ᐅᓂᒃᑳᑦ: ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑲᑎᒪᓂᕐᒥᓂᒃ ᐃᓱᓕᔾᔪᑎᓚᐅᖅᑐᑦ ᑲᔪᓯᑦᑎᐊᓚᐅᖅᑐᒥᒃ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑲᑎᒪᔨᖏᑦ ᑲᑎᒪᑦᑎᐊᓚᐅᖅᑐᑦ ᐱᓇᓱᐊᕈᓯᐅᓚᐅᖅᑐᒥᒃ ᐃᖃᓗᓐᓂ.
ᕿᑭᖅᑕᓃᒃᑯᑦ ᑲᑎᒪᔨᖏᑦ 13ᓂᑦ ᓄᓇᓕᖕᓂᙶᖅᓯᒪᔪᑦ, ᓂᕈᐊᖅᑕᐅᕙᒃᖢᑎᒃ ᐃᓄᖕᓄᑦ ᑭᒡᒐᖅᑐᖅᑕᒥᖕᓂᑦ ᓄᓇᓕᖕᓂᑦ. ᓯᕗᓕᖅᑏᑦ ᑲᑎᒪᔨᓂᑦ ᑲᑎᒪᔨᖃᖅᑐᖅ ᐊᖓᔪᖅᑳᕐᒥᒃ, ᐊᖓᔪᖅᑳᑉ ᑐᖏᓕᐊᓂ ᐊᒻᒪᓗ ᑎᑎᕋᖅᑎ-ᑮᓇᐅᔭᓕᕆᔨᒥᒃ ᐊᒻᒪᓗ ᐱᖓᓱᓂᒃ ᑲᑎᒪᔨᑐᐃᓐᓇᕐᓂᒃ ᑲᑎᒪᔨᓂᙶᖅᑐᓂᑦ.
ᑲᑎᒪᔩᑦ ᓂᕈᐊᓚᐅᖅᑐᑦ ᑲᔪᓯᑎᑕᐅᖁᓪᓗᒋᑦ ᑖᒃᑯᐊ 2021-2022ᒧᓪᓗ ᐊᐅᓚᑦᑎᔾᔪᑎᓄᑦ ᑮᓇᐅᔭᖅᑑᑎᒃᓴᓂ. ᐅᑯᐊ ᐱᖃᓯᐅᑎᓪᓗᒋᑦ:
- ᑮᓇᐅᔭᖅᑑᑎᒃᓴᓂ $36 ᒥᓕᔭᓂᒃ
- ᐃᑲᔫᓯᐊᒃᓴᓄᑦ ᑮᓇᐅᔭᐃᑦ ᐊᑭᑦᑐᕆᐊᖅᑕᐅᓪᓗᑎᒃ $1.8ᒥᑦ $2 ᒥᓕᔭᓄᑦ. ᑖᒃᑯᐊ ᑮᓇᐅᔭᐃᑦ ᑐᖅᓯᒪᔪᓂ ᑮᓇᐅᔭᓂᙶᖃᑦᑕᖅᑐᑦ.
- ᐊᓯᖏᑦ ᐱᓕᕆᐊᒃᓴᑦ ᐊᒻᒪ ᐊᐃᑦᑑᓯᐊᓪᓗ ᐊᑭᑦᑐᓚᐅᖅᑐᑦ $8.6 ᒥᓕᔭᓂᑦ 9.6 ᒥᓕᔭᓄᑦ, ᐱᔾᔪᑎᒋᔭᐅᓪᓗᓂ ᐊᑭᑦᑐᕆᐊᖅᑕᐅᓂᖏᑦ ᓇᐅᑦᑎᖅᓱᖅᑏᑦ ᑮᓇᐅᔾᔭᒃᓵᓴᖏᓐᓄᑦ ᐋᔩᕋᕈᑎᒋᔭᐅᓯᒪᔪᓂᑦ ᑕᓪᓗᕈᑎᐅᑉ ᐃᒪᖓᓄᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᒃᓴᖏᓐᓂᑦ ᐊᖏᖃᑎᒌᒍᑎᒥ.
