ᓄᓇᕗᑦ ᐸᖓᒡᒍᔾᔨᓂᖅ ᐱᒋᐊᕐᓂᐊᖅᑐᖅ ᖃᐅᒃᐸᑦ ᒥᑦᑎᒪᑕᓕᖕᒥ ᐃᖏᕐᕋᓂᐊᖅᑐᑎᒃ ᕿᑭᖅᑖᓘᑉ ᐅᐊᓐᓇᖓᒍᑦ ᐃᒡᓗᓕᒃᒧᙵᐅᕙᓪᓕᐊᓗᑎᒃ. ᐅᖓᓯᓐᓂᓕᒃ ᑕᒫᓂ 394 km.
ᐊᕐᕌᒍᑕᒫ ᐊᑐᖅᑕᐅᕙᑦᑐᖅ ᖁᕕᐊᒋᔭᐅᑦᑎᐊᖃᑦᑕᖅᑐᖅ ᐱᖃᑕᐅᔪᓄᑦ, ᐱᓕᕆᖃᑕᐅᔪᓄᑦ ᐊᑭᓕᖅᓱᖅᑕᐅᖏᖦᖢᑎᒃ, ᐋᖅᑭᒃᓱᐃᔨᓪᓗ ᑕᖅᑭᒐᓴᓐᓂᒃ ᐸᕐᓇᒍᑕᐅᕙᒃᖢᓂ ᐱᔭᕇᕐᓂᐊᕐᖓᑕ ᑲᒪᒋᔭᖃᖅᑎᓪᓗᒋᑦ ᐊᑐᖅᑕᐅᓂᐊᖅᑐᒥᒃ ᑕᒪᒃᑮᓐᓂᒃ ᐱᒋᐊᙵᕐᓂᖓᓂ ᐃᓱᐊᓄᑦ ᓄᓇᓕᓐᓂᑦ.
ᓄᓇᕗᑦ ᐸᖓᒡᒍᔾᔨᓂᖅ ᐱᒋᐊᕈᑎᖃᓚᐅᖅᓯᒪᕗᖅ ᑕᒪᑐᒥᖓ ᐃᓱᒪᒋᔭᖃᓚᐅᕐᓯᒪᒻᒪᑦ ᒨᓯᓯ ᐆᔪᑯᓗᒃ ᐃᒃᐱᐊᕐᔪᖕᒥᐅᑕᖅ. ᑕᐃᔅᓱᒪᓂ ᒪᐃᔭᐅᓚᐅᖅᓯᒪᖕᒪᑦ, ᓄᓇᕗᑦ ᓴᖅᑭᑕᐅᓇᓱᒃᑎᓪᓗᒍ. ᓄᓇᓖᑦ ᐊᐱᕆᔭᐅᓚᐅᖅᓯᒪᖕᒪᑕ ᑭᓱᓂ ᐃᓕᖅᑯᓯᖅᑎᒍᑦ ᐱᐅᓯᑐᖃᕐᓂᒃ ᐊᑐᖅᑕᐅᖃᑦᑕᕐᓂᑯᓂ ᐊᑐᖅᑕᐅᒃᑲᓐᓂᖁᔨᖕᒪᖔᑕ ᓄᑖᕐᒥᒃ ᐊᐅᓚᑦᑎᕕᐅᓂᐊᖅᑐᒥᒃ ᐋᖅᑮᑉᐸᑕ ᑕᐃᒫᓪᓗ ᐆᔪᑯᓗᒃ ᐅᖃᐅᓯᖃᓚᐅᕐᓯᒪᔪᖅ ᐅᖓᓯᑦᑐᒧᑦ ᕿᒧᒃᓯᐅᕐᔪᐊᖃᑦᑕᓕᙱᒥᒻᒪᑦ.
ᑕᐃᒪᙵᓂ ᐱᙳᖅᑎᑕᐅᓚᐅᖅᑎᓪᓗᒍ ᓄᓇᕗᑦ 1999-ᖑᑎᓪᓗᒍ, ᒪᕐᕈᐃᖅᓱᑐᐃᓐᓇᖅᑐᑎᒃ ᑲᔪᓯᔪᓐᓇᓚᐅᖏᑦᑐᖅ, ᖃᓂᒪᓇᖅᑐᖅ ᓄᕙᕐᔪᐊᕐᓇᖅ 19 ᓯᐊᒻᒪᒃᓯᒪᓂᖓᓄᑦ.
