ᑐᓴᒐᒃᓴᑦ: ᑲᑭᕙᒃᑯᑦ ᑲᒪᒋᔭᖃᓯᔪᑦ $1.5 ᒥᓕᐊᓐᓂᑦ ᐳᕝᕕᕆᓇᖅᑐᖅ ᐱᔾᔪᑎᒋᓪᓗᒍ ᐃᖅᑲᓇᐃᔭᕐᕕᓐᓄᑦ ᐃᑲᔫᑎᔅᓴᓂᑦ ᑮᓇᐅᔾᔭᔅᓵᓄᓪᓗ ᐃᑲᔫᑎᓂᑦ ᐃᑲᔪᖅᑎᖃᖅᑐᑎᒃ ᕿᑭᖅᑕᓂᒃᑯᓐᓂᑦ
ᐃᖃᓗᐃᑦ, ᓄᓇᕗᑦ − ᐄᐳᓗ 15, 2020 – ᐃᑲᔪᖅᑎᖃᖅᑐᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ (ᕿᑭᖅᑕᓂᒃᑯᑦ), ᑲᑭᕙᒃ ᑲᑐᔾᔨᖃᑎᒌᖏᑦ ᐋᖅᑭᔅᓯᔪᑦ $1.5 ᒥᓕᐊᓐᓂᑦ ᐋᖅᑭᓯᒪᑎᑦᑎᓂᐊᕐᖓᑕ ᒪᕐᕉᓐᓂᒃ ᐊᑐᖅᑕᐅᑲᐃᓐᓇᓂᐊᖅᑑᓐᓂᒃ ᓄᑖᖑᔫᓐᓂᒃ ᐳᕝᕕᕆᓇᖅᑐᖅ ᐱᔾᔪᑎᒋᓪᓗᒍ ᐃᑲᔫᑎᓐᓂᒃ ᐃᑲᔫᑕᐅᓂᐊᖅᑐᓂᑦ ᐃᑲᔪᖅᑕᐅᔾᔪᑎᒋᒋᐊᓕᖏᓐᓄᑦ ᒥᑭᓛᓄᑦ, ᐃᓱᒫᓗᓇᖅᑐᒦᓴᕋᐃᓐᓂᕐᓴᓄᑦ ᐃᓄᓐᓄᑦ−ᓇᒻᒥᓂᖁᑎᒋᔭᐅᔪᓄᑦ ᐃᖅᑲᓇᐃᔭᕐᕕᖁᑎᒋᔭᐅᔪᓄᑦ ᕿᑭᖅᑕᓂ ᓄᓇᓕᓐᓂᑦ, ᐊᒻᒪᓗ ᖃᐅᔨᒪᑦᑎᐊᕈᒪᓪᓗᑎᒃ ᐃᓄᐃᑦ ᐃᖅᑲᓇᐃᔮᖃᐃᓐᓇᕋᓗᐊᕐᒪᖔᑕ.
“ᒥᑭᔫᑏᑦ ᐃᓄᓐᓄᑦ−ᓇᒻᒥᓂᕆᔭᐅᔪᑦ ᐃᖅᑲᓇᐃᔭᕐᕖᑦ ᑐᙵᕕᐅᖃᑦᑕᕐᖓᑕ ᓄᓇᑦᑎᓐᓂ ᒪᑭᒪᓇᓱᐊᕈᑕᐅᕙᑦᑐᓂᑦ ᕿᑭᖅᑕᓂ ᓄᓇᓕᓐᓂᑦ, ᐋᖅᑭᓯᒪᔾᔪᑎᔅᓴᖏᓐᓂᒃ ᐃᑲᔫᑎᖃᕆᐊᖃᕋᑦᑕ ᐃᑲᔪᕐᓗᒋᑦ ᒪᑭᑕᔪᓐᓇᓂᐊᕐᖓᑕ ᐊᒻᒪᓗ ᑲᔪᓯᓂᐊᕐᖓᑕ ᐃᖅᑲᓇᐃᔭᖅᑎᑖᖃᑦᑕᓂᕐᒥᒃ ᐃᓄᓐᓂᑦ ᖃᓂᒪᓇᖅᑐᖃᖅᑎᓪᓗᒍ ᓄᕙᕐᔪᐊᕐᓇᖅ−19 ᓄᓇᕐᔪᐊᓕᒫᒥ ᓯᐊᒻᒪᐸᓪᓕᐊᔪᒥᒃ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖓᔪᖅᑳᖓᑦ, ᐸᐅᓗᓯ ᐊᕿᐊᕈᖅ, “ᐱᒃᑯᒍᓱᑦᑐᒍᑦ ᐃᑲᔪᕈᓐᓇᕆᐊᔅᓴᖅ ᐃᖅᑲᓇᐃᔭᕐᕕᖁᑎᕋᓛᖑᔪᓂᑦ ᐃᖅᑲᓇᐃᔮᔅᓴᖃᖅᑎᑦᑎᕙᑦᑐᓂᑦ ᐱᔨᑦᑎᕋᐅᑎᖃᕐᐸᑦᑐᓂᓪᓗ ᓄᓇᓕᑦᑎᓐᓄᑦ.”
