ᐃᖃᓗᐃᑦ, ᓄᓇᕗᑦ – ᓄᕖᕝᕙ  9, 2020 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓴᖅᑭᑎᑦᑎᓂᐊᖅᑐᑦ ᐊᐃᑉᐸᕆᔭᖓᓂᑦ ᐅᐸᓗᖓᐃᔭᐅᑎᒋᔭᐅᔪᓂᒃ ᓂᐅᕕᕈᑎᓂᒃ ᐃᓐᓇᕐᓄᑦ ᐃᑲᔫᑕᐅᓂᐊᖅᖢᑎᒃ ᕿᑭᖅᑕᓂ ᐃᓄᖕᓂᑦ ᐊᑐᖅᑎᓪᓗᒍ ᓄᕙᓐᓇᕐᔪᐊᖅ-19.

“ᓴᐳᔾᔩᓐᓇᕆᐊᖃᕋᑦᑎᒍ ᐊᒃᑐᖅᑕᐅᓴᕋᐃᑦᑐᑦ ᓄᓇᓕᑦᑎᓐᓂ ᐊᑐᖅᑎᓪᓗᒍ ᐊᐃᑉᐸᕆᔭᖓᓂᑦ ᐊᒃᑐᐃᒍᑎᒋᔭᐅᓚᐅᖅᑐᒧᑦ ᓄᕙᓐᓇᕐᔪᐊᕐ-19ᒥᑦ,” ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐲᔨᐊ ᐊᕿᐊᕈᖅ. “ᐃᖅᑲᓇᐃᔭᖅᑎᕗᑦ ᓇᓗᓇᐃᖅᓯᒍᒪᖕᒪᑕ ᐃᓐᓇᕗᑦ ᓂᕿᖃᑦᑎᐊᕐᓂᖏᓐᓂᒃ, ᐱᔭᕆᐊᖃᖅᑕᖏᓐᓂᒃ ᐊᒻᒪᓗ ᓴᓗᒻᒪᖅᓴᐅᑎᒃᓴᓂ ᓂᐅᕕᕆᐊᖃᖅᐸᑕ.”

ᑲᑐᔾᔨᖃᑎᒋᔭᐅᓪᓗᑎᒃ ᐅᑭᐅᖅᑕᖅᑐᒥ ᑯᐊᐸᒃᑯᑦ, ᕿᑭᖅᑕᓃᒃᑯᑦ ᓴᓂᕐᕙᐃᖅᓯᓯᒪᔪᑦ ᖄᒐᒍᒃᑲᓐᓂᖅ  ᑮᓇᐅᔭᓂᒃ $1.8  ᒥᓕᔭᓂᒃ ᐃᑲᔫᑕᐅᓂᐊᕐᒪᑕ ᐊᒃᑐᐃᑎᓪᓗᒍ ᓄᕙᓐᓇᕐᔪᐊᖅ-19 ᐃᓐᓇᕐᓄᑦ.  ᑖᒃᑯᐊ ᑮᓇᐅᔭᐃᑦ ᑐᓂᐅᖅᑲᖅᑕᐅᖃᑦᑕᕐᓂᐊᖅᑐᑦ $250.00ᖑᖃᑦᑕᕐᓗᑎᒃ ᓂᐅᕕᕈᑎᓂᒃ ᐱᓇᓱᐊᕈᓯᐅᑉ ᐊᐃᑉᐸᕆᔭᖓᓂᑦ ᐊᒻᒪᓗ ᑲᑎᓕᒫᕐᓗᒋᑦ ᓂᐅᕕᕈᑎᑦ ᑐᓂᔭᐅᓂᐊᖅᑐᑦ ᐱᖓᓲᔪᖅᑑᔪᓂᒃ ᐅᕝᕙᓘᓐᓃᑦ ᑲᑎᓪᓗᒋᑦ ᐊᑭᖃᖅᑐᓂᒃ  $1,500ᓂ/ᐊᑐᓂ ᐃᓐᓇᕐᒧᑦ.

ᑲᖏᖅᑐᒑᐱᖕᒥ, ᕿᑭᖅᑕᓃᒃᑯᑦ ᑕᒪᑐᒥᖓ ᐱᓕᕆᐊᕐᒥ ᓴᖅᑭᑎᑦᑎᓂᐊᖅᑐᑦ ᐊᖅᑯᑎᒋᔭᐅᓗᓂ ᐃᓕᓴᖅᓯᕕᒃᑯᑦ ᐊᒻᒪ ᑯᐊᐸᒃᑯᑦ ᓂᐅᕕᕈᑎᑖᙱᓪᓗᑎᒃ ᓂᕿᓂᒃ ᐸᔪᖅᑎᕆᓛᖅᑐᑦ ᐃᓐᓇᕐᓄᑦ.