ᑕᐃᒪᙵᓂᑦ 2019ᒧᑦ ᐊᓪᓗᐃᓗᑕ, ᒐᕙᒪᑐᖃᒃᑯᑦ ᒪᒥᐊᓐᓂᖃᓚᐅᕐᓯᒪᒻᒪᑕ ᐃᒻᒪᕐᓂᓴᕐᓂᑦ ᑕᒻᒪᕈᑕᐅᓚᐅᖅᓯᒪᔪᓂᑦ ᕿᒻᒦᔭᐃᓪᓗᑎᒃ ᐊᒻᒪᓗ ᐊᐅᓪᓛᑎᑦᑎᓪᓗᑎᒃ 1950-ᖏᓐᓂ 1975-ᒧᑦ ᐊᕐᕌᒍᐃ ᐊᑐᖅᑎᓪᓗᒋᑦ. ᐸᓖᓯᒃᑯᑦ ᕿᒻᒦᔭᐃᓂᕆᓚᐅᕐᓯᒪᔭᖏᑦ ᐊᔪᓕᕈᑕᐅᓚᐅᕐᓯᒪᒻᒪᑕ ᕿᒧᔅᓯᖏᑦ ᐃᖏᕐᕋᔾᔪᑎᑑᓚᐅᕐᓯᒪᒻᒪᑕ ᑕᐃᔅᓱᒪᓂ.
ᒪᒥᐊᓚᐅᖅᑎᓪᓗᒋᑦ ᑮᓇᐅᔭᖃᖅᑎᑕᐅᓂᖅ ᕿᑭᖅᑕᓂᒃᑯᓐᓄᑦ ᐊᕐᕌᒍᑕᒫ ᑮᓇᐅᔭᓂᑦ ᐃᑲᔫᑕᐅᖃᑦᑕᕈᓐᓇᕐᓯᒪᔪᑦ $100,000−ᓂᒃ ᐃᑲᔫᑎᓕᓐᓂᒃ ᓄᓇᕗᑦ ᐸᖓᒡᒍᔾᔨᓂᕐᒧᑦ, ᓂᕆᐅᒋᔭᖃᖅᖢᑎᒃ ᐱᔪᓐᓇᕐᓯᒃᑲᓂᕐᓂᐊᕐᓂᖏᓐᓂᒃ ᐊᒻᒪᓗ ᓇᖅᑭᑦᑎᑕᐅᓂᐊᕐᓂᖏᓐᓂᒃ ᕿᒧᔅᓯᓂᑦ ᐱᓕᕆᐊᖓᑎᒍᑦ ᕿᑭᖅᑕᓂ ᓄᓇᓕᓐᓂᑦ.
ᐊᕐᕌᒍᑕᒫ, ᒪᒃᑯᒃᑐᑦ ᐅᓄᕐᓂᖅᓴᐃᑦ ᐃᓚᐅᖃᑕᐅᖃᑦᑕᕐᒪᑕ ᐸᖓᒡᒍᔾᔨᓂᕐᒥ ᐊᒻᒪᓗ ᖃᐅᔨᔭᐅᕙᓪᓕᐊᓂᖓ ᐱᕙᓪᓕᐊᔪᓕᕆᔨᓄᑦ ᖁᕕᐊᓇᖅᑐᒻᒪᕆᒃ. ᐃᓱᒪᒋᔭᖃᓚᐅᕐᓯᒪᖕᒪᑦ ᑕᐃᒪᓐᓇ ᒨᓯᓯ ᐆᔪᑯᓗᒃ, ᐊᑐᓕᖅᑎᒃᑲᓐᓂᕐᓗᒍ ᐱᖅᑯᓯᑐᖃᖅ, ᖃᐅᔨᑎᑦᑎᒍᑕᐅᓗᓂ ᒪᒃᑯᖕᓂᖅᓴᓄᑦ ᕿᒧᒃᓯᖃᕐᓂᖅ ᐊᑐᖅᑕᐅᖏᓐᓇᖁᓪᓗᒍ, ᐊᑐᖅᑕᐅᑎᒋᐊᒃᑲᓂᕐᓗᒍ ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪᓗ ᐱᐅᓯᕆᕙᑦᑕᖏᑦ.
