ᐃᖃᓗᐃᑦ, ᓄᓇᕗᑦ, ᐄᐳᓗ 25, 2023 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᖁᕕᐊᓱᑉᐳᑦ ᓇᓗᓇᐃᕐᓯᔭᕆᐊᔅᓴᖅ ᕿᑭᖅᑕᓂ ᒪᑭᒪᔾᔪᑎᔅᓴᑦ ᐱᔾᔪᑎᒋᓪᓗᒋᑦ ᓄᓇᓕᓐᓄᑦ ᐳᓚᕋᓐᓂᐊᕐᖓᑕ ᑲᑎᒪᖃᑎᖃᖃᑦᑕᕆᐊᖅᑐᕐᓗᑎᒃ. ᕿᑭᖅᑕᓂᒃᑯᑦ ᑲᑎᒪᔨᖏᑦ ᐱᖁᔨᕗᖔᕈᑎᓕᐅᔪᒻᒪᑕ ᔮᓐᓄᐊᓕ 2023ᖑᑎᓪᓗᒍ ᑲᔪᓯᖁᔨᓪᓗᑎᒃ ᐸᕐᓇᐃᓂᕐᒥᒃ ᐃᒃᐱᐊᕐᔪᒻᒥ ᐱᓕᕆᐊᔅᓴᒥᑦ ᑮᓇᐅᔭᖃᖅᑎᑕᐅᖏᓐᓇᕈᑎᔅᓴᖓᓂᒃ ᕿᑭᖅᑕᓂ.
ᑖᓐᓇ ᑐᔅᓯᕋᐅᑦ ᐋᔩᕋᕈᑎᖃᕈᒪᓪᓗᑎᒃ ᓄᑖᓂᑦ, ᕿᑭᖅᑕᓂ ᐱᓇᓱᐊᕈᑕᐅᓪᓚᕆᓐᓂᐊᖅᑐᓂᑦ ᓴᐳᔾᔨᓂᕐᒧᑦ ᒪᑯᓂᖓ ᐱᔾᔪᑎᖃᐅᕋᔭᕐᖓᑦ ᓄᓇᓕᓐᓂᑦ ᐱᕙᓪᓕᐊᔪᓕᕆᓂᖅ, ᐃᓄᓐᓄᑦ−ᑐᑭᒧᐊᑦᑎᑕᐅᔪᓂᑦ ᓴᐳᔾᔨᓂᕐᒧᑦ ᐊᐅᓚᑦᑎᓂᕐᒥᒃ, ᐊᐅᓚᔾᔪᑎᔅᓴᓂᑦ ᐋᖅᑭᓯᒪᔭᕆᐊᓕᓐᓂᑦ, ᓇᐅᑦᑎᕐᓱᖅᑎᓂᑦ, ᓂᕿᓂᑦ ᐊᐅᓚᑦᑎᔾᔪᑎᖃᕐᓂᖅ, ᐃᖃᓗᓕᕆᓂᕐᒧᑦ ᐋᖅᑮᑦᑎᐊᕐᓂᖅ, ᐊᒻᒪᓗ ᓇᒻᒥᓂᖅ−ᑐᑭᑖᕈᑎᖃᖃᑦᑕᕐᓗᑎᒃ ᐃᓘᓐᓇᑎᒃ ᕿᑭᖅᑕᓂ ᓄᓇᓕᐅᔪᑦ.
ᕿᑭᖅᑕᓂ ᒪᑭᒪᔾᔪᑎᔅᓴᑦ ᐃᓚᒋᔭᐅᑎᑦᑎᓂᐊᕐᖓᑕ ᐃᓄᓐᓂᑦ ᖃᓄᖅ ᐋᖅᑭᐸᓪᓕᕈᓐᓇᕐᒪᖔᑕ ᐊᑐᖅᑐᑦ ᐊᒻᒪᓗ ᐃᑲᔪᕐᓰᒍᓐᓇᕐᒪᖔᑕ ᓄᑖᓂᑦ ᓴᐳᔾᔨᕕᓐᓂᑦ ᐊᒻᒪᓗ ᓄᓇᓕᓐᓂᑦ ᐱᕙᓪᓕᐊᔪᓕᕆᓂᕐᒧᑦ ᐱᓕᕆᐊᔅᓴᓂᑦ ᕿᑭᖅᑕᓂ ᓄᓇᓕᐅᔪᓂᑦ ᐋᖅᑮᓗᑎᒃ ᑮᓇᐅᔭᓂᑦ ᑖᕗᖓᓕᒫᖅ ᐋᖅᑭᓯᒪᓂᖃᕐᓂᐊᖅᑐᓂᑦ ᐱᕈᕐᐸᓪᓕᐊᑎᑦᑎᒍᑎᖃᕐᓗᑎᒃ ᐃᑲᔫᑕᐅᓯᒪᔪᓂᑦ ᐊᔪᕐᓴᖏᑦᑐᓂᑦ ᐃᑲᔪᖅᑎᐅᕙᑦᑐᓂᑦ ᐊᒻᒪᓗ ᒐᕙᒪᑐᖃᒃᑯᓐᓂᑦ. ᐊᕐᕌᒍᒋᓂᐅᓴᔭᑦᑎᓐᓂ, ᕿᑭᖅᑕᓂᒃᑯᑦ ᑲᑐᔾᔨᖃᑎᕗᓪᓗ ᑖᒃᑯᐊ ᑕᕆᐅᓕᕆᔩᑦ ᐅᑭᐅᖅᑕᖅᑐᒥ ᒪᕐᕈᐊᑎᕐᓗᑎᒃ ᑲᑎᒪᖃᑎᖃᖃᑦᑕᓛᕐᖓᑕ ᐊᑐᓂᑦ ᕿᑭᖅᑕᓂ ᓄᓇᓕᐅᔪᓂᑦ ᑐᑭᓯᓇᓱᓪᓗᑎᒃ ᖃᓄᖅ ᐃᓱᒪᒋᔭᖃᕐᒪᖔᖅ ᕿᑭᖅᑕᓂ ᒪᑭᒪᔾᔪᑎᔅᓴᓂᑦ. ᑖᒃᑯᐊ ᓄᓇᓕᓐᓂᑦ ᑐᑭᓯᒋᐊᕐᕕᖃᕐᓃᑦ ᐱᔾᔪᑎᖃᓗᐊᓛᖅᑐᑦ ᒪᑯᓂᖓ: 