ᐊᓲᔪᓯ ᐃᓘᓐᓇᓯ,

ᑐᓴᐅᒪᑎᑦᑎᔨᒋᔭᐅᔪᖓ ᓄᓇᑦᑎᓐᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ.

ᑐᑭᓯᑎᑦᑎᒋᐊᕈᒪᓪᓗᖓ ᐃᓱᒫᓗᓇᕐᓯᓯᒪᑎᓪᓗᒍ ᒫᓐᓇ ᓂᐅᕕᐅᑎᔅᓴᐃᑦ ᐃᓄᑐᖃᕐᓄᑦ ᑐᕌᖓᔪᑦ ᑲᖏᖅᑐᒑᐱᒻᒥ. ᑖᓐᓇ ᐃᓚᒋᔭᐅᒻᒪᑦ ᕿᑭᖅᑕᓂᒃᑯᑦ ᐳᕝᕕᕆᓇᖅᑐᒧᑦ (ᓄᕙᕐᔪᐊᕐᓇᖅ−19) ᖃᓄᖅᑑᕈᑎᒋᓪᓗᒍ ᐃᑲᔫᑎᔅᓴᓕᐊᕆᓯᒪᔭᖏᑦ ᐸᕐᓇᑕᐅᓯᒪᔪᑦ.

ᐃᑲᔫᑎᔅᓴᐃᑦ ᐸᕐᓇᑕᐅᓯᒪᔪᑦ ᐋᖅᑭᓱᖅᑕᐅᓯᒪᔪᑦ ᕿᓚᒻᒥᐅᔪᒥᒃ ᑮᓇᐅᔭᓂᑦ ᐃᑲᔫᑎᖃᑲᐃᓐᓇᓂᐊᕐᖓᑕ ᕿᑭᖅᑕᓂᒥᐅᓄᑦ ᐃᓄᓐᓄᑦ ᐃᓄᑐᖃᕐᓄᑦ ᐳᕝᕕᕆᓇᖅᑐᒥᒃ ᖃᓂᒪᓇᖅᑐᖅᑕᖃᖅᑎᓪᓗᒍ ᓄᓇᕐᔪᐊᓕᒫᒥ.

ᕿᑭᖅᑕᓂᒃᑯᑦ ᒫᓐᓇ ᐱᔨᑦᑎᕋᐅᑎᖃᖃᑦᑕᕐᖓᑕ ᑖᒃᑯᓂᖓ ᐃᑲᔫᑎᓂᑦ ᐃᓕᓴᖅᓯᕕᒃᑯᑎᒍᑦ ᐊᒻᒪᓗ ᐅᑭᐅᖅᑕᖅᑐᒥ ᐃᓚᒌᔅᓴᒃᑯᑎᒍᑦ ᓄᓇᔅᓯᓐᓂ. ᑖᒃᑯᐊ ᐃᓱᒫᓗᓇᕐᓯᓯᒪᑎᓪᓗᒍ ᐃᑲᔫᑏᑦ ᐋᖅᑭᑦᑕᐅᒋᐊᙵᓚᐅᕐᓯᒪᒻᒪᑕ ᐱᓇᓱᐊᕈᓯᕐᓄᑦ 12ᓄᑦ ᐊᑐᕈᒫᕐᓂᐊᖅᑐᑎᒃ ᐊᒻᒪᓗ ᒫᓐᓇ ᐅᖓᕙᕆᐊᖅᑕᐅᒻᒪᑕ ᐊᐅᔭᐅᓂᖓᓂ ᐊᑐᖅᑕᐅᑲᓐᓂᖁᓪᓗᒋᑦ.