- ᐃᑲᔫᓯᐊᑦ ᐊᑭᑦᑐᕆᐊᓚᐅᖅᑐᑦ $14.7 ᒥᓕᔭᓂᑦ $16 ᒥᓕᔭᓄᑦ ᐱᔾᔪᑎᒋᓪᓗᒍ ᑖᒃᑯᐊ ᓇᐅᑦᑎᖅᓱᖅᑏᑦ ᐱᓕᕆᐊᖏᑦ
- ᓄᓘᔮᓄᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᒃᓴᖏᓐᓂᒃ ᐊᖏᖃᑎᒌᒍᑎᖓ ᐊᒻᒪᓗ ᐱᓕᕆᐊᒃᓴᓂ ᐊᐅᓚᑦᑎᓂᕐᒧᑦ ᐊᑭᒋᔭᖏᑦ ᓱᕐᕋᖅᓯᒪᙱᑦᑐᑦ -$3.6 ᒥᓕᔭᓐ
ᕿᑭᖅᑕᓃᒃᑯᑦ ᑕᖅᑲᐅᖓ ᐱᔫᒥᓵᕈᑎᓂᒃ ᓴᖅᑭᑎᑦᑎᕙᒃᑐᑦ ᑲᑎᒪᔨᐅᒍᒪᓇᔭᖅᑐᓂᒃ ᑲᑎᒪᔨᕋᓛᓂ ᑲᑎᒪᔨᐅᕝᕕᐅᔪᓂᓘᓐᓃᑦ. ᕿᑭᖅᑕᓃᒃᑯᑦ ᑲᑎᒪᔨᖏᑦ ᑖᒃᑯᓂᖓ ᐊᑎᕐᓂ ᑐᓂᔭᐅᔪᓂᑦ ᕿᒥᕐᕈᓪᓗᑎᒃ ᐊᒻᒪᓗ ᑎᒃᑯᐊᖅᓯᕙᓪᓕᐊᓲᖑᔪᑦ ᑲᑎᒪᔩᑦ ᑲᑎᒪᑎᓪᓗᒋᑦ.
ᓇᓗᓇᕈᓐᓃᓚᐅᕐᒪᑦ ᑲᑎᒪᑎᓪᓗᒋᑦ ᖃᔅᓰᓐᓇᐅᔪᑦ ᐊᑎᖏᓐᓂᒃ ᑐᓂᓯᕙᖕᓂᖏᓐᓄᑦ. ᐅᒡᒍᐊᕐᓇᖅᑐᖅ, ᐱᔾᔪᑎᒋᓪᓗᒍ ᑖᒃᑯᐊ ᑲᑎᒪᔨᕋᓛᑦ ᑲᑎᒪᔨᐅᕝᕕᐅᔪᓪᓗ ᐱᒻᒪᕆᐅᓂᖏᓐᓄᑦ ᑐᑭᑖᖅᑎᑦᑎᒍᑕᐅᖃᑦᑕᕐᓂᐊᖅᑐᓂᒃ ᐊᒃᑐᐃᓂᐊᖅᑐᓄᑦ ᐃᓄᓕᒫᓂᒃ ᕿᑭᖅᑖᓗᖕᒥ. ᐊᑏᑦ ᑐᓂᖃᑕᐅᒍᒪᒍᕕᐅᒃ ᑲᑎᒪᔨᕋᓛᖑᒍᒪᓗᑎᒃ ᑲᑎᒪᔨᐅᕝᕕᐅᔪᓂᒃ ᑲᑎᒪᔨᐅᔪᒪᓗᑎᒃ, ᐊᑏᑦ ᕿᑭᖅᑕᓃᒃᑯᑦ ᖃᐅᔨᒋᐊᕐᕕᒋᒃᑭᑦ ᐊᖅᑯᑎᒋᓗᒍ ᓄᓇᓕᖕᓂ ᑐᓴᐅᒪᑎᑦᑎᔨᓯ.
ᐅᑯᐊ ᐅᕝᕙ ᑲᑎᒪᔨᐅᕝᕕᐅᓲᑦ, ᐃᓄᐃᓪᓗ ᑎᒃᑯᐊᖅᑕᐅᕙᒃᑐᑦ ᑎᓕᔭᐅᓪᓗᑎᒃ ᑲᑎᒪᔨᐅᖃᑕᐅᓂᐊᕐᓗᑎᒃ.
