ᐲᑕ ᑕᐸᑕᐃ ᐃᓅᓚᐅᖅᑐᖅ ᐃᒡᓗᓕᒑᕐᔪᖕᒥ, ᐊᒻᒪᓗ ᐊᑯᓂᐅᔪᒥᒃ ᐊᒻᒪ ᐊᔾᔨᒌᙱᑦᑐᓂᒃ ᐱᓕᕆᐊᖃᖃᑦᑕᖅᓯᒪᓪᓗᓂ ᐱᕕᒃᓴᖃᖅᑎᑦᑎᓪᓗᓂᓗ ᐃᓄᖕᓂᑦ ᓄᓇᕗᒥᐅᓂᒃ.  ᐃᓕᑕᕆᔭᐅᓚᐅᖅᑐᖅ ᐃᑲᔪᖃᑦᑕᖅᓯᒪᓂᖓᓄᑦ ᓄᓇᕗᒥ ᑐᓂᔭᐅᑎᓪᓗᒍ ᐃᓕᑕᕆᔭᐅᔾᔪᑎᒥᒃ.

ᑖᓐᓇ ᐃᓕᑕᕆᔭᐅᔾᔪᑎ ᐃᓕᑕᖅᓯᓲᖑᔪᖅ ᐃᓄᖕᓂᑦ ᐱᒻᒪᕆᐅᔪᒃᑯᑦ ᐃᑲᔪᖅᓯᒪᔪᓄᑦ ᐃᓕᖅᑯᓯᓕᕆᓂᕐᒧᑦ, ᐃᓅᓯᕐᓄᑦ ᐅᕝᕙᓘᓐᓃᑦ ᐱᕙᓪᓕᐊᑎᑦᑎᓂᕐᒥᒃ ᓄᓇᕗᒥ.

ᑕᐸᑕᐃ ᑕᐃᑲᓂ  ᐃᓕᑕᕆᔭᐅᑎᓪᓗᒍ ᐅᖃᓪᓚᓚᐅᕐᒪᑦ ᖃᓄᖅ ᓇᖕᒥᓂᖅ ᓴᖅᑭᑎᑦᑎᒋᐊᖃᓚᐅᕐᓂᖓᓄᑦ ᐃᑲᔫᓯᐊᖅᑖᖃᑕᐅᓂᐊᕐᒪᑦ ᐊᐳᖅᑎᓐᓈᖅᑐᒥᒃ ᖃᒪᓂᑦᑐᐊᑉ ᓯᓚᑖᓃᑦᑐᒥᒃ.

ᐃᖅᑲᐃᑎᑦᑎᓚᐅᖅᑐᑦ ᐃᓄᖕᓂᑦ ᐃᑲᔪᖅᑐᐃᒋᐊᖃᖅᖢᑕ ᐃᓕᓐᓂᐊᖅᑎᑦᑎᓗᑕᓗ ᐃᓅᓱᒃᑐᓂ, ᓯᕗᓂᒃᓴᕆᔭᐅᖕᒪᑕ ᓄᓇᕗᒥ.

ᐸᐅᓗᓯ ᐊᕿᐊᕈᖅ, ᐊᖓᔪᖅᑳᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ, ᓇᖕᒥᓂᖅ ᐅᐱᒍᓱᓚᐅᖅᑐᖅ ᑕᐸᑕᐃᒥᒃ.

“ᐲᑕ ᓯᕗᓪᓕᖅᑎᒋᔭᐅᔪᖅ ᐃᓕᓴᕆᔭᐅᓯᒪᑦᑎᐊᕆᐊᖃᖅᖢᓂᓗ.  ᑕᑯᓐᓇᙳᐊᓚᐅᖅᓯᒪᔭᖏᑦ ᐊᖅᑯᓯᐅᖅᓯᒪᔭᖏᓐᓂᑦ ᓴᖅᑮᓯᒪᔪᖅ ᐃᓄᖕᓂᑦ ᐃᓱᒪᒋᔭᖏᓐᓂᒃ ᓇᓗᓇᐃᔭᐃᒍᓐᓇᖅᓯᓪᓗᑎᒃ ᐃᓅᓯᕐᓅᖓᔪᓂᒃ.”

