ᐃᖃᓗᐃᑦ, ᓄᓇᕗᑦ, ᓯᑎᐱᕆ 15, 2022, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᕿᓂᖅᑐᑦ ᐃᕿᐊᓱᖏᑦᑎᐊᖅᑐᓂᒃ ᑲᑎᒪᔨᕋᓛᙳᕈᒪᔪᓂᒃ ᐅᑯᓄᖓ:
ᓄᓇᕗᒻᒥ ᐃᒪᕐᒥᐅᑕᓕᕆᔨᒃᑯᑦ
ᐊᑕᐅᓯᕐᒥᒃ ᑲᑎᒪᔨᕋᓛᖑᓂᐊᕐᓗᓂ– ᐊᕐᕌᒍᓄᑦ ᐱᖓᓱᓄᑦ
ᐃᒪᕐᒥᐅᑕᓕᕆᔨᒃᑯᑦ ᐱᔪᒪᔪᑦ, ᑲᑎᒪᔨᕋᓛᖑᑎᓪᓗᒍ ᓚᐃᔭᓯᓕᕆᓂᕐᒥᒃ ᐃᓱᒪᒃᓴᖅᓯᐅᕈᑎᖃᖃᑦᑕᕐᓂᐊᕐᓗᓂ, ᐱᔾᔪᑎᒋᓪᓗᒍ ᑭᓱᑐᐃᓐᓇᑦᑎᐊᖅ ᐃᒪᕐᒥᒃ ᐊᑐᖅᑐᓂᒃ ᐃᒪᕐᓂᒃ ᑯᕕᐅᖅᑲᐅᔪᓂᒃ ᐊᓯᖏᓐᓂᓪᓗ ᐃᒪᓕᕆᖃᑦᑕᖅᑐᓂᒃ ᐊᑐᕐᑐᓂᒡᓗ, ᐱᔭᕆᐊᖃᕌᖓ, ᐃᓄᓕᒫᓂᒃ ᓈᓚᒃᑎᑦᑎᕙᒡᓗᑎᒃ.
ᓄᓇᕗᒻᒥ ᐃᒪᕐᒥᐅᑕᓕᕆᔩᑦ ᐱᔭᒃᓴᖃᖅᐳᑦ ᐱᔪᓐᓇᐅᑎᖃᖅᖢᑎᒡᓗ ᐊᑐᖅᑕᐅᓂᖓ, ᐊᐅᓚᑕᐅᓂᖓ ᒪᓕᒐᖅᑎᒎᖓᑎᑕᐅᓂᖓᓗ ᓄᓇᒦᑦᑐᓕᒫᑦ ᐃᒪᖏᓐᓂᒃ ᓄᓇᕗᒻᒥ ᑭᒡᒐᖅᑐᐃᖁᔭᐅᓪᓗᑎᒡᓗ ᓴᐳᔾᔨᓂᕐᒥᒃ ᐊᑐᖅᑎᑦᑎᐊᕐᓂᕐᒥᓪᓗ ᐃᒥᕐᓂᒃ ᓄᓇᕗᒻᒥ- ᑲᓇᑕᐅᑉ ᒥᕐᖑᐃᖅᓯᕕᓕᕆᔨᒃᑯᑦ ᐃᓚᐅᓇᑎᒃ – ᑭᒡᒐᖅᑐᐃᔾᔪᑎᒋᓗᒋᑦ ᐃᒪᐅᑉ ᐃᑲᔪᖅᑕᐅᓛᖑᔭᕆᐊᖃᕐᓂᖓ ᑲᓇᑕᒥᐅᓄᑦ ᐱᓗᐊᖅᑐᒥ, ᓄᓇᕗᒻᒥᐅᓄᑦ.
ᐃᖅᑲᓇᐃᔮᓪᓚᑦᑖᑎᑐᑦ ᐱᖏᑦᑐᖅ ᐃᑲᕐᕋᓕᐅᖅᑎᑕᐅᖃᒃᑕᑐᐃᓐᓇᕐᓂᐊᖅᑐᖅ, ᑲᑎᒪᔾᔪᓯᐊᖅᑖᖅᑎᑕᐅᓂᒃᑯᑦ ᑲᑎᒪᔨᕋᓛᖑᓂᕐᒧᑦ ᐱᔭᒃᓴᕆᔭᖏᓐᓂᓪᓗ ᐱᓕᕆᓂᕐᒧᑦ ᓄᓇᕗᒻᒥ ᐃᒪᕐᒥᐅᑕᓕᕆᔨᒃᑯᓐᓄᑦ ᐱᓕᕆᐊᒃᓴᖏᓐᓂᒃ.
ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᕋᓛᖏᑦ
ᐊᑕᐅᓯᕐᒥᒃ ᑲᑎᒪᔨᕋᓛᖑᓂᐊᕐᓗᓂ ᒪᑐᐃᖓᔪᖅ ᐊᕐᕌᒍᓄᑦ ᑎᓴᒪᓄᑦ
ᑎᑎᕋᖅᓯᒪᔪᖅ 5ᒥ ᒪᓕᒡᓗᒍ ᓄᓇᕗᑖᕐᓂᕐᒧᑦ ᐊᖏᖃᑎᒌᒍᑎ, ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯ ᓴᐳᔾᔨᔨᐅᖕᒪᑕ ᐆᒪᔪᕐᓂᒃ ᐆᒪᔪᓪᓗ ᐃᓂᒋᔭᖏᓂᒃ ᓯᕗᓂᒃᓴᑐᖄᓗᖕᒧᑦ ᐃᑲᔪᖅᑐᐃᖁᓪᓗᒋᑦ ᓄᓇᕗᒻᒥᐅᓂᒃ ᐃᒃᐱᒍᓱᒃᑎᐊᕐᓂᕐᓗ ᐊᑐᖅᑕᐅᓗᓂ ᐃᓄᐃᑦ ᐊᖑᓇᓱᒍᓐᓇᕐᓂᖏᓐᓂᒃ ᐱᖅᑳᕆᐊᖃᕐᓂᖏᓐᓂᓪᓗ.
ᐃᖅᑲᓇᐃᔮᓪᓚᑦᑖᑎᑐᑦ ᐱᖏᑦᑐᖅ ᐃᑲᕐᕋᓕᐅᖅᑎᑕᐅᖃᒃᑕᑐᐃᓐᓇᕐᓂᐊᖅᑐᖅ, ᑲᑎᒪᔾᔪᓯᐊᖅᑖᖅᑎᑕᐅᓂᒃᑯᑦ ᑲᑎᒪᔨᕋᓛᖑᓂᕐᒧᑦ ᐱᔭᒃᓴᕆᔭᖏᓐᓂᓪᓗ ᐱᓕᕆᓂᕐᒧᑦ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᖏᓐᓄᑦ.
ᐃᓄᐃᑦ ᐱᖁᑎᖏᓐᓂᒃ ᓇᐅᑦᑎᖅᓱᖅᑏᑦ
ᐊᑕᐅᓯᕐᒥᒃ ᑲᑎᒪᔨᕋᓛᖑᓂᐊᕐᓗᓂ ᐱᖓᓱᓄᑦ ᐊᕐᕌᒍᓄᑦ ᑲᑎᒪᔨᐅᓗᓂ
ᑐᕌᖓᑎᑕᐅᔪᖅ ᐸᐸᑕᐅᓂᖏᓐᓄᑦ, ᐱᕚᓪᓕᕈᑎᒃᓴᖏᓐᓄᑦ ᐊᒻᒪᓗ ᓴᐳᔾᔭᐅᓯᒪᔾᔪᑎᑦᓴᖏᓐᓄᑦ ᐃᓄᐃᑦ ᐃᓕᖅᑯᓯᕆᖃᑦᑕᖅᓯᒪᔭᖏᓐᓂᒃ ᐊᒻᒪᓗ ᐃᓕᓴᒃᓇᐅᑎᒋᔭᖏᓐᓂᒃ ᓄᓇᕗᒻᒥ ᐃᑦᑕᕐᓂᓴᓕᕆᕕᐅᕙᑦᑐᓂ, ᖃᐅᔨᔾᔪᑕᐅᕙᑦᑐᑦ ᐃᓄᖏᓐᓂᒃ ᓇᒥᒥᐅᑕᐅᓂᕐᒪᖔᑕ ᐊᒻᒪᓗ ᓄᓇᒥᓂ ᐊᑎᑐᖃᖏᓐᓂᒃ ᓄᓇᐃᑦ. ᓇᐅᑦᓯᖅᑐᖅᑏᑦ ᐱᓕᕆᐊᕆᕙᑦᑕᖏᑦ ᑐᙵᕕᖃᑦᑐᑦ ᐅᑉᐱᕐᓇᕈᑎᒃᓴᕆᓪᓗᓂᒋᑦ ᐱᖅᑯᑐᓯᑐᖃᕐᒥᑎᒍᑦ ᖃᐅᔨᒪᓂᕆᔭᖏᓐᓂᒃ ᐊᒻᒪᓗ ᓯᓚᑐᓂᕆᔭᖏᓐᓂᒃ ᐃᓇᒻᒪᕆᖁᑎᑦᑕ.
