ᔪᓚᐃ 9, 2018, ᓄᓇᕗᑦ ᐅᓪᓗᐊᓂ ᖁᕕᐊᓲᑎᖃᓚᐅᕐᒪᑕ ᓇᓗᓇᐃᖅᓯᔾᔪᑎᒋᓪᓗᒍ ᐊᖅᑯᑎᓂ ᖃᓄᐃᓕᐅᕈᓘᔭᖅᑎᑦᓯᓪᓗᑎᒃ ᐃᖃᓗᖕᓂ ᐃᓚᖃᐅᖅᑐᑎᒃ − ᐃᖏᖅᑎᓂᒃ, ᐃᓄᐃᑦ ᓂᕿᖏᓐᓂᒃ, ᐃᓄᐃᑦ ᐱᓐᖑᐊᕈᓯᖏᓐᓂᒃ, ᓱᕈᓰᑦ ᐱᓕᕆᐊᒃᓴᖃᖅᑎᑕᐅᓪᓗᑎᒃ ᐊᒻᒪ ᐊᐃᑦᑑᓯᐊᖅᑖᖅᑎᑦᑎᓪᓗᑎᒃ.  ᓴᓂᐊᓂ ᑕᒪᒃᑯᐊ ᖁᕕᐊᓇᕈᓘᔭᖅᑐᑦ, ᑕᒫᓐ ᐊᕐᕌᒍᒥ ᓄᓇᕗᑦ ᐅᓪᓗᐊᓂ ᐃᒃᐱᒋᔭᖃᖅᑐᑎᒃ ᓇᓗᓇᐃᖅᑕᐅᓂᖓᓄᑦ ᐱᒋᐊᖅᑎᑕᐅᓯᒪᔪᖅ ᐊᕐᕌᒍᑕᒫᑦ ᖁᕕᐊᓲᑎᒋᔭᐅᓂᖓ 25−ᓄᑦ ᐊᕐᕋᒍᓄᑦ ᓇᓪᓕᐅᓐᓂᖅᓯᐅᖅᑎᓪᓗᒍ ᓄᓇᕗᑦ (ᓄᓇᑖᕈᑏᑦ) ᐊᖏᕈᑏᑦ, ᓴᖅᑭᑎᑦᓯᔾᔪᑕᐅᓚᐅᖅᑐᑦ ᐊᕕᒃᑐᑦᓯᒪᓂᑦᑎᓐᓄᑦ.

ᒪᐃ 25, 2018 ᓇᓗᓇᐃᕈᑕᐅᓚᐅᖅᑐᖅ 25−ᓄᑦ ᐊᕐᕋᒍᓄᑦ ᑕᐃᒪᓐᖓᓂᒃ ᐊᑎᓕᐅᕈᑕᐅᓚᐅᕐᒪᑦ ᓄᓇᕗᒥ ᐊᖏᕈᑏᑦ.  ᑖᒃᑯᐊ ᐊᖏᕈᑏᑦ ᑐᓐᖓᕕᐅᖕᒪᑕ ᓄᓇᕗᑦ ᐱᕈᖅᐸᓪᓕᐊᔾᔪᑎᖏᑦ ᐊᒻᒪ ᑲᔪᓯᔾᔪᑎᒋᓂᐊᖅᑕᖏᑦ ᐱᕈᖅᐸᓪᓕᐊᓂᕐᒧᑦ ᐊᒻᒪ ᑐᑭᒧᐊᒍᑕᐅᓗᑎᒃ ᓯᕗᓂᒃᓴᒥ.  ᐊᑎᓕᐅᕈᑕᐅᓚᐅᖅᑐᑦ ᓴᖅᑭᑎᑕᐅᖁᓪᓗᒋᑦ ᐃᑲᔫᑎᒃᓴᑦ ᓄᓇᕗᒥᐅᓕᒫᓄᑦ ᐃᓄᖕᓄᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓴᖅᑭᑎᑕᐅᓯᒪᖕᒪᑕ ᐃᓄᖕᓄᑦ ᑲᑐᔾᔨᖃᑎᒋᖑᓪᓗᓂ ᐊᑖᒍᑦ ᓄᓇᕗᒥ ᐊᖏᕈᑏᑦ.  