ᑕᐸᑕᐃ ᐱᒋᐊᖅᑎᑦᑎᓂᑰᔪᖅ ᐊᒻᒪ ᐊᖓᔪᖅᑳᖑᓪᓗᓂ ᐲᑕᐅᑉ ᐊᔾᔨᒌᙱᑦᑐᓂᒃ ᐱᓕᕆᐊᓂᒃ ᐊᐅᓚᑦᑎᔨᐅᔪᓂᒃ, ᖃᒪᓂᑦᑐᐊᕐᒥ.

100ᖑᓪᓗᓂ ᐃᓄᖕᒧᑦ ᓇᖕᒥᓂᖁᑎᒋᔭᐅᔪᖅ ᐱᔨᑦᓯᕋᖅᐸᒃᖢᑎᒃ ᐊᔾᔨᒌᙱᑦᑐᓂᒃ ᓱᕐᓗ ᐅᓯᑲᖅᑕᖅᑐᓕᕆᓂᖅ ᐅᒥᐊᕐᔪᐊᓂᑦ, ᐃᖏᕐᕋᔾᔪᑎᓕᕆᓂᖅ ᐅᔭᕋᕐᓂᐊᕐᕕᖕᓄᑦ, ᐊᒻᒪᓗ ᓄᓇᒥ ᐱᔨᑦᓯᕋᕐᓂᕐᒥᒃ ᖃᒪᓂᑦᑐᐊᕐᒥ ᒥᑦᑕᕐᕕᖕᒥ.  ᐊᐅᓚᓯᒪᔭᖓ ᓇᖕᒥᓂᖓ 1990ᕈᔪᖏᓐᓂᒃ ᐱᒋᐊᓚᐅᖅᓯᒪᓂᐅᒃ.

ᑕᐸᑕᐃ ᑐᓂᔭᐅᓚᐅᖅᑐᖅ ᑯᐃᓐ ᐃᓕᓴᐱᐅᑉ ᐃᓕᑕᕆᔭᐅᔾᔪᑎᖓᓂᑦ 2012ᒥ.  ᑕᕝᕙᓂᑦᓴᐃᓐᓇᖅ ᐊᕐᕌᒍᒥ, ᐅᖃᓪᓚᓚᐅᖅᓯᒪᔪᖅ ᒪᓕᒐᓕᐅᕐᕕᐊᓗᖕᒥᑦ ᑲᑎᒪᔨᕋᓛᖑᔪᓄᑦ ᓄᓇᒥᐅᑕᓕᕆᓂᕐᒧᑦ ᐱᓕᕆᐊᖃᖅᑐᓄᑦ 2012ᒥ ᑭᒡᒐᖅᑐᐃᔨᐅᓪᓗᓂ ᖃᒪᓂᑦᑐᐊᕐᒥ ᕼᐊᒻᓚᒃᑯᓐᓂᑦ ᐅᖃᐅᓯᖃᖅᖢᓂ ᑕᑯᓯᒪᔭᖏᓐᓂᒃ ᐅᔭᕋᕐᓂᐊᕐᕕᖕᒥᑦ, ᓴᓇᔭᐅᓂᖓ, ᐊᐅᓚᑕᐅᓂᖓᓗ ᓄᓇᓕᒋᔭᖓᑕ ᓯᓚᑖᓃᑦᑐᒥᒃ.

