ᐃᖃᓗᐃᑦ, ᓄᓇᕗᑦ, ᐊᒃᑑᕙ 2, 2024 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᖁᕕᐊᓱᒃᖢᑎᒃ ᑐᓴᖅᑎᑦᑎᕗᑦ ᑖᔅᓱᒥᖓ 2024ᒥ ᓴᖅᑭᑕᐅᓂᕆᔭᖓᓂᑦ ᕿᑭᖅᑕᓂ ᕿᒧᒃᓯᖅᑎᓄᑦ ᐱᓕᕆᐊᒃᓴᒥᒃ ᐋᖅᑭᒃᓯᒪᓪᓗᓂ ᐃᑲᔫᑎᒋᔭᐅᔪᓐᓇᕐᓂᐊᕐᓗᓂ ᐃᓄᖕᓂᒃ ᕿᑭᖅᑕᓂᒥᐅᓂᒃ ᐋᖅᑭᐅᒪᑎᑦᑎᓂᖏᓐᓄᑦ ᕿᒻᒥᖏᓐᓂᒃ ᕿᒧᒃᓯᐅᑎᓂᒃ.
ᑖᓐᓇ ᐱᓕᕆᐊᖅ ᑮᓇᐅᔭᖃᖅᑎᑦᑎᔪᓐᓇᖅᑐᖅ ᐃᓄᖕᓂᒃ ᕿᑭᖅᑕᓂᒥᐅᓂᒃ ᕿᒻᒥᓕᖕᓂᑦ ᕿᒧᒃᓯᐅᑎᓂᒃ. ᑖᓐᓇ ᐱᓕᕆᐊᖅ ᐃᓚᒋᔭᐅᖃᑕᐅᕗᖅ ᕿᑭᖅᑕᓃᒃᑯᑦ ᐱᓕᕆᐊᕆᕙᓪᓕᐊᔭᖏᓐᓄᑦ ᓴᐃᒻᒪᖃᑎᒌᖕᓂᕐᒧᑦ ᐊᒻᒪᓗ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᑦ.
“ᕿᒥᕐᕈᓚᐅᖅᑎᓪᓗᑎᒍ ᑖᓐᓇ ᐱᖓᓱᓄᑦ-ᐊᕐᕌᒍᓄᑦ ᐆᒃᑐᕋᖅᑕᐅᓪᓗᓂ ᐱᓕᕆᐊᖑᓚᐅᖅᑐᖅ ᐊᒻᒪ ᑐᓴᕐᕕᒋᓪᓗᒋᓪᓗ ᕿᒧᒃᓯᖅᑏᑦ, ᕿᑭᖅᑕᓃᒃᑯᑦ ᑲᑎᒪᔨᖏᑦ ᐊᖏᓚᐅᕐᒪᑕ ᑲᔪᓯᑎᑦᑎᓪᓗᑎᒃ ᐱᖁᔨᕗᖔᕈᑎᒥᒃ ᐊᕐᕌᒍᑕᒫᖅᓯᐅᒻᒥᒃ ᑲᑎᒪᑎᓪᓗᒋᑦ 2023ᒥ, ᐱᓕᕆᐊᖑᓗᓂ ᑲᔪᓯᓯᒪᔪᒥᒃ. ᐃᑲᔪᖅᑐᐃᑎᓪᓗᑕ ᕿᒧᒃᓯᓕᖕᓂᑦ ᐊᒻᒪᓗ ᑐᓴᖃᑦᑕᖅᖢᑕ ᐱᐅᔪᒃᑯᒃ ᐊᒃᑐᐃᓂᖏᓐᓄᑦ ᑮᓇᐅᔭᐃᑦ, ᖃᐅᔨᒪᓚᐅᖅᑐᒍᑦ ᑐᕌᕐᓂᖃᑦᑎᐊᕐᓂᑦᑎᓐᓄᑦ ᐊᑐᖅᑕᐅᒃᑲᓐᓂᖅᑎᑦᑎᓂᕐᒧᑦ ᕿᒧᒃᓯᕐᓂᕐᒥᒃ” ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ , ᐅᓛᔪᒃ ᐊᑭᓱᒃ.
ᐃᓄᐃᑦ ᕿᑭᖅᑕᓂᒥᐅᑦ ᑕᓪᓕᒪᓂᑦ ᐅᖓᑖᓂᓘᓐᓃᑦ ᕿᒧᒃᓯᐅᑎᓖᑦ ᑐᒃᓯᕋᕐᓗᑎᒃ ᑮᓇᐅᔭᖅᑖᕋᓱᒍᓐᓇᖅᑐᑦ, ᐱᖃᓯᐅᑎᓗᒋᑦ ᑕᐃᒃᑯᐊ ᐊᕐᕌᒍᓂ ᑭᖑᓂᑦᑎᓐᓂᒃ ᑐᒃᓯᕋᖅᓯᒪᔪᑦ. ᑐᒃᓯᕋᐅᑎᑦ ᐱᔭᐅᔪᓐᓇᖅᑐᑦ ᕿᑭᖅᑕᓃᒃᑯᑦ ᐃᑭᐊᖅᑭᕕᖓᓂᑦ ᐅᕗᙵᕐᓗᑎ https://www.qia.ca/applications/qikiqtani-qimuksiqtiit-project/ ᐅᕝᕙᓘᓐᓃᑦ ᑕᑕᑎᕆᖃᑎᒋᔪᓐᓇᖅᖢᒍ ᓄᓇᓕᖕᓂ ᑐᓴᐅᒪᑎᑦᑎᔨᓯ, ᐅᕝᕙᓘᓐᓃᑦ ᐅᖄᓚᓗᑎᑦ 867 975 8377ᒧᑦ.
ᕿᑭᖅᑕᓂ ᕿᒧᒃᓯᖅᑎᓄᑦ ᐱᓕᕆᐊᖓᓄᑦ ᑐᒃᓯᕋᐅᑎᓕᐅᕐᓂᖅ ᑭᒡᓕᖃᖅᑐᖅ ᑎᓯᐱᕆ 31, 2024ᒥ. ᑕᐃᒃᑯᐊ ᑐᒃᓯᕋᐅᑎᑦ ᐊᖏᖅᑕᐅᔪᑦ ᑮᓇᐅᔭᖅᑖᕋᔭᖅᑐᑦ ᔭᓐᓄᐊᓕ 31, 2025ᒥ.
ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:
ᑭᐊᕋᓐ ᕙᓚᕋᑎ
ᑐᑭᒧᐊᒃᑎᑦᑎᔨ, ᑐᑭᒧᐊᒍᑎᒃᓴᓄᑦ ᑐᓴᐅᒪᖃᑦᑕᐅᑎᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(ᐅᖄᓚᐅᑖ) 867.975.8398 ᐊᑭᖃᙱᑦᑐᒧᓪᓘᓐᓃᑦ 1.800.667.2742