ᑕᒪᓐᓇ ᑐᑭᖃᖅᑐᖅ ᐱᓕᕆᐊᒃᓴᖃᖅᑎᑕᐅᓂᑦᑎᓐᓂᒃ ᐊᖏᖃᑎᒋᒍᑎᑎᒍᑦ, ᐊᑐᕆᐊᖃᖅᑕᑦᑎᓐᓂᒃ ᐊᒻᒪ ᐊᑐᖃᑦᑕᖅᑕᕗᑦ ᑖᒃᑯᐊ ᐊᖏᕈᑏᑦ ᓯᕗᒻᒧᐊᒃᐸᓪᓕᐊᔾᔪᑎᒋᓪᓗᒋᑦ ᐱᓕᕆᐊᒃᓴᑦᑎᓐᓄᑦ ᖃᐅᑕᒫᑦ ᐱᓕᕆᐊᑎᒍᑦ.  ᐊᑖᒍᑦ ᐊᖏᕈᑏᑦ, ᑖᒃᑯᐊ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐱᓕᕆᐊᒃᓴᖃᖅᑎᑕᐅᖕᒪᑕ ᐊᐅᓚᑦᓯᔨᐅᓪᓗᑎᒃ ᐃᓄᐃᑦ ᓇᖕᒥᓂᖁᑎᖏᓐᓂᒃ ᓄᓇᓂᒃ ᕿᑭᖅᑕᓂ ᑭᒡᒐᖅᑐᖅᑐᒋᑦ 14,000 ᐃᓄᐃᑦ ᑭᒡᒐᖅᑐᖅᑕᐅᔪᑦ.

ᑕᑯᓇᖃᑦᑕᖅᑕᕗᑦ ᐊᖏᖏᕈᑏᑦ ᑐᑭᒧᐊᒍᑎᒋᓪᓗᒋᑦ ᐃᓱᒪᓕᐅᕈᑎᑦᑎᓐᓄᑦ ᐊᒻᒪ ᐱᓕᕆᐊᑦᑎᓐᓄᑦ ᓴᖅᑭᔮᖅᑎᑦᓯᔾᔪᑕᐅᓪᓗᑎᒃ ᐃᓄᒃᑐᑦ, ᐃᓄᐃᑦ ᐱᖁᓯᖏᓐᓄᑦ, ᐊᕙᑎᑦᑎᓐᓅᖓᔪᓄᑦ ᐅᒃᐱᕆᔭᑦᑎᓐᓄᑦ, ᓇᖕᒥᓂᖅ ᒪᑭᒪᒍᓐᓇᕐᓂᕐᒧᑦ ᐊᒻᒪ ᑮᓇᐅᔭᓕᐅᕈᑎᖃᕈᓐᓇᕐᓂᕐᒧᑦ, ᐃᓅᓯᖏᓐᓄᑦ ᐊᒻᒪ ᐃᓕᖅᑯᓯᖏᑦ ᖃᓄᐃᓐᖏᑦᓯᐊᖁᓪᓗᒋᑦ ᐃᓄᐃᑦ.  ᐅᕙᒍᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓂ ᐃᓱᒪᒐᑦᑕ ᐅᐱᒍᓱᒃᑐᑕ ᐱᔨᑦᓯᕈᓐᓇᕐᓂᑦᑎᓐᓄᑦ ᕿᑭᖅᑕᓂ ᐃᓄᖕᓄᓂᑦ ᐊᑐᖅᑐᖏᑦ ᐊᑐᓕᖅᑎᑕᐅᕙᓪᓕᐊᓂᖏᑦ ᑖᒃᑯᐊ ᓄᓇᕗᒥ ᐊᖏᕈᑏᑦ.

