ᐊᕐᕌᓂ, ᐋᒡᒋᓯ 14, 2019ᖑᑎᓪᓗᒍ, ᑲᓇᑕᐅᑉ ᒐᕙᒪᒃᑯᖏᑦ ᓇᓗᓇᐃᕐᓯᔪᒻᒪᑕ ᑐᑭᓯᓂᕋᖅᑐᑎᒃ ᐊᒻᒪᓗ ᒪᒥᐊᑦᑐᑎᒃ ᐅᓪᓗᒥᐅᓕᖅᑐᖅ ᖃᓪᓗᓈᑎᑐᑦ ᐱᐅᓯᕆᔭᐅᔪᓂᑦ ᐊᑐᖅᑕᐅᑎᑦᑎᓯᒪᓂᖏᓐᓂᒃ ᐃᓄᓐᓄᑦ ᕿᑭᖅᑕᓂ ᓄᓇᓕᓐᓂᑦ ᐊᑯᓐᓂᖏᓐᓂ ᐊᕐᕌᒍᐃᑦ 1950 ᐊᒻᒪᓗ 1975, ᓲᕐᓗ ᒪᑯᓂᖓ ᐊᐅᓪᓛᕈᒪᙱᑦᑐᓂᑦ ᐊᐅᓪᓛᑎᑦᑎᒐᓱᐊᒡᒐᕐᓯᒪᒻᒪᑕ, ᐃᓚᒌᓂᑦ ᐊᕕᑎᑦᑎᓂᖅ, ᐊᒻᒪᓗ ᕿᒻᒥᓂᑦ ᑐᖁᕋᐃᓂᖅ.

ᒪᒥᐊᕝᕕᖃᖅᑎᓪᓗᒋᑦ ᐊᑎᓕᐅᕐᓯᓐᓈᔪᒻᒥᔪᑦ ᑐᑭᓯᓯᒪᖃᑎᒌᑦᑐᑎᒃ ᐊᖏᖃᑎᒌᒍᑎᓂᑦ (MOU) ᐊᒻᒪᓗ ᓱᓕᓂᕋᖅᑐᑎᒃ ᐅᖃᖅᑐᑎᒃ ᓄᑖᖑᓕᖅᑐᒥᒃ ᑲᑐᔾᔨᖃᑎᒌᒍᑎᖃᕐᓂᐊᕐᓂᕋᖅᑐᑎᒃ ᓈᒻᒪᑦᑐᒧᑦ ᑐᕌᖓᔪᓂᑦ ᐊᓯᔾᔩᒍᒪᓪᓗᑎᒃ.

ᐅᓪᓗᒥᒧᑦ ᑎᑭᑦᑐᒍ, ᒐᕙᒪᑐᖃᒃᑯᑦ ᐃᑲᔫᑎᖃᕐᓂᐊᕐᓂᕋᕐᓯᒪᔪᑦ $20 ᒥᓕᐊᓐᓂᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐃᖅᑲᓇᐃᔮᖏᓐᓄᑦ ᑐᕌᖓᔪᓂᑦ ᐱᔾᔪᑎᓕᓐᓂᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᓂᑦ. ᐋᔩᖃᑎᒌᓐᓃᑦ ᑎᑭᐅᑎᔪᒪᓪᓗᑕ ᑮᓇᐅᔭᑎᒍᑦ ᑐᕌᒐᑦᑎᓐᓄᑦ ᐊᑑᑎᕕᐅᒻᒪᑕ ᖃᓂᒪᓇᖅᑐᒧᑦ (COVID-19) ᒫᓐᓇ.

ᕿᑭᖅᑕᓂᒃᑯᑦ ᐃᖅᑲᓇᐃᔮᖏᑦ ᐱᓇᓱᐊᕈᑎᖏᓐᓂᒃ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᓅᖓᔪᓂᑦ ᐊᑑᑎᕕᐅᒻᒥᒻᒪᑕ ᖃᓂᒪᓇᖅᑐᒧᑦ (COVID-19), ᒪᑐᓯᒪᐅᔪᒻᒪᑕ ᐊᓪᓚᕝᕕᖏᑦ ᐊᒻᒪᓗ ᐃᑲᔫᑎᒋᕙᑦᑕᖏᑦ ᒫᑦᓯᐅᑉ−ᕿᑎᖏᓐᓂ ᔫᓂᐅᑉ−ᕿᑎᖏᓐᓄᑦ ᑎᑭᑦᑐᒍ.

ᐅᓪᓗᒥᒧᑦ ᑎᑭᑦᑐᒍ, ᕿᑭᖅᑕᓂᒃᑯᑦ ᐊᑐᕐᓯᒪᒻᒪᑕ ᐃᓚᖏᓐᓂᒃ ᓯᕗᓪᓕᕐᒥ ᐱᓇᓱᐊᕈᑕᐅᔪᓐᓇᕐᓯᒪᔪᓂᑦ ᐱᓯᒪᔭᖏᓐᓂᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐃᖅᑲᓇᐃᔭᖅᑎᑖᕐᓂᕐᒧᑦ ᕿᒻᒦᑦ ᐊᑐᖅᑕᐅᒋᐊᒃᑲᓐᓂᖁᓪᓗᒋᑦ ᑐᑭᒧᐊᑦᑎᑦᑎᔨᐅᓂᐊᖅᑐᒥᒃ, ᑖᓐᓇ ᑲᒪᒋᔭᖃᓗᐊᕋᔭᖅᑐᖅ ᕿᒻᒦᑦ ᒥᔅᓵᓅᖓᔪᓂᑦ ᐱᓕᕆᐊᔅᓴᓂᑦ ᐱᓕᕆᐊᓂᓪᓗ. ᕿᒻᒦᑦ ᐊᑐᖅᑕᐅᒋᐊᒃᑲᓐᓂᖁᓪᓗᒋᑦ ᑐᑭᒧᐊᑦᑎᑦᑎᔨᐅᑉ ᐃᖅᑲᓇᐃᔮᕆᖃᑦᑕᓂᐊᖅᑕᖏᑦ ᒪᑯᐊ:

