ᑕᓪᓗᕈᑎᐅᑉ ᐃᒪᖓ ᑐᕙᐃᔪᐃᑦᑐᕐᓗ ᓴᐳᔾᔨᕕᓐᖑᕐᑎᑕᐅᓚᐅᕐᓂᖓᓂᑦ ᓇᓪᓕᐅᓂᕐᓯᐅᕐᓂᖅ 

ᐊᕐᕌᒍᓕᒫᓪᓗᐊᖑᓕᕐᑐᖅ, ᐋᒋᓯ 1, 2019ᖑᑎᓪᓗᒍ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᖏᕈᑎᓕᐅᓚᐅᕐᓯᒪᒻᒪᑕ ᐃᓄᐃᑦ ᓄᓇᖓ ᐊᑦᑐᖅᑕᐅᓂᖓᓄᑦ ᐃᑲᔫᓯᐊᕈᑎᑦᓴᑦ ᐊᖏᕈᑎᖏᓂᑦ ᑕᓪᓗᕈᑎᐅᑉ ᐃᒪᖓᑕ ᓴᐳᔾᔨᕕᖓᓄᑦ ᑕᕝᕙᑦᓴᐃᓐᓇᕐᓗ ᓴᐳᔾᔨᒍᑕᐅᑲᐃᓐᓇᕐᓂᐊᕐᑐᓂᑦ ᑐᕙᐃᔪᐃᑦᑑᑉ ᐃᒪᖓᓄᑦ ᐱᖃᓯᐅᔾᔨᓪᓗᑎᑦ.  ᐊᕐᕌᒍᑦᑎᓂ, ᐃᒪᕐᒥᐅᑕᓕᕆᔨᕗᑦ ᐆᒪᔪᓕᕆᔨᒃᑯᓪᓗ ᐱᒋᐊᕐᑎᑦᓯᕙᓪᓕᐊᓯᒪᓕᕐᑐᒍᑦ ᐃᖅᑲᓇᐃᔮᑦᓴᓂᑦ ᐃᑲᔫᓯᐊᑦᓴᓂᓪᓗ ᑐᕌᖓᓂᐊᕐᑐᓂᑦ ᑕᓪᓗᕈᑎᐅᑉ ᐃᒪᖓᓄᑦ ᐃᓄᐃᑦ ᓄᓇᖓ ᐊᑦᑐᖅᑕᐅᓂᖓᓄᑦ ᐃᑲᔫᓯᐊᕈᑎᑦᓴᑦ ᐊᖏᕈᑎᖏᑎᒍᑦ.

ᑮᓇᐅᔭᕐᑖᑦᓴᑦ ᐊᔪᕈᕐᓃᖅᐹᓪᓕᕈᑕᐅᓂᐊᕐᑐᑦ ᓄᓇᓖᑦ ᐊᖑᓇᓱᑦᑐᓕᕆᔨᖏᑕ ᑲᑐᔾᔨᖃᑎᒌᖏᓄᑦ

ᑕᖅᑭᕆᕋᑖᕐᑕᑎᓐᓂ, ᕿᑭᖅᑕᓃᒃᑯᑦ ᓯᐊᒻᒪᕐᑎᕆᓚᐅᕐᑐᑦ $100,000ᓂᑦ ᓄᓇᓖᑦ ᐊᖑᓇᓱᑦᑐᓕᕆᔨᖏᑦᑕ ᑲᑐᔾᔨᖃᑎᒌᖏᓐᓄᑦ (ᐆᒪᔪᕐᓂᐊᕐᑎᒃᑯᑦ) ᑕᓪᓕᒪᐅᓕᖓᔪᓄᑦ ᖃᓂᒋᔮᓃᓐᓂᕐᐹᓄᑦ ᐃᑉᐱᐊᕐᔪᖕᓄᑦ, ᑲᖏᖅᑐᒑᐱᒻᒧᑦ, ᐊᐅᓱᐃᑦᑐᒧᑦ, ᒥᑦᑎᒪᑕᓕᖕᒧᑦ ᖃᐅᓱᐃᑦᑐᒧᓪᓗ. ᑮᓇᐅᔭᕐᑖᖏᑦ ᑐᓂᐅᖅᑲᕐᑕᐅᔪᓐᓇᕐᓯᓚᐅᕐᑐᑦ ᐋᔩᕋᕈᑕᐅᓚᐅᕐᑐᑎᑦ ᑕᓪᓗᕈᑎᐅᑉ ᐃᒪᖓᓄᑦ ᐃᓄᐃᑦ ᓄᓇᖓ ᐊᑦᑐᖅᑕᐅᓂᖓᓄᑦ ᐃᑲᔫᓯᐊᕈᑎᑦᓴᑦ ᐊᖏᕈᑎᖏᑦ (ᐊᖏᑏᑦ).