ᐊᖏᖃᑎᒌᒍᑎᖃᕋᓱᐊᕐᓂᖅ ᓄᓇᕗᒥ ᐊᖏᕈᑎᓂᒃ ᐊᒃᓱᕈᕐᓇᓚᐅᖅᑐᑦ ᐊᕐᕌᒍᓄᑦ ᐊᕙᑎᓄᑦ 20.  ᑐᓐᖓᕕᒃ ᓄᓇᕗᒥ (ᒫᓐᓇ ᓄᓇᕗᑦ ᑐᓐᖓᕕᒃ ᑎᒥᒋᓕᖅᑕᖓ) ᐊᖅᑯᑎᒻᒪᕆᐅᓚᐅᖅᑐᖅ ᑕᒪᓐᓇ ᐊᑐᖅᑎᓪᓗᒍ ᐃᓚᐅᑎᑕᐅᓪᓗᑎᒃ ᐃᓄᐃᑦ ᐊᕕᒃᑐᖅᓯᒪᓂᐅᔪᒥ ᑐᑭᓯᐊᒪᓂᖅᓴᐅᔾᔪᑎᒋᒍᒪᓪᓗᒋᑦ ᐃᓄᐃᑦ ᑭᓱᓂ ᐱᒍᒪᖕᒪᖔᑕ ᓯᕗᓂᒃᓴᒥᓄᑦ ᐊᒻᒪ ᑕᒪᒃᑯᐊ ᐃᓚᓕᐅᑎᔭᐅᖁᓪᓗᒋᑦ ᑖᒃᑯᓄᖓ ᐊᖏᕈᑎᓄᑦ.

ᖁᔭᓕᔪᒍᑦ ᐃᓄᐃᑦ ᐊᖏᖃᑎᒌᒐᓱᐊᖅᑎᐅᓚᐅᖅᑐᑦ ᓴᐱᓕᕈᓐᓇᓚᐅᓐᖏᒻᒪᑕ ᑐᕌᒐᕐᒥᓂᒃ ᓇᖕᒥᓂᖅ ᒐᕙᒪᖃᕈᒪᓂᕐᒧᑦ ᐊᒻᒪ ᐃᖕᒥᒃᑰᖅᑐᒥᒃ ᐊᕕᒃᑐᖅᓯᒪᓂᖃᕈᒪᒧᑦ.  ᑖᒃᑯᐊ ᐊᖏᕈᑏᑦ ᒪᓕᒐᕈᓚᐅᖅᑐᑦ ᐊᑎᓕᐅᕈᑕᐅᓚᐅᖅᓪᓗᒋᑦ ᐹᓪ ᖁᐊᓴᕐᒧᑦ, ᑕᐃᑦᓱᒪᓂ ᐊᖓᔪᖅᑳᕆᔭᐅᓚᐅᖅᑐᑦ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᐊᒻᒪ ᐳᕋᐃᐊᓐ ᒪᕉᓂ, ᑲᓇᑕᒥ ᐊᖓᔪᖅᑳᕐᔪᐊᖑᓚᐅᖅᑐᖅ ᐅᓪᓗᐊᓂ ᒪᐃ  25, 1993.

ᓱᓕᔪᑦ ᐅᖃᐅᓯᕆᐊᕐᔪᒡᓗᒋᑦ ᐱᓪᓗᒍ ᓄᓇᕗᒥ ᐊᖏᕈᑏᑦ:

1. ᑖᒃᑯᐊ ᐊᖏᕈᑏᑦ ᓴᓂᕐᕙᐃᓯᒪᔪᑦ 350,000 km² ᑭᓛᒥᑕ ᓄᓇᐃᑦ ᓄᓇᕗᒥ ᓇᖕᒥᓂᕆᔭᐅᔪᑦ ᐃᓄᖕᓄᑦ (ᐊᖏᓂᖃᑲᓴᒃᑐᑦ ᑖᒃᑯᐊᑎᑐᑦ ᓅᐸᐅᓐᓛᓐ ᐊᒻᒪ ᓛᕙᑐᐊ). 44%−ᐳᓴᓐᑎᖓ ᑖᑦᓱᒪ ᓄᓇᐅᑉ ᐃᓂᖃᖅᑐᖅ ᕿᑭᖅᑕᓂ ᐊᕕᒃᑐᖅᓯᒪᓂᐅᔫᑉ ᑖᒃᑯᐊ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓄᓇᕐᔪᐊᓂ ᐊᖏᓂᖅᐹᒥᒃ ᓄᓇᓂᒃ ᓇᖕᒥᓂᖃᖃᑕᐅᔪᑦ.
