ᕿᑭᖅᑕᓂ ᓄᓇᓖᑦ ᐃᓄᐃᑦ ᐊᑕᐅᓯᐅᖃᑎᒌᓯᒪᐃᓐᓇᕐᖓᑕ ᖃᓄᖅᑑᕈᑎᖃᕐᐸᑦᑐᑎᒃ ᐳᕙᓪᓗᓇᖅᑐᒥᒃ (TB) ᓄᓇᓕᖁᑎᑦᑎᓐᓂ. ᐅᓪᓗᒥ, ᐊᕐᕌᒎᔾᔭᐅᕙᓪᓕᐊᓕᖅᑎᓪᓗᑕ ᓄᕙᔾᔪᐊᓇᖅᑐᖅ ᓄᓇᕐᔪᐊᓕᒫᒥ ᓯᐊᒻᒪᐸᓪᓕᐊᓯᓚᐅᕐᓯᒪᑎᓪᓗᒍ ᖃᐅᔨᓯᒪᔪᒍᑦ ᐃᓄᐃᑦ ᑕᕝᕘᓈᖅᑎᓪᓗᒋᑦ ᐃᑉᐱᒋᖃᑦᑕᐅᑎᑦᑎᐊᑎᓪᓗᒋᑦ ᐊᒻᒪᓗ ᓄᓇᓕᖁᑎᑦᑎᓐᓄᑦ.

ᐊᑐᓂᑦ ᐅᕙᒍᑦ ᖃᐅᔨᒪᔪᒍᑦ ᐃᓅᓯᕗᑦ ᐊᑦᑐᖅᑕᐅᓯᒪᓪᓚᕆᒻᒪᑦ ᐃᓅᓯᑦᑎᓐᓂᒃ ᖃᓄᐃᑦᑐᒃᑰᕈᑎᑦᑎᓐᓄᑦ. ᑕᒪᒃᑯᐊᓴᐃᓐᓇᐃᑦ ᐃᓅᓯᑦᑎᓐᓂᒃ ᒪᑭᒪᓇᓱᐊᕈᑕᐅᕙᑦᑐᓂᓪᓗ ᓈᒻᒪᖏᑦᑐᑦ ᐃᓱᒫᓗᓇᖅᑐᒦᒋᐊᒃᑲᓐᓂᕈᑎᒋᕙᒃᑲᑦᑎᒍ ᓄᕙᕐᔪᐊᓇᖅᑐᒧᑦ ᐃᓱᒫᓗᓇᖅᑐᒦᒋᐊᒃᑲᓐᓂᕈᑎᒋᕙᒻᒥᔭᕗᑦ ᐳᕙᓪᓗᓇᖅᑐᒧᑦ. ᓄᕙᕐᔪᐊᓇᖅᑐᖅ ᓄᓇᕐᔪᐊᓕᒫᒥ ᓯᐊᒻᒪᕐᓯᒪᔪᖅ ᑕᑯᔾᔪᑕᐅᓯᒪᒻᒪᑦ ᐃᓪᓗᑖᕆᐊᖃᓪᓚᕆᓐᓂᑎᓐᓂ ᐊᒻᒪᓗ ᐊᑐᐃᓐᓇᖃᕆᐊᖃᕐᓂᑎᓐᓂᒃ ᐋᓐᓂᐊᖅᑐᓕᕆᔭᐅᕕᔅᓴᓂᑦ ᐊᒻᒪᓗ ᐃᓅᓯᓕᕆᔭᐅᕕᔅᓴᓂᑦ ᐃᓄᐃᑦ ᓄᓇᖓᓐᓂ ᓇᒥᓕᒫᖅ.