“ᐃᓱᒪᔅᓴᕐᓯᐅᕈᑎᖃᕋᑦᑕ ᖃᓄᒃᑲᓐᓂᖅ ᐃᑲᔪᕈᓐᓇᕐᒪᖔᑦᑕ ᐃᓄᓐᓄᑦ−ᓇᒻᒥᓂᕆᔭᐅᔪᓂᑦ ᐃᖅᑲᓇᐃᔭᕐᕕᓐᓂᑦ ᐃᑲᔪᖅᑕᐅᔾᔪᑎᒋᒋᐊᓕᖏᓐᓂᒃ ᑕᒪᑐᒥᖓ ᐱᔭᕆᐊᑐᔪᒃᑰᕈᑎᖃᖅᑎᓪᓗᑕ ᐱᔭᕆᐊᑐᔪᒥᒃ,” ᐅᖃᖅᑐᖅ ᔫ ᐊᑕᒍᑦᑖᓗᒃ, ᐃᒃᓯᕙᐅᑕᖅ, ᑲᑭᕙᒃᑯᓐᓂᑦ, “ᐊᑐᖅᑐᒍᑦ ᑮᓇᐅᔭᓂᑦ, ᐃᓄᓐᓄᑦ ᑐᕌᖓᔪᓂᑦ ᐊᐅᓚᑕᐅᔪᓂᑦ ᐃᑲᔪᕈᒪᓪᓗᒋᑦ ᐃᓄᓐᓄᑦ−ᓇᒻᒥᓂᕆᔭᐅᔪᑦ ᐃᖅᑲᓇᐃᔭᕐᕖᑦ.”
ᕿᑭᖅᑕᓂᒃᑯᑦ ᐳᕝᕕᕆᓇᖅᑐᖅ ᐃᓱᒫᓗᓇᕐᓯᓯᒪᑎᓪᓗᒋᑦ ᑮᓇᐅᔾᔭᔅᓵᖑᕙᑦᑐᓄᑦ ᐃᑲᔫᑏᑦ ᐃᑲᔫᑎᖃᖃᑦᑕᓂᐊᖅᑐᑦ $20.00ᒧᑦ ᑎᑭᐅᒪᔪᓂᑦ ᐃᑲᕐᕋᑕᒫᑦ ᐊᑐᓂᑦ ᐃᖅᑲᓇᐃᔭᖅᑎᓄᑦ ᓄᖅᑲᖅᑎᑕᐅᒐᔭᖅᑐᓄᑦ ᐃᑲᔫᓯᐊᔅᓴᖃᖅᑎᑕᐅᔾᔮᒐᑎᒃ.
$1,500ᓄᑦ ᑎᑭᐅᒪᔪᓂᑦ ᐱᔭᔅᓴᖅᑕᖃᕐᒥᔪᖅ ᐃᓕᓐᓂᐊᑎᑦᑎᔾᔪᑎᔅᓴᓂᑦ ᐊᑐᓂᑦ ᐃᖅᑲᓇᐃᔭᖅᑎᓄᑦ ᐃᖅᑲᓇᐃᔭᕐᕕᓐᓄᑦ ᒫᓐᓇ ᐱᕕᖃᕐᓂᖏᓐᓂ ᐱᓕᒻᒪᔅᓴᐃᒍᒪᔪᓄᑦ ᐃᖅᑲᓇᐃᔭᖅᑎᖏᓐᓂᒃ.
