ᐊᒥᓱᐊᓗᓐᓂᑦ ᑲᒪᒋᔭᖃᕈᓐᓇᕋᑦᑕ ᑭᒃᑯᑐᐃᓐᓇᐃᑦ ᓴᓇᒍᓐᓇᖅᑕᖏᓐᓂᒃ ᓴᓇᓕᖅᑎᓪᓗᒋᑦ ᐃᑲᔫᑎᒋᓪᓗᒋᑦ ᐃᑲᔪᖅᑕᐅᔭᕆᐊᓕᓐᓄᑦ. ᐊᐱᕆᓚᐅᕈᒃ ᑖᓐᓇ 11ᓂᑦ ᐅᑭᐅᓕᒃ ᐋᕗᕆ ᓯᐊᐳᑦ, ᑖᓐᓇ ᑮᓇᕐᒧᑦ ᒪᑐᐊᔅᓴᓕᐅᖅᑐᖅ ᓄᓇᖅᑲᑎᖏᓐᓄᑦ ᐳᕝᕕᕆᓇᖅᑐᒥᒃ ᖃᓂᒪᓇᕐᓂᖓᓂ ᓄᓇᕐᔪᐊᓕᒫᒥ. ᑖᓐᓇ ᐱᒋᐊᕈᑎᖃᓚᐅᖅᑑᒐᓗᐊᖅ ᖁᕕᐊᒋᔭᕐᓱᖅᑐᓂ ᓴᓇᓪᓗᓂ ᐱᓕᕆᐊᔅᓴᖃᐅᑎᒋᓕᖅᑕᖓ ᐃᑲᔫᑎᒋᓂᐊᕐᖓᒍ ᐃᖃᓗᒻᒥᐅᑕᐃᑦ ᖃᓄᐃᖁᓇᒋᑦ ᐊᒻᒪᓗ ᑮᓇᐅᔭᓂᑦ ᓄᐊᓴᐃᔾᔪᑎᒋᓪᓗᒍ ᔫᒥ ᐃᓕᓴᕕᒻᒥ ᐅᓪᓛᕈᕐᒥᑕᕈᑕᐅᕙᑦᑐᒧᑦ.

“ᖁᕕᐊᓇᐃᓐᓇᓕᒫᕐᐸᑦᑐᖅ ᐃᑲᔪᕆᐊᔅᓴᖅ,” ᐅᖃᖅᑐᖅ ᐋᕗᕆ “ᐊᒥᓱᐊᓗᐃᑦ ᓱᕈᓰᑦ, ᐃᓐᓇᐃᑦ ᐃᓚᒌᓪᓗ, ᑮᓇᐅᔭᓂᑦ ᐊᒥᒐᕐᓯᖃᑦᑕᕐᖓᑕ ᓂᐅᕕᐅᑎᔅᓴᓂᑦ ᓂᕿᓂᑦ, ᐅᕝᕙᓘᓐᓃᑦ ᐃᓪᓗᖓᓄᑦ ᐊᑭᓕᐅᑎᔅᓴᓂᑦ.”

ᐃᑲᔪᕈᒪᓪᓗᓂ ᓄᓇᖅᑲᑎᖏᓐᓂᒃ, ᐱᓗᐊᖅᑐᒥᑦ ᐃᓕᓐᓂᐊᖃᑎᖏᓐᓂᒃ ᔫᒥ ᐃᓕᓴᕕᒻᒥ, ᓱᕈᓯᕐᓄᑦ ᐃᓕᓴᕕᒃ ᐃᖃᓗᓐᓂ, ᐋᕗᕆ ᑐᑭᑖᕈᑎᖃᓯᓚᐅᖅᑐᖅ ᖃᓄᖅᑑᕈᑎᒋᔪᒪᓪᓗᓂᐅᒃ ᑕᒪᓐᓇ.

ᐄᐳᓗ ᓄᙳᖏᓐᓂ, ᐋᕗᕆ ᐃᓚᒋᔭᐅᓚᐅᖅᑐᖅ ᐊᑭᑦᑐᕋᐅᑎᑎᑦᑎᓂᕐᒥ ᐃᑲᔪᕐᓯᒪᓪᓗᑎᒃ ᓄᓇᕗᒥ ᐅᖃᓕᒫᖃᑦᑕᓂᕐᒧᑦ ᑲᑎᒪᔩᑦ ᓴᓇᓯᒪᔪᒥᒃ ᐃᓱᒪᓇᙱᑦᑐᒥᒃ ᑮᓇᕐᒧᑦ ᒪᑐᐊᕐᒥᑦ, ᐊᑐᓯᓚᐅᖅᑐᖅ ᐃᓕᕋᑖᕐᓯᒪᔭᒥᓂᒃ ᓄᐊᓴᐃᔾᔪᑎᒋᓂᐊᕐᖓᒍ ᑮᓇᐅᔭᓂᑦ ᔫᒥ ᐃᓕᓴᕕᒻᒧᑦ ᐅᓪᓛᕈᕐᒥᑕᖅᑎᑦᑎᒍᑎᒋᕙᑦᑕᖏᓐᓄᑦ.