• ᐋᖅᑭᔅᓱᐃᓂᖅ ᑐᑭᓯᐅᒪᔾᔪᑎᔅᓴᖃᕐᕕᒻᒥᑦ ᕿᒻᒥᖃᖅᑎᐅᕙᑦᑐᑦ ᕿᒧᔅᓯᓂᑦ ᒥᔅᓵᓄᑦ ᕿᑭᖅᑕᓂ ᓄᓇᓕᐅᔪᓂᑦ
• ᐱᒋᐊᕐᓗᓂ ᖃᐅᔨᓴᕈᑎᖃᕐᓂᕐᒥᒃ ᕿᒻᒥᓂᑦ ᕿᒧᔅᓯᖁᑎᖃᖅᑎᐅᕙᑦᑐᓂᑦ ᕿᑭᖅᑕᓂ ᓄᓇᓕᐅᔪᓂᑦ ᐱᔪᓐᓇᕐᓂᖏᑕ ᒥᔅᓵᓅᖓᔪᓂᑦ ᐊᒻᒪᓗ ᐃᑲᔪᖅᑕᐅᔾᔪᑎᒋᒋᐊᓕᖏᓐᓂᒃ ᖃᐅᔨᓴᕈᑎᖃᕐᓂᕐᒥᒃ

ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐊᑑᑎᖃᕐᓯᒪᓪᓚᕆᑦᑐᑦ ᑐᑭᓯᔭᐅᑎᑦᑎᓂᕐᒥᒃ ᐱᓪᓚᑦᑖᓂᑦ ᑕᐃᔅᓱᒪᓂ ᓈᒻᒪᖏᑦᑐᓕᕆᔾᔪᑕᐅᖃᑦᑕᕐᓯᒪᔪᒥᓂᕐᓂᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᑲᒪᒋᔭᐅᔪᓂᑦ. ᕿᑭᖅᑕᓂᒃᑯᑦ ᑲᑦᑐᖓᐃᕈᑎᖃᕐᓯᒪᔪᑦ ᐱᓕᕆᖃᑎᖃᕐᓂᐊᕐᓂᕐᒧᑦ ᑲᑐᔾᔨᖃᑎᒋᕙᑦᑕᑎᓐᓂᒃ ᑲᔪᓯᑎᑦᑎᓗᑎᒃ ᐱᕙᓪᓕᐊᑎᑦᑎᓂᕐᒥᒃ ᐋᖅᑭᐅᒪᑎᑦᑎᓂᕐᒥᒃ ᑭᐅᔾᔪᑎᒋᓂᐊᖅᑕᖏᓐᓂᒃ ᐊᑐᓕᖁᔨᔾᔪᑕᐅᓯᒪᔪᓄᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐱᔭᕇᕈᑎᖏᓐᓂ ᐅᓂᒃᑳᓕᐊᕆᓯᒪᔭᖏᓐᓂᒃ.

ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᓯᕗᓪᓕᕐᐹᖑᓪᓗᑎᒃ ᐃᓄᓐᓄᑦ−ᐃᑲᔪᖅᑕᐅᓯᒪᓪᓗᑎᒃ ᐊᒻᒪᓗ ᐃᓐᓄᓄᑦ−ᑐᑭᒧᐊᑦᑎᑕᐅᓪᓗᑎᒃ ᐱᓇᓱᐊᕈᑕᐅᓯᒪᒻᒪᑕ ᑕᐃᒫᒃ. ᐊᔾᔨᒋᔭᐅᙱᑦᑐᒥᓪᓗ ᑐᑭᓕᐅᔾᔨᓯᒪᓗᑎᒃ ᐃᓘᓐᓇᖏᓐᓅᖓᔪᓂᑦ ᓄᓇᓕᓐᓄᑦ ᓈᒻᒪᑦᑐᓕᖁᔨᓪᓗᑎᒃ ᖃᐅᔨᓴᕈᑎᖃᕐᓯᒪᒻᒪᑕ ᑐᑭᒧᐊᑦᑎᑕᐅᓪᓗᓂ ᓄᓇᖃᖅᑐᑐᖃᕐᓄᑦ ᑎᒥᐅᔪᒧᑦ. ᑐᑭᓯᒃᑲᓐᓂᕈᒪᒍᔅᓯ ᑐᑭᓯᒋᐊᒃᑲᓐᓂᖃᑦᑕᕆᔅᓯ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᒥᔅᓵᓅᖓᔪᓂᑦ ᐅᕗᖓ ᖃᐅᔨᒋᐊᕐᓗᓯ: https://www.qtcommission.ca/iu.