ᑮᓇᐅᔭᑦ ᐃᑲᔫᑕᐅᔪᒫᕐᓂᐊᕐᑐᑦ ᓄᓇᓖᑦ ᐊᖑᓇᓱᑦᑐᓕᕆᔨᖏᑕ ᑲᑐᔾᔨᖃᑎᒌᖏᓐᓄᑦ ᐊᔪᕐᓴᕈᓐᓃᕐᐹᓪᓕᖁᓪᓗᒋᑦ ᐃᑲᔫᑕᐅᓂᐊᕐᖓᑕ ᐱᔭᑦᓴᓂᑉᐸᓪᓕᐊᑐᐃᓐᓇᕐᑎᓪᓗᒋᑦ ᓄᓇᕗᑦ ᐊᖏᕈᑎᖓ ᐊᖅᑯᑕᐅᓪᓗᓂ, ᓴᖅᑭᓚᕿᔪᓪᓗ ᐱᓐᖑᕐᑎᑕᐅᓂᖓᑎᒍᑦ ᑕᓪᓗᕈᑎᐅᑉ ᐃᒪᖓᓂᑦ ᓴᐳᔾᔨᕕᒃ.

ᑕᓪᓗᕈᑎᐅᑉ ᐃᒪᖓᓄᑦ ᐃᓄᐃᑦ ᓄᓇᖓ ᐊᑦᑐᖅᑕᐅᓂᖓᓄᑦ ᐃᑲᔫᓯᐊᕈᑎᑦᓴᑦ ᐊᖏᕈᑏᑦ ᐃᓗᐊᓂ ᓇᓗᓇᐃᕐᓯᒪᔪᑦ ᑕᓪᓕᒪᑦ ᐅᒪᔪᕐᓂᐊᕐᑏᑦ ᑲᑐᔾᔨᖃᑎᒌᖏᑦ ᐱᑎᑕᐅᖃᑦᑕᓂᐊᕐᑐᑦ $250,000ᓂᑦ ᐊᕐᕌᒍᑕᒫᑦ.  ᑖᒃᑯᐊ $100,000 ᑐᓂᔭᐅᔪᑦ ᐊᑐᓂ ᐆᒪᔪᕐᓂᐊᕐᑏᑦ ᑲᑎᒪᔨᖏᓐᓄᑦ ᐊᑐᕈᒫᕐᓂᐊᕐᓯᒪᔪᑦ ᐊᕐᕌᒍᖓᓄᑦ 2019-2020 ᐊᒻᒪ 2020-2021.

ᕿᑭᖅᑕᓃᒃᑯᑦ ᑐᑭᓯᓇᓱᐊᕐᕕᖃᓚᐅᕐᑐᑦ ᐊᑐᓂ ᐆᒪᔪᕐᓂᐊᕐᑏᑦ ᑲᑐᔾᔨᖃᑎᒌᖏᓐᓂᑦ ᔮᓐᓄᐊᕆ ᐊᒻᒪ ᕕᕝᕗᐊᕆ 2020ᖑᑎᓪᓗᒍ ᑭᓱᒥᖕ ᑭᓐᖒᒪᑦᓯᒪᖔᑕ ᐸᕐᓇᓯᒪᒻᒪᖔᑕᓗ ᖃᓄᑦ ᑮᓇᐅᔭᕐᑖᖏᑦ ᐊᑐᖅᑕᐅᓂᐊᕐᒪᖔᑕ.  ᐊᒥᓱᑦ ᓄᓇᓕᑦ ᐆᒪᔪᕐᓂᐊᕐᑎᖏᑕ ᑲᑎᒪᔨᖏᑦ ᐸᕐᓇᓯᒪᔪᑦ ᑎᑎᕋᕐᕕᖏᑕ ᐋᖅᑭᒋᐊᕐᑕᐅᒍᑎᑦᓴᖏᓂᑦ, ᓂᐅᕕᕆᐊᖃᓗᐊᓐᖑᐊᕐᑐᓂᑦ ᓱᓇᒃᑯᑎᑦᓴᓂᑦ, ᖃᐅᔨᓴᕈᑎᑦᓴᓄᑦ ᐊᒻᒪ ᓄᓇᓕᓐᓂ ᖃᓄᐃᓕᐅᕐᑎᑦᓯᓂᐊᑐᐊᕐᐸᑕ ᐃᑲᔫᑎᑦᓴᓂᑦ.

