ᓇᐃᓈᖅᑐᑦ: ᖃᓄᖅ ᑲᒪᒋᔭᖃᕈᓐᓇᕐᒪᖔᑦᑕ ᐳᕝᕕᕆᓇᖅᑐᖅ ᐱᔾᔪᑎᒋᓪᓗᒍ ᐅᖁᒪᐃᓪᓕᐅᕈᑎᖃᕐᓗᓂ: ᐅᖃᐅᔾᔨᒋᐊᕈᑦ ᐃᓄᑐᖃᕐᒥᒃ
ᑐᑭᓯᒋᐊᕐᕕᒋᔪᒐᑦᑎᒍ ᐃᓅᓪᓗᓂ ᐃᓄᑐᖃᖅ ᐃᓕᓴᐱ ᑕ. ᐊᓐᓂᖕᒥᐅᖅ ᖃᓄᖅ ᐅᖃᐅᔾᔨᒋᐊᕈᑎᔅᓴᖃᕐᒪᖔᖅ ᖃᓄᖅ ᑲᒪᒋᔭᖃᕈᓐᓇᕐᒪᖔᑦᑕ ᐱᔭᕆᐊᑐᔪᓂᑦ ᕿᓄᐃᓵᕐᓗᑕ ᐳᕝᕕᕆᓇᖅᑐᖅ ᓄᓇᕐᔪᐊᓕᒫᒥ ᖃᓂᒪᓇᖅᑐᖅ ᓯᐊᒻᒪᐸᓪᓕᐊᓯᒪᑎᓪᓗᒍ.
“ᒫᓐᓇ ᐊᑐᕋᑦᑕ ᐱᔭᕆᐊᑐᔪᓪᓚᕆᐊᓗᒻᒥᒃ ᑭᒃᑯᓕᒫᓄᑦ, ᐃᓚᒌᓄᑦ, ᓄᓇᖅᑲᑎᒌᓄᑦ, ᓄᓇᑦᑎᓐᓂ, ᑲᓇᑕᒥ, ᓄᓇᕐᔪᐊᓕᒫᒥᓗ,” ᐅᖃᖅᑐᖅ ᐃᓕᓴᐱ.
ᐃᓕᓴᐱ ᐅᖃᐅᔾᔨᒋᐊᖅᑐᖅ ᐅᖄᓚᕕᐅᖃᑦᑕᖁᓪᓗᓂᒋᑦ ᐃᓄᑐᖃᐃᑦ ᐊᒻᒪᓗ ᐅᖃᕐᕕᒋᖃᑦᑕᖁᓪᓗᒋᑦ ᐱᖃᑎᓯ ᐃᓚᓯᓗ. ᐅᖃᖅᑐᖅ ᐅᖃᕐᕕᖃᖃᑦᑕᕐᓂᖅ ᐊᓯᑦᑎᓐᓄᑦ ᐃᓱᒪᒋᔭᑦᑎᓐᓂᒃ ᐅᖃᕐᕕᒋᖃᑦᑕᕐᓗᒋᑦ ᐊᒻᒪᓗ ᐃᓱᒪᑖᕈᑎᒋᓯᒪᔭᑦᑎᓐᓂᒃ ᐊᖏᔪᐊᓗᒻᒥᒃ ᐱᕙᓪᓕᐅᑎᑎᑦᑎᓲᖑᒻᒪᑦ. ᑐᑭᓯᑎᑦᑎᖃᑦᑕᕐᓂᖅ ᐃᓱᒪᑦᑎᓐᓄᑦ ᐊᑲᐅᓯᒃᑲᓂᕐᓇᓲᖑᒻᒪᑦ ᐊᒻᒪᓗ ᐃᑲᔫᑎᖃᓲᖑᓪᓗᓂ ᐅᖃᐅᓯᖃᕐᓂᕐᒥᒃ ᐃᑉᐱᒋᔭᑦᑎᓐᓂᒃ ᐃᓱᒪᒋᔭᑦᑎᓂᓪᓗ.