ᐃᖅᑲᓇᐃᔮᓪᓚᑦᑖᑎᑐᑦ ᐱᖏᑦᑐᖅ ᐃᑲᕐᕋᓕᐅᖅᑎᑕᐅᖃᒃᑕᑐᐃᓐᓇᕐᓂᐊᖅᑐᖅ, ᑲᑎᒪᔾᔪᓯᐊᖅᑖᖅᑎᑕᐅᓂᒃᑯᑦ ᑲᑎᒪᔨᕋᓛᖑᓂᕐᒧᑦ ᐱᔭᒃᓴᕆᔭᖏᓐᓂᓪᓗ ᐱᓕᕆᓂᕐᒧᑦ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑏᑦ
ᑲᑭᕙᒃᑯᑦ ᐃᑲᔫᓯᐊᖅᑖᖅᑐᓕᕆᔩᒃ ᐊᑐᖅᑐᐊᖅᑏᓪᓗ ᐃᓗᐊᙱᓕᐅᕈᑎᖃᖅᑎᓪᓗᒋᑦ
ᐊᑕᐅᓯᕐᒥᒃ ᑲᑎᒪᔨᕋᓛᒃᓴᒥᒃ, ᐊᕐᕌᒍᓄᑦ ᐱᖓᓱᓄᑦ
ᑲᑎᒪᔨᕋᓛᑦ ᑲᑎᖃᑦᑕᖅᑐᑦ ᕿᒥᕐᕈᐃᔭᕆᐊᖃᓕᕌᖓᑕ ᑐᒃᓯᕋᐅᑏᑦ ᐃᓗᐊᖏᓕᐅᕈᑎᖃᕌᖓᑕ ᑮᓇᐅᔭᖅᑖᖅᑎᑕᐅᖏᓐᓂᒃᑯᓪᓘᓐᓃᑦ ᑲᑭᕙᒃᑯᓐᓄᑦ ᑐᒃᓯᕋᖅᓯᒪᔭᕋᓗᐊᖏᓐᓂᒃ ᐱᔨᑦᑎᕋᐅᑎᖏᒍᓪᓘᓐᓃᑦ. ᑲᑎᒪᔨᕋᓛᖑᕐᓂᐊᖅᑐᖅ ᐃᖅᑲᓇᐃᔭᖅᑎᐅᔭᕆᐊᖃᖏᑦᑐᖅ ᑲᑭᕙᒃᑯᓐᓄᑦ, ᕿᑭᖅᑕᓂᒃᑯᓐᓄᑦ ᐊᓯᖏᓐᓄᓪᓗ ᐊᒃᑐᐊᖓᓂᖃᖅᑎᓪᓗᒍᑦ ᑮᓇᐅᔭᓕᕆᔭᐅᑎᓪᓗᖏᓪᓗ ᕿᑭᖅᑕᓃᒃᑯᓐᓂ.