2. ᑖᓐᓇ ᓄᓇᕗᒥ ᐊᖏᕈᑏᑦ ᐊᖏᓂᖅᐹᖑᔪᖅ ᓄᓇᖃᖅᑳᖅᓯᒪᔪᑦ ᓄᓇᓂᒃ ᓇᖕᒥᓂᖃᕐᓂᖏᓐᓄᑦ ᑲᓇᑕᒥ ᐊᒻᒪ ᐃᓚᐅᑎᑦᓯᓪᓗᑎᒃ ᐅᓄᕐᓂᖅᐹᓂᒃ ᓄᓇᑖᕈᑎᓄᑦ ᐊᑎᖃᖃᑕᐅᔪᓂᒃ.
3. ᐊᑖᒍᑦ ᑖᑦᓱᒪ ᐊᖏᕈᑎᐅᑉ, ᑕᓪᓕᒪᑦ 5 (ᒫᓐᓇᒫᖅ ᐱᖓᓲᔪᖅᑑᓕᕐᓂᐊᖅᑐᑦ 6) ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐊᒻᒪ ᐃᑲᔫᓯᐊᒃᓴᓄᑦ ᐊᖏᕈᑏᑦ ᐊᑎᓕᐅᖅᑕᐅᓯᒪᓕᖅᑐᑦ ᕿᑭᖅᑕᓂ ᐊᕕᒃᑐᖅᓯᒪᓂᐅᔪᒥ.
4. ᑖᓐᓇ ᐊᖏᕈᑎ ᐱᑕᖃᕆᐊᖃᖅᑎᑦᓯᔪᖅ ᓂᖏᖅᑕᕈᑎᓂᒃ ᓄᓇᕗᒥ ᐃᓄᖕᓄᑦ ᑕᒪᒃᑯᐊ ᓄᓇᒥᐅᑕᐃᑦ ᐱᕙᓪᓕᐊᑎᑕᐅᓂᖏᓐᓄᑦ ᓲᕐᓗ ᐅᖅᓱᐊᓗᐃᑦ, ᒑᓰᑦ ᐊᒻᒪ ᐅᔭᕋᖕᓂᐊᒐᒃᓴᑦ ᐊᒻᒪ ᐱᔪᓐᓇᐅᑎᖃᖅᑎᑦᓯᓪᓗᑎᒃ ᐊᖏᖃᑎᒌᒐᓱᐊᖃᑎᖃᕈᓐᓇᕐᓂᕐᒥᑦ ᓴᓇᕝᕕᒡᔪᐊᓂ ᑮᓇᐅᔭᓕᐅᕈᑎᒃᓴᓂᒃ ᐊᒻᒪ ᐃᓅᓯᕐᓄᑦ ᐃᑲᔫᑎᒃᓴᓂᒃ ᐱᕈᒃᑲᓐᓂᕈᓐᓇᖏᑦᑐᓂᒃ ᐱᕙᓪᓕᐊᑎᑦᓯᓂᖏᓐᓄᑦ.
5. ᐊᕐᕌᒍᐊᓂ 2015, ᓄᓇᕗᑦ ᑐᓐᖓᕕᒃ ᑎᒥᖓᑦ ᐊᖏᖃᑎᒌᖓᓱᐊᕈᑎᖃᓚᐅᖅᑐᑦ ᖄᖓᒍᑦ ᑕᒪᑐᒪ $255.5−ᒥᓕᔭᓐ ᐊᖏᖃᑎᒋᓪᓗᒋᑦ ᒐᕙᒪᑐᖃᒃᑯᑦ ᒪᓕᓚᐅᓐᖏᓐᓂᖏᓐᓂᒃ ᓴᖅᑭᑎᒋᐊᖃᖅᓯᒪᔭᖏᓐᓂᒃ ᓴᖅᑭᑎᑕᐅᓚᐅᖅᑐᓂᒃ 1993−ᒥ ᐊᖏᕈᑎᑎᒍᑦ. ᑖᒃᑯᐊ ᐊᖏᓂᖅᓴᖏᑦ ᑮᓇᐅᔭᑦ ᐱᔭᐅᔪᑦ ᑐᕌᕐᓂᐊᖅᑐᑦ ᐃᓕᓐᓂᐊᖅᑎᑦᓯᔾᔪᑕᐅᓗᑎᒃ ᐃᓄᖕᓄᑦ ᐃᖅᑲᓇᐃᔭᕈᓐᓇᓕᕈᑕᐅᓗᑎᒃ.