- a) ᓄᓇᕗᒥ ᐅᒪᔪᓕᕆᔨᕐᔪᐊᒃᑯᓐᓂ ᑲᑎᒪᔨᐅᓂᖅ, ᐊᑕᐅᓯᕐᒥ ᐃᓐᓄᒋᐊᓕᒃ. ᓯᑕᒪᓄᑦ ᐊᕐᕌᒍᓄᑦ ᑲᑎᒪᔨᐅᓗᓂ: ᔫᓱᐊᖅ ᐋᕆᐊᒃ ᒥᑦᑎᒪᑕᓕᖕᒥᑦ
- b) ᑲᑭᕙᒃᑯᑦ ᐊᑐᒐᒃᓴᓕᕆᓂᖏᓐᓄᑦ ᑲᑎᒪᔨᕋᓛᓄᑦ, ᐊᑕᐅᓯᕐᒥ ᐃᓐᓄᒋᐊᓕᒃ, ᐱᖓᓱᓄᑦ ᐊᕐᕌᒍᓄᑦ ᑲᑎᒪᔨᐅᓗᓂ: ᑐᓂᓯᔪᖃᓚᐅᙱᑦᑐᖅ ᐊᑎᕐᓂ ᓅᑕᐅᔪᖅ ᑎᓕᓯᓛᕐᓗᑎᒃ ᑭᖑᓪᓕᕐᒥ ᑲᑎᒪᔩᑦ ᑲᑎᒪᓕᕐᒥᑉᐸᑕ.
- c) ᕿᑭᖅᑕᓃᒃᑯᑦ ᐃᓅᓯᓕᕆᓂᕐᒧᑦ ᐸᕐᓇᐃᔨᒃᑯᑦ ᑲᑎᒪᔨᕋᓛᖏᓐᓄᑦ: ᐃᓐᓇᕐᓄᑦ ᑭᒡᒐᖅᑐᐃᔨ, ᐊᑕᐅᓯᕐᒥ ᐃᓐᓄᒋᐊᓕᒃ, ᐱᖓᓱᓄᑦ ᐊᕐᕌᒍᓄᑦ ᑲᑎᒪᔨᐅᓗᓂ: ᐊᐃᓴᑭ ᓲᔪᖅ ᐃᒃᐱᐊᕐᔪᖕᒥᑦ
ᐊᕐᓇᓄᑦ ᑭᒡᒐᖅᑐᖅᑎ, ᐊᑕᐅᓯᕐᒥ ᐃᓐᓄᒋᐊᓕᒃ, ᐱᖓᓱᓄᑦ ᐊᕐᕌᒍᓄᑦ: ᐊᑎᕐᓂ ᑐᓂᓯᔪᖃᓚᐅᙱᑦᑐᖅ ᑕᐃᒪᐃᒻᒪᑦ ᑭᖑᓪᓕᕐᒧᑦ ᑲᑎᒪᔩᑦ ᑲᑎᒪᓂᖓᓄᑦ ᓅᑕᐅᔪᖅ
ᐊᖑᑎᓄᑦ ᑭᒡᒐᖅᑐᖅᑎ, ᐊᑕᐅᓯᕐᒥ ᐃᓐᓄᒋᐊᓕᒃ, ᐱᖓᓱᓄᑦ ᐊᕐᕌᒍᓄᑦ: ᑕᐃᕕᑎ ᖃᕝᕕᒃ ᑎᒃᑯᐊᖅᑕᐅᓚᐅᖅᑐᖅ ᑲᑎᒪᔨᐅᓂᐊᕐᓗᓂ
- d) ᐃᖃᓗᐃᑦ ᑰᖓᓄᑦ & ᖃᐅᒻᒫᕐᕕᖕᒧᑦ ᒥᕐᖑᐃᖅᓯᕝᕖᑦ: ᐊᑕᐅᓯᕐᒥ ᐃᓐᓄᒋᐊᓕᒃ: ᐊᑎᕐᓂ ᑐᓂᔪᖃᓚᐅᙱᑦᑐᖅ, ᓅᑕᐅᔪᖅ ᑭᖑᓪᓕᕐᒥ ᑲᑎᒪᔩᑦ ᑲᑎᒪᓂᖓᓄᑦ
- e) ᑲᑕᓐᓇᓕᒃ ᒥᕐᖑᐃᖅᓯᕝᕕᒃ: ᐊᑕᐅᓯᕐᒥ ᐃᓐᓄᒋᐊᓕᒃ, ᐱᖓᓱᓄᑦ ᐊᕐᕌᒍᓄᑦ: ᑎᓕᔭᐅᔪᖅ ᓂᖏᐅᓛᖅ ᕿᓕᖅᑎ ᑭᒻᒥᕈᒻᒥ
- f) ᓇᐹᖅᑐᓕᒃ ᒥᕐᖑᐃᖅᓯᕝᕕᒃ: ᐱᖓᓱᓂ ᐃᓐᓄᒋᐊᓕᒃ, ᒪᕐᕉᓄᑦ ᐊᕐᕌᒍᓄᑦ ᑲᑎᒪᔨᐅᓗᑎᒃ