ᒪᓕᑦᑐᒋᑦ ᐅᖃᐅᓯᖏᑦ ᐃᓕᓴᐱᐅᑉ, ᒫᓐᓇ ᐱᔭᕆᐊᑐᔪᒃᑰᕋᓗᐊᖅᑎᓪᓗᑕ, ᑕᒪᓐᓇ ᐱᕙᓪᓕᐊᔾᔪᑎᒋᓯᓐᓈᕐᒥᒐᑦᑎᒍ.
“ᐃᓄᒃᑎᑐᑦ ᐅᖃᐅᓯᖅᑕᖃᕐᖓᑦ, ᐱᔭᕆᐊᑐᔪᒃᑰᖃᑦᑕᖏᒃᑯᕕᑦ, ᓯᓚᑦᑐᐸᓕᐊᔾᔮᖏᑦᑐᑎᑦ,” ᐅᖃᖅᑐᖅ ᐃᓕᓴᐱ.
ᐅᕙᑦᑎᓐᓂᒃ ᐃᖅᑲᐃᑎᑦᑎᒋᐊᕐᒥᔪᖅ ᐅᖃᐅᓯᕐᒥᒃ, “ᐊᔪᕐᓇᕐᒪᑦ” ᑖᓐᓇ ᐃᒫᒃ ᑐᑭᓕᒃ ‘ᐊᔪᕐᓇᕐᖓᑦ’ ᐅᕝᕙᓘᓐᓃᑦ ‘ᖃᓄᐃᓕᒋᐊᒃᑲᓐᓂᕈᓐᓇᖏᓐᓇᑦᑎᒍ.’ “ᐃᖅᑲᐃᑎᑕᐅᔪᒍᑦ ᓴᐃᓕᔭᕆᐊᖃᕋᑦᑕ, ᐊᓪᓛᑦ ᑭᓱᑐᐃᓐᓇᕐᓂᒃ ᐅᑕᖅᑭᑲᐃᓐᓇᕆᐊᖃᕋᓗᐊᖅᑎᓪᓗᑕ,” ᐅᖃᖅᑐᖅ ᐃᓕᓴᐱ.
ᐅᖃᖅᑐᖅ ᐅᐊᑦᑎᐊᕈᓕ, ᐃᓄᐃᑦ ᐊᐅᓪᓚᕈᓐᓇᖃᑦᑕᕐᓯᒪᙱᒻᒪᑕ ᓄᓇᒥ ᓯᓚ ᓱᓐᓇᐃᑦᑐᐊᓘᑎᓪᓗᒍ, ᐃᖅᑲᐃᑎᑕᐅᖃᑦᑕᕐᓯᒪᔪᒍᑦ ᕿᓄᐃᓵᕆᐊᖃᕐᓂᑎᓐᓂᒃ ᐅᑕᖅᑭᔭᕆᐊᖃᕐᓂᑎᓐᓂᓪᓗ ᓯᓚ ᐱᐅᓯᒐᓱᓐᓂᖓᓂ.
“ᐃᓄᐃᑦ ᐃᓕᖅᑯᓯᖓᓐᓂ ᓅᒍᓐᓇᓲᖑᙱᓇᑦᑕ ᐊᕙᑎᑦᑎᓐᓂ, ᑕᐃᒫᒃ ᑲᒪᒋᔪᓐᓇᖅᑕᕗᑦ ᑭᓯᐊᓂ ᑲᒪᒋᕙᑦᑐᒋᑦ,” ᐅᖃᖅᑐᖅ. “ᐱᐅᓂᕐᓴᐅᒻᒪᑦ ᐱᓇᓱᐊᖃᑦᑕᕐᓗᓂ, ᓇᒻᒥᓂᖅ−ᐱᒋᐊᖃᑦᑕᕐᓗᓂ, ᐅᐱᓐᓇᕋᓂ ᑕᐃᒫᒃ ᓯᕗᓕᔅᓴᔭᖃᕋᑦᑕ.”
