᑦ ᓄᓇᓕᖕᓄᓪᓗ. ᐃᓄᐃᑦ ᐅᓄᖅᑐᑦ, ᐊᖑᓇᓱᒐᓱᒃᐸᖕᒪᑐᑦ ᐃᓕᓴᕆᔭᐅᔾᔪᑎᒋᓯᒪᓪᓗᓂᐅᒡᓗ ᑭᓇᐅᓂᖏᓐᓂᒃ ᓇᒥᓪᓗ ᐱᕈᖅᓴᓂᖏᓐᓂᒃ.

ᐄ, ᖁᕕᐊᓇᖅᐸᓚᐅᖅᑐᖅ ᐃᖃᓪᓕᐊᖅᖢᓂ ᐊᖑᓇᓱᒋᐊᖅᖢᓂᓗ ᓇᒥᑐᐃᓐᓇᖅ, ᑕᐃᒪᓐᓇᑦᑎᐊᖅᑕᐅᖅ ᓄᓇᖃᖅᑲᑎᒋᖏᑕᕗᑦ ᐊᖑᓇᓱᒃᐸᖕᒪᑕ ᐃᖃᓪᓕᐊᖅᐸᖕᒪᑕ. ᖁᕕᐊᓱᓕᐹᓪᓕᕐᓇᖅᖢᓂᓗ ᐊᐅᓪᓚᖅᓯᒪᖃᑕᐅᓪᓗᓂ (A14 2020, ᐃᓄᒃᑐᖅᓯᒪᔪᒥᖔᖅᑐᖅ)

ᐊᖑᓇᓱᒡᕖᑦ ᐱᒻᒪᕆᐅᒋᔭᐅᔪᑦ

ᓄᓇᖑᐊᓕᕆᓂᖅ ᓄᓘᔮᓕᕆᕕᖕᒥ ᑕᑯᒃᓴᕈᖅᑎᑦᑎᓯᒪᕗᖅ ᓄᓇᖓ ᐊᑐᖅᑕᐅᖃᑦᑕᓂᖓᓂ ᐊᖑᓇᓱᒡᕕᐅᓪᓗᓂ. ᒥᑦᑎᒪᑕᓕᖕᒥᐅᑦ ᐅᖃᐅᓯᖃᓚᐅᖅᑐᑦ ᐊᖑᓇᓱᕖᐅᒐᔪᒃᑐᓂᒃ ᒥᑭᒋᐊᕋᓱᒡᕕᖕᓂᓪᓗ ᕿᑭᖅᑕᓂ (ᐱᓗᐊᖅᑐᒥ ᐅᐊᖕᓇᖓᓂ) ᕿᑭᖅᑖᓗᖕᒥᓪᓗ. ᒥᑦᑎᒪᑕᓕᖕᒥᐅᑦ ᓄᓇᙳᐊᓕᕆᓚᐅᕐᒥᔪᑦ ᑐᓄᓂᕈᓯᕐᒦᑦᑐᓂᒃ ᕿᕐᖑᐊᑕᓗ ᖃᓂᒋᔮᓂ, ᓄᓘᔮᓪᓗ ᖃᓂᒋᔮᓂ, ᑕᐅᕗᖓᓕᒫᖅ ᑐᖔᑦ ᑰᖃᕐᕕᖓᓄᑦ.

ᐃᒃᐱᐊᕐᔪᖕᒥᐅᑦ ᑲᖏᖅᑐᒑᐱᖕᒥᐅᓪᓗ ᑕᑯᖅᑯᔾᔨᓚᐅᕐᒥᔪᑦ ᓄᓘᔮᓕᕆᕕᐅᑉ ᓄᓇᖓᑕ ᖃᓂᒋᔮᓃᑦᑐᓂᒃ, ᐃᓚᐅᓪᓗᓂ ᐃᒃᐱᑭᑦᑐᕐᔪᐊᕆᐊᖅ ᐊᖅᑯᑎᑯᑖᒃᓴᖅ ᑐᓚᒃᑕᕐᕕᓕᐅᖅᑕᐅᔪᒃᓴᕐᓗ. ᑐᒃᑐᓄᑦ ᐊᖑᓇᓱᒡᕕᐅᕙᒃᑐᑦ ᐃᓂᒋᔭᐅᓪᓗᑎᒡᓗ, ᑲᖑᕐᓄᓪᓗ ᓂᕐᓕᕐᓄᓪᓗ ᐃᓂᖃᕐᕕᕙᒃᑯᓪᓗᑎᒃ.

