ᐃᖃᓗᐃᑦ, ᓄᓇᕗᑦ –  ᒫᑦᓯ  30, 2020 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᓴᖅᑭᑎᑦᓯᓂᐊᕐᒪᑕ ᐊᔾᔨᒌᙱᑦᑐᓂᒃ ᐱᒋᐊᕈᑎᓂᒃ ᐃᑲᔫᑕᐅᓂᐊᖅᑐᓄᑦ ᐃᓄᖕᓄᑦ ᕿᑭᖅᑕᓂ ᓄᓇᓕᖕᓂ ᑖᓐᓇ ᐳᕝᕕᕆᓐᓇᖅᑐᒥ ᖃᓂᒪᓇᖅ-19 ᓯᐊᒻᒪᒃᐸᓪᓕᐊᖏᓐᓇᖅᑐᒥᒃ ᐱᖃᓯᐅᑎᓗᒋᑦ ᓂᕿᑖᕈᑎᒃᓴᓂ ᐃᓄᑐᖃᓄᑦ, ᑮᓇᐅᔭᓂᒃ ᓄᒃᑕᖅᑎᓄᑦ, ᐊᒻᒪᓗ ᐃᑲᔫᑎᒃᓴᓂ ᕿᑐᕐᖓᕆᔭᐅᔪᓄᑦ ᐃᓚᒌᓄᓗ.

“ᐱᒻᒪᕆᐅᖕᒪᑦ ᓴᐳᑎᓯᒪᓗᒋᑦ ᐊᒃᑐᖅᑕᐅᓴᕋᐃᑦᑐᑦ ᓄᓇᓕᑦᑎᓐᓂ ᒫᓐᓇ ᑖᓐᓇ ᐳᕝᕕᕆᓐᓇᖅᑐᒥ ᖃᓂᒪᓇᖅ−19 ᓯᐊᒻᒪᒃᐸᓪᓕᐊᖏᓐᓇᖅᑎᓪᓗᒍ,” ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐲᔨᐋ ᐊᕿᐊᕈᖅ, “ᐃᓄᑐᖃᕗᑦ ᓂᕿᖃᑦᑎᐊᖁᓪᓗᒋᑦ ᐱᔭᕆᐊᖃᖅᑕᖏᓐᓂᓗ, ᕿᑐᕐᖓᕗᑦ ᐃᑲᔪᖅᑕᐅᓗᑎᒃ, ᐊᒻᒪᓗ ᐃᓄᐃᑦ ᕿᑭᖅᑕᓂ ᓄᓇᓕᖕᓂᑦ ᑳᓕᖁᓇᒋᑦ ᐊᔾᔨᐅᙱᑦᑐᒥᒃ ᐃᓅᓯᖃᑲᐃᓐᓇᓕᖅᑎᓪᓗᑕ.”

“ᓄᓇᓕᖕᓂ ᑯᐊᐸᐃᑦ ᐊᒻᒪᓗ ᕿᑭᖅᑕᓃᒃᑯᑦ ᐊᑕᐅᓯᕐᒥ ᑐᕌᒐᖃᕐᒪᑕ ᐱᔨᑦᓯᕐᓂᕐᒥᒃ ᐃᓄᑐᖃᓂ ᓄᓇᓕᑦᑎᓐᓂ.  ᒫᓐᓇ ᐱᓗᐊᖅᑐᒥᒃ ᓇᓗᓇᖅᑐᖃᕈᓘᔭᖅᑎᓪᓗᒍ ᐊᒃᓱᕈᓐᓇᖅᑐᒃᑰᖅᑎᓪᓗᒋᓪᓗ, ᐱᒻᒪᕆᐅᕗᖅ ᑲᑐᔾᔨᑦᑎᐊᕐᓗᑕ ᐃᑲᔪᖅᑎᒌᒡᓗᑕ ᓴᖅᑭᑎᑦᓯᓂᕐᒥᒃ ᐊᑑᑎᖃᖅᑐᒥᒃ ᐃᑲᔫᑎᐅᓂᐊᖅᑐᓄᑦ ᐃᓄᑐᖃᑦᑎᓐᓄᑦ,” ᐅᖃᖅᑐᖅ ᐸᐅᓗᓯ ᖃᐅᒻᒪᕆᐊᒃ, ᑭᙵᕐᓂ, ᑲᑎᒪᔨᖓ ᐅᑭᐅᖅᑕᖅᑐᒥ ᑯᐊᐸᒃᑯᑦ ᐃᓚᒌᓴᒃᑯᓐᓂᑦ.