1. ᓴᐳᔾᔨᓂᖅ ᐊᒻᒪᓗ ᐃᓄᓐᓄᑦ ᑐᑭᒧᐊᑦᑎᑕᐅᔪᒥᒃ ᓇᐅᑦᑎᕐᓱᖃᑦᑕᕐᓂᖅ 2. ᐃᓄᐃᑦ ᓇᒻᒥᓂᖅ−ᑐᑭᑖᕈᑎᖃᖃᑦᑕᕐᓗᑎᒃ ᐊᒻᒪᓗ ᐊᐅᓚᑦᑎᓂᖃᕐᓗᑎᒃ 3. ᐃᖃᓗᓕᕆᓂᕐᒧᑦ ᐋᖅᑮᑦᑎᐊᕐᓂᖅ 4. ᓄᓇᐃᑦ ᐱᒻᒪᕆᐅᒋᔭᐅᓗᐊᖅᑐᑦ ᕿᑭᖅᑕᓂ ᓄᓇᓕᐅᔪᓄᑦ ᐃᓄᓐᓄᑦ 5. ᐊᐅᓚᔾᔪᑎᔅᓴᑦ ᐋᖅᑭᓯᒪᔭᕆᐊᓖᑦ ᐊᒻᒪᓗ ᓄᓇᓖᑦ ᐃᓅᓯᖃᑦᑎᐊᓂᕐᒧᑦ ᐃᑲᔪᖅᑕᐅᔾᔪᑎᒋᒋᐊᓕᖏᑦ ᕿᑭᖅᑕᓂᒃᑯᑦ ᓯᕗᓪᓕᕐᒥ ᑲᒪᒋᔭᖃᓛᖅᑐᑦ ᓄᓇᓕᓐᓄᑦ ᐳᓚᕋᓕᖅᑲᑕ ᓴᓂᑭᓗᐊᕐᒨᕐᓗᑎᒃ ᒪᐃ 1ᒥ − ᒪᐃ 4ᒧᑦ, 2023. ᓇᒥᐅᓛᕐᒪᖔᖅ ᓇᓗᓇᐃᖅᑕᐅᔭᕆᐊᓕᒃ. ᐸᕐᓇᓯᒪᒻᒥᔪᑦ ᐳᓚᕋᓛᖅᑐᑎᒃ ᐃᓘᓐᓇᖏᓐᓄᑦ 13ᓄᑦ ᓄᓇᓕᐅᔪᓄᑦ, ᐊᒻᒪᓗ ᐅᓪᓗᖏᑦ ᖃᖓᒃᑰᓛᕐᒪᖔᑕ ᑐᓴᐅᒪᑎᑦᑎᒍᑕᐅᓛᖅᑐᑦ ᓇᓗᓇᐃᖅᑕᐅᑦᑎᐊᑐᐊᖅᑲᑕ.
ᑐᑭᓯᒋᐊᒃᑲᓐᓂᕈᒪᒍᔅᓯ, ᑎᑎᕋᕐᕕᐅᖃᑦᑕᖅᑕ ᐃᕐᖐᓈᖅᑕᐅᑎᒃᑯᑦ ᐅᕗᖓ makimajjutissat@qia.flywheelsites.com, ᑕᑯᓂᐊᖃᑦᑕᕆᔅᓯ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᑎᓐᓄᑦ ᐅᕗᖓ qia.flywheelsites.com/makimajjutissat ᐅᕝᕙᓘᓐᓃᑦ ᓄᓇᔅᓯᓐᓂ ᑐᓴᐅᒪᑎᑦᑎᔨᔅᓯᓐᓄᑦ ᑐᑭᓯᒋᐊᕐᕕᒋᓗᒍ. ᑕᐃᒪᓕ, ᓂᕆᐅᑉᐳᒍᑦ ᑕᑯᓛᕆᐊᔅᓴᖅ ᐃᓕᔅᓯᓐᓂᒃ ᑎᑭᓯᒪᓕᕈᑦᑕ ᑲᑎᒪᖃᑎᖃᕐᓂᕐᒥ.
ᑐᓴᕋᔅᓴᐅᑉ ᒥᔅᓵᓄᑦ ᑐᑭᓯᒋᐊᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ ᑖᓐᓇ:
ᑭᐊᕋᓐ ᕙᓚᕋᑎ
ᑐᑭᒧᐊᑦᑎᑦᑎᔨ, ᑐᑭᒧᐊᒍᑎᔅᓴᓂᑦ ᑐᓴᐅᒪᖃᑦᑕᐅᑎᒍᑎᖃᕐᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ (ᐅ) 867.975.8398 ᐊᑭᖃᙱᑐᒃᑯᓘᓐᓃᑦ ᐅᖓᓯᑦᑐᒥᑦ 1.800.667.2742
kflaherty@qia.flywheelsites.com