ᐱᔭᕇᕈᑎᒋᓪᓗᒍ ᐃᓕᓴᐱ ᐅᖃᕆᐊᒃᑲᓂᖅᑐᖅ, “ᐱᔭᕆᐊᑐᔪᒃᑰᕋᓗᐊᖅᑎᓪᓗᑕ ᒫᓐᓇ ᑭᓯᐊᓂ ᓱᓕ ᓯᕗᓂᔅᓴᑎᓐᓂ ᐱᐅᔪᓂᑦ ᐊᑐᕐᓂᐊᕐᒥᔪᒍᑦ ᓇᓗᓇᙱᑦᑐᖅ.”
ᐃᑲᔪᖅᑕᐅᔪᒪᒍᕕᑦ ᐳᕝᕕᕆᓇᖅᑐᒥᒃ ᖃᓂᒪᓇᖅᑐᖃᖅᑎᓪᓗᒍ ᓄᓇᕐᔪᐊᓕᒫᒥ, ᐊᒥᓱᐊᓗᓐᓂᑦ ᐃᑲᔪᖅᑕᐅᔾᔪᑎᔅᓴᖅᑕᓕᒃ, ᑕᕝᕙ ᐃᓚᖏᑦ ᑎᑎᕋᖅᑕᐅᓯᒪᔪᑦ. ᐊᑏ ᖃᐅᔨᒃᑲᐃᖃᑦᑕᓂᐊᖅᑯᓯ ᐱᖃᑎᔅᓯᓐᓂᒃ ᐃᓚᔅᓯᓂᓪᓗ ᐊᒻᒪᓗ ᖃᓄᐃᓐᓂᐊᖏᓐᓂᕗᓯ.
ᐱᒻᒪᕆᐅᖕᒪᑦ ᐃᓱᒪᑦᑎᓐᓂ ᑲᒪᑦᑎᐊᕆᐊᖃᕐᓂᖅ ᑎᒥᕗᑦ ᑲᒪᒋᑦᑎᐊᓲᕆᒐᑦᑎᒍᑦ ᑕᐃᒪᓐᓇᑐᐃᓐᓇᑦᑎᐊᖅ. ᓇᖕᒥᓂᖅ ᐊᓯᖕᓂᓪᓗ ᐅᑕᖅᑭᑦᑎᐊᖅᐸᒡᓗᑎᑦ ᐊᒻᒪ ᐃᑲᔪᖅᑎᒃᓴᖅᓯᐅᖅᐸᒡᓗᑎᑦ ᐊᔪᕐᓇᖅᑐᖅᓯᐅᓕᕌᖓᕕᑦ. ᐃᓱᒪᒃᑯᑦ ᖃᓄᐃᙱᑦᑎᐊᕐᓃᑦ ᑲᒪᒋᓗᒍ ᓴᙱᓂᕆᔭᑎᑦ ᐅᔾᔨᕆᑦᑎᐊᕐᓗᒋᑦ ᐊᒻᒪ ᐊᓂᒍᖅᑎᓯᒪᔭᑎᑦ ᐊᒻᒪ ᐋᓐᓂᕐᓇᖅᑐᖅᓯᐅᓕᕌᖓᕕᑦ ᐱᐅᔪᒥ ᐊᑐᕋᓱᒃᐸᒡᓗᑎᑦ ᑲᒪᒋᓗᒍ. ᐊᖏᕈᑎᒋᕙᒡᓗᒋᑦ ᑲᔪᓯᑎᑕᑎᑦ ᐊᒻᒪ ᐊᓂᒍᖅᑎᓯᒪᔭᑎᑦ ᐃᓕᖅᑯᓯᕆᓂᐊᖅᑕᕐᓂᒃ ᐋᖅᑭᒃᓱᐃᔾᔪᑎᒋᓚᐅᖅᑕᕐᓄᑦ.
