ᐃᖃᓗᐃᑦ, ᓄᓇᕗᑦ – ᓄᕖᕝᕙ 5, 2020 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᐋᖅᑭᒋᐊᖅᓯᕗᑦ ᕿᑭᖅᑕᓂ ᐃᓚᒌᓄᑦ ᐃᑲᔫᑎᒥᒃ ᐃᑲᔪᖅᑕᐅᒃᑲᓐᓂᕈᓐᓇᕐᓂᐊᕐᒪᑕ ᐊᒥᓲᓂᖅᓴᓂᒃ ᐃᓄᖕᓂᑦ ᐊᑐᖅᑎᓪᓗᒍ ᓄᕙᓐᓇᕐᔪᐊᖅ -19.  ᑮᓇᐅᔭᐃᑦ ᐊᑐᖅᑕᐅᔪᓐᓇᖅᑐᑦ ᐊᖑᓇᓱᒋᐊᕐᓂᕐᒧᑦ ᓂᕿᒃᓴᖅᓯᐅᓂᕐᒥᒃ, ᓂᕿᑖᕈᑎᒃᓴᓂᑦ ᐊᒻᒪᓗ ᒥᖅᓱᒐᒃᓴᓄᑦ.

24ᓂ ᐃᑲᕐᕋᓂ ᕿᑭᖅᑕᓃᒃᑯᑦ ᑐᓂᔭᐅᓚᐅᖅᑐᖅ 2,000 ᐅᖓᑖᓄᑦ ᑐᒃᓯᕋᐅᑎᓂᒃ ᑕᒪᑐᒧᖓ ᐱᒋᐊᕈᑎᒋᔭᐅᔪᒧᑦ ᐱᓇᓱᖃᑕᐅᔪᓂᑦ, ᑖᒃᑯᐊ ᐅᓪᓗᒥᒧᑦ ᑎᑭᑦᑐᒍᑦ ᐅᓄᕐᓂᖅᐹᖑᓯᒪᔪᓂᒃ ᐱᓇᓱᖃᐅᑕᐅᓯᒪᔪᑦ ᕿᑭᖅᑕᓃᒃᑯᑦ  ᐱᓕᕆᐊᕆᕙᒃᑕᖏᓐᓂᑦ.  ᑕᐃᒪᐃᒻᒪᑦ, ᕿᑭᖅᑕᓃᒃᑯᑦ ᐋᖅᑭᒋᐊᖅᓯᓯᒪᔪᑦ ᑐᓂᓯᖃᑦᑕᕐᓂᐊᖅᖢᑎᒃ $1,000ᑖᓚᓂ ᐊᑐᓂ ᐃᓚᒌᓄᑦ ᐃᒡᓗᖃᖅᑐᓂᒃ ᐊᒻᒪᓗ ᖄᒐᒍᒃᑲᓐᓂᖅ ᑐᓂᓯᒃᑲᓐᓂᕈᓐᓇᕐᓂᐊᖅᖢᑎᒃ 884ᓄᑦ ᐃᓄᖕᓂ ᐃᓚᒌᓄᑦ.  ᑲᑎᓪᓗᒋᑦ 2,660ᖑᔪᓂᒃ ᕿᑭᖅᑕᓂ ᐃᓚᒌᓂᑦ ᐃᑲᔪᖅᑕᐅᔭᕆᐊᖃᖅᑐᑦ ᐃᑲᔪᖅᑕᐅᔪᓐᓇᖅᓯᓂᐊᖅᑐᑦ ᑖᔅᓱᒪᙵᑦ ᐱᓕᕆᐊᖑᔪᒥᒃ.

ᕿᑭᖅᑕᓃᒃᑯᑦ ᖄᖓᒍᑦ ᑐᓂᔭᐅᒃᑲᓐᓂᓚᐅᕐᒪᑕ $2.65 ᒥᓕᔭᓂᒃ ᐃᑯᓪᓚᖅᑎᑦᑎᒍᑕᐅᖁᓪᓗᒋᑦ ᐊᒃᑐᐃᒍᑕᐅᓯᒪᔪᓂᑦ ᓄᕙᓐᓇᕐᔪᐊᕐᒥᑦ. ᐊᑐᓂ ᐃᒡᓗᖃᖅᑎᐅᔪᑦ ᑐᓂᔭᐅᓂᐊᓚᐅᖅᑑᒐᓗᐊᑦ $1,500.00ᓂ.

“ᑐᒃᓯᕋᖅᑐᑦ ᑕᒪᑐᖓ ᐱᒋᐊᕈᑎᐅᔪᒥᒃ ᐊᒥᓲᒻᒪᕆᐅᖕᒪᑕ ᐊᒻᒪᓗ ᓇᓗᓇᕈᓐᓃᕈᑕᐅᓯᒪᕗᖅ ᑖᒃᑯᐊ ᐱᓕᕆᐊᕆᕙᒃᑕᕗᑦ ᐋᖅᑭᒃᓯᒪᑦᑎᐊᕐᓂᖏᓐᓄᑦ ᐱᔪᒪᔭᐅᔪᓄᑦ ᕿᑭᖅᑕᓃ ᐃᓄᐃᑦ ᐃᓚᒌᓂᑦ ᐊᑐᖅᑎᓪᓗᒍ ᓄᕙᓐᓇᕐᔪᐊᖅ-19,” ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐲᔨᐊ ᐊᕿᐊᕈᖅ, “ᑕᐃᒪ ᐋᖅᑭᒋᐊᖅᓯᒪᓕᖅᑎᓪᓗᒍ ᐊᒥᓲᓂᖅᓴᓂᒃ ᐃᓄᖕᓂᑦ ᐱᓇᓱᒃᑐᖃᕈᓐᓇᕐᓂᐊᕐᓕᒪᑕ ᑮᓇᐅᔭᓂᒃ ᐃᑲᔫᑕᐅᓂᐊᖅᑐᓄᑦ ᐊᖑᓇᓱᒋᐊᕐᓂᕐᒧᑦ ᓂᕿᒃᓴᖅᓯᐅᓂᕐᒥᒃ, ᓂᕿᑖᕐᓂᕐᒧᑦ ᐊᒻᒪᓗ ᒥᖅᓱᒐᒃᓴᓂ ᐋᓐᓄᕌᓕᐅᕈᑎᒃᓴᓄᑦ ᐅᑭᐅᖅᓯᐅᑎᓂᒃ.”