ᕿᑭᖅᑕᓂᒃᑯᑦ ᓱᓕ ᐊᖏᕐᓯᒪᔪᑦ ᐱᓕᕆᖃᑎᖃᕈᒪᓂᕐᒧᑦ ᐃᓄᓐᓂᑦ, ᐊᒻᒪᓗ ᓄᓇᕗᑦ ᑲᓇᑕᐅᓪᓗ ᒐᕙᒪᒃᑯᖏᓐᓂᑦ ᐳᕙᓪᓗᓇᖅᑐᖅᑕᖃᕈᓐᓃᖁᓪᓗᒍ ᓄᓇᑦᑎᓐᓂ ᐊᒻᒪᓗ ᐃᓄᐃᑦ ᓄᓇᖓᓐᓂ ᓇᒥᓕᒫᖅ. ᑲᑐᔾᔨᓗᑕ ᐳᕙᓪᓗᓇᖅᑐᒥᒃ ᓄᖅᑲᑎᑦᑎᔪᓐᓇᕋᑦᑕ ᐊᒻᒪᓗ ᐱᕙᓪᓕᐊᑎᑦᑎᓗᑕ ᓈᒻᒪᑦᑐᓂᑦ ᐆᒻᒪᑦᑎᐊᕆᑦᑐᓂᓪᓗ ᐃᓄᓐᓂᑦ ᓄᓇᖅᑲᑎᒌᓂᑦ.

ᒫᑦᓯ 8, 2019ᖑᑎᓪᓗᒍ, ᑲᓇᑕᐅᑉ ᒐᕙᒪᒃᑯᖏᑦ ᒪᒥᐊᓐᓂᖃᓚᐅᕐᓯᒪᒻᒪᑕ ᐃᓄᓐᓄᑦ ᐊᐅᓚᑕᐅᓂᕆᓚᐅᕐᓯᒪᔭᖓ ᐱᔾᔪᑎᒋᓪᓗᒍ ᐳᕙᓪᓗᓇᖅᑐᖅ ᓯᐊᕐᒪᕐᖓᑦ 1940ᖏᓐᓂ 1960ᖏᓐᓄᑦ. ᒪᒥᐊᕝᕕᐅᔭᕆᐊᖃᕐᓯᒪᓚᐅᕐᖓᑕ ᑕᐃᒪᙵᓂᑐᖄᓗᒃ ᐊᒻᒪᓗ ᓇᓗᓇᐃᒃᑯᑕᐅᓚᐅᖅᑐᓂ ᓯᕗᒧᑦ ᓵᙵᕙᓪᓕᐊᒋᐊᖃᕐᓂᑎᓐᓂᒃ ᒪᒥᓴᕐᓂᕐᒧᑦ ᐃᓱᒪᒋᔪᓐᓇᐃᖅᑎᒌᓐᓂᒧᓪᓗ (ᓴᐃᒻᒪᖃᑎᒌᓐᓂᕐᒧᑦ).

ᒫᑦᓯ 23, 2018ᖑᑎᓪᓗᒍ, ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ ᑲᑦᑐᖓᐃᕈᑎᖃᓚᐅᕐᓯᒪᔪᑦ ᐳᕙᓪᓗᓇᖅᑐᖅᑕᖃᕈᓐᓃᖁᔨᓪᓗᑎᒃ ᐃᓄᐃᑦ ᓄᓇᖓᓐᓂ 2030 ᖃᓂᒋᔭᖓᓂ ᐊᒻᒪᓗ ᐸᓚᕐᓯᐅᒥᖁᓪᓗᒋᑦ ᖃᑦᑏᓐᓇᕈᒃᑲᓂᕐᓗᑎᒃ ᐳᕙᓪᓗᑦᑐᑦ ᓇᑉᐸᖏᓐᓂ 2025 ᖃᓂᒋᔭᖓᓂ.

