ᐃᑲᔪᕐᓂᖅ ᕿᑭᖅᑕᓂ ᓄᓇᓕᓐᓂᑦ ᐃᓄᓐᓂᑦ ᓂᓪᓕᕈᑎᖃᖅᑎᓪᓗᒋᑦ ᐅᕐᓱᐊᓗᓐᓂᐊᕐᓂᐅᑉ ᒑᓯᔅᓴᓂᐊᕐᓂᐅᓪᓗ ᒥᔅᓵᓄᑦ ᓴᓐᓂᕈᑎᐅᑉ ᐃᒪᖓᓂ ᐊᒻᒪᓗ ᕿᑭᖅᑖᓘᑉ ᐃᑭᕋᓴᖓᓂ
2017ᒥᓂᑦ, ᑲᑐᔾᔨᖃᑎᒌᒃᑯᑦ ᐃᑲᔪᖃᑦᑕᕐᓯᒪᒻᒪᑕ ᓄᓇᕗᒥ ᐊᕙᑎᓕᕆᓂᕐᒧᑦ ᑲᑎᒪᔨᓂᑦ (NIRB) ᖃᐅᔨᓴᖅᑎᓪᓗᒋᑦ ᐅᕐᓱᐊᓗᓐᓂᐊᕐᓂᐅᑉ ᒑᓯᔅᓴᓂᐊᕐᓂᐅᓪᓗ ᒥᔅᓵᓄᑦ ᓴᓐᓂᕈᑎᐅᑉ ᐃᒪᖓᓂ ᐊᒻᒪᓗ ᕿᑭᖅᑖᓘᑉ ᐃᑭᕋᓴᖓᓂ.
ᐊᕙᑎᓕᕆᔨᒃᑯᑦ ᓯᕗᓕᕐᓯᔪᒻᒪᑕ ᑐᑭᒧᐊᒍᑎᔅᓴᓂᑦ ᐊᕙᑎᓕᕆᓂᕐᒥ ᖃᐅᔨᓴᕐᓂᕐᒥ ᑮᓇᐅᔭᖃᖅᑎᑕᐅᓪᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓄᑦ. ᑲᑐᔾᔨᖃᑎᒌᒃᑯᑦ ᐃᓚᒋᔭᐅᓯᒪᒻᒪᑕ ᐱᔭᕆᐊᑭᓪᓕᑎᑦᑎᔨᓂᑦ ᑕᒪᓐᓇ ᖃᐅᔨᓴᕐᓂᖅ ᐱᔾᔪᑎᒋᓪᓗᒍ. ᒐᕙᒪᑐᖃᒃᑯᑦ ᓄᐊᑦᑎᖃᑦᑕᓂᐊᖅᑐᑦ ᑐᑭᓯᔾᔪᑎᔅᓴᓂᑦ ᓄᐊᑕᐅᓯᒪᔪᓂᑦ ᖃᐅᔨᓴᕐᓂᖏᓐᓂ ᐅᓂᒃᑳᓕᐅᕈᑕᐅᓛᕐᖓᑕ ᐅᕐᓱᐊᓗᓐᓂᐊᕐᓂᐅᑉ ᒑᓯᔅᓴᓂᐊᕐᓂᐅᓪᓗ ᒥᔅᓵᓄᑦ ᓴᓐᓂᕈᑎᐅᑉ ᐃᒪᖓᓂ ᕿᑭᖅᑕᓘᓪᓗ ᐃᑭᕋᓴᖓᓂ.
