ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑕᓪᓕᒪᒋᓕᖅᑕᖓᓐᓂ ᐊᕐᕌᒍᑕᒫᑦ ᑲᒪᒋᓲᖓᓐᓂᒃ ᐃᙱᐅᓯᐅᕐᓂᕐᒥᒃ ᐅᖃᓗᕋᐅᔭᐅᑎᓕᐅᕐᓂᒥᓪᓗ ᐊᑭᑦᑐᕋᐅᑎᑎᑦᑎᓕᕐᒥᒻᒪᑕ ᒫᓐᓇ ᐱᒋᐊᖅᑐᓂ.

ᕿᓂᕋᑦᑕ ᓇᐃᑦᑑᑎᓂᑦ ᐅᖃᓗᕋᐅᔭᐅᑎᓂᑦ ᐃᙱᐅᓯᕐᓂᓪᓗ ᐃᓄᒃᑎᑑᖓᔪᓂᑦ. ᑖᒃᑯᐊ ᑎᑎᕋᖅᑕᐅᔭᕆᐅᕐᓂᑰᒋᐊᓖᑦ. ᒪᑐᕕᔅᓴᓕᒃ ᕖᕝᕗᐊᓕ 19ᒥ. ᑐᓂᔭᐅᕙᑦᑐᑦ ᐅᖃᓕᒫᖅᑕᐅᑦᑎᐊᕆᐊᖃᓛᕐᒥᒻᒪᑕ, ᓵᓚᔅᓴᑐᓪᓗ ᓇᓗᓇᐃᖅᑕᐅᓛᖅᑐᑎᒃ ᕖᕝᕗᐊᓕ 26ᖑᓕᖅᑲᑦ.

ᓵᓚᖃᐅᓯᐊᔅᓴᑦ ᐱᔪᒥᓇᑦᑎᐊᖅᑐᑎᒃ ᑕᒫᓂ ᐊᕐᕌᒍᒥ. ᓯᕗᓪᓕᕐᐹᖅ ᓵᓚᖃᐅᓯᐊᕋᔭᖅᑐᖅ $2500ᓂᑦ! ᑐᖏᓕᐊ  ᓵᓚᖃᐅᓯᐊᕋᔭᖅᑐᖅ $1750ᓂᑦ, ᐊᒻᒪᓗ ᐱᖓᔪᐊᑦ ᓵᓚᖃᐅᓯᐊᕋᔭᖅᑐᖅ $750ᓂᑦ.

ᑎᓕᐅᕆᒍᒪᔪᒍᑦ ᕿᑭᖅᑕᓂ ᓄᓇᓕᓐᓂᑦ ᐃᓄᓐᓂᑦ ᐃᓱᒪᔅᓴᕐᓯᐅᖁᓪᓗᒋᑦ ᓴᓇᒍᓐᓇᖅᑕᖏᓐᓂᒃ ᑕᑯᔪᒪᓪᓗᒋᓪᓗ ᐋᖅᑭᓱᖅᑕᖏᑦ.

ᕿᑭᖅᑕᓂᒃᑯᑦ ᖁᕕᐊᓲᑎᖃᓲᖑᒻᒪᑕ ᐃᓄᒃᑎᑐᑦ ᐅᖃᐅᓯᓕᕆᓂᕐᒥᒃ ᑕᖅᑭᕐᒥ ᕖᕝᕗᐊᓕᒥ, ᐊᒻᒪᓗ ᑖᓐᓇ ᐊᑭᑦᑐᕋᐅᑎᑎᑦᑎᓂᖅ ᐃᓚᒋᔭᐅᓪᓗᓂ ᖁᕕᐊᓲᑎᖃᕐᓂᖓᓐᓄᑦ.

ᐃᓄᒃᑎᑐᑦ ᐅᖃᐅᓯᓕᕆᓂᕐᒧᑦ ᑕᖅᑭᖅ ᐊᑐᖅᑎᑦᑎᒋᐊᒃᑲᓐᓂᕈᑕᐅᕙᒻᒪᑦ ᐃᓄᐃᑦ ᐅᖃᐅᓯᖏᓐᓂᒃ ᐃᓕᖅᑯᓯᖓᓐᓂᓪᓗ, ᐊᒻᒪᓗ ᐃᑉᐱᓇᕐᓯᑎᑦᑎᕙᑦᑐᓂ ᐃᑉᐱᒋᑦᑎᐊᕆᐊᖃᕐᓂᕐᒥᒃ ᐅᐱᒍᓱᒋᐊᖃᕐᓂᒥᓪᓗ ᐃᓄᐃᑦ ᐊᑐᖃᑦᑕᕐᓯᒪᔭᑐᖃᖏᓐᓂᒃ.