ᑖᒃᑯᐊ ᓄᓇᕗᒥ ᐊᖏᕈᑏᑦ ᑕᑭᔪᒻᒪᕆᐅᖕᒪᑕ (300 ᒪᒃᐱᒐᐃᑦ!) ᐊᒻᒪ ᐱᔭᕆᐊᑐᒍᓐᓇᕐᒪᑦ ᑐᑭᓯᒐᓱᐊᕐᓗᒋᑦ ᐅᖃᐅᓯᖅᑕᖏᑦ ᐃᓗᐊᓃᑦᑐᑦ ᒪᓕᒐᑎᒎᕐᓂᖏᓐᓄᑦ.  ᓇᓂᓯᒍᑕᐅᒋᐊᖃᓚᐅᖅᑐᑦ ᐊᒥᓱᒻᒪᕆᖕᓂᑦ ᐱᕙᓪᓕᐊᑎᑕᐅᓪᓗᑎᒃ ᐃᓄᒃᑎᑕᑦ ᐊᒻᒪ ᐃᓄᐃᓐᓇᖅᑐᑦ.  ᖁᓕᓄᑦ 10 ᐊᕐᕌᒍᓄᑦ ᓇᓪᓕᐅᓐᓂᖅᓯᐅᖅᑎᓪᓗᒋᑦ ᐊᖏᕈᑏᑦ, ᓄᓇᕗᑦ ᑐᓐᖓᕕᒃ ᑎᒥᖓᑦ ᓴᖅᑭᑎᑦᓯᓚᐅᖅᑐᑦ ᐅᖃᐅᓯᖏᑦ ᑐᑭᓯᓇᓂᖅᓴᐅᔪᓂᒃ ᑖᒃᑯᓂᖓ ᓄᓇᕗᒥ ᐊᖏᕈᑎᓂᒃ ᓇᐃᓐᓂᖅᓴᐅᓪᓗᑎᒃ ᐊᒻᒪ ᐱᔭᕆᐊᑭᓐᓂᖅᓴᐅᓕᖅᑐᑎᒃ ᐃᓱᒪᒋᔭᐅᔪᑦ ᐊᖏᕈᑎᓂ.  ᑖᒃᑯᐊ ᑐᑭᓯᓇᕐᓂᖅᓴᐃᑦ ᐊᖏᕈᑏᑦ ᐱᔭᐅᔪᓐᓇᖅᑐᑦ ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦᑕ ᐃᑭᖃᖅᑭᕕᐊᓂ ᖃᕆᓴᐅᔭᒃᑯᑦ.

ᐅᓪᓕᐊᓂ ᔪᓚᐃ 9^th, ᓄᓇᕗᑦ ᓇᓪᓕᐅᓐᓂᖅᓯᐅᖅᑎᓪᓗᒍ, ᓄᓇᕗᑦ ᑐᓐᖓᕕᒃ ᑎᒥᖓᑦ ᐱᒋᐊᖅᑎᑦᓯᓚᐅᖅᑐᑦ ᓴᖅᑭᔮᖅᑎᑦᓯᔾᔪᑕᐅᓂᐊᕐᓂᖓᓂᒃ ᖁᕕᐊᓲᑕᐅᓂᖓ ᐊᖏᕈᑏᑦ 25-ᓄᑦ ᐊᕐᕌᒍᓄᑦ ᓇᓪᓕᐅᓐᓂᖅᓯᐅᕐᓂᖓ. ᓄᓇᕗᑦ ᑐᓐᖓᕕᒃ ᑎᒥᖓᑦ ᓯᕗᒃᑲᑕᖅᑎᐅᓂᐊᖅᑐᑦ ᖁᕕᐊᓲᑎᖃᕐᓂᐅᔪᓄᑦ ᐊᒻᒪ ᑐᓐᖓᓱᒃᑎᑦᑎᔨᐅᓗᑎᒃ ᐊᔾᔨᒌᓐᖏᑦᑐᓄᑦ ᖁᕕᐊᓱᕈᓘᔭᕈᑕᐅᔪᓄᑦ ᐊᕕᒃᑐᓯᒪᓂᐅᔪᒥ.  ᑕᒪᒃᑯᐊ ᖁᕕᐊᓲᑎᖃᕐᓂᐅᔪᑦ ᐅᔾᔨᕆᒋᐊᕐᓂᐊᖅᐸᓯ ᓄᓇᓕᑦᓯᓐᓂ!