ᐃᖃᓗᐃᑦ, ᓄᓇᕗᑦ − ᔪᓚᐃ 22, 2020 − ᐃᑲᔪᖅᑐᖅᑕᐅᓪᓗᑎᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ, ᑲᑭᕙᒃ ᑲᑐᔾᔨᖃᑎᒌᖏᑦ ᓴᓂᕐᕙᐃᓯᒪᕗᑦ $263,000−ᓂᑦ ᐋᖅᑮᓪᓗᑎᑦ ᐃᓄᐃᑦ ᐃᓕᓐᓂᐊᖅᑏᑦ ᓯᓚᑦᑐᓴᕐᕕᒻᒥ ᐃᑲᔫᑎᒃᓴᖏᑦ ᐱᓕᕆᐊᕐᒥᒃ. ᐱᓕᕆᐊᖅ ᐋᖅᑭᓱᖅᑕᐅᓯᒪᕗᖅ ᕿᓚᒥᐅᔪᒃᑯᑦ ᑮᓇᐅᔭᖅᑎᒍᑦ ᐃᑲᔫᑕᐅᖁᓪᓗᒋᑦ ᐃᓄᐃᑦ ᐃᓕᓐᓂᐊᖅᑎᓄᑦ ᕿᑭᖅᑖᓗᒻᒥᐅᑦ ᐊᑭᓖᔪᓐᓇᕐᓂᐊᕐᒪᑕ ᐊᑐᖅᑕᐅᔭᕆᐊᖃᓪᓚᕆᑦᑐᑦ ᓄᕙᒡᔪᐊᕐᓇᖅ-19 ᐊᐃᑦᑑᑖᓗᖃᑦᑕᑎᓪᓗᒍ.

“ᓄᕙᒡᔪᐊᕐᓇᖅ-19 ᐊᐃᑦᑑᑖᓘᖃᑦᑕᑎᓪᓗᒍ ᐊᒥᓱᒻᒪᕆᓐᓂᒃ ᐊᕝᕕᐊᕈᑎᒃᑲᓐᓂᐅᔪᓂᑦ ᓴᖅᑮᓯᒪᓕᕐᒪᑦ ᓯᓚᑦᑐᓴᕐᕕᓕᐊᓲᓄᑦ ᐃᓄᐃᑦ ᐃᓕᓐᓂᐊᖅᑎᓄᑦ,” ᐅᖃᖅᑐᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖓᔪᖅᑳᖓᑦ ᐸᐅᓗᓯ ᔫᓯᐱ ᐊᕿᐊᕈᖅ, “ᑕᒪᒃᑯᓄᖓ ᐃᓕᓐᓂᐊᖅᑎᓄᑦ ᑮᓇᐅᔭᖅᑎᒍᑦ ᐃᑲᔫᑎᒃᓴᒃᑲᓐᓃᑦ ᐊᒃᓱᒻᒪᕆᐊᓗᑦ ᐱᕚᓪᓕᕈᑎᖃᕈᓐᓇᕐᒪᑕ, ᑖᓐᓇᓗ ᐱᓕᕆᐊᖅ ᐊᑐᖅᑕᐅᔪᓐᓇᕋᔭᖅᑐᓂ ᐊᑭᓕᖅᑕᐅᖁᓪᓗᒋᑦ ᐊᑭᓕᐅᑕᐅᔭᕆᐊᓖᑦ ᓲᕐᓗᒃ ᐃᒡᓗᒨᖅᑲᐃᓗᓂ ᐊᒻᒪᓗ ᐃᓯᕈᑎᓄᑦ ᐊᒻᒪᓗᑦᑕᐅᖅ ᐅᖃᓕᒫᒐᕐᓄᑦ ᐸᐃᕆᕕᓐᓄᓪᓗ.”

“ᐃᓄᐃᑦ ᐃᓕᓐᓂᐊᖅᑏᑦ ᐃᑲᔪᖅᑐᕈᒪᒐᑦᑎᒍᑦ ᐃᓕᓐᓂᐊᖏᓐᓇᖁᓪᓗᒋᑦ,” ᐅᖃᖅᑐᓂ ᔫ ᐊᑕᒍᑦᑖᓗᒃ, ᑲᑭᕙᒃᑯᑦ ᐃᒃᓯᕙᐅᑕᖓᑦ, “ᑖᓐᓇ ᐃᓕᓐᓂᐊᖅᑎᓄᑦ ᑮᓇᐅᔭᖅᑎᒍᑦ ᐃᑲᔫᑎᒃᓴᑦ ᐱᓕᕆᐊᖓᑦ ᐃᑲᔪᕋᔭᖅᑐᖅ ᑮᓇᐅᔭᖅᑎᒍᑦ ᐊᒃᓱᕈᕈᑕᐅᕙᑦᑐᓄᑦ ᐊᒃᓱᕈᙱᓂᖅᓴᐅᓕᕐᓗᑎᑦ ᐊᒻᒪᓗ ᐃᑲᔪᖅᑕᐅᓗᑎᑦ ᐃᓕᓐᓂᐊᖅᑏᑦ ᐅᑎᕈᓐᓇᕐᓂᐊᕐᒪᑕ ᐱᓕᕆᐊᖃᕐᓗᑎᑦ ᐱᒻᒪᕆᐅᔪᓂᑦ − ᐃᓕᓐᓂᐊᖅᑕᖏᖕᓂ ᑲᒪᓂᖅᓴᐅᓕᕐᓗᑎᑦ.”

ᐃᓕᓐᓂᐊᖅᑎᓄᑦ ᑮᓇᐅᔭᖅᑎᒍᑦ ᐃᑲᔫᑏᑦ ᐱᓕᕆᐊᖓᑦ ᐊᑐᖅᑕᐅᔪᓐᓇᖅᐳᖅ ᑕᒪᐃᓐᓄᑦ ᕿᑭᖅᑖᓗᒻᒥᐅᑕᐅᔪᓄᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑐᓄᑦ ᐱᖃᓯᐅᑎᓪᓗᒋᑦ ᐃᓕᓐᓂᐊᖅᑏᑦ ᐊᕕᑦᑐᖅᓯᒪᔪᑉ ᓯᓚᑖᓅᖅᓯᒪᔪᑦ ᐃᓕᓐᓂᐊᕆᐊᖅᓯᒪᓪᓗᑎᑦ, ᐊᒻᒪᓗ ᐃᓕᓐᓂᐊᖏᓐᓇᐸᑦᑐᑎᑦ ᐅᓪᓗᓕᒫᖅ ᐅᕝᕙᓘᓐᓂᑦ ᐅᓪᓗᑉ ᐃᓚᖓᒍᑦ ᐃᓕᓐᓂᐊᓲᑦ ᐃᓕᓴᕆᔭᐅᓯᒪᔪᓂᑦ ᓯᓚᑦᑐᓴᕐᕕᓂ ᐅᕝᕙᓘᓐᓃᑦ ᓯᓚᑦᑐᓴᕐᕕᕐᔪᐊᕐᓂ ᐃᓄᒃᑎᒍᑦ ᐃᓕᓐᓂᐊᕆᐊᓲᖑᓪᓗᑎᑦ ᐅᕝᕙᓘᓐᓃᑦ ᖃᕋᓴᐅᔭᒃᑯᑦ ᐃᓕᓐᓂᐊᖃᑦᑕᖅᑐᓄᑦ ᐊᑐᖅᑕᐅᔪᓐᓇᖅᑐᑎᑦ.

ᐱᓕᕆᐊᖅ ᐊᑐᕐᓗᒍ ᐊᑭᓕᐅᑎᖃᕈᓐᓇᕋᔭᖅᑐᑦ ᐃᓕᓐᓂᐊᖅᑏᑦ ᐊᖏᖅᑕᐅᓯᒪᔪᓂᑦ, ᐊᑭᓕᐅᑕᐅᔪᓐᓇᖅᑐᓂᑦ ᐊᑭᓕᒃᓴᓄᑦ ᒫᑦᓯ 1-ᒥ ᐱᒋᐊᕐᓗᒍ ᑎᑭᓪᓗᒍ ᓯᑏᕝᕙ 30−ᒧᑦ, 2020. ᐊᑭᓕᐅᑕᐅᔭᕇᖅᑐᒥᓃᑦ ᐅᑎᖅᑎᑕᐅᒍᓐᓇᕐᒥᔪᑦ ᓯᕗᓂᐊᒍᑦ ᐅᓪᓗᖏᓐᓂ ᐱᓇᓱᐊᖅᑐᒥᓂᐅᑎᓪᓗᒍ, ᓈᒻᒪᒋᔭᐅᔪᓂᑦ ᓇᓕᖅᑲᖃᑐᐊᕈᑎᑦ ᐊᑭᓕᐅᑎᒥᓂᖏᓐᓄᑦ ᐊᒻᒪᓗ ᑕᒪᒃᑯᐊ ᐊᑭᓕᐅᑕᒥᓂᖏᑦ ᐊᓯᐊᒍᑦ ᐱᓕᕆᐊᖅᑎᒍᑦ ᐅᑎᖅᑎᑕᐅᓐᓂᙱᑐᐊᕈᑎᑦ ᐅᕝᕙᓘᓐᓃᑦ ᑮᓇᐅᔭᖅᑎᒍᑦ ᐃᑲᔫᑕᐅᔾᔪᑎᒃᓴᓂᑦ ᐊᑐᕐᓂᙱᑐᐊᕈᑎᑦ ᓂᐅᕕᖅᑐᒥᓂᐅᑎᓪᓗᒋᑦ ᐃᓕᓐᓂᐊᖅᑏᑦ.