ᒪᕐᕉᒃ ᑐᓂᓯᔪᖃᓚᐅᖅᑐᖅ: ᐊᓂ ᐊᐅᓪᓚᓗᒃ ᐊᐅᓱᐃᑦᑐᕐᒥ, ᐊᐃᒨᓯ ᓄᑕᕌᕐᔪᒃ ᐊᐃᓱᐃᑦᑐᕐᒥ
- g) ᐊᒡᒍᑦᑎᓐᓂ ᒥᕐᖑᐃᖅᓯᕝᕕᒃ: ᐊᑕᐅᓯᕐᒥ ᐃᓐᓄᒋᐊᓕᒃ, ᐱᖓᓱᓄᑦ ᐊᕐᕌᒍᓄᑦ: ᐊᑎᕐᓂ ᑐᓂᓯᔪᖃᓚᐅᙱᑦᑐᖅ ᑕᐃᒪᐃᒻᒪᑦ ᓅᑕᐅᔪᖅ ᑭᖑᓪᓕᕐᒥ ᑲᑎᒪᔩᑦ ᑲᑎᒪᓂᖓᓄᑦ
- h) ᑭᙶᓗᒃ ᒥᕐᖑᐃᖅᓯᕝᕕᒃ: ᒪᕐᕉᓂ ᐃᓐᓄᒋᐊᓕᒃ, ᐱᖓᓱᓄᑦ ᐊᕐᕌᒍᓄᑦ ᑲᑎᒪᔨᐅᓗᑎᒃ: ᑐᓂᓯᔪᖃᓚᐅᙱᓐᓂᖓᓄᑦ ᑭᖑᓪᓕᕐᒧᑦ ᑲᑎᒪᔩᑦ ᑲᑎᒪᓂᖓᓄᑦ ᓅᑕᐅᔪᖅ
- i) ᖁᑦᑎᓂᖅᐹᖅ ᒥᕐᖑᐃᖅᓯᕝᕕᖕᒥ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᖏᑦ, ᒪᕐᕉᓂ ᐃᓐᓄᒋᐊᓕᒃ, ᒪᑐᐃᖓᓂᐊᖅᑐᖅ ᐃᓐᓄᒃᑕᐅᓚᐅᙱᑎᓪᓗᒍ: ᑐᓂᓯᔪᖃᓚᐅᙱᑦᑐᖅ ᑕᐃᒪᐃᒻᒪᑦ ᓅᑕᐅᔪᖅ ᑭᖑᓪᓕᕐᒥ ᑲᑎᒪᔩᑦ ᑲᑎᒪᓂᖓᓄᑦ
- j) ᐊᐅᔪᐃᑦᑐᖅ ᒥᕐᖑᐃᖅᓯᕝᕕᖕᒧᑦ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᖏᑦ: ᒪᕐᕉᓂ ᐃᓐᓄᒋᐊᓕᒃ, ᒪᑐᐃᖓᓂᐊᖅᑐᑦ ᐃᓐᓄᒃᑕᐅᓚᐅᙲᓐᓇᖅᑎᓪᓗᒍ: ᑐᓂᓯᔪᖃᓚᐅᙱᑦᑐᖅ ᑕᐃᒪᐃᒻᒪᑦ ᓅᑕᐅᔪᖅ ᑭᖑᓪᓕᕐᒥ ᑲᑎᒪᔩᑦ ᑲᑎᒪᓂᖓᓄᑦ
- k) ᖃᐅᓱᐃᑦᑐᕐᒥ ᒥᕐᖑᐃᖅᓯᕝᕕᖕᒥ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᖏᑦ, ᐊᑕᐅᓯᕐᒥ ᐃᓐᓄᒋᐊᓕᒃ, ᒪᑐᐃᖓᓂᐊᖅᑐᖅ ᐃᓐᓄᒃᑕᐅᓚᐅᙱᓐᓇᓕᒫᖓᓄᑦ: ᑐᓂᓯᔪᖃᓚᐅᙱᑦᑐᖅ ᑲᑎᒪᔨᐅᒍᒪᒐᔭᖅᑐᓂᒃ ᑕᐃᒪᐃᒻᒪᑦ ᓅᑕᐅᔪᖅ ᑭᖑᓪᓕᕐᒥ ᑲᑎᒪᔩᑦ ᑲᑎᒪᓂᖓᓄᑦ
