ᔭᓄᐊᕆ 20ᒥ ᕿᑭᖅᑕᓃᒃᑯᑦ ᑐᙵᓱᒃᑎᑦᑎᓚᐅᖅᐳᑦ ᐃᖃᓗᓐᓄᑦ ᑲᑎᒪᔨᓂᒃ ᓯᕗᓪᓕᖅᐹᕆᔭᒥᓂᒃ ᑲᑎᒪᓂᕆᔭᖓᓂᑦ ᐊᕐᕌᒍᒥ.
ᑖᓐᓇ ᑲᑎᒪᓂᖅ ᓯᕗᓪᓕᖅᐹᖑᓚᐅᕐᒥᖕᒪᑦ ᓄᑖᓄᑦ ᓂᕈᐊᖅᑕᐅᓵᓚᐅᖅᑐᓄᑦ ᑲᑎᒪᔨᓄᑦ, ᐲᑕ ᐃᕙᓗ (ᐃᒡᓗᓕᒃ) ᑕᐃᕕᑎᑦ ᖃᕝᕕᒃ (ᓴᓂᑭᓗᐊᖅ), ᓴᓗᒨᓂ ᐊᓗᕈᑦ (ᓴᓂᕋᔭᒃ), ᔮᓱᐊ ᑲᑦᓴᒃ (ᒥᑦᑎᒪᑕᓕᖕᒥ), ᐊᒻᒪᓗ ᒫᑕ ᔮ (ᑭᙵᕐᓂᑦ), ᓂᕈᐊᖅᑕᐅᓚᐅᖅᑎᓪᓗᒍ ᓂᕈᐊᖅᑎᑦᑎᒃᑲᓐᓂᖅᑎᓪᓗᒋᑦ ᑭᙳᕝᕕᕐᓂᐊᖅᑐᒥᒃ ᐅᐃᒋᓚᐅᖅᑕᒥᓂᑦ ᐊᒻᒪᓗ ᒪᕐᕉᓄᑦ ᐊᕐᕌᒍᓄᑦ ᑲᑎᒪᔨᐅᓂᐊᖅᖢᓂ.
ᑲᑎᒪᔩᑦ ᑲᑎᒪᑎᓪᓗᒋᑦ ᓕᕙᐃ ᐸᓇᐹᓯ ᓂᕈᐊᖅᑕᐅᓚᐅᖅᑐᖅ ᐃᓄᖃᕈᓐᓃᓚᐅᖅᑐᒥᒃ ᐊᖓᔪᖅᑳᑉ ᑐᖏᓕᐊᑕ ᐃᓂᐊᓄᑦ. ᔨᐊᕆᒥ ᑑᕐᖔᓗᒃ ᓂᕈᐊᖅᑕᐅᓪᓗᓂ ᑎᑎᕋᖅᑎᐅᓂᕐᒥᒃ-ᑮᓇᐅᔭᓕᕆᔨᐅᓂᕐᒥᓗ. ᓯᕗᓕᖅᑎᓂᒃ ᑲᑎᒪᔨᐅᖃᑕᐅᓂᐊᖅᑐᑦ ᑖᒥ ᐋᑲᕙᒃ ᐊᒻᒪ ᓵᓕ ᖁᒻᒧᐊᖅᑐᕐᓗ ᑲᑎᒪᔨᑐᐃᓐᓇᐅᓗᑎᒃ.
ᑐᙵᓱᒋᑦ ᐊᒻᒪ ᑭᓇᐅᓂᖏᑦ ᑲᑎᒪᔨᑕᓵᑦ ᖃᐅᔨᓗᒋᑦ! ᕿᑭᖅᑕᓃᒃᑯᑦ ᖁᔭᓐᓇᒦᖅᐳᑦ ᑕᐃᒃᑯᓂᖓ ᑲᑎᒪᔨᐅᒍᓐᓃᓚᐅᖅᑐᓄᑦ ᐱᔨᑦᓯᓚᐅᕐᓂᖏᓐᓄᑦ ᐊᒻᒪ ᐊᒃᓱᕈᖃᑦᑕᓚᐅᕐᓂᖏᓐᓂᓗ ᐱᔨᑦᓯᖅᑎᓪᓗᒋᑦ ᕿᑭᖅᑕᓂᒥᐅᓂᒃ ᐃᓄᖕᓂᑦ.