ᐃᒫᒃ ᐋᖅᑭᓯᒪᓂᐊᖅᑐᖅ:

• ᑖᓐᓇ ᐃᑲᔫᑎ ᐊᑐᕐᓗᒍ, ᕿᑭᖅᑕᓂ ᓄᓇᓕᒃ ᐃᓄᒃ ᐃᓄᑐᖃᖅ ᐅᑭᐅᓕᒃ 60-ᓂᑦ ᐅᖓᑖᓂᓘᓐᓃᑦ ᓄᓇᖃᕐᓗᓂ ᑲᖏᖅᑐᒑᐱᒻᒥᑦ, ᐊᒻᒪᓗ ᐊᑎᓕᐅᖅᑕᐅᓯᒪᓗᓂ ᕿᑭᖅᑕᓂ ᓄᓇᖃᕐᓗᓂ.
• ᐊᑐᓂᑦ ᓂᐅᕕᐅᑎᔅᓴᑦ ᐊᑐᐃᓐᓇᐅᑎᑕᐅᕗᑦ ᓂᕿᑖᕈᑕᐅᖃᑦᑕᕈᒫᕐᓂᐊᕐᓗᑎᒃ ᐊᑭᓕᓐᓂᑦ $250
• ᑭᓇᑐᐃᓐᓇᖅ ᐃᓕᓴᖅᓯᕕᒻᒥᑦ ᐸᔪᖃᑦᑕᓂᐊᖅᑐᖅ ᓂᕿᓂᑦ ᑲᑎᑕᐅᓯᒪᔪᓂᑦ ᐃᓄᑐᖃᕐᓄᑦ
• ᒪᕐᕈᐊᑎᕐᓗᑎᒃ ᓂᕿᓂᑦ ᓱᓕ ᐸᔪᒍᑎᖃᓱᖓᕆᐊᖃᕐᓯᒪᒻᒪᑕ ᓯᕗᓪᓕᕐᒥ ᐃᑲᔫᑎᐅᔪᔪᓂᑦ. ᐋᑕᐅᓛᖅᑐᑦ
  • ᔪᓚᐃ 10ᒥ 24ᒥᓗ
• ᐃᑲᔫᑏᑦ ᐅᖓᕙᕆᐊᖅᑕᐅᒻᒪᑕ ᒫᓐᓇᓗ ᑎᓴᒪᐃᕋᒃᑲᓂᕐᓗᑎᒃ ᓂᕿᓂᑦ ᑲᑎᑕᐅᓯᒪᔪᓂᑦ ᐃᑲᔫᑎᖃᕈᒫᕐᓂᐊᓕᕐᖓᑕ.
• ᑖᒃᑯᐊ ᓂᖀᑦ ᑲᑎᑕᐅᓯᒪᔪᑦ ᐊᑐᐃᓐᓇᖃᑦᑕᓂᐊᖅᑐᑦ ᒪᕐᕉᒃ ᐱᓇᓱᐊᕈᓰᒃ ᓈᔭᕋᐃᑉᐸᑎᒃ, ᐅᑯᓇᓂ ᐅᓪᓗᓂᑦ:

• • ᐋᒡᒌᓯ 7 ᐊᒻᒪᓗ 21
  • ᓯᑎᐱᕆ 4 ᐊᒻᒪᓗ 18

ᐊᑎᓕᐅᕆᐊᑐᙱᑦᑐᓯ ᑖᒃᑯᓄᖓ ᐃᑲᔫᑎᓄᑦ.

ᐃᓘᓐᓇᑎᒃ ᕿᑭᖅᑕᓂᒥᐅᑦ ᐃᓄᑐᖃᐃᑦ, ᐊᑎᓕᐅᖅᑕᐅᓯᒪᔪᑦ ᓄᓇᕗᑦ ᑐᙵᕕᒃᑯᑎᒍᑦ, ᐊᑎᓕᐅᖅᑕᐅᑦᑕᐅᑎᒋᖃᑦᑕᖅᑐᑦ.

ᑖᒃᑯᐊ ᐃᓱᒫᓗᓇᕐᓯᓯᒪᑎᓪᓗᒍ ᐃᑲᔫᑎᐅᒻᒪᑕ ᐃᓄᑐᖃᕐᓄᑦ.

