ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᐱᒍᓱᑦᑐᑦ ᓴᖅᑮᑎᑦᑎᔭᕆᐊᒃᓴᖅ ᑐᓴᖅᑕᕗᑦ: ᑐᓴᖃᑦᑕᓚᐅᖅᑕᕗᑦ ᐅᓂᒃᑳᕐᒥᒃ. ᑖᒃᑯᐊ ᐅᖃᓕᒫᒐᕋᓛᓕᐊᕆᔭᐅᓯᒪᔪᑦ ᐋᖅᑭᓱᖅᑕᐅᓚᐅᖅᓯᒪᕗᑦ ᐱᓕᕆᖃᑎᒋᔪᓐᓇᐃᓐᓇᖅᑐᑎᒍᑦ ᓄᓇᓕᒻᒥᐅᑦ ᑖᒃᑯᓄᖓ ᓄᓇᖃᐅᖅᑐᑦ ᖃᓂᒋᔭᖏᖕᓂ ᓄᓘᔭᑦ ᐅᔭᕋᓐᓂᐊᕐᕕᖓᓂᒃ ᐊᑦᑐᖅᑕᐅᓯᒪᔪᓂᑦ ᓄᓇᓕᖕᓂ ᓲᕐᓗᒃ ᐅᑯᓇᓂ ᐃᒃᐱᐊᕐᔪᒃ, ᑲᖏᖅᑐᒑᐱᒃ, ᐃᒡᓗᓕᒃ, ᒥᑦᑎᒪᑕᓕᒃ ᐊᒻᒪᓗ ᓴᓂᕋᔭᒃ.

ᓄᓇᖃᐅᖅᑐᑦ ᓄᓘᔭᓂ ᐅᔭᕋᓐᓂᐊᕐᕕᖓᑕ ᓄᓇᓕᖁᑎᖏᖕᓂ  ᑲᑐᔾᔨᔪᒪᓂᖃᑦᑎᐊᖅᑐᑎᑦ ᐅᓂᒃᑲᐅᓯᖃᓚᐅᕐᒪᑕ ᖃᐅᔨᒪᓂᕐᒥᖕᓂᒃ ᐃᑲᔪᖅᑐᑎᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐋᖅᑭᒃᓱᐃᓪᓗᑎᑦ ᑖᔅᓱᒥᖓ ᐅᖃᓕᒫᒐᕋᓛᖑᔪᒥᒃ, ᐅᖃᐅᓯᖃᓗᐊᖅᑐᑎᑦ ᐃᓱᒫᓘᑎᒋᔭᐅᔪᓂᑦ ᐊᒻᒪᓗ ᐊᑦᑐᐃᓂᖃᕈᓐᓇᕐᓂᖏᖕᓂᑦ ᓄᓘᔭᑦ ᐅᔭᕋᓐᓂᐊᕐᕕᒃ ᓄᓇᓕᐅᔪᓄᑦ ᐊᒻᒪᓗ ᓄᓇᓕᒻᒥᐅᑕᐅᔪᓄᑦ. ᑕᒪᓐᓇ ᐊᕕᑦᑐᖅᓯᒪᓂᐊ ᓄᓘᔭᑦ ᐅᔭᕋᓐᓂᐊᕐᕕᑉ ᐱᓕᕆᐊᖑᔫᑉ ᖃᓂᒋᔭᖓᓃᑦᑐᖅ ᐱᒻᒪᕆᐅᓯᒪᒻᒪᑦ ᐊᒥᓱᓄᑦ ᐊᕐᕌᒍᒐᓵᓗᓐᓄᑦ ᑭᖑᕚᕇᑦᑐᓄᑦ ᐃᓄᖕᓄᑦ ᐊᒻᒪᓗ ᐊᑐᖅᑕᐅᖏᓐᓇᖅᑐᓂ ᓱᓕ ᐊᒻᒪᓗ ᑕᑎᖏᔭᐅᓪᓗᓂ ᐅᓪᓗᒥᐅᔪᖅ. ᐱᐅᔫᓂᖏᑦ ᑐᑭᓯᒋᐊᕈᑏᑦ ᑕᑯᒃᓴᐅᑎᑕᐅᕗᑦ ᓈᓴᐅᑎᖏᑎᒍᑦ ᐊᒥᓲᓂᖏᑦ ᐱᒻᒪᕆᐅᔪᑦ ᓄᓇᐃᑦ ᐊᒻᒪᓗ ᐱᒻᒪᕆᐅᑎᒋᓂᖏᑦ ᓇᓗᓇᐃᖅᑕᐅᓯᒪᓪᓗᑎᑦ ᓄᓇᓕᒻᒥᐅᑕᐅᔪᓄᑦ: 2,457 ᓈᓴᐅᑎᓖᑦ ᐅᕝᕙᓘᓐᓃᑦ ᐱᒻᒪᕆᐅᑎᒋᓂᕋᖅᑕᐅᓂᖏᑦ ᓇᓗᓇᐃᖅᑕᐅᓚᐅᖅᑐᑦ ᑕᐃᑲᓂ ᐊᒻᒪᓗ ᖃᓂᒋᖓᔭᓂ ᓄᓘᔭᑦ ᐅᔭᕋᓐᓂᐊᕐᕕᖓᖕᓂ ᓄᓇᐅᓂᕋᖅᑕᐅᓪᓗᑎᑦ ᐱᒻᒪᕆᐅᓪᓗᑎᑦ ᐊᑐᖅᑕᐅᕙᓐᓂᖏᖕᓄᑦ.