ᑐᓂᓯᔭᐅᖃᑦᑕᕐᓯᒪᒐᑦᑕ ᐱᐅᔫᑎᐊᓗᓐᓂᑦ ᐊᕐᕌᒍᓂᑦ ᑕᓪᓕᒪᓂᑦ ᐊᓂᒍᖅᑐᓂᑦ ᑕᐃᒫᒃ ᐊᑭᑦᑐᕋᐅᑎᑎᑦᑎᖃᑦᑕᑎᓪᓗᑕ. ᐊᕐᕌᓂ ᓯᕗᓪᓕᕐᐹᖑᔪᔪᖅ ᐃᙱᐅᓯᓕᐊᖑᔪᔪᖅ, ᐃᓯᕋᕕᓐ, ᑎᑎᕋᕐᓯᒪᔭᖓ ᑖᔅᓱᒪ ᔨᐅᕋᒥ ᐊᑕᒍᑦᓯᐊᑉ ᐃᒃᐱᐊᕐᔪᒻᒥᐅᑕᐅᑉ.

ᐃᓯᕋᕕᓐ ᐱᔾᔪᑎᓕᒃ ᐃᒫᒃ “ᐃᓄᒃ ᐃᓯᖅᑐᖅ ᖃᐅᒻᒪᐅᒥᑎᑦᑎᓪᓗᓂ ᐃᓪᓗᕈᓯᕐᒥᒃ ᐊᒻᒪ ᓯᕗᓂᔅᓴᖓᓂᒃ ᖃᐅᒻᒪᐅᒥᑎᑦᑎᓪᓗᓂ ᐃᑉᐱᓇᕐᓂᖓᓄᑦ,” ᐊᑕᒍᑦᓯᐊᖅ ᐅᖃᖅᑐᖅ. ᑖᔅᓱᒥᖓ ᐊᑯᓂᐊᓗᒃ ᐃᙱᐅᓯᐅᕋᓱᔅᓯᒪᔪᖅ ᐊᒻᒪᓗ ᐱᔭᕇᕈᒪᓯᓚᐅᕐᓯᒪᔭᖓ ᐊᑭᑦᑐᕋᐅᑎᑎᑦᑎᔪᖃᓕᕐᖓᑦ.

ᓂᕆᐅᑉᐳᒍᑦ ᑐᓵᖃᑦᑕᕐᓂᐊᕆᐊᔅᓴᖅ ᐃᓕᔅᓯ ᑎᑎᕋᐅᓯᕆᔪᒪᓂᐊᖅᑕᖏᓐᓂᒃ ᑕᒫᓂ ᐊᕐᕌᒍᒥ!

ᑐᓂᖃᑦᑕᕈᓐᓇᖅᑕᓯ ᐅᖃᓗᕋᐅᔭᐅᑎᓕᐊᓯ ᐅᕝᕙᓘᓐᓃᑦ ᐃᙱᐅᓯᓕᐊᓯ ᓴᖅᑭᖃᑦᑕᕐᓗᒋᑦ ᕿᑭᖅᑕᓂᒃᑯᑦ ᐃᓄᓕᒫᓄᑦ ᑐᓴᕋᔅᓴᓕᕆᕕᖏᑎᒍᑦ ᖃᕋᓴᐅᔭᒃᑯᑦ.

ᑐᓂᓯᓂᐊᕈᕕᑦ ᐃᙱᐅᓯᓕᐊᓐᓂᒃ, ᓴᖅᑭᖅᑎᒍᓐᓇᖅᑕᐃᑦ ᑕᕐᕆᔮᔅᓴᖅ ᐃᙱᑎᓪᓗᑎᑦ, ᐊᒻᒪᓗ ᑐᓂᓯᓂᐊᕈᕕᑦ ᐅᖃᓗᕋᐅᔭᐅᑎᓕᐊᓐᓂᒃ ᓴᖅᑭᖅᑎᒍᓐᓇᖅᑕᑎᑦ ᐅᖃᐅᓯᖅᑎᑦ, ᐅᕝᕙᓘᓐᓃᑦ ᑕᕐᕆᔮᔅᓴᐅᓗᒍ ᐅᖃᓕᒫᖅᑎᓪᓗᑎᑦ ᑖᔅᓱᒥᖓ.

