ᑐᓴᕋᔅᓴᕈᖅᑎᑕᐅᕕᖓᑕ ᐅᓪᓗᖓ: ᔫᓂ 25, 2020

ᐱᔾᔪᑕᐅᔪᖅ: ᑐᔅᓯᕋᐅᓯᐅᖁᔨᔾᔪᑏᑦ; ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᔅᓯᕋᐅᓯᐅᖁᔨᔾᔪᑎᓖᑦ ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑎᓄᑦ (QCAP)

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᔅᓯᕋᐅᓯᐅᖁᔨᔾᔪᑎᓖᑦ ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑎᓄᑦ ᐃᓘᓐᓇᖏᓐᓂᒃ ᕿᑭᖅᑕᓂ ᓄᓇᓕᓕᒫᓂᑦ.

ᐊᑐᓂᑦ ᑭᒃᑯᑐᐃᓐᓇᐃᑦ ᐃᓄᐃᑦ ᐊᒻᒪᓗ ᓄᓇᓕᓐᓂᑦ ᑲᑐᔾᔨᖃᑎᒌᑦ ᐃᓘᓐᓇᑎᒃ ᕿᑭᖅᑕᓂ ᓄᓇᓕᖏᓐᓃᑦᑐᑦ ᑐᔅᓯᕋᐅᓯᐅᖃᑦᑕᖁᔭᐅᕗᑦ ᐱᓕᕆᐊᔅᓴᓄᑦ ᑲᒪᒋᔭᐅᓛᖅᑐᓄᑦ 2020-21 ᑮᓇᐅᔭᓄᑦ ᐊᐅᓚᕕᑦᑎᓐᓂ ᐊᕐᕌᒍᒥ. ᑕᒫᓂ $45,000ᖏᓐᓃᑦᑐᑦ ᐊᑐᖅᑕᐅᔪᓐᓇᕐᖓᑕ ᐊᑐᓂᑦ ᖁᓕᓄᑦ ᐱᖓᓱᓄᓪᓗ ᓄᓇᓕᐅᔪᓄᑦ.

ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑏᑦ ᓄᖅᑲᖅᑎᑕᐅᑲᐃᓐᓇᔪᒻᒪᑕ ᒫᑦᓯᐅᑉ−ᕿᑎᖏᓐᓂ ᐱᔾᔪᑎᒋᓪᓗᒍ ᐃᓱᒫᓗᓇᕐᓯᓯᒪᓂᕆᔪᔭᖓ ᐳᕝᕕᕆᓂᕐᒧᑦ−ᖃᓂᒪᓇᖅᑐᖅ ᓄᓇᕐᔪᐊᓕᒫᒥ ᓯᐊᒻᒪᐸᓪᓕᐊᔪᖅ. ᕿᑭᖅᑕᓂᒃᑯᑦ ᑲᑦᑐᖓᐃᕐᓯᒪᒻᒪᑕ ᐊᑦᑕᓇᖅᑐᒦᖁᔨᒐᑎᒃ ᐊᒻᒪᓗ ᖃᓄᐃᖁᔨᒐᑎᒃ ᐃᖅᑲᓇᐃᔭᖅᑎᑎᓐᓂᒃ ᐊᒻᒪᓗ ᓄᓇᕗᒻᒥᐅᓕᒫᓂᑦ ᐊᒻᒪᓗ ᓯᐊᒻᒪᖁᔨᒐᑎᒃ ᖃᓂᒪᓇᖅᑐᒥᒃ. ᔫᓂ 1, 2020 ᓇᓗᓇᐃᕐᓯᓚᐅᖅᑎᓪᓗᒍ ᓄᓇᕗᒥ ᐃᓱᒪᑕᖅ ᐃᓄᓕᒫᓄᑦ ᐋᓐᓂᐊᖅᑐᓕᕆᓂᕐᒧᑦ, ᐃᓚᖏᑦ ᑭᓪᓕᓕᐅᕈᑕᐅᓯᒪᔪᔪᑦ ᒫᓐᓇ ᐸᓚᕐᓯᐅᔾᔭᐅᕙᓪᓕᐊᓕᕐᖓᑕ ᓄᓇᕗᒥ ᓇᒥᓕᒫᖅ ᐊᒥᓲᓂᕐᓵᕐᔫᖃᑦᑕᕈᓐᓇᕐᓯᕙᓪᓕᐊᓕᖅᑐᑎᒃ ᑲᑎᕙᑦᑐᑦ ᐊᒻᒪᓗ ᐊᒥᓲᙱᓪᓗᑎᒃ ᑲᑎᒻᒪᔪᓂᑦ ᐱᓕᕆᑎᑦᑎᕙᑦᑐᑦ.