ᓇᐅᑦᓯᕐᑐᖅᑏᑦ ᐊᓯᖏᓂ ᑲᔪᓯᑎᑕᐅᓂᖓ

ᑲᔪᓯᑦᓯᐊᕐᓯᒪᓂᖓᓄᑦ ᓇᐅᑦᓯᕐᑐᖅᑎ, ᐃᓄᐃᑦ ᐸᐸᑦᓯᔩᑦ ᐆᑦᑐᕋᕐᑕᐅᓪᓗᓂ ᐱᒋᐊᓚᐅᕐᓯᒪᒻᒪᑦ ᐃᑉᐱᐊᕐᔪᖕᒥ ᐊᓯᖏᓂ ᑲᔪᓯᑎᑕᐅᓕᓚᐅᕐᑐᖅ ᑎᓴᒪᐅᓕᖓᔪᓂ ᑕᓪᓗᕈᑎᐅᑉ ᐃᒪᖓᓄᑦ ᖃᓂᓐᓂᖅᐹᖓᓃᑦᑐᓂ ᓄᓇᓕᓐᓂ.  ᕿᑭᖅᑕᓃᒃᑯᑦ ᐃᖅᑲᓇᐃᔭᐃᓐᓇᕐᑐᑦᓴᓂᑦ ᐃᖅᑲᓇᐃᔭᕐᑎᖃᓕᕐᑐᑦ ᑲᖏᖅᑐᒑᐱᒻᒥ, ᐊᐅᓱᐃᑦᑐᒥ, ᒥᑦᑎᒪᑕᓕᖕᒥ ᖃᐅᓱᐃᑦᑐᒥᓗ.  ᐃᖅᑲᓇᐃᔮᑦᓴᓂᑦ ᐱᓐᖑᕐᑎᑦᓯᓂᖏᓐᓄᑦ ᐃᓄᐃᑦ ᐃᖅᑲᓇᐃᔭᕐᑎᐅᔪᓐᓇᕐᓯᓯᒪᔪᑦ ᐊᕙᑎᑦᑎᓂᑦ ᐸᐸᑦᓯᔨᐅᓂᒃᑯᑦ ᓇᐅᑦᓯᕐᑐᖅᑏᑦ ᐊᖑᓇᓱᑦᑎᐅᓯᓐᓈᑦ.  ᑐᓐᖓᕕᑦᓯᐊᕙᐅᓂᐊᕆᓪᓗᓂ ᑐᑭᓯᕙᓪᓕᐊᔭᒥᓂᖕ ᐃᓕᓴᐃᔪᓐᓇᕐᓯᓂᐊᕐᖓᑕ, ᐱᓕᒻᒪᑦᓴᐃᕙᓪᓗᑎᑦ, ᐊᒻᒪ ᑮᓇᐅᔭᓕᐅᕐᓂᒃᑯᑦ ᒪᑭᑉᐹᓪᓕᕈᑕᐅᔪᓐᓇᕐᑐᓂᑦ ᐃᓄᓐᓄᑦ.

ᐊᕐᕌᒍᑦᑎᓂ, ᐃᑉᐱᐊᕐᔪᖕᒥ ᓇᐅᑦᓯᕐᑐᖅᑏᑦ ᑕᑎᒋᔭᐅᓪᓚᕆᓚᐅᕐᒥᔪᑦ ᐃᑲᔪᕐᓂᖏᓐᓄᑦ ᓄᕙᔾᔪᐊᕐᓇᐅᑎᓪᓗᒍ COVID-19 ᐳᕝᕕᕆᓇᕐᑐᖅ ᓯᐊᒻᒪᑦᑐᐊᓘᓕᕐᑎᓪᓗᒍ. ᐃᑉᐱᐊᕐᔪᖕᒥ ᓇᐅᑦᓯᕐᑐᖅᑏᑦ ᐆᒪᔪᕐᓯᐅᐸᑦᑐᑎᑦ ᓂᕿᑦᓯᐊᕙᓐᓂᓪᓗ ᓂᕿᖃᕐᑎᑦᓯᕙᑦᑐᑎᑦ ᓄᓇᖅᑲᑎᒥᓐᓂᖕ.