ᐲᑕ ᐃᕙᓗ – ᐃᒡᓗᓕᒃ
ᕿᑭᖅᑕᓃᒃᑯᓐᓄᑦ ᑲᑎᒪᔨᙳᓚᐅᙱᑎᓪᓗᒍ, ᐲᑕ ᐃᕙᓗ ᒪᐃᔭᒋᔭᐅᓯᒪᓂᑯ 2012 -2020ᑎᐅᓪᓗ ᐊᑯᓐᓂᖓᓂᒃ. ᖃᐅᔨᒪᓂᖏᑦ ᐊᔾᔨᒌᙱᑦᑑᖕᒪᑕ ᐃᑲᔪᕐᓂᖃᕐᓂᐊᖅᑐᓂᒃ ᑲᑎᒪᔨᐅᓂᖓᓂᒃ ᐊᒻᒪᓗ ᐃᒃᓯᕙᐅᑕᕆᔭᐅᓚᐅᖅᖢᓂ ᓄᓘᔭᓕᕆᓂᕐᒧᑦ ᑲᑎᒪᔨᕋᓛᖏᓐᓂᒃ. ᐲᑕ ᐃᓕᓐᓂᐊᕐᕕᖕᒥᒃ ᐃᓕᓐᓂᐊᕌᓂᒃᓯᒪᓂᑯᑦ ᐊᒻᒪᓗ ᓯᓚᑦᑐᖅᓴᕐᕕᖕᒥᑦ ᓇᓗᓇᐃᒃᑯᑕᖅᑖᖅᓯᒪᓪᓗᓂ.
ᐲᑕ ᖃᐅᔨᒪᑦᑎᐊᖅᑐᑦ ᐱᓕᕆᐊᒃᓴᓕᒻᒪᕆᐅᓂᖓᓂᒃ ᕿᑭᖅᑖᓗᖕᒥ ᐊᒻᒪᓗ ᓂᕆᐅᒋᔭᖃᖅᖢᓂ ᑭᒡᒐᖅᑐᐃᒍᒪᓪᓗᒋᑦ ᐃᓄᐃᑦ ᐃᒡᓗᓕᖕᒥ ᕿᑭᖅᑖᓗᖕᒥᓗ.
ᑕᐃᕕᑎ ᖃᕝᕕᒃ – ᓴᓂᑭᓗᐊᖅ
ᑕᐃᕕᑎ ᑲᑎᒪᔨᙳᖅᑐᖅ ᓴᓂᑭᓗᐊᕐᒥ ᑭᒡᒐᖅᑐᐃᓗᓂ, ᓴᓂᑭᓗᐊᕐᒥ ᐅᖅᓱᐊᓗᖃᐅᑎᒥᒃ ᓄᓇᓯᐅᖅᑎᐅᔪᖅ ᒥᑎᖅ ᑯᐊᐸᒃᑯᓐᓄᑦ. ᐊᔾᔨᒌᙱᑦᑐᓂᒃ ᐃᖅᑲᓇᐃᔮᖃᖃᑦᑕᖅᓯᒪᔪᖅ ᓄᓇᓕᖕᒥ ᐃᒡᓗᓕᕆᔨᒃᑯᓐᓂ ᐊᒻᒪ ᕼᐊᒻᓚᒃᑯᓐᓂᓗ ᐊᒻᒪᓗ ᐃᓚᒋᔭᐅᖃᑕᐅᖃᑦᑕᖅᓯᒪᓪᓗᓂ ᑭᙶᓗᒃ ᒥᕐᖑᐃᖅᓯᕝᕕᖕᒥ ᑲᑎᒪᔨᕋᓛᖏᓐᓂᒃ. ᑕᐃᕕᑎᑦ ᐃᖅᑲᓇᐃᔭᕐᓇᐅᕈᓐᓃᕌᖓ ᖁᕕᐊᒋᔭᖃᖃᑦᑕᖅᑐᖅ ᐊᖑᓇᓱᖕᓂᕐᒥᒃ, ᐃᖃᓗᒃᓯᐅᕐᓂᕐᒥᒃ ᐊᒻᒪᓗ ᓂᔾᔭᐅᓯᔭᐅᑎᓂᒃ ᑐᓴᕐᓂᕈᓱᒃᖢᓂ.
ᓴᓗᒨᓂ ᐊᓗᕈᑦ – ᓴᓂᕋᔭᒃ
ᓱᓗᒨᓂ ᐊᓗᕈᑦ ᒫᓐᓇ ᓄᖅᑲᖓᓕᖅᑐᖅ ᐃᖅᑲᓇᐃᔮᓂᒃ. ᑲᑎᒪᔨᙳᓚᐅᖅᑎᓐᓇᒍ, ᑐᑭᒧᐊᒃᑎᑦᑎᔨᒋᔭᐅᓚᐅᖅᑐᖅ ᐃᖅᑲᓇᐃᔭᖅᑐᓕᕆᓂᕐᒧᑦ ᓄᓇᕗᑦ ᒐᕙᒪᒃᑯᓐᓄᑦ, ᐊᒻᒪ ᐊᐅᓚᑦᑎᔨᒋᔭᐅᓪᓗᓂ ᐃᒡᓗᓕᖕᒥ ᐃᒡᓗᓕᕆᔨᒃᑯᓐᓄᑦ. ᓴᓗᒨᓂ ᐃᓚᐅᕈᓘᔭᖅᐸᒃᑐᑦ ᓄᓇᓕᖕᒥ ᖃᓄᐃᓕᐅᖅᑐᖃᓕᕋᐃᖕᒪᑦ, ᑮᓇᐅᔾᔭᒃᓴᙱᖦᖢᓂ ᐃᑲᔪᖃᑦᑕᖅᖢᓂ ᐊᔾᔨᒌᙱᑦᑐᓄᑦ ᑎᒥᐅᔪᓂᒃ, ᐊᒻᒪ ᖁᕕᐊᒋᔭᖃᖅᖢᓂ ᐊᖑᓇᓱᖕᓂᕐᒥᒃ. .