ᐃᑲᔪᖅᑕᐅᔪᒪᔪᓄᑦ ᐅᖄᓚᖃᑦᑕᕐᕖᑦ ᐃᓱᒪᔮᕐᓇᖅᑐᒦᑦᑐᓄᑦ ᐃᑲᔪᕈᓐᓇᖅᑐᑦ ᑭᒃᑯᑐᐃᓐᓇᕐᓄᑦ ᐃᓱᒪᔮᖅᑐᓄᑦ ᐊᒻᒪᓗ ᐅᖁᒪᐃᓪᓕᐅᖅᑐᓄᑦ:
ᓄᓇᕗᑦ ᑲᒪᑦᓯᐊᖅᑐᑦ ᐃᑲᔪᖅᑕᐅᔪᒪᔪᓄᑦ ᐅᖄᓚᖃᑦᑕᕐᕕᒃ: 1-800-265-3333
ᐃᓄᑐᖃᕐᓄᑦ ᐃᑲᔪᖅᑕᐅᔪᒪᔪᓄᑦ ᐅᖄᓚᖃᑦᑕᕐᕕᒃ: 1-866-684-5056
ᐊᒃᓱᕈᕐᓇᖅᑐᓄᑦ ᐱᔨᑦᑎᕋᖅᑎᑦ ᑲᓇᑕᒥ: ᖃᕆᓴᐅᔭᒃᑯᑦ ᐅᖃᖃᑎᖃᕆᑦ (www.crisisservicescanada.ca), ᐅᖄᓚᓗᑎᑦ, ᐅᕝᕙᓘᓐᓃᑦ ᐅᖃᓘᑎᕋᓛᒃᑯᑦ ᑎᑎᕋᕐᓗᑎᑦ 1-833-456-4566
ᐃᓴᒃᓯᒪᒌᒃᑯᑦ ᐃᓅᓯᕐᒥ ᑲᑐᔾᔨᖃᑎᒌᑦ ᖃᕆᓴᐅᔭᒃᑯᑦ ᐃᑭᐊᕿᕕᖓᓄᑦ (www.inuusiq.com), ᐅᕙᓗ ᐊᑭᖃᙱᑦᑐᒃᑯᑦ ᐅᖄᓚᐅᑎᖓᓄᑦ ᐅᖄᓚᓗᑎᑦ 1-866-804-2782
ᓄᓇᖃᖅᑐᑐᖃᑦ ᐃᓅᓱᒃᑐᖅ ᐃᑲᔪᖅᑕᐅᔭᕆᐊᖃᓕᖅᐸᑦ ᐅᖄᓚᐅᑎ: (1-877-209-1266)
ᓱᕈᓯᖅ ᐃᑲᔪᖅᑕᐅᔭᕆᐊᖃᓕᖅᐸᑦ ᐅᖄᓚᕕᐅᒍᓐᓇᖅᑐᖅ ᐅᓇ: (1-800-668-6868)
ᑭᒃᑯᑐᐃᓐᓇᐃᑦ ᐃᓱᒫᓗᓇᖅᑐᒦᓪᓚᕆᑦᑐᑦ ᓇᒻᒥᓂᖅ ᖃᓄᐃᓕᑐᐃᓐᓇᕆᐊᓖᑦ ᐅᕝᕙᓘᓐᓃᑦ ᐊᓯᖏᓐᓂᒃ ᖃᓄᐃᓕᔅᓯᑐᐃᓐᓇᕆᐊᓖᑦ ᐃᑲᔪᖅᑕᐅᑦᑕᐅᑎᒋᔪᒪᓗᑎᒃ ᓄᓇᖓᓐᓂ ᐋᓐᓂᐊᕕᖓᓅᕆᐊᓖᑦ ᐊᒻᒪᓗ/ᐅᕝᕙᓘᓐᓃᑦ ᐅᖄᓚᓗᑎᒃ ᐸᓖᓯᒃᑯᓐᓄᑦ.