ᕿᑭᖅᑕᓂᒃᑯᑦ ᐳᕝᕕᕆᓇᖅᑐᖅ ᐱᔾᔪᑎᒋᓪᓗᒍ ᐃᖅᑲᓇᐃᔭᕐᕕᓐᓄᑦ ᐃᑲᔫᑏᑦ ᐃᑲᔫᑎᖃᕐᓂᐊᖅᑐᑦ ᐅᑎᖅᑎᑕᐅᒋᐊᑐᔾᔮᓛᙱᑦᑐᓂᑦ ᐃᑲᔫᑎᓂᑦ ᑎᑭᐅᒪᔪᓂᑦ $25,000ᓄᑦ ᐊᑐᓂᑦ ᐱᓇᓱᐊᖃᑕᐅᔪᓐᓇᖅᑐᓄᑦ ᑐᔅᓯᕋᖅᑐᓄᑦ.
ᐃᖅᑲᓇᐃᔭᕐᕖᑦ ᒪᑐᒋᐊᖃᓚᕿᓯᒪᔪᑦ, ᐅᕝᕙᓘᓐᓃᑦ ᑮᓇᐅᔭᓕᐅᕈᓐᓃᐹᓪᓕᕐᓯᒪᔪᑦ ᑐᔅᓯᕋᖃᑦᑕᕈᓐᓇᖅᑐᑦ ᑮᓇᐅᔭᓂᑦ ᐋᖅᑭᐅᒪᑎᑦᑎᔾᔪᑎᔅᓴᓂᑦ ᐊᐅᓚᓂᖏᓐᓄᑦ ᐊᒻᒪᓗ ᐃᖅᑲᓇᐃᔭᖅᑎᓄᑦ ᑐᕌᖓᔪᓂᑦ ᑕᖅᑭᕐᓄᑦ ᒫᑦᓯ 15ᒥ ᔫᓂ 30ᒧᑦ.
ᐃᓱᒪᒋᔭᐅᒋᐊᕈᒪᒍᔅᓯ ᐃᑲᔪᖅᑕᐅᓂᕐᒧᑦ ᑐᔅᓯᕋᖅᑐᑦ ᑕᑯᑎᑦᑎᔭᕆᐊᓖᑦ ᐃᑲᔪᖅᑕᐅᔭᕆᐊᖃᕐᓂᖏᓐᓂᒃ ᑐᓂᓯᓗᑎᒃ ᓇᓗᓇᐃᕐᓯᒪᑦᑎᐊᖅᑐᓂᑦ ᒫᓐᓇ ᖃᓄᐃᓕᖓᓂᖏᑕ ᒥᔅᓵᓅᖓᔪᓂᑦ ᐃᖅᑲᓇᐃᔭᕐᕕᖏᑕ ᐊᒻᒪᓗᑦᑕᐅᖅ ᑐᑭᓯᐅᒪᔾᔪᑎᔅᓴᓂᑦ ᖃᓄᖅ ᐋᖅᑭᓯᒪᓂᖃᕋᔪᖃᑦᑕᕐᒪᖔᑕ ᐊᐅᓚᓂᖏᓐᓄᑦ ᐊᑭᖏᓐᓄᑦ ᐃᖅᑲᓇᐃᔭᕐᕕᖁᑎᖏᑕ, ᓲᕐᓗ ᒪᑯᓂᖓ:
- ᑮᓇᐅᔾᔭᔅᓵᑦ
- ᐊᑐᖅᑐᐊᕈᑏᑦ
- ᐅᖅᑰᓴᐅᑎᓯᐅᑏᑦ
- ᖃᐅᒪᓯᐅᑏᑦ
- ᑐᓴᐅᒪᖃᑦᑕᐅᑎᔾᔪᑏᑦ
ᐊᑐᓂᑦ ᑐᔅᓯᕋᖅᑐᑦ ᑐᓂᓯᔭᕆᐊᓖᑦ ᐱᔭᕇᕐᓯᒪᑦᑎᐊᖅᑐᓂᑦ ᕿᑭᖅᑕᓂ ᐳᕝᕕᕆᓂᕐᒧᑦ ᖃᓂᒪᓇᖅᑐᒧᑦ ᐃᖅᑲᓇᐃᔭᕐᕕᓐᓄᑦ ᐃᑲᔫᓯᐊᔅᓴᓄᑦ ᑐᔅᓯᕋᐅᑎᓂᑦ ᐊᒻᒪᓗᑦᑕᐅᖅ ᐃᑲᔪᕐᓯᕆᐊᕈᑎᖏᓐᓂᒃ ᑎᑎᖅᑲᓂᑦ.