ᐃᒡᓗᓕᖕᒥᐅᑦ ᓴᓂᕋᔭᖕᒥᐅᓪᓗ ᑕᑯᖅᑯᔾᔨᓚᐅᕆᕗᑦ ᐊᖑᓇᓱᒡᕕᐅᕙᒃᑐᓂᒃ ᒥᑭᒋᐊᖃᕐᕕᐅᕙᒃᑐᓂᒡᓗ ᐃᒃᐱᑭᑦᑐᕐᔪᐊᑉ ᓯᒡᔭᖃᕐᕕᓕᒫᖏᑎᒍᑦ. ᕿᑭᖅᑖᓗᖕᒥ, ᓄᓇᓕᖕᒥᐅᑦ ᑕᑯᖅᑯᔾᔨᓚᐅᖅᐳᑦ ᓯᑯᓯᓛᕐᒥᐅᑦ ᑕᕆᐅᖓᑕ ᓯᒡᔭᖏᓐᓂᒃ, ᐃᒃᐱᖕᒧᑦ ᐊᖏᔪᕐᔫᑉ ᑕᓯᖓᑕ ᖃᓂᒋᔮᓂ ᓄᓘᔮᓅᖓᔪᒥ.

ᐊᖑᓇᓱᒡᕕᐅᒐᔪᒃᑐᓂᒃ ᑕᑯᖅᑯᔾᔭᐅᓚᐅᖅᐳᒍᑦ ᓂᕐᔪᑎᓄᓪᓗ ᖃᔅᓯᑲᓪᓚᖕᓄᑦ ᐃᓂᒋᔭᐅᒐᔪᒃᑐᓂᒃ ᓲᕐᓗ ᑐᒃᑐᑦ ᕿᙳᐊᓂ, ᐊᖓᔪᕐᔪᖓᓗᖕᓂ, ᑐᒑᓂ, ᐊᑭᐊ ᕿᑭᖅᑕᖓᓂ, ᑲᓇᔪᒃ ᑕᓯᖓᓂ, ᓄᕗᑯᑖᓂ, ᖃᖅᑲᓂᕐ ᐱᖑᖕᓂᓪᓗ ᓄᓘᔮᓃᑦᑐᓂᒃ.

ᐊᒃᑯᖅᑕᐅᔾᔪᑎᐅᑐᐃᓐᓇᕆᐊᓖᑦ ᓄᓘᔮᓕᕆᓂᕐᒧᑦ ᓄᓇᒥᐅᑕᑦ ᐊᖑᓇᓱᒃᑕᐅᕝᕕᖏᓐᓂᒃ

ᓄᓇᓕᖕᒥᐅᑦ ᐊᔾᔨᒌᐸᓗᖕᒥ ᐃᓱᒫᓘᑎᖃᓚᐅᖅᑐᑦ ᓄᓘᔮᓕᕆᓂᕐᒥᒃ ᖃᓄᕐᓗ ᐃᓄᐃᑦ ᐊᖑᓇᓱᒍᑎᒋᕙᒃᑕᖏᓐᓂᒃ ᓄᓇᒥᒃ ᐊᒃᑐᐃᓂᖃᕐᓂᐊᕐᒪᖔᑦ.

