ᑎᓴᒪᐅᔪᖅᑐᑦ ᐱᓕᒻᒪᒃᓴᓚᐅᖅᑐᑦ ᖃᐅᓱᐃᑦᑐᕐᒥ ᐱᔭᕇᕋᑖᓚᐅᖅᐳᑦ ᖁᓕᓄᑦ ᐱᓇᓱᐊᕈᓯᕐᓄᑦ ᐊᑯᓂᐅᑎᒋᔪᖅ ᓴᓇᔨᐅᒋᐅᖅᓴᓂᕐᒧᑦ ᐱᓕᒻᒪᒃᓴᕈᑎᒥᒃ. ᑖᓐᓇ ᐃᓕᓐᓂᐊᖅᑕᐅᓂᖓ ᐃᓚᒋᔭᐅᕗᖅ ᖁᑦᑎᒃᑐᒥ ᓴᓇᔨᐅᒋᐅᖅᓴᓂᕐᒧᑦ ᐃᓕᓐᓂᐊᕋᒃᓴᖅ ᐊᐅᓚᑕᐅᔪᖅ ᐃᓚᒋᔭᐅᓪᓗᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᑕᓪᓗᕈᑎᐅᑉ ᐃᒪᖓ ᐱᖁᑎᕐᔪᐊᑦ ᐱᕙᓪᓕᐊᑎᑕᐅᓂᖏᑦ. 
ᖃᐅᓱᐃᑦᑐᖅ ᓯᕗᓪᓕᖅᐹᖑᓚᐅᖅᐳᖅ ᓄᓇᓕᒃ ᓴᓇᔨᐅᒋᐅᖅᓴᓂᕐᒧᑦ ᐱᓕᒻᒪᒃᓴᕈᑎᒥᒃ ᐃᓕᓐᓂᐊᑎᑦᑎᕕᐅᓪᓗᓂ. ᐱᓕᒻᒪᒃᓴᖅᑐᑦ ᐱᔭᕇᑦᑎᐊᓚᐅᖅᑐᑦ ᓴᓇᔨᐅᒋᐅᖅᓴᓂᕐᒧᑦ ᒫᓐᓇ ᐱᕕᖃᓕᖅᑐᑦ ᐃᖅᑲᓇᐃᔭᕐᓗᑎᑦ ᓄᓇᕗᒻᒥ ᓴᓇᔪᓕᕆᔨᒃᑯᑦ ᑯᐊᐳᕇᓴᙵᓄᑦ ᐱᕙᓪᓕᐊᔨᖏᖕᓂᑦ ᑕᓪᓗᕈᑎᐅᑉ ᐃᒪᖓᓂᒃ ᐊᒥᓱᓄᑦ ᐊᑐᖅᑕᐅᔪᓐᓇᖅᑐᖅ ᐃᒡᓗᕐᔪᐊᓕᐊᕆᔭᖅ ᖃᐅᓱᐃᑦᑐᒥ. ᐱᓕᒻᒪᒃᓴᖅᑐᑦ ᐃᖅᑲᓇᐃᔭᖅᓯᓐᓈᕐᓗᑎᑦ ᐃᓕᓐᓂᐊᖅᑎᑕᐅᒐᔭᖅᑐᑦ ᓴᓇᔭᐅᒋᐊᕐᓗᓂ ᑯᐊᐸᒃᑯᑦ ᑐᔪᕐᒥᕕᑐᖃᖓ ᐋᖅᑭᒋᐊᖅᑕᐅᒐᔭᕐᒪᑦ ᓄᑖᖅ ᓇᐅᑦᑎᖅᓱᖅᑏᑦ ᐊᓪᓚᒡᕕᐊ ᐊᒻᒪᓗᑦᑕᐅᖅ ᓄᑖᖅ ᐃᓚᔭᐅᓂᖓ ᓇᐅᑦᑎᖅᓱᖅᑏᑦ ᑲᑎᒪᓪᓗᑎᑦ ᐃᖅᑲᓇᐃᔮᖃᖅᓯᓐᓈᕈᑎᖓᓂᒃ.
ᐅᐱᒋᕙᑦᑎᒋᑦ ᐱᓕᒻᒪᒃᓴᖅᑐᑦ ᖃᐅᓱᐃᑦᑐᕐᒥ!