ᐳᕙᓪᓗᓕᖅᑐᖃᓲᖑᒻᒪᑦ ᖁᐱᕐᕈᐊᕐᔪᒻᒥᒃ ᐱᒋᐊᕈᑎᖃᖅᑐᑎᒃ ᐃᒫᒃ ᖃᓪᓗᓈᑎᑦᑐᑦ ᑕᐃᒎᓯᓕᒃ mycobacterium tuberculosis. ᑭᒃᑯᑐᐃᓐᓇᐃᑦ ᐳᕙᓪᓗᓕᕈᓐᓇᕐᖓᑕ ᓂᐅᕐᓯᒍᑎᒃ ᐳᕙᓪᓗᓇᖅᑐᖅᑕᓕᒻᒥᒃ, ᑭᓯᐊᓂ ᐊᑦᑑᑎᓂᒃᑰᖏᑦᑐᖅ ᑭᓇᑐᐃᓐᓇᕐᒧᑦ ᐅᕝᕙᓘᓐᓃᑦ ᐊᑐᖅᑐᒥᓂᐅᓂᒃᑰᖏᑦᑐᖅ ᓂᕐᕆᑎᓂᑦ ᐊᓐᓄᕌᓂᓪᓘᓐᓃᑦ ᐱᒋᔭᐅᔪᓂᑦ. ᓂᐅᖅᑕᐅᑐᐊᕋᒥ, ᐳᕙᓪᓗᓇᖅᑐᖅ ᑕᐃᒪᐃᓕᖓᑐᐃᓐᓇᕈᓐᓇᕐᖓᑦ (ᓱᕙᓪᓕᐊᖏᓪᓗᓂ) ᑎᒥᒦᑐᐃᓐᓇᕐᓗᓂ ᐊᒥᓱᓂᑦ ᐊᕐᕌᒍᓂᑦ ᐳᕙᓪᓗᓕᕈᑕᐅᓚᐅᙱᓐᓂᖓᓂ.

ᐳᕙᓪᓗᓇᖅᑐᖅ ᓄᖅᑲᖓᑎᑕᐅᔪᓐᓇᑎᐊᕐᖓᑦ ᑲᒪᒋᔭᐅᔪᓐᓇᖅᑐᓂᓗ. ᐳᕙᓪᓗᓇᖅᑐᖃᕐᒪᖔᑦ ᖃᐅᔨᓴᖅᑕᐅᓂᖅ ᐊᑑᑎᖃᓪᓚᕆᑦᑐᖅ ᐱᔾᔪᑎᒋᓪᓗᒍ ᓴᐳᔾᔨᓲᖑᒻᒪᑦ ᐃᓕᓐᓂᒃ, ᐃᓚᓐᓂᒃ, ᓄᓇᖅᑲᑎᓂᓪᓗ. ᐊᑏ ᓄᓇᔅᓯᓐᓂ ᐋᓐᓂᐊᕕᓕᐊᕐᓂᐊᖅᑯᑎᑦ ᖃᐅᔨᓴᖅᑕᐅᔭᖅᑐᕐᓗᑎᑦ.

ᓄᕙᕐᔪᐊᓇᖅᑐᖅ ᑖᓐᓇ ᖃᓂᒻᒪᓯᖅᑖᖅᑲᐅᖑᒻᒪᑦ ᐃᓄᓐᓂᑦ ᖃᓂᒻᒪᓯᐅᓚᐅᕐᓯᒪᒐᓂ. ᐃᓚᒋᔭᐅᒻᒪᑦ ᖃᓂᒪᒍᑕᐅᓲᓄᑦ (ᐳᕝᕕᕆᒍᑕᐅᓲᑦ) ᖃᓂᒪᒍᑕᐅᒐᔪᓲᑦ ᑭᒃᑯᑐᐃᓐᓇᕐᓂᑦ ᐆᒪᔪᓂᓪᓗ. ᑭᒃᑯᑐᐃᓐᓇᐃᑦ ᓄᕙᕐᔪᐊᓇᖅᑐᒥᒃ ᖃᓂᒻᒪᒍᑎᖃᕈᓐᓇᖅᑐᑦ ᓂᐅᕐᓯᒍᑎᒃ ᓄᕙᕐᔪᐊᓇᖅᑐᖅᑕᓕᒻᒥᒃ ᖁᐱᕐᕈᐊᕐᔪᓐᓂᑦ, ᐊᑦᑐᕐᓯᓗᑎᒃ ᑭᓱᑐᐃᓐᓇᕐᓂᑦ ᑲᑕᒐᕐᕕᐅᓯᒪᔪᓂᑦ ᐊᒻᒪᓗ ᐊᑦᑐᕐᓯᒍᑎᒃ ᑮᓇᒥᓐᓂᒃ, ᖃᓂᖏᓐᓂᒃ, ᓱᕐᓗᖏᓐᓂᓪᓗ, ᐅᕝᕙᓘᓐᓃᑦ ᑎᒥᒃᑯᑦ ᐊᑦᑐᓯᓐᓂᕈᑎᒃ ᓲᕐᓗ ᐃᒫᒃ ᑎᒎᑎᓂᖅ, ᐃᕿᑦᑎᓂᖅ ᑯᓃᔅᓯᓂᕐᓘᓐᓃᑦ. ᑭᒃᑯᑐᐃᓐᓇᐃᑦ ᐊᐃᑦᑐᖅᑕᐅᓯᒪᒍᓐᓇᖅᑐᑦ ᓄᕙᕐᔪᐊᕐᓇᖅᑐᒧᑦ 14ᓄᑦ ᐅᓪᓗᓄᑦ ᐅᔾᔨᕐᓇᕐᓯᓚᐅᙱᓐᓂᖏᓐᓂ ᖃᓄᐃᒍᑕᐅᓲᑦ ᖃᓂᒻᒪᑎᓪᓗᒋᑦ.