ᑮᓇᐅᔭᑦ ᕿᑭᖅᑕᓂ ᐳᕝᕕᕆᓇᖅᑐᖅ ᐃᓱᒫᓗᓇᕐᓯᓯᒪᑎᓪᓗᒍ ᑮᓇᐅᔾᔭᔅᓵᓄᑦ ᐃᑲᔫᑏᑦ ᐅᕙᙶᕐᓯᒪᔪᑦ ᑲᑭᕙᒃᑯᑦ ᑮᓇᐅᔾᔭᔅᓵᖑᕙᑦᑐᓄᑦ ᐃᑲᔫᑎᖏᓐᓂᑦ ᑮᓇᐅᔭᖅᑖᕆᓯᒪᔭᖏᓐᓂᒃ ᓄᓇᖃᖅᑐᑐᖃᕐᓄᑦ ᐱᓕᒻᒪᔅᓴᐃᓂᕐᒧᑦ ᐃᓕᓐᓂᐊᓂᕐᒧᓪᓗ ᐃᑲᔫᑎᓂᑦ ᐊᖏᖃᑎᒌᒍᑎᑎᒍᑦ.
ᑮᓇᐅᔭᑦ ᕿᑭᖅᑕᓂ ᐳᕝᕕᕆᓇᖅᑐᖅ ᐱᔾᔪᑎᒋᓪᓗᒍ ᐃᖅᑲᓇᐃᔭᕐᕕᓐᓄᑦ ᐃᑲᔫᑏᑦ ᐅᕙᙶᕐᓯᒪᔪᑦ ᓴᓂᕐᕙᖅᑕᐅᓯᒪᔪᓂᑦ ᐊᑐᖅᑕᐅᓯᒪᙱᑦᑐᓂᑦ ᓯᕗᒧᑦ ᑮᓇᐅᔭᓂᑦ ᑐᓂᔭᐅᓯᒪᔪᓂᑦ ᑲᑭᕙᒃᑯᓐᓄᑦ ᕿᑭᖅᑕᓂᒃᑯᓐᓂᑦ.
ᑐᔅᓯᕋᐅᓯᐅᕈᑦ ᑎᑎᕋᕐᕕᔅᓴᖅ ᐱᔭᔅᓴᖅ ᐅᕙᙵᑦ:
ᕿᑭᖅᑕᓂ ᐳᕝᕕᕆᓇᖅᑐᖅ ᐃᓱᒫᓗᓇᕐᓯᓯᒪᑎᓪᓗᒍ ᑮᓈᐅᔾᔭᔅᓵᓄᑦ ᐃᑲᔫᑏᑦ www.kakivak.ca
ᕿᑭᖅᑕᓂ ᐳᕝᕕᕆᓇᖅᑐᖅ ᐱᔾᔪᑎᒋᓪᓗᒍ ᐃᖅᑲᓇᐃᔭᕐᕕᓐᓄᑦ ᐃᑲᔫᑏᑦ www.kakivak.ca
ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕᑦ:
ᓰᒪ ᓴHᐊ ᔨᐅᕋHᐃ, ᑐᑭᒧᐊᒃᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
867.975.8413
1.800.667.2742
ᑲᑭᕙᒃ ᑲᑐᔾᔨᖃᑎᒌᑦ:
867.979-0911
1.800.561.0911
ᑐᔅᓯᕋᐅᓯᐅᕈᑦ ᕿᑭᖅᑕᓂ ᐳᕝᕕᕆᓇᖅᑐᖅ ᐱᔾᔪᑎᒋᓪᓗᒍ ᐃᖅᑲᓇᐃᔭᕐᕕᓐᓄᑦ ᐃᑲᔫᓯᐊᔅᓴᓂᑦ:
ᕿᑭᖅᑕᓂ ᐳᕝᕕᕆᓇᖅᑐᖅ ᐱᔾᔪᑎᒋᓪᓗᒍ ᐃᖅᑲᓇᐃᔭᕐᕕᓐᓄᑦ ᐃᑲᔫᓯᐊᔅᓴᑦ:
ᑐᔅᓯᕋᐅᓯᐅᕈᑦ ᕿᑭᖅᑕᓂ ᐳᕝᕕᕆᓇᖅᑐᖅ ᐱᔾᔪᑎᒋᓪᓗᒍ ᐃᖅᑲᓇᐃᔭᕐᕕᓐᓄᑦ ᐃᑲᔫᓯᐊᔅᓴᓂᑦ:
ᕿᑭᖅᑕᓂ ᐳᕝᕕᕆᓇᖅᑐᖅ ᐱᔾᔪᑎᒋᓪᓗᒍ ᐃᖅᑲᓇᐃᔭᕐᕕᓐᓄᑦ ᐃᑲᔫᓯᐊᔅᓴᑦ:
