ᐃᓄᖕᓄᑦ ᑐᓴᒐᒃᓴᖅ: ᐱᓇᓱᖃᑕᐅᔪᒪᔪᓄᑦ ᑲᑎᒪᔨᐅᕝᕕᐅᔪᓄᑦ
ᓴᖅᑭᑕᖅ: ᒪᐃ 14, 2020
ᐱᔾᔪᑎᖓ: ᐱᓇᓱᖃᑕᐅᔪᒪᔪᓄᑦ ᑲᑎᒪᔨᐅᕝᕕᐅᔪᓄᑦ; ᐃᓕᖅᑯᓯᓕᕆᓂᕐᒧᑦ ᓄᓇᓕᓐᓄᓪᓗ ᐱᓇᓱᐊᕈᑕᐅᔪᓄᑦ, ᑲᑭᕙᒃ ᑲᑐᔾᔨᖃᑎᒌᖏᑦ, ᓄᓇᕗᒥ ᐸᕐᓇᐃᓂᕐᒧᑦ ᑲᑎᒪᔨᖏᑦ, ᓄᓇᕗᒥ ᒪᑭᓐᓇᓱᐊᖅᑏᑦ ᑲᑎᒪᔨᖏᑦ, ᐃᓄᐃᑦ ᑕᑯᓐᓈᒐᒃᓴᓕᕆᔨᖏᑦ, ᓄᓇᕗᒥ ᐊᕙᑎᓕᕆᓂᕐᒧᑦ ᑲᑎᒪᔨᖏᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᕿᓂᕐᒪᑕ ᐆᒻᒪᕆᒃᑐᓂᒃ ᐱᓪᓗᕆᒃᓴᕈᓐᓇᖅᑐᓂᓪᓗ ᐃᓄᖕᓂᑦ ᑲᑎᒪᔨᐅᓂᐊᖅᑐᓄᑦ ᐊᔾᔨᒌᙱᑦᑐᓂᒃ ᑲᑎᒪᔨᐅᕝᕕᐅᔪᓂᒃ. ᐃᓱᒪᒋᔭᐅᒋᐊᕈᒪᒍᕕᑦ, ᐱᓇᓱᖃᑕᐅᔪᑦ ᐱᔪᒪᓂᖃᑦᓯᐊᕆᐊᖃᖅᑐᑦ ᐱᓕᕆᔪᒪᓗᑎᒃ ᑭᒡᒐᖅᑐᐃᑦᓯᐊᕈᒪᓗᑎᒃ ᐱᔭᐅᔪᒪᔪᓂᒃ ᕿᑭᖅᑕᓂ ᐃᓄᖕᓄᑦ ᐊᒻᒪᓗ ᑐᑭᓯᐅᒪᓂᖃᕐᓗᑎᒃ ᓄᓇᕗᒥ ᐊᖏᕈᑎᖓᓂ ᑐᕌᖓᔪᓂᒃ ᐱᓕᕆᐊᒃᓴᕆᔭᐅᔪᓄᑦ ᐃᓂᒃᓴᐅᔪᓂᑦ.
ᕿᑭᖅᑕᓂᒃᑯᑦ ᐃᓕᖅᑯᓯᓕᕆᓂᕐᒧᑦ ᓄᓇᓕᓐᓄᓪᓗ ᐱᓇᓱᐊᕈᑕᐅᔪᓄᑦ − ᐃᓅᓱᑦᑐᓂᑦ ᑭᒡᒐᑐᖅᑎ (ᐊᑕᐅᓯᖅ ᐃᓂᒃᓴᖅ, ᐱᖓᓱᓄᑦ ᐊᕐᕌᒍᓄᑦ)
ᕿᑭᖅᑕᓂᒃᑯᑦ ᐃᓕᖅᑯᓯᓕᕆᓂᕐᒧᑦ ᓄᓇᓕᓐᓄᓪᓗ ᐱᓇᓱᐊᕈᑕᐅᔪᓄᑦ ᑲᑎᒪᔨᕋᓛᕐᓄᑦ (CCIC) ᐱᓇᓱᐊᕋᔅᓴᖅᑖᖃᑦᑕᕐᖓᑕ ᕿᑭᖅᑕᓂᒃᑯᑦ ᑲᑎᒪᔨᖏᓐᓃᙶᖅᑐᓂᑦ. ᑲᑎᒪᔨᕋᓛᑦ ᐅᖃᐅᔾᔨᒋᐊᖅᑎᐅᕙᑦᑐᑦ ᐊᒻᒪᓗ ᐊᑐᓕᖁᔨᔾᔪᑎᖃᕐᐸᑦᑐᑎᒃ ᑲᑎᒪᔨᓄᑦ ᐃᓅᓯᕐᒨᖓᔪᓂᑦ ᐃᓕᖅᑯᓯᕐᒨᖓᔪᓂᓪᓗ ᐱᔾᔪᑕᐅᕙᑦᑐᓂᑦ ᐊᒻᒪᓗ ᐱᓕᕆᐊᖑᔭᕆᐊᓕᓐᓂᑦ ᐃᑲᔪᖅᑕᐅᔾᔪᑎᒋᒋᐊᓕᖏᓐᓂᒃ ᕿᑭᖅᑕᓂ ᓄᓇᓖᑦ. ᑲᑎᒪᔨᕋᓛᑦ ᑕᓪᓕᒪᐅᕙᑦᑐᑦ ᑲᑎᒪᔨᖏᑦ, ᐊᒻᒪᓗ ᐃᑲᔪᖅᑕᐅᕙᑦᑐᑎᒃ ᐃᓅᓯᓕᕆᓂᕐᒧᑦ ᐸᕐᓇᐃᔨᓂᑦ ᑲᑎᒪᔨᖓᑎᒍᑦ.
ᑲᑭᕙᒃ ᑲᑐᔾᔨᖃᑎᒌᑦ (ᐊᑕᐅᓯᖅ ᐃᓂᒃᓴᖅ, ᒪᕐᕉᓄᑦ ᐊᕐᕌᒍᓄᑦ ᑲᑎᒪᔨᐅᓗᓂ)
ᑲᑭᕙᒃ ᑲᑐᔾᔨᖃᑎᒌᖏᑦ ᐱᓕᕆᐊᒃᓴᖃᖅᑐᑦ ᓄᓇᓕᖕᓂᑦ ᐊᒻᒪᓗ ᐱᕙᓪᓕᐊᔪᓕᕆᓂᕐᒧᑦ ᑎᒥᖁᑎᒋᔭᐅᔪᖅ ᐱᔨᑦᓯᖅᑐᒥᒃ ᐃᓄᖕᓂᑦ, ᐃᑲᔪᖅᖢᑎᒃ ᓇᖕᒥᓂᖅ ᐃᖅᑲᓇᐃᔭᕐᕕᓐᓂᑦ, ᐃᖅᑲᓇᐃᔮᒃᓴᓂ ᐊᒻᒪᓗ ᐱᓕᒻᒪᒃᓴᕈᑎᒃᓴᓂᒃ ᓴᙱᓕᖅᑎᑦᓯᓂᐊᖅᑐᒥᒃ ᓄᓇᓕᖕᓂ ᕿᑭᖅᑕᓂ ᓄᓇᓕᖕᓂ.
ᓄᓇᕗᒥ ᐸᕐᓇᐃᔩᑦ (ᐊᑕᐅᓯᖅ ᐃᓂᒃᓴᖅ, ᐱᖓᓱᓄᑦ ᐊᕐᕌᒍᓄᑦ ᑲᑎᒪᔨᐅᓗᓂ)
ᓄᓇᕗᒥ ᐸᕐᓇᐃᓂᕐᒧᑦ ᑲᑎᒪᔩᑦ ᐱᓕᕆᐊᒃᓴᖃᖅᑐᑦ ᐱᕙᓪᓕᐊᑎᑦᓯᓂᕐᒥᒃ, ᐊᑐᓕᖅᑎᑦᓯᓂᕐᒥᒃ ᐊᒻᒪᓗ ᓇᐅᑦᑎᖅᓱᕐᓂᕐᒥᒃ ᓄᓇᓂᒃ ᐊᑐᕐᓂᕐᒧᑦ ᐸᕐᓇᐅᑎᓂᒃ ᒪᓕᒐᒃᓴᐅᔪᓂᒃ ᖃᓄᖅ ᓄᓇᓂᒃ ᐱᕙᓪᓕᐊᑎᑦᓯᔪᓐᓇᕐᒪᖔᑖᒃ ᓄᓇᕗᒥ.
ᓄᓇᕗᒥ ᒪᑭᓐᓇᓱᐊᖅᑏᑦ ᑲᑎᒪᔨᖏᑦ (ᐊᑕᐅᓯᖅ ᐃᓂᒃᓴᖅ, ᐊᑕᐅᓯᕐᒧᑦ ᐊᕐᕌᒍᒧᑦ ᑲᑎᒪᔨᐅᓗᓂ)
ᓄᓇᕗᒥ ᒪᑭᓐᓇᓱᐊᖅᑏᑦ ᑲᑎᒪᔨᖏᑦ ᖃᐅᔨᒪᑎᑦᓯᖃᑦᑕᖅᑐᑦ ᐅᔾᔨᕈᓱᒃᑎᑦᑎᓪᓗᑎᒃ, ᐱᕕᒃᓴᖃᖅᑎᑦᓯᓪᓗᑎᒃ, ᐃᓚᐅᑎᑦᓯᓪᓗᑎᒃ ᖃᓄᑐᐃᓐᓇᓕᒫᖅ ᐃᓅᓯᕐᓂ ᐃᑲᔪᕈᒪᓪᓗᑎᒃ ᓄᓇᕗᒥᐅᓂ ᑎᒥᒥᒍᑦ ᐊᔪᕈᑎᖃᖅᑐᓂᒃ ᓇᖕᒥᓂᖅᓱᓕᕈᓐᓇᖅᓯᓂᕐᒥᒃ, ᐊᒻᒪᓗ ᐃᓚᐅᑦᓯᐊᓕᕈᓐᓇᕐᓂᕐᒥᒃ ᓄᓇᓕᖏᓐᓂ.
ᐃᓄᐃᑦ ᑕᑯᓐᓈᒐᒃᓴᓕᕆᔩᑦ (ᐊᑕᐅᓯᖅ ᐃᓂᒃᓴᖅ, ᐱᖓᓱᓄᑦ ᐊᕐᕌᒍᓄᑦ ᑲᑎᒪᔨᐅᓗᓂ)
ᐃᓄᐃᑦ ᑕᑯᓐᓈᒐᒃᓴᓕᕆᔨᒃᑯᑦ ᖃᑭᒪᑎᑦᓯᖃᑦᑕᖅᑐᑦ ᑐᑭᓯᐅᒪᑎᑦᓯᓪᓗᑎᒃ ᐃᓄᐃᑦ ᐃᓕᖅᑯᓯᖓᓂ ᐅᖃᐅᓯᖓᓂᓗ ᐊᑐᕐᓗᑎᑦ ᐊᔾᔨᒌᙱᑦᑐᓂᒃ ᓴᖅᑭᔮᕐᕕᐅᔪᓐᓇᖅᑐᓂᒃ. ᐃᓄᐃᑦ ᑕᑯᓐᓈᒐᒃᓴᓕᕆᔨᒃᑯᑦ ᑕᑯᒃᓴᐅᑎᖃᑦᑕᖅᑕᖏᑦ ᐃᓕᖅᑯᓯᕐᒥᙶᖅᑐᓂᒃ ᐊᒻᒪᓗ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐊᑐᕈᓐᓇᖅᑎᑕᐅᓂᖏᓐᓄᑦ.
ᓄᓇᕗᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ (ᐊᑕᐅᓯᖅ ᐃᓂᒃᓴᖅ, ᐱᖓᓱᓄᑦ ᐊᕐᕌᒍᓄᑦ ᑲᑎᒪᔨᐅᓗᓂ)
ᓄᓇᕗᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ (NIRB) ᑎᒥᙳᖅᑎᑕᐅᓯᒪᔪᑦ ᐊᖏᕈᑎᑎᒍᑦ ᐃᓄᓕᒫᓄᑦ ᑐᕌᖓᓪᓗᑎᒃ ᓄᓇᕗᑦ ᐊᖏᖃᑎᒌᒍᑎᖏᑎᒍᑦ ᖃᐅᔨᓴᖃᑦᑕᓂᐊᕐᖓᑕ ᐊᑑᑎᔪᓐᓇᖅᑐᓂᑦ ᐱᕙᓪᓕᐊᔪᓕᕆᔾᔪᑕᐅᔪᒪᔪᓂᑦ ᓄᓇᕗᑦ ᓇᓗᓇᐃᖅᑕᐅᓯᒪᓂᖓᑕ ᐃᓗᐊᓂ ᐊᖏᕐᓯᓚᐅᙱᓐᓂᖏᓐᓂ ᐱᓕᕆᐊᕐᒥ ᑲᔪᓯᑎᑦᑎᒋᐊᕈᑕᐅᓂᐊᖅᑐᓂᑦ. ᐊᑐᕐᐸᑦᑐᑦ ᑕᒪᒃᑮᓐᓂᒃ ᐱᖅᑯᓯᖅᑎᒍᑦ ᖃᐅᔨᒪᔭᖏᓐᓂᒃ ᐊᒻᒪᓗ ᐃᓕᓴᕆᔭᐅᓯᒪᔪᓂᑦ ᖃᐅᔨᓴᖅᑐᓕᕆᔩᑦ ᐱᓕᕆᔾᔪᓯᖏᓐᓂᒃ, ᐊᕙᑎᓕᕆᔨᒃᑯᑦ ᖃᐅᔨᓴᓲᑦ ᐆᒪᓂᓖᑦ ᐱᐅᓯᖏᓐᓂᒃ ᐊᒻᒪᓗ ᓄᓇᓖᑦ−ᒪᑭᒪᓇᓱᐊᕈᑎᖏᓐᓂᒃ ᐊᑑᑎᕕᐅᓂᐊᖅᑐᓂᑦ ᑐᔅᓯᕋᐅᑕᐅᓯᒪᔪᓄᑦ ᐊᒻᒪᓗ ᐊᑐᓕᖁᔨᔾᔪᑎᓕᐅᕐᐸᑦᑐᑎᒃ ᐊᒻᒪᓗ ᑐᑭᑖᕈᑎᖃᕐᐸᑦᑐᑎᒃ ᓇᓪᓕᐊᑦ ᐱᓕᕆᐊᔅᓴᑦ ᑲᔪᓯᒍᓐᓇᓂᐊᕐᒪᖔᑕ. ᑲᑎᒪᔩᑦ ᐋᖅᑭᔅᓯᖃᑦᑕᕈᓐᓇᕐᒥᔪᑦ ᓇᐅᑦᑎᕐᓱᕈᑕᐅᖃᑦᑕᓂᐊᖅᑐᓂᑦ ᐱᓕᕆᐊᓂᑦ ᖃᐅᔨᓴᖅᑕᐅᓯᒪᔪᓂᑦ ᐊᖏᖅᑕᐅᓯᒪᔪᓂᓪᓗ ᑲᔪᓯᒍᓐᓇᕐᓂᕋᖅᑕᐅᓯᒪᔪᓂᑦ.
ᕿᑭᖅᑕᓂᒃᑯᑦ ᓇᓗᓇᐃᖅᓯᒍᒪᕗᑦ ᐃᓄᐃᑦ ᐃᓚᐅᑦᑎᐊᕐᓂᖏᓐᓄᑦ ᐊᑐᓕᖅᑎᑕᐅᓂᖓᓄᑦ ᓄᓇᕗᒥ ᐊᖏᕈᑎᐊ. ᑕᐃᒪᓐᓇᐃᑎᓪᓗᒍ, ᕿᑭᖅᑕᓂᒃᑯᑦ ᐊᑐᓕᖅᑎᑦᓯᒪᔪᑦ ᒪᑐᐃᖓᑦᓯᐊᖅᑐᒥᒃ ᓵᙵᔭᐅᔪᓐᓇᖅᑐᓂᒃ ᖃᓄᐃᓕᐅᕈᑎᓂᒃ ᐃᓱᒪᒋᔭᐅᓂᐊᖅᑎᓪᓗᒋᑦ ᐱᔪᓐᓇᕐᓂᖃᖅᑐᓂ ᐱᓇᓱᖃᑕᐅᔪᓄᑦ. ᖃᐅᔨᒪᓂᐊᖅᑯᓯ, ᐸᓖᓯᒃᑯᓐᓂᑦ ᖃᐅᔨᓴᖅᑕᐅᒋᐊᖃᕐᓂᐊᕐᒥᔪᖅ ᑎᒃᑯᐊᖅᑕᐅᔪᑦ/ᓂᕈᐊᒐᒃᓴᓕᐅᖅᑕᐅᔪᑦ.
ᐱᓇᓲᑎᑎᑦ ᓈᒪᓗᑎᒃ ᑐᓂᓗᒋᑦ, ᐃᓄᒃᑎᑐᑦ ᖃᓪᓗᓈᑎᑐᓪᓘᓐᓃᑦ, ᐅᖃᖅᓯᒪᓗᓂ ᓇᓪᓕᐊᖕᓂ ᐃᓂᒃᓴᒥ ᐱᓇᓱᖕᒪᖔᖅᐲᑦ, ᐊᒻᒪᓗ ᐱᔪᓐᓇᕐᓂᕆᔭᑎᑦ ᓇᓗᓇᐃᔭᖅᓯᒪᓗᑎᒃ ᓇᒃᓯᐅᑎᓗᒋᑦ ᐅᕗᖓ:
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
ᑎᑎᖅᑲᖅᑖᕐᕕᐊ 1340
ᐃᖃᓗᐃᑦ, ᓄᓇᕗᑦ X0A 0H0
ᐅᖄᓚᐅᑖ: (867) 975-8400
ᓱᑲᑦᑐᒃᑰᕈᑖ: (867) 979-3238
ᐊᑭᖃᙱᑦᑐᒃᑯᑦ ᐅᖄᓚᐅᑖ: 1-800-667-2742
ᐃᕐᖐᓐᓈᖅᑕᐅᑖ: nominations@qia.ca
ᑐᑭᓯᒃᑲᓐᓂᕈᒪᒍᕕᑦ ᑖᒃᑯᓂᖓ ᐱᕕᒃᓴᐅᔪᑦ ᒥᒃᓵᓄᑦ, ᖃᐅᔨᒋᐊᕈᓐᓇᖅᑐᑎᑦ ᕿᑭᖅᑕᓃᒃᑯᓐᓄᑦ ᐅᕝᕙᓘᓐᓃᑦ ᓄᓇᓕᖕᓂᑦ ᑐᓴᐅᒪᑎᑦᓯᔨᒧᑦ ᓄᓇᓕᔅᓯᓐᓂ.
ᒪᑐᕕᔅᓴᖓ ᑐᔅᓯᕋᐅᑎᓄᑦ ᒪᐃ 29, 2020 5:00ᒧᐊᖅᑎᓪᓗᒍ ᐅᓐᓄᒃᑯᑦ.
ᑐᓴᕋᔅᓴᐃᑦ ᒥᔅᓵᓄᑦ ᑐᑭᓯᒋᐊᕈᒪᔪᓄᑦ, ᑐᑭᓯᒋᐊᕐᕕᐅᖃᑦᑕᕐᓕ:
ᓰᒪ ᓴᕼᐊ ᔨᐊᕆHᐃ
ᑐᑭᒧᐊᒃᑎᑦᓯᔨ ᑐᓴᐅᒪᖃᑦᑕᐅᑎᔾᔪᑎᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(867) 975.8413
1.800.667.2742