ᓴᓗᒨᓂ ᖁᕕᐊᓱᒃᑐᑦ ᑲᑎᒪᔨᙳᓚᐅᕋᒥ ᖃᐅᔨᒪᖕᒪᑦ ᒫᓐᓇ ᖃᓄᐃᓕᐅᖅᑕᐅᕙᓪᓕᐊᔪᓂᒃ ᖃᐅᔨᖃᑦᑕᕋᒥ.
ᔮᔅᓱᐊ ᑲᑦᓴᒃ – ᒥᑦᑎᒪᑕᓕᒃ
ᕿᑭᖅᑕᓃᒃᑯᓐᓄᑦ ᑲᑎᒪᔨᙳᓚᐅᙱᑎᓪᓗᒍ, ᔮᔅᓱᐊ ᑲᑦᓴᒃ ᒪᐃᔭᒋᔭᐅᖃᑦᑕᖅᓯᒪᔪᖅ ᒥᑦᑎᒪᑕᓕᖕᒥ ᐊᕐᕌᒍᓂ 2015 ᐊᒻᒪ 2017 ᐊᑯᓐᓂᖓᓂᑦ, ᑲᑎᒪᔨᐅᖃᑦᑕᖅᓯᒪᓪᓗᓂᓗ ᕼᐊᒻᓚᒃᑯᓐᓂ. ᐱᔨᑦᓯᓚᐅᕐᒥᔪᖅ ᑮᓇᐅᔾᔭᙱᖦᖢᓂ ᖃᑦᑎᕆᔭᐅᓂᕐᒥᒃ 7ᓄᑦ ᐊᕐᕌᒍᓄᑦ ᐊᒻᒪᓗ ᐃᒃᓯᕙᐅᑕᕆᔭᐅᓪᓗᓂ ᓄᓇᓕᖕᒥ ᐃᓕᓐᓂᐊᖅᑐᓕᕆᔨᒃᑯᓐᓄᑦ. ᔮᔅᓱᐊ ᓴᓇᔪᓕᕆᓂᕐᒧᑦ ᓇᓗᓇᐃᒃᑯᑕᓕᒃ ᐊᒻᒪᓗ ᓄᖅᑲᖓᓕᖅᖢᓂ ᐃᖅᑲᓇᐃᔭᓚᐅᖅᑎᓪᓗᒍ 31ᓂ ᐊᕐᕌᒍᓄᑦ ᐅᓇᖅᑐᖃᐅᑎᓕᕆᔨᐅᓂᕐᒧᑦ ᕼᐊᒻᓚᒃᑯᓐᓄᑦ ᐊᒻᒪ ᓄᓇᕗᑦ ᒐᕙᒪᒃᑯᓐᓄᓗ.
ᑭᓱᓕᕆᙱᑎᓪᓗᒍ, ᖁᕕᐊᒋᔭᖃᖅᑐᖅ ᐊᖑᓇᓱᖕᓂᕐᒥᒃ ᐊᒻᒪᓗ ᓅᓯᒪᓂᕐᒥᒃ.
ᒫᑕ ᔮ – ᑭᙵᐃᑦ
1990 ᐱᒋᐊᓕᓵᕐᓂᖓᓂᑦ, ᒫᑕ ᐃᖅᑲᓇᐃᔮᖃᓕᓚᐅᖅᑐᖅ ᓄᓇᓕᖕᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑭᒡᒐᖅᑐᖅᑎᒋᔭᐅᓪᓗᓂ ᓄᓇᕗᑦ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᖏᓐᓂ. ᒫᑦᑕ ᑐᒃᓯᐊᖅᑎᑦᑎᔨᐅᖕᒥᔪᖅ Full Gospel ᑐᒃᓯᐊᕐᕕᖕᒥ ᐊᒻᒪᓗ ᐃᓕᑕᕆᔭᐅᓕᓚᐅᖅᓯᒪᔪᖅ ᑐᒃᓯᐊᖅᑎᑦᑎᔨᐅᓂᕐᒧᑦ 1984ᒥᑦ. ᐃᓚᒋᔭᖏᓐᓂᒃ ᐱᒻᒪᕆᐅᑎᑦᑎᔪᖅ ᒫᑕ, ᐊᒻᒪᓗ ᐊᖏᕐᕋᖅᓯᒪᒍᒪᒐᔪᒃᖢᓂ ᕿᑐᕐᖓᖏᓐᓂ, ᐃᕐᖑᑕᖏᓐᓂᒃ, ᐃᓗᓕᖏᓐᓂᓗ ᐊᖏᕐᕋᖅᓯᒪᖃᑎᒋᕙᒃᖢᒋᑦ.