ᑕᒫᓂ ᐊᕐᕌᒍᒋᕋᑖᖅᑕᑎᓐᓂ, ᑲᑐᔾᔨᖃᑎᒌᒃᑯᑦ ᓄᓇᓕᓐᓄᑦ ᐳᓚᕋᖃᑦᑕᓚᐅᕐᖓᑕ ᕿᑭᖅᑕᓂ ᓄᓇᓕᓐᓄᑦ ᑐᓴᕈᒪᓪᓗᑎᒃ ᐃᓄᓐᓂᑦ ᖃᓄᖅ ᓯᕗᓂᔅᓴᑎᓐᓂ ᐅᕐᓱᐊᓗᓐᓂᐊᕐᓂᐅᒍᓐᓇᖅᑐᖅ ᒑᓯᔅᓴᓂᐊᕐᓂᐅᒍᓐᓇᑐᕐᓗ ᐊᑦᑐᐃᓂᖃᕋᔭᕐᒪᖔᖅ ᐊᕙᑖᓂ.
ᐅᓪᓗᒥᒧᑦ ᑎᑭᑦᑐᒍ, ᑲᑐᔾᔨᖃᑎᒌᒃᑯᑦ ᑲᑎᖃᑎᖃᕐᓯᒪᔪᑦ ᐃᓘᓐᓇᖏᓐᓂᒃ ᖁᓕᓂᑦ (10) ᓄᓇᓕᓐᓂᑦ ᖃᓂᒋᔭᓕᓐᓂᑦ ᓴᓐᓂᕈᑎᐅᑉ ᐃᒪᖓᓄᑦ ᕿᑭᖅᑖᓘᓪᓗ ᐃᑭᕋᓴᖓᓄᑦ ᐅᑯᐊᖑᓪᓗᑎᒃ: ᐃᒃᐱᐊᕐᔪᒃ, ᑭᙵᐃᑦ, ᑲᖏᖅᑐᒑᐱᒃ, ᐊᐅᓱᐃᑦᑐᖅ, ᐃᖃᓗᐃᑦ, ᑭᒻᒥᕈᑦ, ᐸᓐᓂᖅᑑᖅ, ᒥᑦᑎᒪᑕᓕᒃ, ᕿᑭᖅᑕᕐᔪᐊᖅ, ᐊᒻᒪᓗ ᖃᐅᓱᐃᑦᑐᖅ.
ᐊᑐᓂᑦ ᓄᓇᓕᓐᓂᑦ, ᑲᑐᔾᔨᖃᑎᒌᒃᑯᑦ ᐃᖅᑲᓇᐃᔭᖅᑎᖏᑦ ᑲᑎᖃᑎᖃᖃᑦᑕᔪᔪᑦ ᐊᖑᓇᓱᑦᑐᓕᕆᔨᒃᑯᓐᓂᑦ, ᑲᑐᔾᔨᖃᑎᒌᒃᑯᑦ ᓄᓇᓕᓐᓂᑦ ᓄᓇᓕᕆᓂᕐᒧᑦ ᑲᑎᒪᔨᕋᓛᖏᓐᓂᒃ (ᓄᓇᓕᕆᔨᕋᓛᑦ), ᐃᓕᓴᕕᓐᓂᑦ ᐊᒻᒪᓗ ᑭᒃᑯᑐᐃᓐᓇᕐᓂᑦ.
ᑲᑐᔾᔨᖃᑎᒌᒃᑯᑦ ᖃᓄᖅ ᐃᖅᑲᓇᐃᔮᖃᕐᖓᑕ ᑕᒪᑐᒥᖓ ᐃᖅᑲᓇᐃᔮᖓᔪᒥᒃ?
ᑲᑐᔾᔨᖃᑎᒌᑯᑦ ᐱᒻᒪᕆᐊᓗᒻᒥᒃ ᐃᖅᑲᓴᐃᔮᔅᓴᖃᕐᖓᑕ ᑕᒪᑐᒥᖓ. ᑲᒪᒋᔭᖃᓗᐊᖅᑐᒍᓪᓕ ᐱᓕᕆᖃᑎᖃᕐᓂᕐᒥᒃ ᐃᓄᓐᓂᑦ ᓄᐊᑦᑎᕙᓪᓕᐊᓪᓗᑕ ᖃᐅᔨᒪᔭᑐᖃᕐᓂᑦ, ᐊᑐᖅᑕᐅᒐᔭᕐᖓᑕ ᐊᑐᓕᖁᔨᔾᔪᑕᐅᒐᔭᙳᐊᖅᑐᓄᑦ ᑐᑭᒧᐊᒍᑎᔅᓴᓄᑦ.