ᐱᓕᕆᐊᖅᑎᒍᑦ ᐃᓕᓐᓂᐊᖅᑎᐅᔪᑦ ᐅᑎᕐᕕᐅᔪᓐᓇᕋᔭᖅᑐᑦ ᐊᑭᓕᐅᑎᒥᓂᖏᑦ ᓲᕐᓗᒃ ᐃᖏᕐᕋᔾᔪᑎᓂᑦ ᐊᑐᖅᑐᒥᓂᐅᒍᑎᑦ ᐊᑭᓖᓪᓗᑎᑦ ᐊᒻᒪᓗ ᑐᔪᕐᒥᔾᔪᑎᖏᑦ ᓄᕙᒡᔪᐊᕐᓇᖅ−19 ᐱᓪᓗᒍ ᐊᓯᐊᑎᒍᑦ ᑮᓇᐅᔭᖃᖅᑎᑦᑎᔨᓄᑦ ᐊᑭᓕᐅᑕᐅᒍᓐᓇᙱᑦᑐᒥᓂᐅᒍᑎᑦ. ᐊᒻᒪᓗᑦᑕᐅᖅ, ᑖᓐᓇ ᐱᓕᕆᐊᖅ ᐃᑲᔪᕈᓐᓇᕐᒥᔪᖅ ᐃᓕᓐᓂᐊᖅᑎᓂᑦ ᐅᐸᓗᖓᐃᔭᖅᑎᓪᓗᒋᑦ ᐅᑎᓛᕐᓂᖏᓐᓂᑦ ᐃᓕᓐᓂᐊᕆᐊᕐᓗᑎᑦ ᓈᒻᒪᑦᑐᒥᒃ ᐃᒡᓗᒃᓴᖃᑦᑎᐊᓕᖁᓪᓗᒋᑦ, ᐊᐅᔭᒃᑯᑦ ᐃᓕᓐᓂᐊᕆᐊᕈᑎᒃᓴᐅᔪᓂᑦ, ᓂᐅᕕᕐᓗᑎᑦ ᖃᕋᓴᐅᔭᕐᒥᒃ, ᐊᒻᒪᓗ ᐸᐃᕆᕕᒻᒥ ᐃᓂᒃᓴᓕᐅᕐᓗᑎᑦ ᕿᑐᕐᖓᖏᓐᓄᑦ ᐃᓕᓐᓂᐊᖅᑏᑦ.

ᑮᓇᐅᔭᖅᑎᒍᑦ ᐃᑲᔫᑎᒃᓴᑦ ᐊᑐᖅᑕᐅᔪᓐᓇᖅᑐᑦ ᐊᑭᓕᖅᑕᐅᓗᑎᑦ ᐅᑯᐊ:

• ᐃᓕᓐᓂᐊᖅᑕᒥᓃᑦ ᓈᓴᐅᑎᖏᓐᓂᑦ ᓇᓕᖅᑲᖅᑖᕐᓗᑎᑦ ᐊᒻᒪᓗ ᐃᓕᓐᓂᐊᕆᐊᕈᒪᔾᔪᑎᓄᑦ ᐊᑭᓕᐅᑏᑦ;
• ᐃᓯᕈᑏᑦ ᐊᒻᒪᓗ ᐊᓯᖏᑦ ᐃᓕᓐᓂᐊᖅᑏᑦ ᐊᑭᓕᓲᖏᑦ ᖃᕋᓴᐅᔭᒃᑯᑦ ᐊᒻᒪᓗ ᐊᐅᔭᒃᑯᑦ ᐃᓕᓐᓂᐊᖅᑎᓪᓗᒋᑦ;
• ᐱᓕᕆᔨᒻᒪᕆᐅᔪᓄᑦ ᓇᓗᓇᐃᒃᑯᑕᖅᑖᕋᓱᐊᕐᓂᕐᒧᑦ ᐊᒻᒪᓗ ᖃᐅᔨᓴᖅᑕᐅᓂᕐᒧᑦ ᐊᑭᓕᐅᑏᑦ;
• ᐅᖃᓕᒫᒐᑦ ᐊᒻᒪᓗ ᓱᓇᒃᑯᑖᑦ;
• ᖃᕋᓴᐅᔭᑦ ᐊᒻᒪᓗ ᖃᕋᓴᐅᔭᕐᓅᖓᕈᓘᔭᓲᑦ ᐊᒻᒪᓗ ᓱᓇᒃᑯᑖᖏᑦ, ᐊᒻᒪᓗ ᐃᑭᐊᖅᑭᔾᔪᑏᑦ;
• ᐃᓕᓐᓂᐊᖅᑎᓪᓗᒋᑦ ᐃᑲᔪᖅᑎᖃᒃᑲᓐᓂᕆᐊᖃᕈᑎᑦ, ᑐᑭᒧᐊᑦᑎᑕᐅᓗᑎᓪᓗ ᐊᒻᒪᓗ ᐃᓅᓯᓕᕆᓂᕐᒧᑦ ᐱᔨᑦᑎᕋᕈᑎᓄᑦ;
• ᐃᒡᓗᒥ ᐊᑐᖅᑐᐊᕐᓂᕐᒧᑦ ᐊᒻᒪᓗ ᐊᓯᖏᑦ ᐃᓅᓇᓱᐊᕐᓂᕐᒧᑦ ᐊᑭᓕᐅᑕᐅᔭᕆᐊᖃᓲᑦ, ᐱᖃᓯᐅᑎᓪᓗᒋᑦ ᕿᑐᕐᖓᖏᑦ, ᐊᔪᕐᓇᙱᒃᑯᓂ;
• ᐃᖏᕐᕋᔾᔪᑎᓂᑦ ᐊᑐᕆᐊᖃᖅᑎᓪᓗᒋᑦ ᐃᑲᔪᖅᑐᖅᑕᐅᔾᔪᑎᖏᑦ, ᐱᔭᕆᐊᖃᕈᑎᑦ;
• ᐊᑭᓕᐅᑕᐅᓲᑦ ᐊᐅᓪᓚᕐᓗᑎᑦ ᐊᖏᕐᕋᒥ ᐊᖏᕐᕋᒧᓪᓗ, ᐱᖃᓯᐅᔾᔭᐅᓗᑎᑦ ᐊᐅᓪᓚᕈᑎᖏᑦ ᐸᖅᑭᔭᖏᑦ, ᕿᑐᕐᖓᖃᕈᑎᑦ; ᐊᒻᒪᓗ,
• ᐸᐃᕆᕕᓐᓄᑦ, ᐸᐃᕆᕕᒻᒦᑦᑐᖁᑎᖃᕈᑎᑦ.

ᑐᑭᒧᐊᕈᑏᑦ ᐱᓕᕆᐊᕐᒧᑦ ᑕᑯᓂᐊᕋᒃᓴᐅᕗᑦ ᐅᕙᓂ:

http://kakivak.ca/Kakivak_IPSE-Student-Relief-Program-Guidelines_Inuktitut.pdf

ᐱᓇᓱᐊᕐᓗᓂ ᑮᓇᐅᔭᖅᑎᒍᑦ ᐃᑲᔫᑎᒃᓴᓂᑦ ᐱᓕᕆᐊᖅᑎᒍᑦ ᐊᑐᐃᓐᓇᐅᒪᕗᑦ ᐅᕙᓂ:

http://kakivak.ca/Kakivak_IPSE-Student-Relief-Program-Application_Inuktitut.pdf

ᑐᑭᓯᒋᐊᒃᑲᓐᓂᕈᒪᓐᓂᕈᕕᑦ, ᖃᐅᔨᒃᑲᕐᓗᒋᑦ:

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ:

ᓯᒪ ᓴᕼᐊᕐ ᔨᐅᕐᕼᐃ, ᑐᑭᒧᐊᑦᑎᑦᑎᔨ ᑐᓴᐅᒪᖃᑎᒌᑦᑐᓕᕆᓂᕐᒧᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

szerehi@qia.ca

867.975.8413

1.800.667.2742

ᑲᑭᕙᒃ ᑲᑐᔾᔨᖃᑎᒌᖏᑦ:

info@kakivak.ca

867.979-0911

1.800.561.0911