ᑲᑐᔾᔨᓂᐊᖅᑎᓪᓗᒋᑦ ᐅᑭᐅᖅᑕᖅᑐᒥ ᑯᐊᐸᒃᑯᑦ, ᕿᑭᖅᑕᓃᒃᑯᑦ ᑐᓂᓯᓂᐊᖅᑐᑦ ᑮᓇᐅᔭᓂᒃ  $3 ᒥᓕᔭᓂ ᐊᒃᑐᐃᓂᖃᓗᐊᖁᓇᒋᑦ ᐃᓄᑐᖃᐃᑦ ᕿᑭᖅᑕᓂ ᓄᓇᓕᖕᓂᑦ ᑖᔅᓱᒪᙵᑦ ᖃᓂᒪᓇᕐᒥ ᓯᐊᒻᒪᒃᐸᓪᓕᐊᖏᓐᓇᖅᑐᒥ.  ᑮᓇᐅᔭᐃᑦ ᑐᓂᐅᖅᑲᖅᑕᐅᖃᑦᑕᕐᓂᐊᖅᑐᑦ  $250−ᑎᐅᖃᑦᑕᕐᓗᓂ ᓂᐅᕕᕈᑎᓂ ᐱᓇᓱᐊᕈᓯᑦ ᒪᕐᕉᒃ ᖄᖏᕋᐃᒻᒪᑦ.  ᑖᒃᑯᐊ ᓂᕿᑖᕈᑎᑦ ᐃᓄᖕᓄᑦ ᐃᓄᑐᖃᓄᑦ 60ᓂᑦ ᐅᖓᑖᓄᓗ ᐊᕐᕌᒍᖃᖅᑐᓄᑦ.

ᐃᓄᑐᖃᐃᑦ ᐊᑦᑕᕐᓇᖅᑐᒦᓐᓂᖅᓴᐅᖕᒪᑕ ᐳᕙᒃᑯᑦ ᖃᓂᒪᓇᖅᑖᕐᓂᕐᒥᒃ ᐆᑐᓇ ᐳᕝᕕᕆᓐᓇᖅᑐᒥᒃ ᖃᓂᒪᓇᖅᑐᖅ-19ᒥ, ᑖᒃᑯᐊ ᑮᓇᐅᔭᐃᑦ ᐃᑲᔪᕐᓂᖃᕐᓂᐊᖅᑐᑦ ᓂᐅᕕᕈᓐᓇᕐᓂᕐᒥᒃ ᓂᕿᑦᑎᐊᕙᓂ ᐊᒻᒪᓗ ᐅᐊᓴᐅᑎᒃᓴᓂ ᓴᓗᒻᒪᖅᓴᐅᑎᒃᓴᓂ.  ᑖᓐᓇ ᐱᓕᕆᐊᖑᔪᖅ ᓴᖅᑭᑕᐅᔪᒃᓴᒫᖑᔪᖅ ᐃᐴᓪ ᐱᒋᐊᓕᓵᖅᑎᓪᓗᒍ.

