ᑐᓴᕈᒥᓇᓪᓚᕆᑦᑐᖅ!

Hᐊᒪᓚᐅᒍᕕᑦ, ᐃᓪᓗᓕᕆᓂᕐᒧᑦ ᑲᑐᔾᔨᖃᑎᒌᖑᒍᔅᓯ ᐅᕝᕙᓘᓐᓃᑦ ᐊᓯᐊᓂᒃ ᖃᑭᒪᒍᑎᔅᓴᓕᐅᕋᓱᐊᖅᑎᐅᖏᓪᓗᓯ ᑲᑐᔾᔨᖃᑎᒌᖑᒍᔅᓯ ᕿᑭᖅᑕᓂ ᓄᓇᓕᓐᓂᑦ ᐱᓇᓱᐊᕈᒪᓂᐊᖅᑐᔅᓴᐅᔪᑎᑦ ᑲᑭᕙᒃ ᑲᑐᔾᔨᖃᑎᒌᖏᑕ ᐊᐅᔭᒃᑯᑦ ᐃᖅᑲᓇᐃᔭᕆᐅᕐᓴᑎᑦᑎᓂᕐᒧᑦ ᐃᑲᔫᑎᓂᑦ!

ᐱᔾᔪᑎᒋᓪᓗᒍ ᐳᕝᕕᕆᓂᕐᒧᑦ ᖃᓂᒪᓇᖅᑐᖅ ᑖᒃᑯᐊ ᐃᑲᔫᑏᑦ ᐋᖅᑭᒋᐊᖅᑕᐅᓯᒪᒻᒪᑕ ᐱᓇᓱᐊᕋᔅᓴᖃᑦᑎᐊᓂᕐᐹᖑᖁᓪᓗᒋᑦ ᐃᓕᓐᓂᐊᖅᑏᑦ ᐃᖅᑲᓇᐃᔮᖃᕈᓐᓇᓂᕐᒧᑦ ᐊᐅᔭᐅᓂᐊᖅᑐᒥ ᐅᑭᐊᔅᓵᖑᓂᐊᖅᑐᒥᓗ 2020ᒥ.

ᑭᓱᑦ ᓄᑖᑦ ᓴᖅᑭᕐᓯᒪᕙᑦ?

ᐃᑲᕐᕋᑎᒍᑦ ᐊᑭᒋᕙᑦᑕᖏᑦ ᐃᑲᔫᑏᑦ ᐊᑭᑦᑐᕆᐊᖅᑕᐅᓯᒪᔪᑦ $13.00ᒥᑦ $16.00ᒧᑦ ᐃᑲᕐᕋᑕᒫᑦ, ᐃᓚᒋᔭᐅᓪᓗᑎᒃ 13% ᐊᑭᓕᐅᑕᐅᓯᒪᓂᐊᖅᑐᑦ ᐊᑐᖅᑕᐅᓴᐃᓐᓇᕆᐊᓕᓐᓄᑦ ᐃᖅᑲᓇᐃᔭᖅᑎᖃᕐᐸᑦᑐᓄᑦ ᐊᑭᓕᕐᓱᖅᑕᐅᔾᔪᑎᒋᒋᐊᓕᖏᓐᓂᒃ ᑕᒪᑐᒧᖓ ᑐᕌᖓᔪᓂᑦ.

ᐊᑯᓂᐅᓂᕆᖃᑦᑕᓂᐊᖅᑕᖓ ᐱᓕᕆᐊᕐᓄᑦ ᐃᑲᔪᖅᑕᐅᔪᓄᑦ ᐃᑲᔫᑎᑎᒍᑦ ᐅᖓᕙᕆᐊᖅᑕᐅᑲᓐᓂᕐᓯᒪᒻᒥᔪᖅ ᐊᒥᓲᓂᕐᐹᕆᔪᓐᓇᖃᑦᑕᓚᐅᕋᓗᐊᕐᖓᒋᑦ 18 ᐱᓇᓱᐊᕈᓰᑦ 44ᓄᑦ ᐱᓇᓱᐊᕈᓯᕐᓄᑦ ᐅᖓᕙᕆᐊᖅᑕᐅᓯᒪᓕᖅᑐᖅ!

ᖃᓄᐃᓕᐅᕈᓐᓇᖅᑭᑕ ᖃᓂᒪᓇᖅᑐᖅᑕᖃᖅᑎᓪᓗᒍ ᓄᓇᕐᔪᐊᓕᒫᒥ?