ᐅᕙᑦᑎᓐᓂᒃ ᓇᓂᓯᔪᓐᓇᖅᑐᑎᑦ ᕙᐃᔅᐳᒃᑯᑦ ᖃᕋᓴᐅᔭᒃᑯᑦ ᓇᕿᑦᑕᕐᓗᒋᑦ ᐅᑯᐊ Qikiqtani Inuit Assoc. ᐅᑯᓇᓂ ᐃᑭᐊᖅᑭᕕᒃᑯᑦ ᑐᑭᓯᒋᐊᕈᑎᖃᕐᕕᓐᓃᒻᒥᔪᒍᑦ Twitter ᐊᒻᒪᓗ Instagram @Qikiqtani_Inuit. ᑕᕝᕗᖓ ᐃᓕᖃᑦᑕᓂᐊᖅᑲᓯᐅᒃ ᐃᙱᐅᓯᓕᐊᓯ ᐅᕝᕙᓘᓐᓃᑦ ᐅᖃᓗᕋᐅᔭᐅᑎᓕᐊᓯ ᐅᓇ ᓇᓗᓇᐃᒃᑯᑕᖅ ᑎᑎᕋᖃᓯᐅᑎᓗᒍ #QIAInuk21 ᑕᐃᒫᒃ ᓇᓂᔪᓐᓇᖃᑦᑕᕐᓂᐊᕋᑦᑎᒍ.

ᐃᕐᖐᓈᖅᑕᐅᑎᒃᑯᑦ ᓇᔅᓯᐅᑎᖃᑦᑕᕈᓐᓇᕐᒥᔭᓯ ᐅᕗᖓ ᑐᕌᖅᑎᓪᓗᒋᑦ whopkins@qia.ca.

ᓄᓇᔅᓯᓐᓂ ᕿᑭᖅᑕᓂᒃᑯᑦ ᑐᓴᐅᒪᑎᑦᑎᔨᖓᓐᓄᑦ ᐅᐸᒍᑎᖃᑦᑕᕈᓐᓇᕐᒥᔪᓯ ᑐᓂᔭᖅᑐᕐᓗᒋᑦ ᐆᑦᑐᕈᑎᓯ ᐅᕝᕙᓘᓐᓃᑦ ᐅᖃᓕᒫᕐᓗᒋᑦ ᐃᙱᕐᓗᒋᓪᓘᓐᓃᑦ ᑐᓴᐅᒪᑎᑦᑎᔨᒧᑦ ᓂᐱᓕᐅᕆᑎᓪᓗᒍ ᐃᓕᓐᓂᒃ. ᐃᖃᓗᓐᓂ ᕿᑭᖅᑕᓂᒃᑯᑦ ᐊᓪᓚᕝᕕᖓᓐᓅᖃᑦᑕᕈᓐᓇᖅᑐᓯ ᐃᒡᓗᕗᑦ ᐃᓪᓗᒦᑦᑐᑦ.

ᖁᕕᐊᓱᓪᓚᕆᑉᐳᒍᑦ ᕿᓚᓈᖅᑐᑕ ᑕᑯᖃᑦᑕᕐᓂᐊᕆᐊᔅᓴᖅ ᐃᓕᔅᓯ ᑎᑎᕋᖅᑕᒥᓂᖏᓐᓂᒃ! ᑎᑎᕋᕐᓗᑎᑦ ᖃᕋᓴᐅᔭᒃᑯᑦ ᐅᕗᖓ whopkins@qia.ca ᐊᐱᖅᑯᑎᔅᓴᖃᕈᔅᓯ, ᐅᕝᕙᓘᓐᓃᑦ ᑎᑎᕋᕐᓗᑎᑦ ᐅᑯᐊ ᐊᖅᑯᑎᒋᓗᒋᑦ ᖃᕋᓴᐅᔭᒃᑯᑦ Facebook, Instagram ᐅᕝᕙᓘᓐᓃᑦ Twitter.