ᐃᓚᒋᔭᐅᓪᓗᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐳᕝᕕᕆᓇᖅᑐᖅ ᐱᔾᔪᑎᒋᓪᓗᒍ ᐃᑲᔫᑎᔅᓴᖏᓐᓄᑦ ᐸᕐᓇᐅᑎᓄᑦ, ᑐᓂᓯᖃᑦᑕᖅᑐᑦ ᐃᓱᒫᓗᓇᕐᓯᓯᒪᓂᖓᓄᑦ ᓂᕿᑖᕈᑎᔅᓴᓂᑦ ᐃᓄᑐᖃᕐᓄᑦ ᐊᒻᒪᓗ ᕿᓚᒻᒥᐅᔪᒥᒃ ᑮᓇᐅᔭᓂᑦ ᐃᑲᔫᑎᓂᑦ ᕿᑭᖅᑕᓂ ᐃᓄᓐᓄᑦ ᐃᓚᒌᓄᑦ ᐃᓄᓕᓐᓂᑦ ᓇᔫᑎᙱᑲᐃᓐᓇᓂᐊᕐᖓᑕ ᐊᐅᓪᓚᕐᓯᒪᒍᒪᔪᓄᑦ ᐊᒻᒪᓗ ᐊᖑᓇᓱᒋᐊᕈᒪᔪᓄᑦ ᐳᕝᕕᕆᓇᖅᑐᖅ ᓄᓇᕐᔪᐊᒥ ᖃᓂᒪᓇᕐᓂᖓᓂ. ᐊᑐᐃᓐᓇᐅᑎᑦᑎᒻᒥᔪᒍᑦ ᐳᕝᕕᕆᓇᖅᑑᑉ ᒥᔅᓵᓄᑦ ᑐᓴᕋᔅᓴᓕᐊᖑᕙᑦᑐᓂᑦ ᐊᒻᒪᓗ ᑐᑭᓯᑎᑦᑎᒋᐊᕈᑎᓂᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᑎᓐᓂ ᐃᓚᒋᔭᐅᓪᓗᑎᒃ ᒪᑯᐊ ᐊᑭᓐᓇᕐᒨᒐᐃᑦ, ᑕᑯᓐᓇᕋᔅᓴᐃᑦ ᐊᓯᖏᓪᓗ ᐊᑐᖅᑕᐅᔪᓐᓇᖅᑐᑦ ᓴᓇᓯᒪᔭᕗᑦ.
ᐃᑲᔪᖅᑎᖃᖅᑐᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ (ᕿᑭᖅᑕᓂᒃᑯᑦ), ᑲᑭᕙᒃ ᑲᑐᔾᔨᖃᑎᒌᖏᑦ ᐋᖅᑭᔅᓯᔪᑦ $1.5 ᒥᓕᐊᓐᓂᑦ ᐋᖅᑭᓯᒪᑎᑦᑎᓂᐊᕐᖓᑕ ᒪᕐᕉᓐᓂᒃ ᐊᑐᖅᑕᐅᑲᐃᓐᓇᓂᐊᖅᑑᓐᓂᒃ ᓄᑖᖑᔫᓐᓂᒃ ᐳᕝᕕᕆᓇᖅᑐᖅ ᐱᔾᔪᑎᒋᓪᓗᒍ ᐃᑲᔫᑎᓐᓂᒃ ᐃᑲᔫᑕᐅᓂᐊᖅᑐᓂᑦ ᐃᑲᔪᖅᑕᐅᔾᔪᑎᒋᒋᐊᓕᖏᓐᓄᑦ ᒥᑭᓛᓄᑦ, ᐃᓱᒫᓗᓇᖅᑐᒦᓴᕋᐃᓐᓂᕐᓴᓄᑦ ᐃᓄᓐᓄᑦ−ᓇᒻᒥᓂᖁᑎᒋᔭᐅᔪᓄᑦ ᐃᖅᑲᓇᐃᔭᕐᕕᖁᑎᒋᔭᐅᔪᓄᑦ ᕿᑭᖅᑕᓂ ᓄᓇᓕᓐᓂᑦ, ᐊᒻᒪᓗ ᖃᐅᔨᒪᑦᑎᐊᕈᒪᓪᓗᑎᒃ ᐃᓄᐃᑦ ᐃᖅᑲᓇᐃᔮᖃᐃᓐᓇᕋᓗᐊᕐᒪᖔᑕ.