ᑐᑭᓯᐅᒪᔾᔪᑎᔅᓴᐃᑦ ᓄᐊᑕᕗᑦ ᓄᓇᓕᓐᓂᑦ ᑲᑎᒪᖃᑎᖃᖃᑦᑕᓂᑦᑎᓐᓂᒃ ᑲᑎᑕᐅᓂᐊᕐᖓᑕ ᑲᑐᔾᔨᖃᑎᒌᒃᑯᑦ ᐅᓂᒃᑳᓕᐊᖏᓐᓂᒃ. ᐅᓂᒃᑳᕗᑦ ᐃᓚᒋᔭᐅᓂᐊᖅᑐᑦ ᐊᕙᑎᓕᕆᔨᒃᑯᑦ ᐅᓂᒃᑳᖏᓐᓄᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ.
ᐃᓚᒋᔭᐅᓗᓂ ᑕᒪᑐᒧᖓ ᐃᖅᑲᓇᐃᔮᕐᒧᑦ, ᑲᑐᔾᔨᖃᑎᒌᒃᑯᑦ ᐱᓕᕆᖃᑎᖃᕐᓯᒪᔪᑦ ᐃᓄᐃᑦ ᖃᐅᔨᒪᔭᑐᖃᖏᑕ ᒥᔅᓵᓄᑦ ᐅᖃᐅᔾᔨᒋᐊᖅᑎᓂᑦ, ᓂᕈᐊᖅᑕᐅᓯᒪᓪᓗᑎᒃ ᓄᓇᓕᕆᔨᕋᓛᕐᓄᑦ, ᐊᖑᓇᓱᑦᑐᓕᕆᔨᒃᑯᓐᓄᑦ, ᑭᒃᑯᑐᐃᓇᕐᓄᑦ ᐃᓅᓱᑦᑐᓄᓪᓗ ᑖᒃᑯᓇᓂ ᑕᓪᓕᒪᓄᑦ ᓄᓇᓕᓐᓂᑦ: ᐃᒃᐱᐊᕐᔪᒃ, ᑲᖏᖅᑐᒑᐱᒃ, ᐸᓐᓂᖅᑑᖅ, ᒥᑦᑎᒪᑕᓕᒃ ᐊᒻᒪᓗ ᕿᑭᖅᑕᕐᔪᐊᖅ.
ᑭᖑᓪᓕᕐᐹᒥ ᐃᓄᐃᑦ ᖃᐅᔨᒪᔭᑐᖃᖏᑕ ᒥᔅᓵᓄᑦ ᑲᑎᒪᔨᕋᓛᑦ ᑲᑎᒪᓚᐅᕐᓯᒪᔪᑦ ᒫᑦᓯ 2018ᖑᑎᓪᓗᒍ.
ᐃᓄᐃᑦ ᐅᕙᑦᑎᓐᓄᑦ ᖃᓄᖅ ᐅᖃᓚᐅᖅᑲᑦ?