- l) ᓯᕐᒥᓕᒃ ᒥᕐᖑᐃᖅᓯᕝᕕᖕᒥ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᖏᑦ, ᐊᑕᐅᓯᕐᒥ ᐃᓐᓄᒋᐊᓕᒃ, ᒪᑐᐃᖓᓂᐊᖅᑐᖅ ᐃᓐᓄᒃᑕᐅᓚᐅᙱᓐᓇᓕᒫᖓᓄᑦ . ᑐᓂᓯᔪᖃᓚᐅᙱᒻᒪ ᑕᐃᒪᐃᒻᒪᑦ ᓅᑕᐅᔪᖅ ᑭᖑᓪᓕᕐᒥ ᑲᑎᒪᔩᑦ ᑲᑎᒪᓂᖓᓄᑦ
- m) ᖃᐅᓱᐃᑦᑐᖅ ᒥᕐᖑᐃᖅᓯᕝᕕᖕᒥ ᐸᕐᓇᐃᔨᒃᑯᑦ: ᐊᑕᓯᐅᕐᒥ ᐃᓐᓄᒋᐊᓕᒃ, ᒪᑐᐃᖓᓂᐊᖅᑐᖅ ᐃᓐᓄᒃᑕᐅᓚᐅᙱᓐᓇᓕᒫᖓᓄᑦ . ᑐᓂᓯᔪᖃᓚᐅᙱᒻᒪ ᑕᐃᒪᐃᒻᒪᑦ ᓅᑕᐅᔪᖅ ᑭᖑᓪᓕᕐᒥ ᑲᑎᒪᔩᑦ ᑲᑎᒪᓂᖓᓄᑦ
- n) ᖁᑦᑎᓂᖅᐹᖅ ᒥᕐᖑᐃᖅᓯᕝᕕᖕᒥ ᐸᕐᓇᐃᔨᒃᑯᑦ: ᐊᑕᐅᓯᕐᒥ ᐃᓐᓄᒋᐊᓕᒃ, ᐃᓐᓄᒃᑕᐅᓚᐅᙱᓐᓂᖓᓄᑦ: ᓕᐊᕆ ᐊᐅᓪᓚᓗᒃ ᐊᓱᐃᑦᑐᕐᒥᑦ
- o) ᕿᑭᖅᑕᓃᒃᑯᑦ ᑮᓇᐅᔭᓕᕆᓂᕐᒧᑦ ᑲᑎᒪᔨᕋᓛᖏᑦ: ᐊᑕᐅᓯᕐᒥ ᐃᓐᓄᒋᐊᓕᒃ: ᐊᐃᕙᓚᕼᐋᒻ ᖃᒪᓂᖅ
ᑲᑎᒪᑎᓪᓗᒋᑦ, ᑲᑎᒪᔩᑦ ᑭᖑᓪᓕᖅᐹᒃᑯᑦ ᐃᓱᓕᔾᔪᑎᖃᓚᐅᕐᒪᑕ ᐅᖃᐅᓯᐅᖃᑦᑕᐃᓐᓇᖅᓯᒪᔪᒥᒃ ᐃᑲᔪᑐᐃᓂᐊᕐᒪᖔᑖᒃ ᐃᑲᔪᖅᑐᐃᓂᐊᙱᒻᒪᖔᑕᓘᓐᓃᑦ ᓄᓘᔮᓂ ᑐᒡᓕᐊᓂ ᑐᒃᓯᕋᐅᑎᒥᒃ, ᐸᕕᓐᓛᓐᑯᑦ ᑐᒃᓯᕋᐅᑎᒋᔭᖓᓂᑦ.
ᑲᑎᒪᔩᑦ ᓂᕈᐊᓚᐅᖅᑐᑦ ᐃᑲᔪᖅᑐᐃᙱᖦᖢᑎᒃ ᐅᔭᕋᕐᓂᐊᕐᕕᐅᑉ ᑐᒃᓯᕋᐅᑎᒋᔭᖓᓂᑦ ᐅᐃᒍᒋᐊᖅᓯᒍᒪᑎᓪᓗᒋᑦ.