ᐊᐅᓚᔾᔪᑎᓪᓗᐊᑕ ᒪᑭᑕᐅᒋᐊᓖᑦ ᐱᕙᓪᓕᐊᓂᖏᑦ    

ᐊᑦᓱᕈᕐᓇᕐᑐᓄᑦ ᐊᐴᑎᓯᒪᒐᓗᐊᕐᑎᓪᓗᑕ ᐱᔾᔪᑎᒋᓪᓗᒍ ᓄᕙᕐᔪᐊᕐᓇᖅ COVID-19, ᕿᑭᖅᑕᓃᒃᑯᑦ ᑕᐃᒪᓐᖓᑦ ᓱᓕ ᐱᕙᓪᓕᐊᑎᑦᓯᓇᓱᐊᕐᑐᑦ ᐊᐅᓚᔾᔪᑎᑦᓴᓂᑦ ᒪᑭᑦᑕᕆᐊᓕᓐᓂᑦ ᐱᔭᑦᓴᕐᑖᕆᔭᐅᓚᐅᕐᑐᓂᑦ ᑕᓪᓗᕈᑎᐅᑉ ᐃᒪᖓᓄᑦ ᐃᓄᐃᑦ ᐊᖏᕈᑎᑖᕆᓚᐅᕐᑕᖓᒍᑦ.  ᐃᖅᑲᓇᐃᔭᖃᑎᒋᑦᓯᐊᖏᓐᓇᕐᑕᕗᑦ ᕿᑭᖅᑖᓗᖕᒥ ᓇᖕᒥᓂᓖᑦ ᑲᑐᔾᔨᖃᑎᒌᖏᑦ ᐱᔭᕇᔭᖁᓪᓗᒋᑦ ᐊᐅᓚᔾᔪᑎᑦᓴᐅᓂᐊᕐᑐᑦ ᐸᕐᓇᐅᑎᖏᓐᓂᑦ ᐊᒻᒪ ᒪᑭᑕᑦᓯᐊᕈᓐᓇᕋᔭᕐᒪᖔᑕ ᖃᐅᔨᓴᕐᑕᐅᓗᑎᑦ ᐃᓪᓗᓕᐅᕐᑐᖃᕐᐸᑦ ᑭᓱᑐᐃᓐᓇᕐᒧᑦ ᐊᑐᖅᑕᐅᔪᓐᓇᕐᑐᓂᑦ.

ᐃᖅᑲᓇᐃᔭᖃᑎᒋᒻᒥᔭᕗᑦ ᓄᓇᕗᑦ ᒐᕙᒪᖓᑦ ᐊᒪ ᑲᓇᑕᐅᑉ ᐃᖏᕐᕋᔪᓕᕆᔨᒃᑯᖏᑦ ᑐᑭᓯᐅᒪᖃᑎᒌᓐᓂᖕᒧᑦ ᖃᓄᖅᑑᕈᑎᑦᓴᓂᑦ ᐅᖅᑯᐊᓕᓂᓕᐅᖁᓪᓗᒋᑦ ᐅᒥᐊᕐᓄᑦ ᑐᓚᑦᓯᒪᕕᑦᓴᒥᑦ ᐊᐅᓱᐃᑦᑐᒥ ᖃᐅᓱᐃᑦᑐᒥᓗ. ᓱᓕᒃᑲᓂᖅ, ᐃᑲᔪᕐᑐᐃᓚᐅᕐᑐᒍᑦ ᑲᑐᔾᔨᖃᑎᒌᓐᓂᒃᑯᑦ ᑐᑭᓯᓇᓱᐊᓚᐅᕋᑦᑕ ᐱᖃᑎᒋᓪᓗᒋᑦ ᑲᓇᑕᐅᑉ ᐃᒪᕐᒥᐅᑕᓕᕆᔨᒃᑯᖏᑦ ᐃᑉᐱᐊᕐᔪᖕᒥᑦ ᑲᖏᖅᑐᒑᐱᒻᒥᓪᓗ ᖃᓄᐃᓕᖓᖁᔨᒻᒪᖔᑕ ᐅᒥᐊᕐᓄᑦ ᐅᖅᑯᐊᓂᓕᑦᓴᒥᑦ ᑐᓚᕝᕕᑦᓴᒥᑦ.