- ᕿᑭᖅᑕᓂᒥᐅᑦ ᐃᓄᐃᑦ ᐅᕙᑦᑎᓐᓄᑦ ᐅᖃᕐᓯᒪᒧᖅ ᐃᓱᒫᓘᑎᖃᕐᓂᕋᕐᓯᒪᓪᓗᑎᒃ ᐊᑦᑐᐃᓂᖃᕈᓐᓇᖅᑐᓂᑦ ᐱᓕᕆᓂᕐᒥ ᐅᕐᓱᐊᓗᓐᓂᐊᓂᕐᒥ ᒑᓯᔅᓴᓂᐊᕐᓂᒥᓪᓗ
- ᐃᓄᐃᑦ ᐅᖃᕐᓯᒪᔪᑦ ᐃᓱᒫᓗᒋᔭᖃᓗᐊᙳᐊᕐᓂᕋᖅᑐᑎᒃ ᐃᖅᑲᕐᓂᐊᕐᓗᑎᒃ ᖃᐅᔨᓴᕐᓂᕐᒥᒃ ᐊᒻᒪᓗ ᖃᓄᖅ ᓱᕐᕋᐃᒍᓐᓇᕐᓂᕋᖅᑐᒍ ᐊᕙᑎᑦᑎᓐᓂᒃ ᓂᕐᔪᑎᓂᓪᓗ ᐊᓪᓛᑦ ᐱᖅᑯᓯᖅᑎᒍᑦ ᐃᓅᓯᖓᓐᓂᒃ
- ᐃᓱᒫᓘᑕᐅᓯᒪᓗᐊᕐᒥᔪᖅᑕᐅᖅ ᐃᓄᓐᓄᑦ ᐅᖅᓱᐊᓗᒻᒥᑦ ᑯᕕᔪᖃᑦᑕᓂᖅᑲᑦ ᑕᒫᓂ ᐃᒫᓂ ᓄᓇᓖᑦ ᖃᓂᒋᔮᓂ ᐊᒻᒪᓗ ᐊᑦᑐᐃᓂᖃᕋᔭᕐᖓᑦ ᐃᓅᓯᖓᓐᓄᑦ ᐊᑦᑕᓇᙱᑦᑐᒦᒋᐊᖃᕐᓂᖏᓐᓂᒃ ᐃᒪᐅᑉ, ᓂᕐᔪᑏᑦ ᐃᓄᐃᓪᓗ
ᓂᕿᔅᓴᖃᑦᑎᐊᕆᐊᖃᕐᓂᕐᒥᒃ ᖃᐅᔨᓴᕐᓂᖅ
ᐃᓚᒋᔭᐅᓪᓗᓂ ᖃᐅᔨᓴᕐᓂᕐᒥ, ᑲᑐᔾᔨᖃᑎᒌᒃᑯᑦ ᖃᐅᔨᓇᓱᐊᕐᒥᒻᒪᑕ ᐊᑑᑎᖃᖃᑦᑕᕐᓂᖏᓐᓂᒃ ᐃᓄᔅᓯᐅᑏᑦ ᓄᓇᓕᑦᑎᓐᓂ. ᓂᕆᐅᑦᑐᒍᑦ ᓄᐊᑦᑎᒍᒪᓪᓗᑕ ᑐᑭᓯᐅᒪᔾᔪᑎᔅᓴᓂᑦ ᐊᑑᑎᖃᕐᓂᖏᓐᓂᒃ ᐃᓄᔅᓯᐅᑏᑦ ᓂᖀᑦ ᓄᓇᓕᓐᓄᑦ.
ᓄᐊᑦᑎᔪᒍᑦ ᑐᑭᓯᐅᒪᔾᔪᑎᔅᓴᓂᑦ:
- ᖃᓄᑎᒋ ᐃᓄᔅᓯᐅᑏᑦ ᐊᑭᖃᖃᑦᑕᕐᒪᖔᑕ ᐊᑐᓂᑦ ᓄᓇᓕᓐᓂᑦ
- ᖃᓄᑎᒋ ᐃᖅᑲᓇᐃᔮᖑᔭᕆᐊᖃᓲᖑᒻᒪᖔᑕ ᓂᕿᔅᓴᓂᒐᓱᑦᑐᑎᒃ ᐊᒻᒪᓗ ᓂᕿᓕᕆᓪᓗᑎᒃ
- ᑐᑭᓯᓯᒪᑦᑎᐊᕈᒪᓪᓗᑕ ᐋᖅᑭᓯᒪᑦᑎᐊᕐᔫᒥᔪᓂᑦ ᖃᓄᖅ ᐃᓄᔅᓯᐅᑏᑦ ᓂᖀᑦ ᐊᒥᖃᖃᑎᒌᒍᑕᐅᓲᖑᒻᒪᖔᑕ ᐊᒻᒪᓗ ᑐᓂᐅᖅᑲᖅᑕᐅᖃᑦᑕᓲᖑᒻᒪᖔᑕ ᐅᔾᔨᓇᕐᓯᑎᒍᒪᓪᓗᒍ ᐱᒻᒪᕆᐅᓂᖓ
ᑲᑐᔾᔨᖃᑎᒌᒃᑯᑦ ᑭᒃᑯᑐᐃᓐᓇᕐᓂᑦ ᖃᐅᔨᓴᔪᒻᒪᑕ ᐊᒻᒪᓗᑦᑕᐅᖅ ᑐᕌᒐᖃᔪᓪᓗᑎᒃ ᐱᒪᔨᒋᔭᐅᕙᑦᑐᓂᑦ ᓄᐊᑦᑎᓂᐊᕐᖓᑕ ᑐᑭᓯᔾᔪᑎᔅᓴᓂᑦ.
ᐃᓚᒋᔭᐅᒻᒥᔪᖅ ᖃᐅᔨᒪᔭᑐᖃᕐᓂᑦ ᖃᐅᔨᓴᕐᓂᑎᓐᓂ ᐅᕙᑦᑎᓐᓄᑦ ᑐᓂᔭᐅᓯᒪᔪᖅ ᐅᓪᓗᕐᓯᐅᑎᓕᐅᕐᓂᖅ ᐃᓄᐃᑦ ᖃᐅᔨᒪᔭᑐᖃᖏᑕ ᒥᔅᓵᓄᑦ, ᐱᔾᔪᑎᖃᖅᑐᑎᒃ ᓂᕐᔪᑏᑦ ᐊᖅᑯᓵᖃᑦᑕᕐᓂᕆᓲᖏᓐᓂᒃ ᐊᒻᒪᓗ ᐱᖅᑯᓯᖅᑎᒍᑦ ᖃᖓᒃᑯᑦ ᐊᖑᓇᓱᑦᑕᐅᖃᑦᑕᓲᖑᒻᒪᖔᑕ ᓄᓇᓕᓐᓂᑦ ᐊᖑᓇᓱᕝᕕᒋᕙᑦᑕᖏᑎᒍᑦ.
ᐊᑐᓂᑦ ᑕᓪᓕᒪᓂᑦ ᓄᓇᓕᓐᓂᑦ ᐃᓄᐃᑦ ᖃᐅᔨᒪᔭᑐᖃᖏᑕ ᒥᔅᓵᓄᑦ ᐅᖃᐅᔾᔨᒋᐊᖅᑏᑦ ᓇᒻᒥᓂᖅ ᓴᓇᔪᔪᑦ ᐅᓪᓗᕐᓯᐅᑎᖏᓐᓂᒃ.
IQ calendar created in Arctic Bay.
ᖃᓄᐃᓕᐅᕐᓂᐊᓕᕆᕙᑦ?
ᑲᑐᔾᔨᖃᑎᒌᒃᑯᑦ ᒫᓐᓇ ᑎᑎᕋᖅᑐᑦ ᐃᓄᐃᑦ ᖃᐅᔨᒪᑐᔭᖃᖏᑕ ᒥᔅᓵᓄᑦ ᐅᓂᒃᑳᓂᑦ.
ᐊᒻᒪᓗᑦᑕᐅᖅ, ᐃᓕᓐᓂᐊᑎᑦᑎᓛᖅᑐᒍᑦ ᐄᐳᓗᒥ ᐃᖃᓗᓐᓂ ᐱᖃᑎᖃᕐᓗᑕ ᐃᓚᖏᓐᓂᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐅᖃᐅᔾᔨᒋᐊᖅᑐᓂᑦ ᑐᑭᓯᓇᓱᒃᑲᓐᓂᓛᕋᑦᑕ ᐱᖅᑯᓯᖅᑎᒍᑦ ᖃᐅᔨᒪᔭᐅᔪᓂᑦ ᓄᐊᑕᐅᓯᒪᔪᓂᑦ. ᑖᓐᓇ ᑲᑎᒪᓂᖅ ᐊᑐᓛᕐᒥᔭᕗᑦ ᐅᖃᐅᓯᖃᕐᓗᑕ ᖃᓄᖅ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᓱᕐᕋᐃᓂᐊᕐᒪᖔᑕ ᐊᑐᖅᑕᐅᒐᔭᙳᐊᖅᑐᓂᑦ ᐱᔾᔪᑎᓕᓐᓂᑦ ᐅᕐᓱᐊᓗᓐᓂᐊᓂᕐᒥᒃ ᒑᓯᔅᓴᓂᐊᕐᓂᒥᓪᓗ ᓴᓐᓂᕈᑎᐅᑉ ᐃᒪᖓᓂ ᕿᑭᖅᑖᓘᓪᓗ ᐃᑭᕋᓴᖓᓂ.
ᑕᕝᕙᓂ ᑲᑎᒪᓂᕐᓂᑦ ᐅᖃᐅᓯᖃᖃᑦᑕᓛᕐᒥᔪᑦ ᖃᓄᖅ ᐃᖅᑲᕐᓂᐊᕐᓗᑎᒃ ᖃᐅᔨᓴᕐᓂᖅ, ᐅᒥᐊᕐᔪᐊᖃᕐᓂᐅᕙᑦᑐᑦ ᐊᒥᓱᕈᒃᑲᓂᕐᓂᖏᑦ ᐅᕝᕙᓘᓐᓃᑦ ᐅᖅᓱᐊᓗᓐᓂᐊᕐᕕᑦᑕᖃᓕᖅᑲᑦ ᐊᑑᑎᓂᖃᕈᓐᓇᕐᒪᖔᑕ ᓄᓇᓕᓐᓂᑦ ᓂᕐᔪᑎᓂᑦ ᐊᒻᒪᓗ ᐃᓄᐃᑦ ᐊᖑᓇᓱᖃᑦᑕᕈᓐᓇᕐᓂᖏᓐᓂᒃ.
ᐱᓕᕆᖃᑎᒌᑦ ᑎᑎᕋᓛᕐᒥᔪᑦ ᐊᑐᓕᖁᔨᔾᔪᑕᐅᔪᓂᑦ ᐊᑲᐅᓂᕐᐹᓂᑦ ᐊᑐᖅᑕᐅᖃᑦᑕᕈᓐᓇᖅᑐᓂᑦ ᐸᓚᕐᔫᒥᑎᑦᑎᖁᓪᓗᒋᑦ ᓱᕐᕋᐃᑲᒻᒪᒍᓐᓇᖅᑐᓂᑦ ᐅᕐᓱᐊᓗᓐᓂᐊᓂᕐᒥ ᒑᓯᔅᓴᓂᐊᕐᓂᒥᓪᓗ ᓂᕐᔪᑎᓄᑦ ᐊᒻᒪᓗ ᐱᖅᑯᓯᖅᑎᒍᑦ ᐃᓄᓐᓄᑦ ᐱᐅᓯᕆᔭᐅᕙᑦᑐᓂᑦ.
ᐊᕙᑎᓕᕆᔨᒃᑯᑦ ᐅᑎᓛᖅᑐᑦ ᐃᓘᓐᓇᖏᓐᓄᑦ ᖁᓕᓄᑦ (10) ᓄᓇᓕᓐᓄᑦ ᐅᑭᐊᔅᓵᖅ ᑲᔪᓯᑎᑦᑎᓗᑎᒃ ᖃᐅᔨᓴᕈᑎᖓᓐᓂᒃ.