ᐃᖅᑲᓇᐃᔮᓪᓚᑦᑖᑎᑐᑦ ᐱᖏᑦᑐᖅ ᐃᑲᕐᕋᓕᐅᖅᑎᑕᐅᖃᒃᑕᑐᐃᓐᓇᕐᓂᐊᖅᑐᖅ, ᑲᑎᒪᔾᔪᓯᐊᖅᑖᖅᑎᑕᐅᓂᒃᑯᑦ ᑲᑎᒪᔨᕋᓛᖑᓂᕐᒧᑦ ᐱᔭᒃᓴᕆᔭᖏᓐᓂᓪᓗ ᐱᓕᕆᓂᕐᒧᑦ
ᕿᑭᖅᑖᓗᒃ ᑯᐊᐳᕋᐃᓴᒃᑯᓐᓄᑦ
ᐊᑕᐅᓯᖅ ᑲᑎᒪᔨᖃᓛᒃᓴᖅ ᐊᕐᕌᒍᓄᑦ ᐱᖓᓱᓄᑦ
ᕿᑭᑖᓗᒃ ᑯᐊᐳᕋᐃᓴᒃᑯᑦ ᓇᖕᒥᓂᕆᔭᐅᖕᒪᑕ ᕿᑭᖅᑕᓃᒃᑯᓐᓂ. ᕿᑭᖅᑖᓗᒃ ᑯᐊᐳᕋᐃᓴᒃᑯᑦ ᑮᓇᐅᔭᓂᒃ ᐱᕈᖅᓴᐃᕕᖃᒋᖦᓗᑎᒃ ᐱᓕᕆᔨᐅᔪᑦ ᐃᖅᑲᓇᐃᔭᖅᑎᑦᑎᔨᐅᖕᒪᑕ ᑮᓇᐅᔭᓕᕆᔨᐅᓪᓗᑎᒡᓗ ᐃᓄᖕᓄᑦ ᕿᑭᖅᑖᓗᖕᒥ.
ᐃᖅᑲᓇᐃᔮᓪᓚᑦᑖᑎᑐᑦ ᐱᖏᑦᑐᖅ ᐃᑲᕐᕋᓕᐅᖅᑎᑕᐅᖃᒃᑕᑐᐃᓐᓇᕐᓂᐊᖅᑐᖅ, ᑲᑎᒪᔾᔪᓯᐊᖅᑖᖅᑎᑕᐅᓂᒃᑯᑦ ᑲᑎᒪᔨᕋᓛᖑᓂᕐᒧᑦ ᐱᔭᒃᓴᕆᔭᖏᓐᓂᓪᓗ ᐱᓕᕆᓂᕐᒧᑦ ᕿᑭᖅᑖᓗᒃ ᑯᐊᐳᕋᐃᓴᒃᑯᑦ.
ᐃᓄᐃᑦ ᑕᑯᓐᓇᕋᒃᓴᓕᕆᔨᒃᑯᖏᓐᓄᑦ
ᐊᑕᐅᓯᕐᒥᒃ ᑲᑎᒪᔨᕋᓛᖑᔪᒃᓴᒥᒃ – ᐊᕐᕌᒍᓄᑦ ᐱᖓᓱᓄᑦ
ᐃᓄᐃᑦ ᑕᑯᓐᓇᕋᑦᓴᓕᕆᔨᒃᑯᑦ ᓴᖅᑭᔮᖅᑎᑦᑎᔨᐅᖕᒪᑕ ᐃᓄᐃᑦ ᐱᖅᑯᓯᖏᑦ ᐅᖃᐅᓯᖏᓪᓗ ᓴᖅᑭᔮᖅᑎᑕᐅᔭᕆᐊᖃᕐᓂᖏᓐᓄᑦ ᑕᕐᕆᔭᐅᓯᓕᕆᓂᒃᑰᕐᓗᑎᒃ. ᐃᓄᐃᑦ ᑕᑯᓐᓇᕋᑦᓴᓕᕆᔨᒃᑯᑦ ᑕᕐᕋᔭᒐᒃᓴᖏᑦ ᐱᖅᑯᓯᓂᒃ ᑐᓴᐅᒪᔾᔪᑎᓂᒡᓗ ᐊᒃᑐᐊᖕᒪᑕ ᐃᓄᐃᑦ ᐱᔪᓐᓇᐅᑎᒋᖕᒪᒍᑦ ᐃᓱᒪᖅᓱᑏᒋᓪᓗᓂᐅᒡᓗ ᑐᑯᒃᓴᕈᖁᔭᖏᓐᓂᒃ.