ᐱᔾᔪᑎᒋᓪᓗᒍ ᖃᓂᒪᓇᖅᑐᖅ ᓄᓇᕐᔪᐊᓕᒫᒥ, ᕿᑭᖅᑕᓂᒃᑯᑦ ᐃᓘᓐᓇᖏᓐᓂᒃ ᐃᑲᔫᑎᓄᑦ ᑐᔅᓯᕋᖅᑐᓂᑦ ᐊᑐᕆᐊᖃᖅᑎᑦᑎᔪᑦ ᐋᓐᓂᐊᖅᑕᐃᓕᓂᕐᒧᑦ ᐊᑦᑕᓇᖅᑐᒦᑦᑕᐃᓕᓂᕐᒧᓪᓗ ᐸᕐᓇᐅᑎᓂᑦ. ᑖᒃᑯᐊ ᐸᕐᓇᐅᑏᑦ ᐅᔾᔨᓇᕐᓯᑎᑦᑎᓯᒪᔭᕆᐊᓖᑦ ᖃᓄᖅ ᐱᓕᕆᐊᕐᒥ ᐃᓚᒋᔭᐅᓂᐊᖅᑐᑦ ᓴᐳᑎᔭᐅᓯᒪᓂᐊᕐᒪᖔᑕ ᓲᕐᓗ ᐃᒫᒃ ᐊᑐᖃᑦᑕᕐᓗᑎᒃ ᓇᒻᒥᓂᖅ ᐊᐃᑦᑐᖅᑕᐅᔾᔭᐃᒃᑯᑎᖏᓐᓂᒃ ᓲᕐᓗ ᑮᓇᖏᓐᓄᑦ ᒪᑐᐊᕐᓂᑦ ᐊᒻᒪᓗ ᐅᖓᓯᒌᔾᔫᒥᖃᑦᑕᓂᐊᕐᓂᖏᓐᓂᒃ, ᐊᒻᒪᓗᑦᑕᐅᖅ ᖃᓄᖅ ᐃᓪᓗᐃᑦ ᐊᑐᖅᑕᖏᑦ ᓴᓗᒻᒪᓴᖅᑕᐅᖃᑦᑕᓂᐊᕐᒪᖔᑕ ᐱᓕᕆᐊᕐᒥ ᑲᒪᒋᔭᖃᕐᓂᖏᓐᓂ.

ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑏᑦ ᐊᑭᓕᖅᑕᐅᓯᒪᒻᒪᑕ ᕿᑭᖅᑕᓂᒃᑯᑦ ᐃᑲᔫᓯᐊᔅᓴᓄᑦ ᑮᓇᐅᔭᖏᓐᓂᑦ. ᑮᓇᐅᔭᐃᑦ ᐃᑲᔫᓯᐊᔅᓴᓄᑦ ᑮᓇᐅᔭᓄᑦ ᑐᕌᖓᔪᑦ ᑐᖅᑯᖅᑕᐅᕙᓪᓕᐊᔪᓂᑦ ᑮᓇᐅᔭᓂᑦ ᐱᓯᒪᔪᑦ, ᑐᖅᑯᖅᑕᐅᕙᓪᓕᐊᔪᑦ ᑮᓇᐅᔭᑦ ᐊᒥᓱᕈᕐᐸᓪᓕᐊᓂᖏᓐᓂ ᑮᓇᐅᔭᓂᑦ ᐃᓯᖅᑐᖁᑎᒋᕙᑦᑕᖏᓐᓂ ᑐᕌᖃᑦᑕᕐᖓᑕ ᐃᑲᔫᓯᐊᔅᓴᓄᑦ ᑮᓇᐅᔭᓄᑦ ᐊᒥᓱᕈᒃᑲᓐᓂᖁᓪᓗᒋᑦ ᐃᑲᔫᑎᐅᕙᑦᑐᑦ ᐃᓄᓐᓄᑦ ᑐᕌᖓᔪᑦ.

ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑏᑦ ᐃᑲᔫᑎᖃᕐᐸᑦᑐᑦ ᓄᓇᓕᓐᓂᑦ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᖑᕙᑦᑐᓂᑦ. ᐊᐅᓪᓚᕐᓯᒪᑎᑦᑎᖃᑦᑕᕐᓂᖅ ᐊᒻᒪᓗ ᒥᕐᓱᑎᑦᑎᖃᑦᑕᕐᓂᖅ ᓯᕗᓪᓕᐅᔾᔭᐅᓯᒪᒐᓗᐊᖅᑎᓪᓗᒋᒃ, ᕿᑭᖅᑕᓂᒃᑯᑦ ᐃᓱᒪᒋᔭᖃᖃᑦᑕᓂᐊᕐᒥᔪᑦ ᐊᓯᖏᓐᓂᒃ ᐃᓄᓐᓄᑦ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᔅᓴᓂᑦ.

ᑐᔅᓯᕋᐅᑏᑦ ᑲᒪᒋᔭᐅᔪᓐᓇᖅᑐᑦ ᖃᕋᓴᐅᔭᒃᑯᑦ ᐅᕘᓇ https://www.qia.ca/qcap-application/.

ᐃᑲᔪᖅᑕᐅᔭᕆᐊᖃᕈᕕᑦ ᖃᕋᓴᐅᔭᒃᑯᑦ ᑐᔅᓯᕋᐅᓯᐅᕐᓂᕐᒥᒃ 867-975-8438ᒧᑦ ᑎᑎᕋᕐᓗᑎᓪᓘᓐᓃᑦ ᐃᕐᖐᓈᖅᑕᐅᑎᒃᑯᑦ ᐅᕗᖓ qcap@qia.ca.

ᒪᑐᕕᔅᓴᖓ ᑐᔅᓯᕋᐅᓯᐅᕐᓂᕐᒧᑦ ᔪᓚᐃ 12, 2020 ᓯᕿᙳᔭᖅ 12:00ᒨᖅᑲᑦ ᐅᓐᓄᐊᒃᑯᑦ ᑲᓇᓐᓇᐅᑉ ᓯᕿᙳᔭᖓ ᒪᓕᑦᑐᒍ.

ᑐᑭᓯᒋᐊᒃᑲᓐᓂᕈᒪᒍᕕᑦ, ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᔨᐅᕋHᐃ,

ᑐᑭᒧᐊᒃᑎᑦᑎᔨ ᑐᓴᐅᒪᖃᑦᑕᐅᑎᔾᔪᑎᓄᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

szerehi@qia.ca

867.975.8413

1.800.667.2742