ᐃᓱᒫᓘᑎᐅᓛᖑᔪᖅ ᓄᓘᔮᓕᕆᓂᕐᒥᒃ ᐊᖅᑯᑎᑯᑖᓕᐅᖅᑕᐅᔪᒃᓴᖅ ᐊᒃᑐᐅᒻᒪᕆᖕᓂᐊᕋᓱᒋᔭᐅᖕᒪᑦ ᑐᒃᑐᓄᑦ ᓄᒃᑕᖅᐸᒃᑐᑦ ᕿᑭᖅᑖᓗᖕᒥ. ᑐᒃᑐᑦ ᐃᑳᕈᒪᙱᑳᓪᓚᒃᐸᑕ ᐊᖅᑯᑎᑯᑖᓕᐅᖅᓯᒪᔪᒃᑯᑦ ᓂᐱᖅᑯᖅᑐᓗᐊᖅᑐᒃᑰᕈᒪᖏᒃᑐᑎᒡᓗ ᓄᓇᓯᐅᑎᑯᑖᒃ ᐊᑐᖅᑕᐅᓕᖅᑎᓪᓗᒍ. ᐊᓯᔾᔩᔭᕆᐊᖃᓪᓚᕆᒃᑐᑦ ᐊᖑᓇᓱᒍᓐᓇᕐᓂᖅ ᐊᔪᕐᓇᕐᓂᖅᓴᐅᓕᕋᔭᕐᒪᑦ ᐊᑭᑐᓂᖅᓴᐅᓕᕐᓗᓂᓗ ᐃᓄᖕᓄᑦ ᐱᕕᑭᓗᐊᖅᐸᒃᑐᓄᑦ ᐊᖑᓇᓱᒋᐊᕐᓂᕐᒥᒃ. ᐊᒻᒪᓗ, ᑐᒃᑐᑦ ᑐᓴᓚᐅᕐᒥᒐᑦᑎᒍ ᓄᒃᑕᖃᑦᑕᕐᓂᖏᑦ ᐊᒃᑐᖅᑕᐅᔾᔪᑎᑐᐃᓐᓇᕆᐊᖃᕐᒥᖕᒪᑦ ᐅᒥᐊᕐᔪᐊᑦ ᐊᒡᕕᐊᓕᕐᓂᖏᓐᓄᑦ ᐳᐃᔾᔪᕌᖅᖢᑎᒃ ᐃᑳᖅᐸᖕᓂᖏᓐᓄᑦᑕᐅᖅ.  ᐅᒃᐱᕈᓱᒃᑲᓗᐊᕐᒪᑕ ᓄᓇᓕᖕᒥᐅ ᑐᒃᑐᑦ ᐅᑎᖅᐹᓪᓕᕈᓐᓇᕐᓂᖏᓐᓂᒃ ᐱᓕᕆᕕᐅᖏᓪᓗᓂ ᓄᓇᖓ.

ᐊᖅᑯᑎ ᓄᓇᓯᐅᑎᑯᑖᓪᓗ ᐊᖅᑯᑎᖓ ᐊᒃᑐᐃᒻᒪᕆᖕᓂᐊᕐᒪᑦ ᖃᓄᐃᓕᐅᕈᓯᓄᑦ ᓄᒃᑕᕈᑎᓄᓪᓗ ᐊᓯᖏᓐᓄᑦᑕᐅᖅ ᓂᕐᔪᑎᓄᑦ, ᓲᕐᓗ ᑲᖑᕐᓄᑦ, ᐊᕿᒡᒋᓄᑦ, ᑎᕆᐊᕐᓄᒃ, ᐊᑲᓕᕐᓄᓪᓗ, ᓇᒧᑦ ᓂᕆᔭᖅᑐᕐᕕᒋᒐᔪᒃᑕᖏᑦ, ᒪᓐᓂᐅᕐᕕᖏᑦ, ᑎᓯᖏᓪᓘᓐᓃᑦ ᐊᓯᔾᔨᕐᓗᑎᒃ. ᓄᓇᓕᖕᒥᐅᑦ ᐅᖃᐅᓯᖃᓚᐅᕐᒥᔪᑦ ᓄᓇᓯᐅᑎᕐᔪᐊᑦ ᓄᓇᓯᐅᑎᑯᑖᒡᓗ ᑐᓗᖅᓯᑐᐃᓐᓇᕆᐊᖃᕐᓂᖏᓐᓂᒃ ᐊᖏᔪᓂᒃ ᒥᑭᑦᑐᓂᒡᓗ ᓂᕐᔪᑎᓂᒃ ᑐᖁᔾᔪᑎᒋᓕᕐᓗᓂᔾᔪᒃ.