ᑐᑭᓯᒃᑲᓐᓂᕆᑦ ᐳᕙᓪᓗᓇᖅᑑᑉ ᒥᔅᓵᓄᑦ ᐅᑯᓇᙵᑦ ᑭᒃᑯᑐᐃᓐᓇᕐᓄᑦ ᐋᓐᓂᐊᖅᑐᓕᕆᔩᑦ ᑲᓇᑕᒥ , ᐊᒻᒪᓗ ᐅᑯᓇᙵᑦ ᓄᓇᕗᑦ ᒐᕙᒪᒃᑯᖏᑦ.

ᑐᑭᓯᒃᑲᓐᓂᕆᑦ ᓄᕙᕐᔪᐊᓇᖅᑑᑉ ᒥᔅᓵᓄᑦ ᐅᑯᓇᙵᑦ ᑭᒃᑯᑐᐃᓐᓇᕐᓄᑦ ᐋᓐᓂᐊᖅᑐᓕᕆᔩᑦ ᑲᓇᑕᒥ , ᐊᒻᒪᓗ ᐅᑯᓇᙵᑦ ᓄᓇᕗᑦ ᒐᕙᒪᒃᑯᖏᑦ.

ᐃᓚᖏᑦ ᑭᓪᓕᓯᓂᐊᕈᑕᐅᓯᒪᔪᑦ ᖃᓄᖅ ᓄᓇᕗᑦ ᐃᓱᒫᓗᓇᖅᑐᒦᒍᑎᖃᕐᒪᖔᖅ ᐳᕙᓪᓗᓇᖅᑐᒧᑦ ᓄᕙᕐᔪᐊᓇᖅᑐᒧᓪᓗ:

• ᐃᓪᓗᓕᕆᓂᖅ: 56 ᐳᓴᓐᑎᖏᑦ ᐃᓄᐃᑦ ᓄᓇᕗᒻᒥᐅᑦ ᐃᓄᒋᐊᓗᐊᖅᑐᓂᑦ ᐊᖏᕐᕋᖃᐅᖃᑦᑕᕐᖓᑕ.
  • 32 ᐳᓴᓐᑎᖏᑦ ᓄᓇᕗᒻᒥᐅᑦ ᐃᓄᐃᑦ ᐊᖏᕐᕋᖏᓐᓃᑎᑦᑎᑲᐃᓐᓇᕐᓯᒪᒻᒪᑕ (ᐊᖏᕐᕋᖃᙱᑦᑐᓂᑦ ᖃᐅᔨᒪᔭᐅᙱᑦᑐᑦ) ᐊᕐᕌᒍᒋᕋᑖᖅᑕᑎᓐᓂ.
  • ᐃᓄᒋᐊᓗᐊᕐᐸᑦᑐᑦ ᐃᓪᓗᒥ ᐳᕙᓪᓗᓇᖅᑐᒧᑦ ᐊᐃᑦᑐᖅᑕᐅᒍᓐᓇᓂᕐᓴᐅᒻᒪᑕ. ᐃᓱᒫᓗᓇᕈᑎᖃᓗᐊᕆᓪᓗᑎᒃ ᐊᐃᑦᑐᖅᑕᐅᒍᓐᓇᕐᓂᖏᓐᓄᑦ ᓄᕙᕐᔪᐊᓇᖅᑐᒧᑦ.