ᐃᑲᔪᕈᑕᐅᓗᑎᒃ ᓄᓇᓕᖕᓂ ᓄᒃᑕᖅᑎᓂ ᓂᕿᖃᖅᑎᑦᓯᓗᑎᒃ ᓄᓇᓕᖕᒥᐅᓂ, ᕿᑭᖅᑕᓃᒃᑯᑦ ᐊᕙᒃᑯᑎᖃᕐᓂᐊᕐᒥᔪᑦ ᕿᑭᖅᑕᓂ ᐃᓄᖕᓂ ᓄᒃᑕᖅᑎᐅᔪᓄᑦ, ᑕᒻᒫᕐᕕᖃᕇᖅᑐᓂ ᐃᒡᓗᕋᓛᖃᕇᖅᑐᓂᓘᓐᓃᑦ, $2ᒥᓕᔭᓐ ᑮᓇᐅᔭᐃᑦ ᐊᑐᐃᓐᓇᐅᓗᑎᒃ ᒫᓐᓇᐅᓂᖓᓂ ᐊᑐᖅᑕᐅᔪᓐᓇᖅᑐᓄᑦ ᓅᖃᑦᑕᕈᓐᓇᖁᓪᓗᒋᑦ. ᓯᕗᓪᓕᐅᑎᑦᓯᖃᑦᑕᕐᓂᐊᖅᑐᑦ ᐃᓄᐃᑦ ᓅᓯᒪᓂᐊᖅᑐᓄᑦ 14ᓄᑦ ᐅᓪᓗᓄᑦ ᐅᖓᑖᓄᓘᓐᓃᑦ ᐊᒻᒪᓗ ᓇᖕᒥᓂᖅ ᐱᖁᑎᒥᖕᓂ ᐃᖏᕐᕋᔾᔪᑎᖃᕐᓗᑎᒃ.

ᕿᑭᖅᑕᓃᒃᑯᑦ ᑮᓇᐅᔭᓂᒃ ᐊᖏᓪᓕᒋᐊᕆᒐᓱᐊᕐᒥᔪᑦ ᐃᓄᐃᑦ ᓄᑕᕋᖏᓐᓄᑦ ᐱᒋᐊᕈᑎᖓᓂ ᐃᓚᒌᓄᑦ ᑐᕌᖓᔪᑦ ᕿᑐᕐᖓᖃᖅᑐᓄᑦ ᒫᓐᓇᒃᑯᑦ ᐊᒃᓱᕈᓐᓇᖅᑐᕈᓘᔭᐅᑎᓪᓗᒍ s. ᑮᓇᐅᔭᖃᖅᑎᑦᓯᓂᕐᒥᒃ ᑕᒪᑐᒥᖓ ᐱᓕᕆᐊᕐᒥ ᒐᕙᒪᑐᖃᒃᑯᑦ ᐊᐅᓚᑕᖓᓂᑦ ᐃᑲᔪᕐᓂᖃᕐᓂᐊᕐᒪᑦ  ᐃᓄᐃᑦ  ᓄᑕᕋᖏᑦ ᐊᑐᐃᓐᓇᖃᕈᓐᓇᕐᓗᑎᒃ ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ, ᐃᓅᓯᕐᒧᑦ ᐱᕚᓪᓕᕈᑎᒃᓴᓂ, ᐊᒻᒪᓗ ᐃᓕᓐᓂᐊᕐᓂᓕᕆᓂᕐᒧᑦ ᐱᔨᑦᓯᕋᕈᑎᓂ ᐊᒻᒪᓗ ᐊᓯᖏᓐᓂᒃ ᐃᑲᔫᑎᓂ ᐱᔭᕆᐊᖃᖅᑕᖏᓐᓄᑦ.. ᑐᑭᓯᒃᑲᓐᓂᕈᒪᒍᕕᑦ ᐅᕝᕙᓘᓐᓃᑦ ᐃᑲᔪᖅᑕᐅᒍᒪᒍᕕᑦ ᑕᒪᑐᒥᖓ ᓄᑕᖅᑲᑦ ᓯᕗᓪᓕᐅᑎᑕᐅᓂᖏᓐᓂᑦ, ᐅᖄᓚᒍᓐᓇᖅᑐᑦ ᐅᕗᖓ 1-855-572-4453 (24ᓂ ᐃᑲᕐᕋᓄᑦ, 7ᓄᑦ ᐅᓪᓗᓄᑦ ᐱᓇᓱᐊᕈᓯᑕᒫᑦ)