ᐊᖅᑯᑎᑯᑖᒃ ᓄᒃᑕᕐᕕᐅᔪᓂᒃ ᐊᒃᑐᐃᓂᖃᕐᓂᐊᓪᓚᕆᒃᑐᑦ, ᐄᓪᓚᕆᒃ, ᑐᒃᑐᑦ ᐅᓄᕈᓐᓃᖅᐸᓪᓕᐊᔾᔪᑎᒋᓂᐊᖅᑖ. ᐊᒻᒪᓗ ᐅᓪᓗᒥ, ᐊᕐᕌᒍᓪᓗ ᖃᔅᓯᑲᓪᓚᐅᓕᖅᑐᑦ ᐹᕙᓐᓛᓐᑯᑦ ᓄᓘᔮᓕᕇᓐᓇᕐᒪᑕ – ᓄᒃᑕᕐᕕᖏᑦ ᑐᒃᑐᑦ ᐊᓯᔾᔨᕇᖅᑐᑦ ᐊᒃᑐᖅᑕᐅᔾᔪᑎᒋᓪᓗᑎᒍᑦ.(P19, 27-ᐊᐃᕐᕆᓕ-19)

ᐳᔪᖅ ᐊᔭᕋᒃᓯᐅᕐᕕᓕᕆᓂᕐᒧᑦ ᐊᓄᕆᒧᑦ ᑎᒃᑕᐅᖃᓯᐅᔾᔭᐅᓪᓗᓂ ᓱᕈᖅᓯᓕᖅᑐᖅ ᐆᒪᔪᓂᒃ ᑕᒪᓐᓇᑦᑕᐅᖅ ᐃᓱᒫᓘᑎᐅᓪᓚᕆᒃᑐᖅ ᑐᓴᖅᑕᑦᑎᓐᓂ. ᐃᓚᖏᑦ ᑕᖅᓴᖃᒻᒪᕆᓕᕐᒪᑕ ᑕᖅᓴᕆᙱᑕᖏᓐᓂᒃ ᑎᕆᒐᓂᐊᑦ ᐅᑲᓖᓪᓗ, ᐊᒃᑐᖅᑕᐅᓪᓗᑎᒃ ᐳᔪᕐᒧᑦ. ᐳᔫᓪᓗ ᓄᓇᒧᐊᖅᑲᕐᓂᖓ ᓂᕆᔭᐅᕙᓪᓕᐊᖏᓪᓗᓂ ᓂᕐᔪᑎᓄᑦ ᐃᓄᖕᓄᓪᓘᓐᓃᑦ ᖃᐅᔨᒪᖏᑦᑐᒍᑦ ᖃᓄᖅ ᑕᒪᓐᓇ ᐊᒃᑐᐃᓂᖃᕐᒪᖔᑦ, ᓄᓇᓕᖕᒥᐅᑦ ᖃᓄᐃᖏᑦᑎᐊᕈᓐᓇᕐᓂᕐᒧᑦ ᐊᑦᑕᕐᓇᖏᑦᑐᒧᓪᓗ ᐃᓱᒫᓘᑎᒋᓪᓚᕆᒃᑕᖓ.

ᑐᓴᓚᐅᕐᒪᑦ ᐊᖑᓇᓱᒃᑏᑦ ᕿᕐᖑᐊᓂ ᐃᒥᕈᓐᓇᖏᒻᒪᑕ ᑰᖓᓂᒃ ᓂᕐᔪᑎᑕᖃᐅᖅᖢᓂᓗ ᑕᐃᑲᓂ, ᐅᖃᓖᑦ ᐊᕿᒡᒌᑦ ᐊᐅᐸᖅᓯᒻᒪᕆᖕᒪᑕ ᐳᔪᕐᒥᖔᖅᑐᒥᖅᑲᐃ. (P06, 05-ᕖᕗᐊᕆ-19, ᐃᓄᒃᑐᑦ ᐅᖃᓪᓚᒃᑐᖅ)