ᕿᑭᖅᑕᓂᒃᑯᑦ ᐅᖃᐅᔾᔨᓯᒪᔪᑦ ᐃᓕᓴᖅᓯᕕᒃ ᑲᑐᔾᔨᖃᑎᒌᓂᑦ ᑐᓂᓯᐅᖅᑲᐃᖃᑦᑕᖁᔨᒐᑎᒃ ᓂᕿᓂᑦ ᑲᑎᑕᐅᓯᒪᔪᓂᑦ ᐊᑎᓕᐅᖅᑕᐅᓯᒪᙱᑦᑐᓄᑦ.

ᐃᓄᑐᖃᓕᒫᑦᑎᐊᑦ ᐃᑲᔫᓯᐊᖅᑖᕈᓐᓇᖅᑐᑦ ᐱᖃᑦᑕᖁᒐᓗᐊᕋᑦᑎᒍ.

ᑐᑭᓯᒋᐊᒃᑲᓐᓂᕈᒪᒍᔅᓯ ᑖᒃᑯᐊ ᐃᑲᔫᑏᑦ ᒥᔅᓵᓄᑦ ᑎᑎᕋᖃᑦᑕᕈᓐᓇᖅᑐᓯ ᐃᕐᖐᓈᖅᑕᐅᑎᒃᑯᑦ: COVID-19@qia.ca ᐅᖄᓚᖃᑦᑕᓗᕐᓯᓘᓐᓃᑦ: 1-867-975-8383.

ᕿᑭᖅᑕᓂᒃᑯᑦ ᐃᓚᒋᔭᐅᒻᒪᑕ ᐋᓐᓂᐊᖅᑐᓕᕆᔨᓄᑦ ᑎᓕᐅᕆᓪᓗᑎᒃ ᕿᑭᖅᑕᓂᒥᐅᓂᑦ ᐃᓄᓐᓂᑦ ᓴᐳᔾᔨᓯᒪᖁᓪᓗᓯ ᓇᒻᒥᓂᖅ ᓄᓇᖅᑲᑎᔅᓯᓐᓂᓗ.

ᐱᐅᓂᕐᐹᖑᓂᐊᕐᖓᑦ ᓯᐊᒻᒪᖁᓇᒍ ᐳᕝᕕᕆᓇᖅᑐᖅ (ᓄᕙᕐᔪᐊᓇᖅᑐᖅ−19) ᒪᑯᓂᖓ ᐊᑐᖃᑦᑕᕈᔅᓯ:

• ᐅᐊᓴᖃᑦᑕᕐᓗᒋᑦ ᐊᒡᒐᓯ ᐅᐊᓴᕐᔫᒥᔭᒐᐃᓐᓇᕐᓗᓯ
• ᖁᐃᕐᓱᖃᑦᑕᕐᓗᓯ ᑕᒋᐅᖃᑦᑕᕐᓗᓯᓗ ᐊᐃᕐᓯᓐᓄᑦ/ᐃᑯᓯᕕᑦ ᓇᓛᓄᑦ ᑕᓕᕐᓄᑦ
• ᐊᑦᑐᐊᑲᑕᑦᑕᐃᓕᓗᓯᐅᒃ ᑮᓇᓯ, ᐱᓗᐊᖅᑐᒥᒃ ᐃᔨᓯ, ᓱᕐᓗᓯ ᖃᓂᓯᓗ
• ᐃᓄᓕᓐᓃᕋᔭᓗᐊᖅᑕᐃᓕᓗᓯ
  • ᐃᒫᒃ ᑐᑭᓕᒃ ᐊᖏᕐᓯᒪᓗᓯ
  • ᑲᑎᒪᖃᑎᒌᑦᑕᐃᓕᓗᓯ
  • ᐃᖅᑲᓇᐃᔭᕐᓗᓯ ᐊᖏᕐᕋᓯᓐᓂ ᐊᔪᕐᓇᖏᑉᐸᑦ