ᐃᖅᑲᓇᐃᔮᓪᓚᑦᑖᑎᑐᑦ ᐱᖏᑦᑐᖅ ᐃᑲᕐᕋᓕᐅᖅᑎᑕᐅᖃᒃᑕᑐᐃᓐᓇᕐᓂᐊᖅᑐᖅ, ᑲᑎᒪᔾᔪᓯᐊᖅᑖᖅᑎᑕᐅᓂᒃᑯᑦ ᑲᑎᒪᔨᕋᓛᖑᓂᕐᒧᑦ ᐱᔭᒃᓴᕆᔭᖏᓐᓂᓪᓗ ᐱᓕᕆᓂᕐᒧᑦ ᐃᓄᐃᑦ ᑕᑯᓐᓇᕋᒃᓴᓕᕆᔨᒃᑯᖏᓐᓄᑦ.
ᐱᓕᕆᖃᑎᒌᒡᓗᑎᒃ ᒥᕐᖑᐃᖅᓯᕕᔨᕆᔨᒃᑯᑦ ᑲᑎᒪᔨᕋᓛᖏᑦ ᐃᓚᒋᔭᐅᔪᒃᓴᒥᒃ ᕿᓂᕐᒥᔪᑦ ᐅᑯᓄᖓ
ᑲᓇᑕᐅᑉ ᒥᕐᖑᐃᖅᓯᕕᖏᑦ
- ᐊᐅᔪᐃᑦᑐᖅ ᒥᕐᖑᐃᖅᓯᕕᓕᕆᔨᒃᑯᑦ ᐃᑲᔪᖃᑎᒌᒡᓗᑎᒃ ᑲᑎᒪᔨᕋᓛᖅ – ᐊᑕᐅᓯᕐᒥᒃ ᑲᑎᒪᔨᕋᓛᒃᓴᒥᒃ, ᐃᓐᓄᒃᐸᑦ ᑭᓯᐊᓂ
- ᓯᕐᒥᓕᒃ ᒥᕐᖑᐃᖅᓯᕕᓕᕆᔩᑦ ᐃᑲᔪᖃᑎᒌᒡᓗᑎᒃ ᑲᑎᒪᔨᕋᓛᖅ – ᐊᑕᐅᓯᕐᒥᒃ ᑲᑎᒪᔨᕋᓛᒃᓴᒥᒃ, ᐃᓐᓄᒃᐸᑦ ᑭᓯᐊᓂ
- ᖃᐅᓱᐃᑦᑐᖅ ᒥᕐᖑᐃᖅᓯᕕᓕᕆᔩᑦ ᐃᑲᔪᖃᑎᒌᒡᓗᑎᒃ ᑲᑎᒪᔨᕋᓛᖅ – ᐊᑕᐅᓯᕐᒥᒃ ᑲᑎᒪᔨᕋᓛᒃᓴᒥᒃ, ᐃᓐᓄᒃᐸᑦ ᑭᓯᐊᓂ
ᓄᓇᕗᒻᒥ ᒥᕐᖑᐃᖅᓯᕕᓕᕆᔨᒃᑯᑦ
- ᐃᖃᓗᖕᓂ ᐃᑲᔪᖃᑎᒌᒡᓗᑎᒃ ᑲᑎᒪᔨᕋᓛᖅ – ᐃᖃᓗᐃᑦ ᑰᖓᓄᑦ ᑲᑎᒪᔨᕋᓛᒃᓴᒥᒃ ᐊᒻᒪᓗ ᖃᐅᒪᕐᕖᑦ ᒥᕐᖑᐃᖅᓯᕕᖓᓄᑦ- ᐊᑕᐅᓯᕐᒥᒃ ᑲᑎᒪᔨᕋᓛᒃᓴᒥᒃ, ᐊᕐᕌᒍᓄᑦ ᐱᖓᓱᓄᒃ
- ᓴᓂᑭᓗᐊᕐᒥ ᐃᑲᔪᖃᑎᒌᒡᓗᓂ ᒥᕐᖑᐃᖅᓯᕕᓕᕆᔨᒃᑯᑦ ᑲᑎᒪᔨᕋᓛᒃᓴᖓᓂ ᑭᙶᓘᑉ ᒥᕐᖑᐃᖅᓯᕕᖓᓄᑦ, ᐊᑕᐅᓯᕐᒥᒃ ᑲᑎᒪᔨᕋᓛᒃᓴᒥᒃ, ᐊᕐᕌᒍᓄᑦ ᐱᖓᓱᓄᑦ
- ᓄᓇᕗᒻᒥ ᐃᑲᔪᖃᑎᒌᒡᓗᓂ ᒥᕐᖑᐃᖅᓯᕕᓕᕆᓂᕐᒧᑦ ᑲᑎᒪᔨᕋᓛᖅ, ᐊᑕᐅᓯᕐᒥᒃ ᑲᑎᒪᔨᕋᓛᒃᓴᒥᒃ, ᐊᕐᕌᒍᓄᑦ ᑎᓴᒪᓄᑦ
ᑲᑎᒪᔨᕋᓛᖑᖃᑕᐅᔪᒪᒍᕕᑦ ᓇᓕᐊᖕᓄᑎᐃᓐᓇᖅ ᑲᑎᒪᔨᕋᓛᖃᕐᕕᖕᓄᑦ ᑐᓴᕆᐊᒃᑲᓐᓂᕈᑎᒋᔪᒪᒍᕕᐅᒡᓘᓐᓃᑦ, ᑐᓴᕆᐊᕐᕕᒋᔪᓐᓇᖅᐸᑦ:
ᕿᑭᖅᑕᓃᒃᑯᑦ ᑭᒡᒐᖅᑐᐃᔪᓕᕆᓂᕐᒧᑦ ᐊᐅᓚᑦᑎᔨ
ᐃᕐᖐᓐᓈᖅᑕᐅᑎᒃᑯᑦ: nominations@qia.flywheelsites.com
ᐅᖄᓚᐅᑖ: 867-975-8417
ᐅᖃᕐᕕᒋᓗᒍ ᓄᓇᔅᓯᓐᓂ ᑐᓴᐅᒪᑎᑦᑎᔨ ᐃᑲᔪᖅᑕᐅᑲᓐᓂᕆᐊᖃᕈᕕᑦ, ᑖᓐᓇ ᑐᕌᕈᑦ ᑐᑭᓯᐅᒪᔾᔪᑎᔅᓴᓂᑦ ᑕᑯᓂᐊᕋᕕᑦ ᓄᓇᔅᓯᓐᓅᖓᔪᓂᑦ: https://www.qia.ca/contact/#community-liason
ᑐᓂᓯᔪᓐᓇᕐᒥᔪᑎᑦ ᐱᓇᓲᑎᓐᓂᒃ ᓇᓕᑐᐃᓐᓇᖏᓐᓄᑦ ᑖᒃᑯᓄᖓ ᑲᑎᒪᔨᓄᑦ ᐊᑐᕐᓗᒍ ᖃᕋᓴᐅᔭᒃᑯᑦ ᑎᑎᕋᕐᕕᔅᓴᖅ ᐱᓇᓲᑎᓄᑦ: https://www.qia.ca/wp-content/uploads/2022/03/20210720-board-committee-application-form-final-eng.pdf
ᒪᑐᕕᔅᓴᖓ ᑖᒃᑯᓄᖓ ᐃᓘᓐᓇᖏᓐᓄᑦ ᖁᓛᓃᑦᑐᓄᑦ ᓯᑎᐱᕆ 23, 2022 5:00ᒨᖅᑲᑦ ᐅᓐᓄᓴᒃᑯᑦ ᑲᓇᓐᓇᐅᑉ ᓯᕿᙳᔭᖓ ᒪᓕᑦᑐᒍ
ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:
ᑭᐊᕋᓐ ᕙᓚᕼᐊᑎ
ᑐᑭᒧᐊᒃᑎᑦᑎᔨ ᑐᑭᒧᐊᒍᑎᒃᓴᓄᑦ ᑐᓴᐅᒪᖃᑦᑕᐅᓕᕆᔾᔪᑎᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(P) 867.975.8398 ᐊᑭᖃᙱᑦᑐᒧᓪᓘᓐᓃᑦ 1.800.667.2742
kflaherty@qia.flywheelsites.com
