ᐃᓄᖕᓄᑦ ᑐᓴᒐᒃᓴᖅ

ᐅᓪᓗᖓ ᓴᖅᑭᑕᖅ: ᓄᕖᕝᕙ 17, 2020

ᖃᓄᐃᓕᐅᕐᓂᐅᔪᖅ: ᕿᑭᖅᑕᓃᒃᑯᑦ ᓄᖅᑲᖅᑎᑦᑎᕗᑦ ᐱᓕᕆᐊᒃᓴᖏᓐᓂᒃ ᐊᒻᒪᓗ ᐊᑐᓕᖅᑎᑦᑎᓪᓗᑎᒃ ᐊᖏᕐᕋᒥᒃ ᐃᖅᑲᓇᐃᔭᕐᓂᕐᒧᑦ ᒪᓕᒃᖢᒋᑦ ᓄᓇᕗᑦ ᒐᕙᒪᒃᑯᑦ ᑎᓕᐅᕈᑎᒋᔭᖏᑦ ᓄᕙᓐᓇᕐᔪᐊᖅ-19 ᐱᔾᔪᑎᒋᓪᓗᒍ.  

ᓯᕗᓪᓕᐅᑎᓯᒪᐃᓐᓇᕋᑦᑎᒍᑦ ᐃᖅᑲᓇᐃᔭᖅᑎᑦ ᓄᓇᓖᓪᓗ ᐋᓐᓂᐊᖅᑖᖅᑕᐃᓕᖁᓪᓗᒋᑦ ᖃᓄᐃᑦᑕᐃᓕᑦᑎᐊᖁᓪᓗᒋᓪᓗ ᐊᒻᒪᓗ ᐃᑲᔪᖃᑕᐅᒍᒪᓪᓗᑕ ᓯᐊᒻᒪᒃᑎᑦᑎᑕᐃᓕᓂᕐᒥᒃᓄᕙᓐᓇᕐᔪᐊᖅ-19ᒥ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ)  ᓄᖅᑲᖓᑎᑦᑎᖃᑕᐅᒍᒪᓪᓗᑎᒃ ᐋᓐᓂᐊᒥᒃ ᓄᖅᑲᖅᑎᑦᑎᑲᐃᓐᓇᖅᑐᑦ ᐱᒻᒪᕆᐋᓘᙱᑦᑐᓂᒃ ᐱᓕᕆᐊᒃᓴᖏᓐᓂᒃ ᑐᓴᖅᑎᑦᑎᓚᐅᙱᓐᓇᕐᓂᖏᓐᓄᑦ ᑎᑭᓪᓗᒍ.

ᐱᖓᑦᓯᕐᒥ ᐱᒋᐊᕐᓗᒍ ᓄᕖᕝᕙ 18ᒥ, ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᖏᑦ ᐊᖏᕐᕋᒥᖕᓂᒃ ᐃᖅᑲᓇᐃᔭᕆᐊᕐᓂᐊᖅᑐᑦ ᑎᓯᐱᕆ 2, 2020ᒧᑦ, ᑎᓕᐅᕈᑕᐅᓯᒪᔪᖅ ᓄᓇᕗᑦ ᒐᕙᒪᒃᑯᓐᓂᑦ ᒪᓕᒃᑕᐅᓪᓗᓂ ᓄᖅᑲᖓᑎᑦᑎᒍᒪᓪᓗᑎᒃ ᓯᐊᒻᒪᒃᑎᑕᐅᑦᑕᐃᓕᓂᖓᓂᒃ ᓄᕙᓐᓇᕐᔪᐊᖅ-19 ᓄᓇᕗᒥ.

ᒫᓐᓇᐅᓂᖓᓂᒃ ᐱᓕᕆᐊᒃᓴᐅᔪᑦ ᓱᕐᓗ ᐅᓇ ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᖓ, ᕿᑭᖅᑕᓂ ᐱᓕᒻᒪᒃᓴᐃᓂᕐᒧᑦ ᐃᓕᓐᓂᐊᖅᑎᑦᑎᓂᕐᒧᓪᓗ ᐱᓕᕆᐊᖓ, ᑐᓐᓂᖅᑯᓯᐊᑦ ᐊᐃᑦᑑᓯᐊᓪᓗ ᐊᒻᒪᓗ ᐃᓚᒌᒃᑐᓄᑦ ᓄᓇᓕᖕᓄᓪᓗ ᐱᕙᓪᓕᐊᔾᔪᑎᒃᓴᑦ ᑮᓇᐅᔭᐃᑦ, ᐃᓚᕐᖓᖅᑐᓄᑦ ᐃᓚᓕᐊᕆᐊᓕᖕᓄᓪᓗ ᐱᓕᕆᐊᖓ ᓄᖅᑲᖅᓯᒪᑲᐃᓐᓇᕐᓂᐊᖅᑐᑦ.