ᒫᑦᓯ 2022-ᖑᑎᓪᓗᒍ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓴᖅᑎᑦᑎᓚᐅᖅᓯᒪᕗᑦ ᐱᓕᕆᖃᑎᖃᕐᓂᐊᓕᕐᓂᖏᖕᓂᑦ ᓄᓇᕗᒻᒥ ᓴᓇᔪᓕᕆᔨᒃᑯᑦ ᑯᐊᐳᕇᓴᙵᑕ ᐱᕙᓪᓕᐊᑎᑦᑎᔨᖏᖕᓂᑦ, ᕿᑭᖅᑖᓗᒻᒥ ᓇᖕᒥᓂᖃᖅᑐᑦ ᐱᕙᓪᓕᐊᑎᑕᐅᓂᖏᑦ ᑯᐊᐳᕇᓴᙵ, ᐊᒻᒪᓗ ᕿᑭᖅᑕᓂ ᓴᓇᔪᓕᕆᔨᒃᑯᑦ ᑎᒥᖓ ᐊᐅᓚᑦᑎᓗᑎᑦ ᓴᓇᔨᐅᒋᐅᑎᓴᓂᕐᒧᑦ ᐱᓕᒻᒪᒃᓴᒐᒃᓴᒥᒃ ᐃᓕᓐᓂᐊᖅᑕᐅᒐᔭᖅᑐᒥᒃ ᐊᒻᒪᓗ ᐃᖅᑲᓇᐃᔮᕐᓅᖅᑕᐅᒐᔭᕐᓂᖏᑦ ᑎᑭᓪᓗᒋᑦ 60-ᐅᔪᑦ ᐃᓄᐃᑦ ᐱᓕᒻᒪᒃᓴᖅᑐᑦ ᓄᓇᓕᐅᔪᓂ ᐃᒃᐱᐊᕐᔪᒃ, ᑲᖏᖅᑐᒑᐱᒃ, ᐊᐅᓱᐃᑦᑐᖅ, ᒥᑦᑎᒪᑕᓕᒃ, ᐊᒻᒪᓗ ᖃᐅᓱᐃᑦᑐᖅ. ᑖᓐᓇ ᓴᓇᔨᐅᒋᐅᖅᓴᓂᕐᒧᑦ ᐱᓕᒻᒪᒃᓴᕐᓂᖅ ᑮᓇᐅᔭᖃᖅᑎᑕᐅᕗᖅ ᑲᑭᕙᒃ ᑲᑐᔾᔨᖃᑎᒌᖏᑦ ᐊᒻᒪᓗ ᒪᑭᒋᐊᖅᑕ ᐃᓄᐃᑦ ᐱᓕᒻᒪᒃᓴᖅᑎᑕᐅᓂᖏᖕᓄᑦ ᑯᐊᐳᕇᓴᙵᓄᑦ.
ᐃᖅᑲᓇᐃᔮᕐᓄᑦ ᐃᓕᔭᐅᓂᖏᑦ ᐱᓕᕆᐊᕆᔭᐅᒐᔭᕐᒪᑦ ᓄᓇᕗᒻᒥ ᓴᓇᔪᓕᕆᔨᒃᑯᑦ ᑯᐊᐳᕇᓴᙵ ᐱᕙᓪᓕᐊᔪᓕᕆᔨᖏᑦ ᓴᓇᔭᐅᓗᓂ ᐊᒥᓱᓄᑦ ᐊᑐᖅᑕᐅᒍᓐᓇᕋᔭᖅᑐᖅ ᐃᒡᓗᕐᔪᐊᖅ ᐊᒻᒪᓗ ᐊᕕᑦᑐᖅᓯᒪᔪᓂ ᐱᓕᒻᒪᒃᓴᕐᕕᒃ ᐱᓕᕆᐊᑦ ᑮᓇᐅᔭᖃᖅᑎᑕᐅᓪᓗᑎᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ ᑖᒃᑯᑎᒎᓇᖅ ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᐸᐸᑕᐅᕝᕕᖓ ᐊᒻᒪᓗ ᑐᕙᐃᔪᐃᑦᑐᖅ ᐱᖁᑎᕐᔪᐊᖅᑖᖅᑎᑕᐅᓂᖓᑕ ᐊᖏᕈᑎᖏᑎᒍᑦ. ᕿᑭᖅᑕᓂ ᓴᓇᔪᓕᕆᔨᒃᑯᑦ ᑎᒥᖓ ᓯᕗᓂᒃᑲᑕᖅᑎᐅᓂᐊᖅᑐᑦ ᖁᓕᓄᑦ ᐱᓇᓱᐊᕈᓯᕐᓄᑦ ᐊᑯᓂᐅᑎᒋᔪᖅ ᐃᒡᓗᕈᓯᕐᒥ ᐃᓕᓐᓂᐊᕐᓂᕐᒥᒃ ᐊᒻᒪᓗ ᐆᑦᑐᕋᕐᓗᑎᑦ ᐱᓕᒻᒪᒃᓴᖅᑐᖃᖅᑎᓪᓗᒍ ᖃᖓᒃᑰᒐᔭᕐᓂᖓ ᐃᖅᑲᓇᐃᔮᖅᑖᕈᓐᓇᕐᓂᖏᖕᓅᖓᒐᔭᖅᑐᓂ.
ᑖᓐᓇ ᐱᓕᒻᒪᒃᓴᕈᑎ ᓂᕆᐅᒋᔭᐅᕗᖅ ᐱᒋᐊᕋᔭᕐᓂᖓᓂᒃ ᐊᓯᖏᖕᓂᑦ ᑎᓴᒪᑦ ᑕᓪᓗᕈᑎᐅᑉ ᐃᒪᖓᓄᑦ ᐊᑦᑐᖅᑕᐅᓯᒪᔪᑦ ᓄᓇᓕᐅᔪᑦ ᐃᒃᐱᐊᕐᔪᒃ, ᑲᖏᖅᑐᒑᐱᒃ, ᐅᐃᓱᐃᑦᑐᖅ, ᐊᒻᒪᓗ ᒥᑦᑎᒪᑕᓕᒃ ᐅᐱᕐᖔᖅ 2023−ᖑᓕᖅᐸᑦ.