“ᐃᓱᒪᓚᐅᖅᑐᖓ ᐃᓚᖏᑦ ᓂᐅᕕᐊᔅᓴᕆᓚᐅᕐᓗᒋᑦ ᐃᑲᔫᑎᒋᓂᐊᕋᒃᑭᑦ ᑮᓇᐅᔭᑦ ᐅᓪᓛᕈᕐᒥᑕᖅᑎᑦᑎᕙᑦᑐᓄᑦ,” ᐅᖃᖅᑐᖅ ᐋᕗᕆ.

ᓴᓇᓯᒪᓕᖅᑐᖅ ᑕᒫᓂ 40ᖏᓐᓃᑦᑐᓂᑦ ᑮᓇᕐᒧᑦ ᒪᑐᐊᕐᓂᑦ ᓯᕗᓪᓖᓐᓂᒃ ᒪᕐᕉᓐᓂᒃ ᐱᓇᓱᐊᕈᓰᓐᓂᒃ ᐊᒻᒪᓗ ᐃᑲᔫᑎᖃᕐᓯᒪᓪᓗᓂ ᐅᖓᑖᓃᑦᑐᓂᑦ $100 ᔫᒥ ᐃᓕᓴᕕᒻᒥ ᐅᓪᓛᕈᕐᒥᑕᖅᑎᑦᑎᖃᑦᑕᕐᓂᖅ ᐃᖏᕐᕋᐃᓐᓇᖁᓪᓗᒍ ᐊᒻᒪᓗ ᐃᓕᓴᕕᒃ ᒪᑐᓯᒪᓂᖓᓂ.

“ᓇᒻᒥᓂᖅ ᐱᒃᑯᒋᔪᖓ,” ᐅᖃᖅᑐᖅ ᐋᕗᕆ, “ᓱᓕ ᒪᑐᐊᓕᐅᖏᓐᓇᕈᒪᔪᖓ ᐱᔾᔪᑎᖏᓪᓗᒍ ᖃᓂᒪᓇᖅᑐᖅ,” “ᐃᓱᒫᓗᓇᕈᓘᔭᕐᓯᒪᔪᐊᓘᒻᒪᑦ, ᓴᐳᑎᔭᐅᒍᒥᓇᕐᖓᑦ ᖃᓄᐃᙱᑦᑎᐊᖏᓐᓇᕈᒥᓇᖅᑐᓂᓗ.”

ᐋᕗᕆ ᐱᕕᔅᓴᖃᑦᑎᐊᖃᑦᑕᖅᑐᖅ ᐃᓕᓐᓂᐊᕈᑎᖏᓐᓂᒃ ᑲᒪᖃᑦᑕᖅᑐᓂ ᐊᒻᒪᓗ ᑮᓇᕐᒧᑦ ᒪᑐᐊᓕᐅᕐᐸᑦᑐᓂ. ᐅᖃᖅᑐᖅ ᐱᔭᕆᐊᑐᑲᐃᓐᓇᓚᐅᖅᑐᖅ ᑲᑎᑦᑎᓇᓱᑦᑐᓂ ᓴᓈᔅᓴᓂᑦ ᐊᑐᖅᑕᐅᒍᒪᓪᓚᕆᑦᑎᓪᓗᒋᑦ. ᖁᔭᓐᓇᖅᑐᖅ, ᐄᒪᓕ ᔪᐊᓇᓯ, ᓇᒻᒥᓂᖃᖅᑎ ᓂᐅᕕᕐᕕᖁᑎᓕᒃ ᒥᖅᓱᖅᑕᒥᒃ, ᐃᑲᔫᑎᖃᕐᓯᒪᒻᒪᑦ ᓴᓈᔅᓴᓂᑦ ᐃᑲᔫᑎᖃᕐᓂᐊᕐᖓᑕ ᓴᓇᖃᑦᑕᖅᑕᖏᓐᓄᑦ.

ᖃᐅᔨᒪᔭᖃᖅᑮᑦ ᓄᓇᔅᓯᓐᓂ ᐃᑲᔪᖅᑐᒥᒃ ᐊᓯᑦᑎᓐᓂᒃ ᐳᕝᕕᕆᓂᕐᒧᑦ ᖃᓂᒪᓇᖅᑐᖃᖅᑎᓪᓗᒍ ᓄᓇᕐᔪᐊᓕᒫᒥ − ᐊᑏ ᖃᐅᔨᒃᑲᐃᓚᐅᕆᑦ ᐅᕗᖓ ᑎᑎᕋᕐᓗᑎᑦ szerehi@qia.ca