ᐊᐃᑉᐸᕆᔭᖓᓂᑦ ᕿᑭᖅᑕᓃᒃᑯᑦ ᐅᐸᓗᖓᐃᔭᐅᑎᒋᔭᖓᓂᒃ ᓄᕙᓐᓇᕐᔪᐊᖅ-19ᒧᑦ ᐱᒋᐊᕈᖏᑦ ᐊᑐᐃᓐᓇᕐᓂᐊᖅᑐᑦ ᕿᑭᖅᑕᓂ ᐃᓄᖕᓄᑦ. ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᖏᑦ ᐱᓕᕆᐊᖃᕐᒪᑕ 2.900ᓂ ᑐᒃᓯᕋᐅᑎᓂᒃ ᑐᒃᓯᕋᐅᑎᓕᐅᓚᐅᖅᑐᓂᑦ ᕿᑭᖅᑕᓂ ᐃᓚᒌᓄᑦ ᐃᑲᔫᑎᖏᓐᓄᑦ ᐊᒻᒪᓗ ᑕᐃᒃᑯᐊ ᐊᖏᖅᑕᐅᔪᑦ ᑐᓴᖅᑎᑕᐅᓵᓕᓂᐊᖅᖢᑎᒃ ᐱᓇᓱᐊᕈᓯᓂ ᖃᐃᔪᓂᒃ.  ᕿᑭᖅᑕᓃᒃᑯᑦ ᐃᓐᓇᕐᓄᑦ ᓂᐅᕕᕈᑎᖏᑦ ᐊᑐᐃᓐᓇᐅᖏᓐᓇᕐᓂᐊᖅᑐᑦ ᐱᓇᓱᐊᕈᓯᐅᑉ ᐊᐃᑉᐹᓂᒃ ᑎᑭᓪᓗᒍ ᔭᓐᓄᐊᓕ 19, 2021ᒧᑦ.  ᕿᑭᖅᑕᓂ ᐃᓐᓇᐃᑦ ᐊᑎᓕᐅᖅᑕᐅᓯᒪᑲᐅᑎᒋᔪᑦ.

ᑐᑭᓯᒃᑲᓐᓂᕈᒪᒍᕕᑦ ᑖᒃᑯᓂᖓ ᒪᕐᕉᓄᑦ ᐱᓕᕆᐊᒃᓴᓂᒃ, ᐃᕐᖐᓐᓈᕈᑎᒃᑯᑦ ᑎᑎᕋᕐᓗᑎᑦ ᐅᕗᖓ

covid-19@qia.ca ᐅᕝᕙᓘᓐᓃᑦ ᐅᖄᓚᒍᕕᑦ ᖃᒪᐃᓗᑎᒃ ᓂᐱᓕᐅᖅᓯᒪᔪᒥᒃ ᐅᖄᓚᐅᑎᒧᑦ 867 975 8383ᒧᑦ.

ᒪᓗᒍᓱᓕᕈᕕᑦ ᐋᓐᓂᐊᓕᖕᒥᑦ ᓄᕙᓐᓇᕐᔪᐊᖅ-19ᒥ ᐅᖄᓚᓂᐊᖅᐳᑎᑦ ᓄᓇᕗᑦ ᒐᕙᒪᒃᑯᑦ ᓄᕙᓐᓇᕐᔪᐊᖅ-19ᒧᑦ ᐅᖄᓚᐅᑎᖓᓄᑦ ᐅᕗᖓ 1-888-975-8601 10ᒥᑦ ᐅᓪᓛᒃᑯᑦ 6ᒧᑦ ᐅᓐᓄᒃᑯᑦ, ᐅᕝᕙᓘᓐᓃᑦ ᑐᓴᖅᑎᑦᑎᓗᑎᒃ ᓄᓇᓕᖕᒥ ᐋᓐᓂᐊᕐᕕᖕᒧᑦ, ᐊᒻᒪᓗ ᐃᓄᑑᒋᐊᓯᑲᐅᑎᒋᓗᑎᑦ ᐊᕐᕌᕐᓂ 14ᓄᑦ ᐅᓪᓗᓄᑦ.  ᐋᓐᓂᐊᕐᕕᓕᐊᖅᑕᐃᓕᑦᑎᐊᕆᑦ.

ᐋᓐᓂᐊᖃᕋᓱᒋᓗᕈᕕᑦ ᓄᕙᓐᓇᕐᔪᐊᖅ-19ᒥ ᐃᒪᓐᓇᐃᓕᕋᔭᖅᑐᑎᑦ ᐆᓇᖅᓯᖃᑦᑕᕐᓂᖅ, ᖁᐃᖅᓱᖃᑦᑕᕐᓂᖅ, ᐊᓂᖅᓵᑦᑎᐊᖃᑦᑕᕈᓐᓃᕐᓂᖅ.  ᓯᐊᒻᒪᒃᑎᑦᑎᑕᐃᓕᒍᒪᒍᕕᑦ ᐋᓐᓂᐊᒥᒃ ᖃᓂᒌᓗᐊᙱᓪᓗᓯ, ᒪᑐᐊᖅᓯᒪᓗᓯ, ᐊᒡᒐᓯ ᐅᐊᓴᕋᔪᒡᓗᒋᑦ ᐊᒻᒪ 20 ᓯᐊᑲᓐᓯᓄᑦ ᐅᐊᓴᕐᓗᒋᑦ, ᖁᐃᖅᓱᖃᑦᑕᕐᓗᑎᒃ ᑕᒋᐅᖃᑦᑕᕐᓗᑎᓪᓗ ᐃᑯᓯᖕᓄᑦ ᐊᒻᒪᓗ ᐊᖏᕐᕋᖅᓯᒪᓗᑎᑦ.

ᑐᑭᓯᒃᑲᓐᓂᕈᒪᒍᕕᑎᑦ, ᖃᐅᔨᒋᐊᕐᕕᒃᓴᖅ:

ᓰᒪ ᓴᕼᐊᕐ ᓯᐊᕋᕼᐄ,

ᑐᑭᒧᐊᒃᑎᑦᑎᔨ, ᑐᓴᐅᒪᖃᑦᑕᐅᑎᓄᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

szerehi@qia.ca

867.975.8413

1.800.667.2742