ᐊᐅᓚᑦᑎᖃᑎᒌᑦ ᑲᑎᒪᔨᖏᑦ ᐊᒻᒪ ᐃᒪᖅ ᐃᓄᐃᑦ ᑲᑎᒪᔨᕋᓛᖏᑦ

ᐊᐅᓚᑦᑎᓂᕐᖕᒧᓪᓕ, ᐱᓐᖑᕐᑎᑦᓯᓚᐅᕐᑐᒍᑦ ᐃᓄᐃᑦ ᐊᒻᒪ ᑲᓇᑕᐅᑉ ᒐᕙᒪᒃᑯᖏᑦ ᖃᓄᖅᑑᕐᓂᒃᑯᑦ ᐱᓐᖑᕐᑎᑦᓯᖃᑦᑕᓂᐊᕐᑐᓂᑦ ᑕᐃᔭᐅᓪᓗᑎᑦ ᐊᐅᓚᑦᑎᖃᑎᒌᑦ ᑲᑎᒪᔩᑦ ᐊᐅᓚᑦᑎᔨᐅᓂᐊᕐᑐᓂᑦ ᑕᓪᓗᕈᑎᐅᑉ ᐃᒪᖓ ᐱᓪᓗᒍ.  ᓄᓇᓕᓐᓄᑦ ᑐᑭᓯᓇᓱᐊᓚᐅᕐᒥᔪᒍᑦ ᖃᓄᐃᓕᖓᖁᔨᓂᐊᕐᒪᖔᑕ ᐃᒪᖅ ᑲᑎᒪᔨᕋᓛᖏᓐᓂᑦ, ᐃᓄᐃᑦ ᖃᐅᔨᒪᔨᑕᑦᓴᑦ ᑲᑎᒪᔨᕋᓛᖏᑦ, ᑲᔪᓯᑎᑦᓯᔨᐅᔪᒫᕐᓂᐊᕐᑐᑦ ᐊᐅᓚᑦᑎᓂᖕᒧᑦ ᐊᖏᕐᑕᐅᒋᐊᓕᓐᓂᓪᓗ ᐃᑲᔫᓯᐊᑦᓴᓂᑦ.

ᑐᕙᐃᔪᐃᑦᑐᖅ ᑖᕗᖓᓕᒫᖅ ᓴᐳᔾᔭᐅᔪᑦᓴᐅᓂᖓ

ᕿᑭᖅᑕᓃᒃᑯᑦ ᖃᐅᔨᓴᓕᕐᒥᔪᑦ ᖃᓄᖅ ᒪᑭᑕᐃᓐᓇᕈᓐᓇᕐᒪᖔᑦ ᑖᕗᖓᓕᒫᖅ ᓴᐳᔾᔭᐅᓂᖓ ᑐᕙᐃᔪᐃᑦᑐᖅ ᐃᒪᖓᓂ ᓴᐳᔾᔨᕕᒃ. ᖃᐅᔨᓴᕐᑎᑦᓯᓂᐊᕐᑐᒍᑦ ᐃᓄᐃᑦ ᖃᐅᔨᒪᔭᑐᖃᖏᓂᑦ ᐊᐅᓱᐃᑦᑑᑉ ᕿᑭᖅᑖᓗᐊᑕ ᑕᕆᐅᖓᓂᑦ, ᓇᓗᓇᐃᒃᑯᑕᐅᓂᐊᕐᖓᑕ ᖃᐅᔨᒪᔭᑦ ᖃᓄᖅ ᐊᑯᓂᐅᓂᕐᓴᒧᑦ ᓴᐳᔾᔨᕕᐅᒍᓐᓇᕐᒪᖔᑦ.

ᓂᕆᐅᑦᓯᐊᕐᐳᒍᑦ ᐊᕐᕌᒍᑦᑎᓂ ᐃᑉᐱᓐᓇᕐᑐᓂᑦ ᑲᔪᓯᑎᑦᓯᓯᐊᕈᓐᓇᖁᓪᓗᑕ ᐃᖅᑲᓇᐃᔭᕐᑎᐅᔪᑎᒍᑦ, ᓄᓇᑦᑎᓂ ᐊᒻᒪ ᕿᑭᖅᑖᓘᑉ ᒥᑦᓵᓂ ᐱᔾᔪᑎᒋᓪᓗᒍ ᑕᓪᓗᕈᑎᐅᑉ ᐃᒪᖓ ᐊᒻᒪ ᑐᕙᐃᔪᐃᑦᑐᒥ ᐱᔭᑦᓴᑦ ᑲᔪᓯᕙᓪᓕᐊᓂᖏᓂ.