ᑐᑭᓯᒋᐊᕈᑎᓂᑦ ᑲᑐᔾᔨᓚᐅᕐᒪᑕ ᐊᖑᓇᓱᓐᓂᕐᒥᒃ, ᓂᕿᖃᑦᑎᐊᕈᑕᐅᖃᑦᑕᕐᓂᖓᓂᒃ ᐊᒻᒪᓗ ᐃᓕᖅᑯᓯᖏᖕᓄᑦ ᐱᒻᒪᕆᐅᔪᓂᑦ. ᓄᓇᓕᒻᒥᐅᑕᐅᔪᓪᓗ ᐅᖃᐅᓯᖃᓚᐅᕐᒥᔪᑦ ᖃᓄᖅ ᐊᕙᑎ ᐊᓯᔾᔨᖅᓯᒪᓕᕐᓂᖓᓂᒃ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖁᔭᓐᓇᒦᕈᒪᕗᑦ ᐃᑲᔪᓚᐅᖅᑐᓄᑦ ᑖᒃᑯᓄᖓ ᑐᓴᖅᑕᕗᑦ ᖃᐅᔨᓴᖅᑕᐅᑎᓪᓗᒋᑦ.

ᐊᓯᔾᔨᖅᓯᒪᔪᑦ ᐊᒻᒪᓗ ᐃᓱᒫᓘᑎᒋᔭᑦ ᐊᖏᓪᓕᒋᐊᖅᑕᐅᒍᒪ−ᕕᒋᔭᖓᓂ ᐅᔭᕋᓐᓂᐊᕐᕕᑉ ᑕᐃᒪᐃᒃᑯᑎᒡᒎᖅ ᐊᓯᐅᔨᒃᑲᓐᓂᑐᐃᓐᓇᕐᓂᐊᕐᒪᑕ ᐆᒪᔪᐃᑦ ᓇᔪᒐᖏᖕᓂᑦ, ᓂᕐᔪᑏᑦ ᓅᑉᐸᓪᓕᐊᑎᓪᓗᒋᑦ ᐸᕝᕕᓴᒃᑕᐅᓗᑎᑦ ᐊᒻᒪᓗ ᐊᒥᓲᓂᖏᑦ ᐊᑦᑐᖅᑕᐅᓗᑎᑦ, ᓱᕈᕐᓇᖅᑐᖃᕐᓂᖅᓴᐅᓕᕐᓗᓂ, ᐃᑦᑕᕐᓂᓴᐃᑦ ᐊᑦᑐᖅᑕᐅᐃᓕᕐᓗᑎᑦ, ᐊᒻᒪᓗ ᐃᓕᖅᑯᓯᖅ ᖃᐅᔨᒪᔭᐅᔪᖅ ᑭᖑᕚᕆᔭᐅᔪᓄᑦ ᐃᓕᓐᓂᐊᖅᑎᑦᑎᒍᑕᐅᕙᑦᑐᖅ ᓄᖅᑲᖅᑕᕐᓗᓂ. ᑕᒪᒃᑯᐊ ᐊᒻᒪᓗ ᐊᓯᖏᑦ ᐊᑦᑐᐃᓂᖃᕈᓐᓇᕐᓂᖏᑦ ᐱᒻᒪᕆᐅᔪᓄᑦ ᓄᓇᓄᑦ ᓇᓗᓇᐃᔭᖅᑕᐅᓯᒪᕗᑦ ᐅᓂᒃᑳᕐᒥ − ᐊᑐᖅᑐᑎᑦ ᓂᐱᓂᑦ ᐊᒻᒪᓗ ᐅᖃᐅᓯᖏᖕᓂᑦ ᓄᓇᓕᒻᒥᐅᑕᕐᓂᑦ.

ᐃᓕᓐᓂᐊᒃᑲᓐᓂᕈᓐᓇᖅᐳᑎᑦ ᑕᑯᓂᐊᕐᓗᒍ ᑐᓴᖅᑕᕗᑦ: ᑐᓴᓚᐅᕐᓂᕗᑦ ᐅᓂᒃᑳᕐᒥᒃ ᐃᑭᐊᖅᑭᕕᑦᑎᓐᓂ ᐅᕙᓂ.