ᓄᓇᕗᑦ ᒐᕙᒪᒃᑯᖏᑦ ᑐᑭᓯᑎᑦᑎᒋᐊᕐᐸᑦᑐᑦ, ᑐᑭᓯᒋᐊᕐᕕᔅᓴᐃᑦ ᒥᔅᓵᓄᑦ ᑐᑭᓯᒋᐊᕈᑎᔅᓴᖅᑕᓖᑦ ᐋᓐᓂᐊᕕᓐᓄᑦ ᐊᒻᒪᓗ ᐊᓯᖏᓐᓂᒃ ᐊᑐᖅᑕᐅᔪᓐᓇᖅᑐᓂᑦ ᐋᓐᓂᐊᖅᑐᓕᕆᔨᒃᑯᓃᙶᕐᓯᒪᔪᓂᑦ. ᐃᓚᖏᑦ ᐊᑐᖅᑕᐅᔪᓐᓇᖅᑐᑦ ᑐᑭᓯᐅᒪᔾᔪᑎᔅᓴᖅᑕᖃᒃᑲᓂᖅᑐᑦ ᐅᑯᐊ ᒥᔅᓵᓄᑦ ᐳᕝᕕᕆᓇᖅᑐᖅ, ᐃᓅᖃᑎᑦᑎᓐᓂᒃ ᖃᓂᔅᓴᓗᐊᖅᑕᐃᓕᓂᖅ, ᐊᒡᒐᑎᓐᓂᒃ ᐅᐊᓴᖃᑦᑕᕆᐊᖃᕐᓂᕐᒥᒃ, ᐊᒻᒪᓗ ᖃᓄᐃᓕᐅᕈᓐᓇᕐᒪᖔᑦᑕ ᐃᓱᒪᔮᓗᐊᖅᑎᓪᓗᑕ ᐅᖁᒪᐃᓪᓕᐅᕈᑎᖃᖅᑎᓪᓗᑕᓘᓐᓃᑦ.
ᐊᑐᕈᓐᓇᖅᑕᓯ ᑲᓇᑕᐅᑉ ᒐᕙᒪᒃᑯᖏᓐᓂ ᐳᕝᕕᕆᓇᖅᑐᒧᑦ ᖃᓄᐃᓐᓂᐅᕙᑦᑐᓂᑦ ᖃᐅᔨᓴᐅᑦ ᑐᑭᓯᓂᐊᕋᔅᓯ ᖃᐅᔨᓴᖅᑕᐅᒋᐊᒃᑲᓐᓂᕆᐊᖃᕐᒪᖔᔅᓯ ᐅᕝᕙᓘᓐᓃᑦ ᑭᓇᑐᐃᓐᓇᖅ ᐃᑲᔪᖅᑕᐅᔭᕆᐊᖃᖅᑲᑦ ᑕᒪᓐᓇ ᐱᔾᔪᑎᒋᓪᓗᒍ.
ᑲᓇᑕᒥ ᐳᕝᕕᕆᓇᖅᑐᖅ ᐱᔾᔪᑎᒋᓪᓗᒍ ᑮᓇᐅᔭᓕᐊᕋᓱᐊᕈᑎᓄᑦ ᖃᓄᖅᑑᕈᑕᐅᓪᓗᓂ ᐸᕐᓇᐅᑦ (CERB) ᐋᖅᑭᑦᑕᐅᓯᒪᔪᖅ ᐃᑲᔫᑎᖃᕐᓂᐊᕐᖓᑦ ᑲᓇᑕᒥᐅᓄᑦ ᒫᓐᓇ ᓄᓇᕐᔪᐊᓕᒫᒥ ᐳᕝᕕᕆᓇᖅᑐᖅ ᖃᓂᒻᒫᒍᑕᐅᓯᒪᑎᓪᓗᒍ ᓇᒥᓕᒫᖅ, ᐃᓚᒋᔭᐅᓪᓗᑎᒃ ᐃᑲᔫᑏᑦ ᑐᕌᖓᔪᑦ ᐃᓅᓱᑦᑐᓄᑦ, ᑭᒃᑯᑐᐃᓐᓇᕐᓄᑦ, ᐃᖅᑲᓇᐃᔭᕐᕕᓐᓄᑦ ᐊᒻᒪᓗ ᓄᓇᖃᖅᑐᑐᖃᕐᓄᑦ.