ᕿᑭᖅᑕᓃᒃᑯᑦ ᑐᓴᐅᒪᑎᑦᓯᓂᖏᓐᓂᑦ ᐱᕙᓪᓕᐊᑎᑦᓰᓐᓇᕐᓂᐊᖅᑐᑦ ᐊᒻᒪᓗ ᐃᓄᖕᓄᑦ ᑐᓴᐅᒪᑎᑦᓰᓐᓇᕐᓗᑎ ᖃᐅᔨᖁᔨᖕᒪᑦ ᐃᓄᖕᓂᑦ ᕿᑭᖅᑕᓂ ᑖᓐᓇ ᐳᕝᕕᕆᓐᓇᖅᑐᒥ ᖃᓂᒪᓇᖅ−19 ᐱᔾᔪᑎᒋᓪᓗᒍ ᖃᓄᖅ ᓇᖕᒥᓂ ᓴᐳᑎᓯᒪᒍᓐᓇᕐᓂᕐᒥᒃ ᐊᒻᒪᓗ ᖃᓄᐃᓕᐅᕆᐊᖃᕐᓂᕐᒥᒃ.  ᑮᓇᐅᔭᓂᒃ ᓴᓂᕐᕙᐃᓯᒪᖕᒥᔪᑦ ᑎᑭᑕᐅᑲᓪᓚᖕᓂᕈᑎᒃ ᑮᓇᐅᔭᖅᑐᕆᐊᓕᖕᓂᑦ ᓂᕆᐅᓇᙱᑦᑐᓂ ᑖᓐᓇ ᐳᕝᕕᕆᓐᓇᖅᑐᒥ ᖃᓂᒪᓇᖅ-19  ᐱᔾᔪᑎᒋᓪᓗᒍ ᐃᓄᐃᑦ ᐋᓐᓂᐊᖅᑕᐃᓕᓂᖏᓐᓄᑦ ᑐᐊᕕᓐᓇᖅᑐᖃᓕᕐᓂᖅᐸᑦ.

ᑮᓇᐅᔭᐃᑦ ᕿᑭᖅᑕᓃᒃᑯᑦ ᐳᕝᕕᕆᓐᓇᖅᑐᒥ ᖃᓂᒪᓇ-19ᒧᑦ ᑭᐅᔾᔪᑎᒋᔭᐅᓪᓗᓂ ᐸᕐᓇᐅᑎᖓ ᑮᓇᐅᔭᖅᑖᖅᒪᔪᑦ ᓄᓇᖃᖅᑐᑐᖃᓄᑦ ᓄᓇᓕᖕᓄᑦ ᑮᓇᐅᔭᐃᑦ ᐃᑲᔫᑎᑦ ᓇᓗᓇᐃᖅᑕᐅᓯᒪᔪᓂᑦ ᒐᕙᒪᑐᖃᒃᑯᓐᓂᑦ ᒫᑦᓯ  25, 2020ᒥ. ᕿᑭᖅᑕᓃᒃᑯᑦ ᑖᒃᑯᓇᙵᑦ ᑮᓇᐅᔭᖅᑖᖅᓯᒪᔪᑦ  $6,132,544.

ᐱᓕᕆᐊᖑᔪᖅ ᕿᒥᕐᕈᔭᐅᖃᑦᑕᕐᓂᐊᖅᑐᑦ ᑖᓐᓇ ᐳᕝᕕᕆᓐᓇᖅᑐᒥ ᖃᓂᒪᓇᖅ ᐱᓕᕆᐊᖑᓂᓕᒫᖓᓂᑦ ᑭᒡᒐᖅᑐᐃᑦᑎᐊᕋᓱᐊᖏᓐᓇᕐᓂᐊᖅᑎᓪᓗᒋᑦ ᐃᓄᖕᓂ ᕿᑭᖅᑕᓂ ᓄᓇᓕᖕᓂᑦ.

ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:

ᓰᒪ ᓯᕼᐊᕐ ᓯᐊᕆᕼᐃ

ᑐᑭᒧᐊᒃᑎᑦᓯᔨ, ᑐᓴᐅᒪᖃᑦᑕᐅᑎᓄᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ

szerehi@qia.ca

867.975.8413

1.800.667.2742