ᑐᑭᓯᔪᒍᑦ  ᐃᓚᖏᑦ ᐃᖅᑲᓇᐃᔭᖅᑎᖃᕐᐸᑦᑐᑦ ᐊᒻᒪᓗ ᓄᓇᓖᑦ ᐃᓱᒫᓘᑎᖃᕐᓂᐊᑐᔅᓴᐅᒻᒪᑕ ᐅᖓᓯᒌᔾᔪᒥᑲᑕᒋᐊᖃᖅᑎᓪᓗᑕ ᐊᒻᒪᓗ ᐊᓯᖏᓐᓂᒃ ᑭᓪᓕᓕᐅᕈᑎᖃᕐᓯᒪᑎᓪᓗᒋᑦ ᖃᓂᒪᓇᖅᑐᖅ ᐱᔾᔪᑎᒋᓪᓗᒍ, ᑭᓯᐊᓂᓕ ᑐᑭᓕᐅᔾᔨᓯᒪᔪᒍᑦ ᐱᓕᕆᐊᖑᒐᔭᙳᐊᖅᑐᓂᑦ ᐃᑲᔪᖅᑕᐅᔪᓐᓇᕋᔭᖅᑐᓂᑦ ᐊᒻᒪᓗ ᑲᒪᒋᔭᐅᔪᓐᓇᕋᔭᖅᑐᓂᑦ ᖃᓂᒌᓗᐊᖅᑕᐃᓕᓂᕐᒥᒃ ᐊᑐᖅᑎᓪᓗᑕ, ᐅᑯᐊᖑᓪᓗᑎᒃ:

• ᓄᓇᓕᓐᓂᑦ ᐊᒻᒪᓗ ᐃᒪᐅᑉ ᓯᓈᖓᓂ ᓴᓗᒻᒪᕐᓴᐃᓂᖅ
• ᐲᔭᐃᓂᖅ ᕿᒪᐃᓐᓇᖅᑕᐅᓂᑯᓂᑦ ᐃᓪᓗᕋᓛᕐᓂᑦ ᐊᒻᒪᓗ ᓴᓂᕐᓂᑦ ᑕᒫᓂᖅᑭᔪᓂᑦ
• ᐊᒥᐊᕆᓂᖅ ᓯᓚᑎᖏᓐᓂᒃ ᐃᓪᓗᐃᑦ
• ᐱᓱᕝᕕᐅᖃᑦᑕᓂᐊᖅᓂᑐᓂᑦ ᐋᖅᑭᔅᓱᐃᓂᖅ ᐅᕝᕙᓘᓐᓃᑦ ᓴᓇᑦᑎᐊᕐᓂᖅ ᐱᓱᕝᕕᐅᕙᑦᑐᓂᑦ ᐊᑐᖅᑕᐅᕙᑦᑐᓂᑦ ᓄᓇᓕᓐᓄᑦ ᓂᐅᕐᕈᐊᓄᓪᓗ
• ᓴᓗᒻᒪᕐᓴᐃᓂᖅ ᐃᒪᖃᐅᑎᓂᑦ
• ᓈᓴᐃᓂᖅ ᐊᒻᒪᓗ ᐅᒥᐊᕐᔪᐊᕐᑰᖅᑐᔅᓴᓂᑦ ᑲᒪᓂᖅ
• ᓴᓇᔪᓂᑦ ᐃᓕᓐᓂᐊᖅᑐᓂᑦ ᐃᑲᔪᖅᑎᖃᕐᓂᖅ
• ᐃᓕᓐᓂᐊᕐᓂᖅ ᖃᕋᓴᐅᔭᓕᕆᔾᔪᑕᐅᓲᓂᑦ
• ᐊᐅᔭᒃᑯᑦ ᑲᑎᒻᒪᑎᑕᐅᕙᑦᑐᓂᑦ ᓯᕗᓕᖅᑎᖃᕐᓂᖅ
• ᐸᐃᑉᐹᓕᕆᔾᔪᑎᓄᑦ ᐊᓪᓚᑦᑏᑦ

ᑲᑭᕙᒃ ᑲᑐᔾᔨᖃᑎᒌᑦ ᐃᑲᔪᕈᓐᓇᕐᒥᔪᑦ ᐊᓯᖏᓐᓂᒃ ᐱᓕᕆᐊᔅᓴᓂᑦ, ᒪᑯᓂᖓ:

• ᐃᖅᑲᓇᐃᔭᖅᑎᑦᑎᓂᖅ ᐊᒻᒪᓗ ᐊᔪᕆᕐᓯᐅᔾᔨᔨᖃᕐᓂᖅ (ᑮᓇᐅᔾᔭᔅᓵᓄᑦ ᐃᑲᕐᕋᑎᒍᑦ ᐃᓅᓱᑦᑐᓄᑦ)
• ᖃᐅᔨᓴᖅᑐᓕᕆᓂᕐᒧᑦ ᐃᓱᕐᕆᐅᑕᐅᕙᑦᑐᓄᓪᓗ ᐱᓕᕆᑎᑦᑎᓂᕐᒧᑦ (ᐃᓚᒋᔭᐅᓪᓗᑎᒃ ᐅᑯᐊ ᖃᐅᔨᓴᖅᑐᓕᕆᓂᕐᒧᑦ ᐱᓕᕆᑎᑦᑎᓂᖅ, ᖃᕋᓴᐅᔭᓕᕆᓂᕐᒧᑦ ᐱᓕᕆᑎᑦᑎᓂᖅ, ᐊᒻᒪᓗ ᐱᓕᕆᑎᑦᑎᒍᑕᐅᔪᑦ ᖃᐅᔨᓴᖅᑐᓕᕆᓂᕐᒨᖓᔪᓂᑦ ᐃᓱᕐᕆᐅᑕᐅᕙᑦᑐᓕᕆᓂᕐᒨᖓᔪᓂᑦ ᐱᖅᑯᓯᖏᓐᓄᑦ ᓄᓇᖃᖅᑐᑐᖃᐃᑦ ᖃᐅᔨᒪᔭᖏᓐᓄᑦ).
• ᐃᖅᑲᓇᐃᔮᔅᓴᓂᑦ ᓴᖅᑭᔮᖅᑎᑦᑎᓂᕐᒧᑦ ᐊᒻᒪᓗ ᐅᔾᔨᕈᓱᑦᑎᑦᑎᒋᐊᕐᓂᕐᒧᑦ ᐱᓕᕆᐊᓄᑦ (ᐃᖅᑲᓇᐃᔮᔅᓴᓕᕆᓂᕐᒧᑦ ᑐᑭᓯᐅᒪᔾᔪᑎᔅᓴᑦ, ᐃᓚᒋᔭᐅᓪᓗᑎᒃ ᐅᔾᔨᕈᓱᑎᑦᑎᒋᐊᕐᓂᕐᒧᑦ ᐊᒻᒪᓗ ᐃᑲᔪᖃᑦᑕᓂᕐᒧᑦ ᐱᓕᕆᐊᑦ ᓲᕐᓗ ᐃᖅᑲᓇᐃᔮᓂᑦ ᓴᖅᑭᔮᖅᑎᑦᑎᓂᖅ ᐊᒻᒪᓗ ᓯᕗᓕᖅᑎᐅᓂᕐᒥᒃ ᐃᓕᓐᓂᐊᑎᑦᑎᖃᑦᑕᕐᓂᖅ).

ᑐᑭᓯᒃᑲᓐᓂᕈᒪᕖᑦ?

ᑐᑭᓯᒋᐊᕐᕕᒋᒍᒃ:

ᐋᓂ ᑎᔅᓚᑦ

ᐃᓅᓱᑦᑐᓄᑦ ᐱᓕᕆᐊᔅᓴᓕᕆᔨ

achislett@kakivak.ca

(867) 979-8967

ᐅᕝᕙᓘᓐᓃᑦ ᑎᑎᕋᕐᕕᒋᓗᒍ ᐃᕐᖐᓈᖅᑕᐅᑎᒃᑯᑦ info@kakivak.ca

ᖃᐅᔨᒪᓂᐊᖅᑯᑎᑦ ᑲᑭᕙᒃ ᑲᑐᔾᔨᖃᑎᒌᒃᑯᑦ ᐃᑲᔪᖃᑕᐅᒻᒪᑕ ᐱᓇᓱᐊᕈᑕᐅᔪᓄᑦ ᓯᐊᒻᒪᖁᓇᒍ ᖃᓂᒪᓇᖅᑐᖅ ᑕᐃᒫᒃ ᐊᓪᓚᕝᕕᕗᑦ ᒪᑐᓯᒪᔪᖅ ᐃᓄᓕᒫᓄᑦ ᑐᑭᓯᑎᑕᐅᓇᓱᓐᓂᖏᓐᓂ ᖃᓄᐃᓕᖓᓂᐊᓕᕐᒪᖔᑦᑕ.