ᐱᔾᔪᑎᖃᖅᖢᑎᒃ ᐃᓄᐃᑦ ᐃᓚᒋᔭᐅᓚᐅᙱᓐᓂᖏᓐᓄᑦ ᐱᕙᓪᓕᐊᑎᑕᐅᓕᖅᑎᓪᓗᒍ ᑐᒃᓯᕋᐅᑎ, ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐸᐅᓗᓯ ᐊᕿᐊᕈᖅ.
ᕿᑭᖅᑕᓃᒃᑯᑦ ᐊᖏᖅᓯᒪᔪᑦ ᓄᓇᒥᙶᖅᑐᓂᒃ ᐱᕙᓪᓕᐊᑎᑦᑎᓂᕐᒥᒃ, ᑭᓯᐊᓂ ᐃᓄᐃᑦ ᐱᒋᐊᕐᓂᖓᓂᒃ ᐃᓚᒋᔭᐅᒋᐊᖃᖅᑐᑦ. ᓄᓘᔮᑦ ᐅᔭᕋᕐᓂᐊᕐᕕᒃ ᑲᔪᓯᔪᖅ ᐊᐅᓚᓂᕆᔭᖓᓂᒃ, ᐊᒻᒪᓗ ᕿᑭᖅᑕᓃᒃᑯᑦ ᓴᐳᔾᔨᓯᒪᐃᓐᓇᕐᓂᐊᖅᑐᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐱᔪᒪᔭᖏᓐᓂᓗ ᐱᔾᔪᑎᒋᓪᓗᒍ ᐅᔭᕋᕐᓂᐊᕐᕕᒃ.
ᑭᖑᓪᓕᖅᐹᒥ,ᑲᑎᒪᔭᖅᑐᖅᓯᒪᓪᓗᑎᒃ ᐃᖃᓗᓐᓄᑦ, ᐱᖓᓱᑦ ᑲᑎᒪᔨᐅᔪᑦ ᐊᓐᓂᐊᕇᒃᑯᑎᒥᒃ ᑲᐴᑎᒥᒃ ᑲᐱᔭᐅᓚᐅᖅᑐᑦ ᓯᕗᓪᓕᖅᐹᒥᒃ. ᐊᖏᕐᕋᖅᓯᒪᓚᐅᙱᒻᒪᑕ ᓄᓇᖅᑲᑎᒋᔭᐅᔪᑦ ᐊᓐᓂᐊᕇᒃᑯᑎᒥᒃ ᑲᐱᔭᐅᕙᓪᓕᐊᓕᖅᑎᓪᓗᒋᑦ
ᑲᑎᒪᔨ ᒫᑎᐅ ᓴᕕᐊᕐᔪᒃ ᔮ ᑭᙵᕐᓂᑦ, ᒨᓯᓯ ᐊᐸᖅᑲᕐᓗ ᓴᓂᑭᓗᐊᕐᒥᑦ, ᐊᐃᑉᐹᓂᒃ ᐊᓐᓂᐊᕇᒃᑯᑎᒥᒃ ᑲᐱᔭᐅᓚᐅᕐᒥᔫᒃ ᐊᒻᒪᓗ ᐊᖓᔪᖅᑳᑉ ᑐᖏᓕᖓ ᐅᓛᔪᒃ ᐊᑭᓱᒃ ᑭᙵᕐᓂᑦ, ᐊᖏᕐᕋᖅᓯᒪᓕᖅᑎᓪᓗᒍ ᐊᐃᑉᐸᕆᔭᖓᓂᑦ ᑲᐱᔭᐅᔪᓐᓇᓛᖅᑐᖅ
ᐊᑭᓱᒃ ᐊᓐᓂᐊᕇᒃᑯᑎᒥᒃ ᑲᐱᔭᐅᓚᐅᖅᑐᖅ ᐅᖃᖅᖢᓂ ᑐᖁᔪᒪᙱᓐᓇᒥᒎᖅ ᓄᕙᓐᓇᕐᔪᐊᖅ -19ᒧᑦ, ᐊᒻᒪᓗ ᐃᓚᖏᓐᓂᒃ ᓴᐳᔾᔨᓯᒪᒍᓪᓗᓂ ᐊᒻᒪᓗ ᑭᓇᑐᐃᓐᓇᕐᒥᒃ ᐊᑦᑕᕐᓇᖅᑐᒦᑦᑕᐃᓕᖁᓪᓗᒋᑦ.