ᐊᑐᖅᑕᐅᒐᔪᒃᑐᖅ ᐸᖓᒡᒍᔾᔨᑎᓪᓗᒋᑦ ᐅᓪᓗᓄᑦ 7-ᓄᑦ, ᐅᐊᔅᓯᓄᑦ ᖃᐅᔨᓴᖅᑎᖃᖅᑐᑎᒃ, ᑕᖕᒫᕐᕕᖏᓐᓂ ᐱᔨᑦᑎᕋᖅᑎᖃᖅᑐᑎᒃ ᐊᑭᓕᖅᓱᖅᑕᐅᖏᖦᖢᑎᒃ ᐊᒻᒪᓗ ᐃᓚᒌᑦ ᐃᑲᔪᖅᑐᐃᓂᖏᓐᓄᑦ ᐊᒻᒪᓗ ᒪᓕᑉᐸᑦᑐᑎᒃ ᐸᖓᒡᒍᔾᔨᔪᓂᑦ ᖃᐅᔨᒪᑦᑎᐊᕋᓱᑦᑐᑎᒃ ᕿᒧᒃᓯᖅᑐᑦ ᑎᑭᐅᑎᑦᑎᐊᕋᓗᐊᕐᒪᖔᑕ ᑎᑭᒐᓱᑦᑕᒥᓄᑦ.
ᐅᐸᒃᑕᐅᓇᓱᒃᑐᖅ ᓄᓇᓕᐅᔪᖅ ᑎᑭᑕᐅᔭᕌᖓᒥ, ᖁᕕᐊᓲᑎᖃᑦᑎᐊᓕᕐᐸᑦᑐᑦ ᖁᔭᓕᓪᓗᑎᓪᓗ. ᓄᓇᓖᑦ ᓂᕆᖃᑎᒌᓕᖅᐸᒃᖢᑎᒃ, ᐃᓄᒃᑎᑐᑦ ᒧᒥᓕᖅᐸᒃᖢᑎᒃ, ᕿᒧᒃᓯᕋᐅᔭᕐᐸᒃᖢᑎᒃ ᓄᓇᓖᑦ ᓂᐅᕐᕈᐊᓪᓗ ᖁᕕᐊᓲᑎᖃᖅᑎᓪᓗᒋᑦ ᐸᖓᒡᒍᔾᔨᖅᑲᐅᔪᓂᑦ.
ᐸᖓᒡᒍᔾᔨᓂᖅ ᐱᕕᖃᖅᑎᑦᑎᕙᑉᐳᖅ ᐃᓚᒌᓂᒃ ᐱᖃᑎᒌᓂᓪᓗ ᑲᑎᖃᑎᒌᓐᓂᕐᒧᑦ ᖃᐅᔨᖃᑦᑕᐅᑎᒃᑲᓐᓂᖅᖢᑎᒃ, ᖁᕕᐊᓱᒃᖢᑎᒃ ᐅᖃᐅᓯᖃᖅᖢᑎᒡᓗ ᐸᖓᒡᒍᔾᔨᓂᕐᒥᑦ.
ᐊᕐᕌᒍᑕᒫ ᐸᖓᒡᒍᔾᔨᓂᐅᕙᑦᑐᖅ, ᐱᒋᐊᓚᐅᖅᓯᒪᔪᖅ ᐱᙳᖅᑎᑕᐅᑎᓪᓗᒍ ᓄᓇᕗᑦ, ᒫᓐᓇ 26-ᒋᓕᖅᑕᖓ ᐊᕐᕌᒍ ᐊᑐᓕᕐᒪᑦ ᓴᕆᒪᒍᓱᒡᓚᑦᑖᖅᑐᒍᑦ!
ᖃᐅᒃᐸ ᐱᒋᐊᕐᓗᑎᒃ, ᓄᓇᕗᑦ ᐸᖓᒡᒍᔾᔨᓂᕐᒥ ᕿᒧᒃᓯᖅᑏᑦ ᐱᒋᐊᕐᓂᐊᖅᑐᑦ ᒥᑦᑎᒪᑕᓕᖕᒥᑦ ᐊᒻᒪᓗ ᐃᓱᓕᕝᕕᖃᕐᓗᑎᒃ ᐃᒡᓗᓕᖕᒥᑦ. ᑕᑯᓈᕈᓐᓇᖅᑕᓯ ᓴᖅᑭᔮᑲᐅᑎᒋᔪᒃᑯᑦ ᒪᓕᒃᑕᐅᕙᓪᓕᐊᑎᓪᓗᒋᑦ ᓄᓇᙳᐊᒃᑯ ᖃᕋᓴᐅᔭᑎᒍᑦ www.qia.ca/nunavut-quest
ᑲᔪᓯᑦᑎᐊᖁᔨᕗᒍᑦ ᐃᓘᓐᓇᖏᓐᓂᒃ 2025ᒥ ᓄᓇᕗᑦ ᐸᖓᒡᒍᔾᔨᓂᕐᒥᑦ!