ᖃᓪᓗᓈᓃᑦᑐᑦ ᐃᓄᐃᑦ, ᕿᑭᖅᑕᓂ ᓄᓇᓕᖕᓂᙶᖅᓯᒪᔪᑦ, ᐊᑎᖃᖃᑕᐅᔪᓂᒃ ᓄᓇᕗᑦ ᑐᙵᕕᒃᑯᓐᓂ, ᐊᑕᐅᓯᐊᖅᑕᐅᓂᐊᖅᑐᒥᒃ ᐊᑭᓕᖅᑕᐅᓂᐊᖅᑐᑦ $750.00 ᓯᒃᑭᓕᐅᖅᑕᐅᖃᑦᑕᕐᓗᑎ.

ᑖᒃᑯᐊ ᓂᐅᕕᕈᑎᑦ ᑐᕌᒐᔪᑦ ᐃᓐᓇᕐᓄᑦ 60ᓂ ᐅᖓᑖᓂᓗ ᐊᕐᕌᒍᖃᖅᑐᓂᒃ 60ᓂ ᐊᕐᕌᒍᑖᖅᓯᒪᒍᕕᑦ ᔭᓐᓄᐊᓕ 31, 2021ᒥ.

ᓯᕗᓪᓕᖅᐹᖑᔪᓂᒃ ᓂᐅᕕᕈᑎᐅᓚᐅᖅᑐᓂᒃ ᐊᐅᓚᑕᐅᓚᐅᖅᑐᖅ ᐄᐳᓪ 14ᒥᑦ ᐊᒡᒌᓯ 18ᒧᑦ ᐊᒻᒪᓗ ᑲᑎᓪᓗᒋᑦ ᑮᓇᐅᔭᐃᑦ ᐊᑐᖅᑕᐅᓚᐅᖅᑐᑦ ᑕᒪᑐᒧᖓ ᐃᑲᔫᓯᐊᖑᓚᖅᑐᓂᒃ ᐃᓐᓇᕐᓄᑦ $3 ᒥᓕᔭᓐᖑᓚᐅᖅᑐᑦ.

ᐃᓐᓇᐃᑦ ᐅᓗᕆᐊᕐᓇᕐᓂᖅᓴᒦᒻᒪᑕ ᐳᕙᒃᑯᑦ ᐋᓐᓂᐊᖅᑖᕐᓂᕐᒥᒃ ᓱᕐᓗ ᐆᑐᓇ ᓄᕙᓐᓇᕐᔪᐊᖅ-19ᒥ.  ᑖᒃᑯᐊ ᐅᐸᓗᖓᐃᔭᐅᑎᒋᔭᐅᔪᑦ ᑮᓇᐅᔭᐃᑦ ᐃᑲᔪᕈᓐᓇᕐᓂᐊᖅᑐᑦ ᓂᕿᑖᕈᓐᓇᕐᓗᑎᒃ ᓂᕿᑦᑎᐊᕙᒃᑖᕐᓗᑎᒃ ᐊᒻᒪᓘᓐᓃᑦ ᓴᓗᒻᒪᖅᓴᐅᑎᑖᕐᓗᑎᒃ, ᐊᑐᕆᐊᖃᖅᑕᖏᓐᓂᒡᓘᓐᓃᑦ.  ᑖᒃᑯᐊ ᓂᐅᕕᕈᑎᑦ ᑐᓂᐅᖅᑲᖅᑕᐅᕙᓪᓕᐊᓂᐊᖅᑐᑦ ᓄᕖᕝᕙ 10ᒥ, 24ᒥ, ᑎᓯᐱᕆ 8ᒥ, 22ᒥ ᐊᒻᒪᓗ ᔭᓐᓄᐊᓕ 5ᒥ ᐊᒻᒪ 19ᒥᓗ.

ᑖᒃᑯᐊ ᑮᓇᐅᔭᐃᑦ ᕿᑭᖅᑕᓃᒃᑯᑦ ᓄᕙᓐᓇᕐᔪᐊᖅ−19ᒧᑦ ᐸᕐᓇᒃᑕᐅᓯᒪᔪᑦ ᑐᓂᔭᐅᓯᒪᔪᑦ ᓄᓇᖃᖅᑐᑐᖃᓂᒃ ᐃᑲᔫᑎᒋᔭᐅᔪᓂᑦ ᓇᓗᓇᐃᖅᑕᐅᓚᐅᖅᑐᓄᑦ ᒐᕙᒪᑐᖃᒃᑯᓐᓄᑦ.  ᕿᑭᖅᑕᓃᒃᑯᑦ ᑐᓂᔭᐅᓚᐅᖅᑐᑦ ᑮᓇᐅᔭᓂᒃ  $4,311,793ᓂ.

ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:  

ᓰᒪ ᓴᕼᐊᕐ ᓯᐊᕋᕼᐃ,

ᑐᑭᒧᐊᒃᑎᑦᑎᔨ, ᑐᓴᐅᒪᖃᑦᑕᐅᑎᓕᕆᓂᕐᒧᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

szerehi@qia.ca

867.975.8413 or

1.800.667.2742