80 ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑏᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ 2018-2019 ᐊᕐᕌᒍᒥ ᐃᓕᓐᓂᐊᓂᕐᒧᑦ ᐃᑲᔫᓯᐊᖅᑖᖅᑐᑦ
ᐃᖃᓗᐃᑦ, ᓄᓇᕗᑦ − ᓯᑎᐱᕆ 26, 2018 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᑲᑐᔾᔨᖃᑎᒌᖏᑦ) ᖁᕕᐊᓱᑦᑐᑦ ᓇᓗᓇᐃᕐᓯᔭᕆᐊᔅᓴᖅ ᐃᑲᔫᓯᐊᖅᑖᖅᑐᓂᑦ ᕿᑭᖅᑕᓂᒃᑯᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᖏᓐᓂ ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑎᓄᑦ ᐃᓕᓐᓂᐊᖅᑐᓄᑦ 2018-2019ᒥ ᐃᓕᓐᓂᐊᕐᓇᒥ ᐊᕐᕌᒍᒥ.
“ᐱᕈᕐᐸᓪᓕᐊᑎᑦᑎᓂᖅ ᐃᓕᓐᓂᐊᕐᓂᓕᕆᓂᕐᒥ ᒪᑭᑉᐸᓪᓕᐊᑎᑦᑎᓂᐅᒻᒪᑦ ᓯᕗᓂᔅᓴᑎᓐᓄᑦ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖏᔪᖅᑳᖓᑦ ᐸᐅᓗᓯ ᐊᕿᐊᕈᖅ, “ᑖᒃᑯᐊ ᓯᓚᑦᑐᓴᕐᕕᒻᒥ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᑦ ᐃᓄᓐᓄᑦ ᐃᑲᔫᑎᖄᕐᔪᖃᑦᑕᕐᖓᑕ ᐊᐅᓪᓗᔾᔨᓂᕐᓴᐅᓂᐊᕐᖓᑕ ᐃᓕᓐᓂᐊᖅᑕᖏᓐᓂᒃ, ᐱᓇᓱᐊᕈᑎᖃᕐᓂᐊᕐᖓᑕ ᑐᕌᒐᖏᓐᓂᒃ ᐊᒻᒪᓗ ᑎᑭᑦᑎᖃᑦᑕᓂᐊᕐᖓᑕ ᐊᑐᕈᒪᓯᒪᔭᖏᓐᓂᒃ.”
ᑕᒫᓂ ᐊᕐᕌᒍ ᑐᖏᓕᕆᒻᒪᒍ ᕿᑭᖅᑕᓂᒃᑯᑦ ᐱᔭᔅᓴᖅᑕᖃᖅᑎᑦᑎᓂᖏᓐᓄᑦ $200,000ᓂᑦ ᓄᑖᓂᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓂᑦ.
80 ᕿᑭᖅᑕᓂᒃᑯᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᖁᑎᖏᑦ ᐊᒥᓲᓂᖃᖅᑐᑎᒃ $2,500/ᐊᕐᕌᒍᑕᒫᑦ, ᑐᓂᔭᐅᕙᑦᑐᑦ ᑐᔅᓯᕋᐅᓯᐅᖅᑳᑐᐃᓐᓇᖅᑐᓄᑦ−ᐃᑲᔪᖅᑕᐅᖅᑳᖅᑐᓄᑦ ᐃᓕᓐᓂᐊᖅᑎᓄᑦ ᕿᑭᖅᑕᓂ ᓄᓇᓕᓐᓃᙶᕐᓯᒪᔪᓄᑦ ᐃᓕᓐᓂᐊᖅᑐᓄᑦ ᓯᓚᑦᑐᓴᕐᕕᒻᒥ.
ᐅᖓᑖᓃᑦᑐᑦ 100 ᐃᓕᓐᓂᐊᖅᑏᑦ ᑐᔅᓯᕋᕐᓯᒪᒻᒪᑕ ᑕᕝᕙᙵᑦ ᕿᑭᖅᑕᓂᒃᑯᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᖅᑖᖃᐅᖏᓐᓂᒃ ᑕᒫᓂ ᐊᕐᕌᒍᒥ.
ᒪᓕᒐᖏᑦ ᕿᑭᖅᑕᓂᒃᑯᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᖏᑕ:
- ᑐᔅᓯᕋᖅᑐᑦ ᐊᑐᖅᑐᒥᒃ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓄᑦ ᐃᓚᒋᔭᐅᔾᔪᑎᖃᕆᐊᓖᑦ
- ᐃᓕᓐᓂᐊᖅᑏᑦ ᐃᓅᔭᕆᐊᓖᑦ ᐊᑎᓕᐅᖅᑕᐅᓯᒪᓗᑎᒃ ᓄᓇᕗᑦ ᐊᖏᖃᑎᒌᒍᑎᖏᓐᓂ ᓄᓇᖃᕐᓗᑎᒃ ᕿᑭᖅᑕᓂ ᓄᓇᓕᓐᓂᑦ
- ᐃᓕᓐᓂᐊᖅᑏᑦ ᐊᑎᓕᐅᕐᓯᒪᔭᕆᐊᓖᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑎᐅᓗᑎᒃ
ᑕᑯᓐᓇᕋᔅᓴᓕᐊᖑᓯᒪᔪᖅ ᐊᒥᓲᙱᑦᑐᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᖅᑖᕐᓯᒪᔪᑦ ᑕᑯᔭᔅᓴᐅᓪᓗᑎᒃ:
https://www.youtube.com/watch?v=YVE7M8ykeDo
ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:
ᓯᒪ ᓴHᐊ ᔨᐅᕋHᐃ,
ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
szerehi@qia.ca
867.975.8413
1.800.667.2742