• ᓂᕆᖃᑦᑕᕐᓂᖅ: 70 ᐳᓴᓐᑎᖏᑦ ᓄᓇᕗᒻᒥᐅᑦ ᐃᓄᐃᑦ ᓂᕆᔭᔅᓴᖃᑦᑎᐊᖃᑦᑕᖏᒻᒪᑕ, ᑕᑯᓪᓗᒋᑦ ᓴᓂᐊᓂ 8 ᐳᓴᓐᑎᖏᑦ ᐊᓯᖏᑦ ᑲᓇᑕᒥᐅᑦ ᓴᓂᐊᓂ.
  • 1,734 ᓱᕈᓰᑦ ᓄᓇᕗᒥ ᓂᕆᖃᑦᑕᖏᒻᒪᑕ ᐊᑕᐅᓯᐊᖅᑐᑎᒃ ᐅᓪᓗᕐᒥᒃ ᐊᕐᕌᒍᑕᒫᑦ.
  • ᓂᕆᑦᑎᐊᖃᑦᑕᖏᓐᓂᖅ ᐃᓱᒫᓗᓇᖅᑐᒦᒍᑕᐅᓂᕐᓴᐅᕙᒻᒪᑦ ᐳᕙᓪᓗᓇᖅᑐᖅᑖᕈᓐᓇᕐᓂᖏᓐᓄᑦ. ᓂᕿᓂᑦ ᐊᑐᐃᓐᓇᖃᕆᐊᖃᕐᓂᖅ ᐃᓱᒫᓗᓇᕆᓪᓗᓂ ᓯᐊᒻᒪᐸᓪᓕᐊᓯᒪᑎᓪᓗᒍ ᓄᕙᕐᔪᐊᓇᖅᑐᖅ, ᐅᓚᕕᑕᐅᓯᒪᑎᓪᓗᒋᑦ ᓂᕿᑖᕐᕕᐅᕙᑦᑐᑦ.

• ᑮᓇᐅᔭᓕᐊᑦ: ᐊᑯᓐᓈᕿᔪᒥᒃ ᑮᓇᐅᔭᓕᐊᖑᕙᑦᑐᑦ ᐃᓄᓐᓄᑦ ᓄᓇᕗᒻᒥᐅᓄᑦ ᑕᒫᓃᒻᒪᑕ $24,768. ᐊᑯᓐᓈᕿᔪᒥᒃ ᑮᓇᐅᔭᓕᐊᖑᕙᑦᑐᑦ ᖃᓪᓗᓈᕐᓄᑦ ᐃᓄᐃᑦ ᓄᓇᖓᓐᓂ ᐊᒥᓲᓂᖃᖃᑦᑕᕐᓯᒪᔪᑦᑦ $84, 139 ᑕᑯᓪᓗᒋᑦ 2018ᓕᓴᐃᑦ.