ᑖᓐᓇ ᐱᒋᐊᕈᑎᑦ ᐅᐃᒍᒋᔭᐅᔪᖅ ᕿᑭᖅᑕᓃᒃᑯᑦ ᓯᕗᓂᐊᓂ ᓴᖅᑭᑎᓚᐅᖅᑕᖓᓂᑦ ᓄᕙᓐᓇᕐᔪᐊᖅ-19 ᐱᔾᔪᑎᒋᓪᓗᒍ ᐅᐸᓗᖓᐃᔭᐅᑎᒋᔭᐅᓚᐅᖅᑐᓄᑦ ᐊᖑᓇᓱᒃᑎᓄᑦ/ᓅᓯᒪᓂᕐᒧᓪᓗ ᓴᖅᑭᑕᐅᓚᐅᖅᑐᒥᒃ ᐄᐳᓪ 2020ᒥ.  ᐃᑲᔪᕈᓐᓇᓚᐅᖅᑐᑦ ᕿᑭᑕᓂ ᐃᓚᒌᓂ $2 ᒥᓕᔭᓂᒃ ᓅᓯᒪᓗᑎᒃ ᖃᓂᒌᓗᐊᖅᑕᐃᖁᓇᒋᑦ ᐊᒻᒪ ᓂᕿᒃᓴᖅᓯᐅᖁᓪᓗᒋᑦ..

ᑐᒃᓯᕋᐅᑎᑦ ᕿᑭᖅᑕᓂ ᐃᓚᒌᓄᑦ ᐃᑲᔫᑎᖓᓄᑦ ᑎᒍᔭᐅᖏᓐᓇᕐᓂᐊᖅᑐᑦ ᑕᐃᑯᖓ ᑮᓇᐅᔭᐃᑦ ᓄᖑᑉᐸᑕᒧᑦ.  ᑐᒃᓯᕋᐅᑎᓕᐅᖅᑐᖃᕈᓐᓇᖅᑐᖅ ᖃᕆᓴᐅᔭᒃᑯᑦ ᐅᕗᙵᕐᓗᑎᑦ https://www.qia.ca/qikiqtani-family-support-initiative/ .

ᑖᒃᑯᐊ ᑮᓇᐅᔭᐃᑦ ᕿᑭᖅᑕᓂ ᓄᕙᓐᓇᕐᔪᐊᖅ-19ᒧᑦ ᑭᐅᔾᔪᑎᒋᔭᐅᔪᓄᑦ ᐸᕐᓇᐅᑎᑦ ᑐᓂᔭᐅᓯᒪᔪᑦ ᓄᓇᖃᖅᑐᑐᖃᓕᕆᓂᕐᒧᑦ ᓄᓇᓕᖕᓂᑦ ᐃᑲᔫᑎᒋᔭᖏᓐᓄᑦ ᓇᓗᓇᐃᖅᑕᐅᓚᐅᖅᑐᓄᑦ ᒐᕙᒪᑐᖃᒃᑯᓐᓂᑦ.  ᕿᑭᖅᑕᓃᒃᑯᑦ ᑐᓂᔭᐅᓯᒪᔪᓂᒃ ᑖᒃᑯᓇᙵᑦ ᑮᓇᐅᔭᓂᑦ $4,311,793ᓂ.  ᖄᖓᒍᒃᑲᓐᓂᖅ ᑮᓇᐅᔭᖅᑖᖑᓯᒪᔪᑦ ᕿᑭᖅᑕᓂ ᐃᓚᒌᓄᑦ ᐃᑲᔫᑎᓄᑦ ᐱᓯᒪᔪᑦ ᐃᓱᒪᒃᑯᑦ ᖃᓄᐃᑦᑕᐃᓕᓂᕐᒧᑦ ᑮᓇᐅᔭᖏᓐᓂᑦ..

ᕿᑭᖅᑕᓃᒃᑯᑦ ᐸᕐᓇᐅᑎᖃᖅᓯᒪᔪᑦ ᖄᖓᒍᒃᑲᓐᓂ ᐱᓕᕆᐊᖑᓯᒪᔪᓂᑦ ᐃᑲᔫᑕᐅᓂᐊᖅᑐᓄᑦ ᕿᑭᖅᑕᓂ ᐃᓚᒌᓄᑦ ᑖᓐᓇ ᐊᑐᖅᑎᓪᓗᒍ ᓄᕙᓐᓇᕐᔪᐊᖅ-19.  ᑐᑭᓯᒋᐊᕈᑎᒃᓴᒃᑲᓐᓂᕐᓂ ᓴᖅᑭᑦᑐᖃᓛᖅᑐᑦ ᐱᓇᓱᐊᕈᓯᐅᓂᐊᖅᑐᒥᒃ.

ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:

ᓰᒪ ᓴᕼᐋᕐ ᓯᐊᕋᕼᐃ,

ᑐᑭᒧᐊᒃᑎᑦᑎᔨ, ᑐᓴᐅᒪᖃᑦᑕᐅᑎᓕᕆᓂᕐᒧᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ

szerehi@qia.ca

867.975.8413 or

1.800.667.2742