ᑕᐸᑕᐃ ᐱᕕᒃᓴᒥᒃ ᑎᒍᓯᓚᐅᖅᓯᒪᔪᖅ ᑕᐃᔅᓱᒪᓂ ᑎᓕᐅᕆᓪᓗᓂ ᒐᕙᒪᑐᖃᒃᑯᓐᓂᑦ ᑮᓇᐅᔭᓂ ᐊᑐᖁᓪᓗᓂᒋᑦ ᐃᓕᓐᓂᐊᕐᓂᕐᒧᑦ ᐱᓕᒻᒪᒃᓴᐃᓂᕐᒧᓪᓗ ᐃᓄᖕᓂᑦ ᓄᓇᕗᒥ ᐃᓚᐅᑦᑎᐊᓕᕈᓐᓇᕐᓂᐊᕐᒪᑕ ᐱᕙᓪᓕᐊᔪᓕᕆᓂᕐᒧᑦ ᓄᓇᕗᒥ ᐱᕈᒃᑲᓐᓂᕈᓐᓇᖅᑐᓂᒃ ᐱᕙᓪᓕᐊᔾᔪᑎᓂᒃ.

ᓇᖕᒥᓂᖅᑖᓚᐅᖅᑎᓐᓇᒍ, ᑕᐸᑕᐃ ᐅᖃᖅᑎᒋᔭᐅᓚᐅᖅᓯᒪᔪᖅ ᐃᓄᐃᑦ ᑕᑯᕋᓐᓈᒐᒃᓴᓕᕆᔨᒃᑯᖏᓐᓂᑦ, ᑭᖑᓂᐊᒍᓪᓗ ᐊᐅᓚᑦᑎᔨᐅᓕᓚᐅᖅᓯᒪᔪᖅ ᐃᓄᐃᑦ ᑕᑯᓐᓈᒐᒃᓴᓕᕆᔨᒃᑯᓐᓄᑦ ᖃᒪᓂᑦᑐᐊᕐᒥ 1996ᒥ.

ᓴᖅᑭᑎᑦᑎᓚᐅᖅᓯᒪᖕᒥᔪᖅ ᖁᕕᐊᒋᔭᐅᕐᔪᐊᓚᐅᖅᑐᒥᒃ ᐊᔪᙱᑦᑐᕐᔪᐊᖑᙳᐊᖅᖢᓂ ᓴᒨᖑᓂᕋᖅᑕᐅᔪᒥᒃ ᐅᖃᐅᔾᔨᐅᕙᒃᖢᓂ ᓄᑕᖅᑲᓂ ᐊᑦᑕᕐᓇᖅᑐᒐᓚᖕᓂᑦ ᓱᕐᓗ ᓂᐅᖅᓯᑳᖃᑦᑕᕐᓂᐅᑉ ᒥᒃᓵᓄᑦ ᐊᒻᒪᓗ ᐅᒥᐊᕐᓂ ᐱᙳᐊᕐᕕᖃᖁᔨᖃᑦᑕᙱᖦᖢᓂ ᐃᓐᓇᖅᑕᖃᖅᑎᓐᓇᒍ.

ᓱᓕ, ᑕᐸᑕᐃ, ᑲᑎᒪᔨᐅᒋᐊᕐᖓᖃᑕᐅᓚᐅᖅᑐᑦ ᓄᓇᕗᒥ ᓇᖕᒥᓂᕐᓂ ᐱᕙᓪᓕᐊᑎᑦᑎᓂᕐᒧᑦ ᑯᐊᐳᕇᓴᒃᑯᓐᓂ, ᐊᒻᒪ ᑲᑎᒪᔨᐅᓪᓗᓂ ᓴᒃᑯᒃᑯᓐᓂ ᐊᒻᒪ ᑭᕙᓪᓕᕐᒥ ᑕᓯᐅᖃᑎᒌᑦ ᐱᕙᓪᓕᐊᑎᑦᑎᓂᕐᒧᑦ ᑲᑎᒪᔨᖏᓐᓄᑦ.

ᐅᐱᒋᔭᐅᕗᑦ ᐲᑕ ᑕᐸᑕᐃ ᐃᓕᓴᕆᔭᐅᓚᐅᕐᓂᕐᓄᑦ.