ᐊᒥᓱᐊᓗᓐᓂᑦ ᐃᓕᒍᑎᖃᕈᓐᓇᖅᑐᒍᑦ ᐳᕙᓪᓗᓇᖅᑑᑉ ᒥᔅᓵᓄᑦ ᐊᑐᖃᑦᑕᕈᓐᓇᖅᑕᕗᑦ ᐃᖅᑲᓇᐃᔮᕆᕙᑦᑕᑎᓐᓂ ᖃᓂᒻᒪᑦᑕᐃᓕᑎᓪᓗᑕ ᓄᕙᕐᔪᐊᓇᖅᑐᒧᑦ. ᑕᕝᕙᐅᑯᐊ ᐊᑐᖅᑕᐅᓯᒪᔪᑦ ᐳᕙᓪᓗᓇᖅᑐᒧᑦ ᑲᓇᑕᒥ, ᐃᓄᐃᑦ ᓄᓇᖓᓐᓂ, ᓄᓇᕗᒥ, ᐊᒻᒪᓗ ᕿᑭᖅᑕᓂ:

• ᑲᓇᑕ:
  • 8/100,000 = ᐊᒥᓲᓂᖏᑦ ᓄᑖᑦ ᐳᕙᓪᓗᓕᕐᐸᑦᑐᑦ ᐊᕐᕌᒍᑕᒫᑦ (ᐳᕙᓪᓗᓕᕐᐸᑦᑐᑦ ᐊᒥᓲᓂᕆᕙᑦᑕᖏᑦ) ᐳᕙᓪᓗᓚᑦᑖᐸᑦᑐᑦ (2016)
  • 6/100,000 = ᐊᒥᓲᓂᖏᑦ ᑲᓇᑕᒥ−ᐃᓅᓂᑯᐃᑦ ᖃᓪᓗᓈᑦ ᐳᕙᓪᓗᐸᑦᑐᑦ ᐊᕐᕌᒍᑕᒫᑦ (2016)

• ᐃᓄᐃᑦ ᓄᓇᖓᑦ:
  • 9/100,000 = ᐃᓘᓐᓇᖏᓐᓂ ᐳᕙᓪᓗᓕᕐᐸᑦᑐᑦ ᐃᓄᐃᑦ ᓄᓇᓖᑦ ᐃᓄᐃᑦ ᓄᓇᖓᓐᓂ (2016)
    • ᑖᒃᑯᐊ ᐊᒥᓲᓂᖏᑦ300ᕌᖅᑎᖅᑐᒥᒃ ᐊᒥᓲᓂᕐᓴᐅᕙᑦᑐᑦ ᐳᕙᓪᓗᓕᕐᐸᑦᑐᑦ ᖃᓪᓗᓈᑦ ᑲᓇᑕᒥ−ᐃᓅᓯᒪᔪᑦ

• ᓄᓇᕗᑦ:
  • 1/100,000 = ᐊᑯᓐᓈᕿᔪᒥᒃ ᐊᒥᓲᓂᖏᓐᓂ ᐳᕙᓪᓗᓕᖃᑦᑕᕐᓯᒪᔪᑦ ᐊᕐᕌᒍᓂᑦ ᐅᑯᓇᓂ 2006-2016
    • ᐳᕙᓪᓗᓕᐊᓯᒪᔪᑦ ᓄᓇᓕᓐᓂᑦ ᐅᑯᓇᓂ ᐊᕐᕌᒍᓂᑦ 2010, 2012, 2014, ᐊᒻᒪᓗ
      • ᐊᕐᕌᒍᒥ 2017, 11 25ᖏᓐᓂ ᓄᓇᓕᐅᔪᓂᑦ ᐳᕙᓪᓗᑐᖅᑕᓖᑦ ᖃᐅᔨᔭᐅᓯᒪᔪᓂᑦ.

• ᕿᑭᖅᑕᓂ:
  • ᓄᓇᕗᒥ, ᐳᕙᓪᓗᓇᖅᑐᖅ ᖁᕝᕙᓯᓐᓂᕐᐹᖅ ᕿᑭᖅᑕᓂ, ᑕᒫᓂ 305.1 ᐳᕙᓪᓗᓕᖃᑦᑕᕐᓯᒪᓪᓗᑎᒃ ᐊᕐᕌᒍᑕᒫᑦ ᐅᑯᓇᓂ ᐊᕐᕌᒍᓂᑦ 2006-2016.