ᐳᐃᒍᖅᑕᐃᓕᒋᔅᓯ ᓇᒻᒥᓂᖅ ᐃᓂᖅᑎᕐᓯᒪᓗᓂ ᐊᓂᑦᑕᐃᓕᖃᑦᑕᕐᓗᓯ ᖃᓄᐃᒍᑎᖃᖅᑑᔮᕈᔅᓯ ᖃᓂᒪᒍᑕᐅᕙᑦᑐᓂᑦ ᐳᕝᕕᕆᓇᖅᑐᒧᑦ (ᓄᕙᕐᔪᐊᓇᖅᑐᒧᑦ).

ᑖᒃᑯᐊ ᖃᓄᐃᒍᑕᐅᕙᑦᑐᑦ ᐃᒪᐃᑦᑑᒻᒪᑕ ᐆᓇᕐᓂᖅ ᐆᓐᓂᐊᓇᕐᓗᓂ, ᖁᐃᕐᓱᑲᑕᓐᓂᖅ ᐅᕝᕙᓘᓐᓃᑦ ᐃᐱᓂᐊᖃᑦᑕᕐᓂᖅ.

ᐱᓕᐅᒥᒍᔅᓯ ᐅᖄᓚᒐᔭᖅᑯᓯ ᓄᓇᔅᓯᓐᓂ ᐋᓐᓂᐊᕕᔅᓯᓐᓄᑦ. ᐋᓐᓂᐊᕕᓕᐊᖅᑕᐃᓕᒋᔅᓯ ᐅᖄᓚᖅᑳᓚᐅᙱᓗᓯ.

ᖃᐅᔨᒪᔪᖓ ᑕᒪᓐᓇ ᐱᔭᕆᐊᑐᔪᐊᓗᒻᒪᑦ ᒫᓐᓇ, ᑭᓯᐊᓂ ᐱᓕᕆᖃᑎᒌᑦᑐᐃᓐᓇᐅᒍᑦᑕ; ᓴᐳᔾᔨᒍᓐᓇᕋᑦᑕ ᓄᓇᖅᑲᑎᑦᑎᓐᓂᒃ.

ᐊᑏ ᖃᐅᔨᒋᐊᖃᑦᑕᕆᔅᓯ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᑎᓐᓂᒃ ᐅᕗᖓ qia.ca ᑐᑭᓯᒋᐊᒃᑲᓐᓂᖃᑦᑕᕐᓗᓯ ᐊᒻᒪᓗ ᖃᐅᑕᒫᑦ ᑐᑭᓯᑎᑦᑎᒋᐊᕈᑕᐅᕙᑦᑐᓂᑦ.

ᒫᓐᓇᓕᓴᐅᓂᕐᐹᓂᑦ ᑐᓴᕋᔅᓴᓂᑦ ᐊᒻᒪᓗ ᑐᑭᓯᑎᑦᑎᒋᐊᕈᑎᐅᓯᒪᔪᓂᑦ ᑕᑯᖃᑦᑕᕈᓐᓇᕐᒥᔪᓯ ᖃᕋᓴᐅᔭᒃᑯᑦ ᐃᑭᐊᖅᑭᕕᖏᓐᓂ ᐅᕙᒍᑦ ᐅᑯᓇᓂ Facebook, Twitter ᐊᒻᒪᓗ Instagram.

ᖁᔭᓐᓇᒦᒃ ᐱᕕᖃᖅᑎᑦᑎᑲᐃᓐᓇᕋᔅᓯ. ᐅᓪᓗᖃᑦᑎᐊᕐᓂᐊᕆᕗᓯ ᖃᓄᐃᙱᑦᑎᐊᖁᓇᖅᑯᓯᓗ.