ᕿᑭᖅᑕᓂᒃᑯᑦ ᕿᑭᖅᑕᓂ ᓂᐱᒋᔭᐅᒻᒪᑕ ᓄᓇᕗᒻᒥᐅᓄᑦ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ ᐱᒃᑯᒍᓱᑦᑐᑕᓗ ᐃᖅᑲᓇᐃᔮᕆᕙᑦᑕᑎᓐᓂᒃ ᐱᔪᓐᓇᕐᓯᑎᑕᐅᒋᐊᒃᑲᓐᓂᖁᓪᓗᒋᑦ ᐃᓄᐃᑦ ᐊᒻᒪᓗ ᓴᐳᑎᓗᒍ ᕿᑭᖅᑕᓂ. ᖁᕕᐊᓱᑉᐳᒍᑦ ᓴᖅᑭᑎᑦᑎᔭᕆᐊᔅᓴᖅ ᑐᑭᓯᐅᒪᔾᔪᑎᔅᓴᓕᐊᕆᓯᒪᔭᑦᑎᓐᓂᒃ, ᑖᒃᑯᐊ ᐊᔾᔨᙳᐊᖅᑕᖃᐅᖅᑐᑎᒃ, ᓈᓴᐅᑎᑎᒍᑦ ᑐᑭᓯᐅᒪᔾᔪᑎᔅᓴᖅᑕᖃᖅᑐᑎᒃ, ᑭᓪᓕᓯᓂᐊᕈᑕᐅᓯᒪᔪᓂᓪᓗ ᑎᑎᖅᑲᖅᑕᖃᖅᑐᑎᒃ ᐊᒻᒪᓗ ᑐᑭᓯᑎᑦᑎᒋᐊᕐᓯᒪᓪᓗᑎᒃ ᓄᑖᓂᑦ ᐃᑲᔫᑎᒋᖃᑦᑕᕐᓂᐊᓕᕐᒥᔭᑦᑎᓐᓂᒃ.

 

ᑐᕌᒐᕗᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓯᕗᒧᐊᖅᑎᑦᓯᓂᐊᖅᑐᑦ ᐱᔪᓐᓇᐅᑎᓂ ᐃᑲᔫᓯᐊᒃᓴᓂᓗ ᕿᑭᖅᑕᓂ ᐃᓄᖕᓄᑦ ᐃᒪᓕᐅᕐᓗᑎ ᓴᐳᔾᔨᓗᑎ ᖃᑭᒪᑎᑦᓯᒪᓗᑎᒃ ᐃᓅᓯᕐᓂᑦ, ᒐᕙᒪᓕᕆᓂᕐᓂ, ᐱᕙᓪᓕᐊᔾᔪᑎᒃᓴᖃᖅᑎᑦᓯᓂᕐᒥ ᐊᒻᒪᓗ ᐃᓕᖅᑯᓯᕐᒥ ᐱᔪᒪᔭᐅᔪᓂ; ᓴᐳᔾᔨᓰᓐᓈᕐᓗᑎᒃ ᓄᓇᓂᒃ, ᐃᒪᓂᓗ ᐊᒻᒪᓗ ᓄᓇᒥᓐᖔᖅᑐᓂᒃ ᐊᓐᓇᐅᒪᔾᔪᑎᒋᔭᐅᔪᓄᑦ ᓄᓇᓕᖕᓄᑦ.

ᑕᑯᓐᓇᙳᐊᖅᑕᕗᑦ

ᒐᕙᓕᕆᔾᔪᑎᓂ ᐊᒻᒪᓗ ᐃᓕᖅᑯᓯᕐᒥ ᓴᙱᓕᖅᑎᑦᓯ.

ᐱᓕᕆᐊᒃᓴᖃᕐᓂᖅ

ᕿᑭᖅᑕᓃᒃᑯᑦ 40 ᐅᖓᑖᓄᑦ ᐱᓕᕆᐊᒃᓴᖃᖅᑐᑦ, ᖃᓄᐃᓕᐅᖅᓯᒪᔪᑦ ᐊᒻᒪᓗ ᐊᔭᐅᖅᑐᐃᖃᑦᑕᖅᖢᑎᒃ ᓯᕗᓪᓕᐅᖁᔭᐅᓯᒪᔪᓂ. ᐱᓕᕆᐊᕗᑦ ᐱᖃᓯᐅᑎᓯᒪᔪᖅ ᓯᕗᒧᐊᖅᑎᑦᓯᓂᕐᒥᒃ ᐃᓄᐃᑦ ᐱᔪᒪᔭᖏᓐᓂ, ᖃᑭᒪᑎᑦᓯᓂᖅ ᐃᓄᖕᓄᑦ ᐊᑐᖅᑐᓂ ᐅᒃᐱᕆᔭᖏᓐᓂᓗ ᐊᒻᒪᓗ ᓴᐳᔾᔨᓂᕐᒥᒃ ᐃᓄᐃᑦ ᐱᔪᓐᓇᐅᑎᖏᓐᓂ. ᐱᓕᕆᐊᒃᓴᕆᔭᕗᑦ ᐊᒥᓲᓂᖅᓴᖏᑦ ᑐᒃᓯᕋᕐᕕᐅᔪᓐᓇᖅᑐᑦ ᕿᑭᖅᑕᓂ ᐃᓄᖕᓂᑦ ᑮᓇᐅᔭᖅᑖᕈᓐᓇᖅᖢᑎᒃ ᐱᓕᕆᑎᑦᓯᓗᑎᒃ ᐃᓕᖅᑯᓯᕐᒥᙶᖅᑐᓂᒃ, ᓅᑎᑦᓯᓂᕐᒥ, ᐱᓕᒻᒪᒃᓴᐃᓂᕐᒧᑦ ᐊᒻᒪᓗ ᐸᐃᕆᕕᖕᓂ ᕿᑐᕐᖓᓕᖕᓄᑦ ᐃᑲᔫᑎᓂ. ᕿᑭᖅᑕᓃᒃᑯᑦ ᐱᓕᕆᐊᒃᓴᖏᑦ ᓴᖅᑭᓯᒪᔪᑦ ᑐᓴᖅᑕᐅᓚᐅᖅᓯᒪᔪᓂᒃ ᐱᔭᐅᔪᒪᒧᓂᒃ ᐱᔭᐅᔭᕆᐊᖃᖅᑐᓂᓪᓗ ᕿᑭᖅᑕᓂ ᐃᓄᖕᓂᑦ.

ᕿᑭᖅᑕᓃᒃᑯᑦ ᑎᓕᔭᐅᓯᒪᓪᓗᑎᒃ ᐃᓄᖕᓄᑦ ᑎᒥᖁᑎᒋᔭᐅᔪᑦ ᓄᓇᕗᒥ ᐊᖏᕈᑎᓂᑦ. ᕿᑭᖅᑕᓃᒃᑯᑦ ᐱᖓᓲᔪᓂᑦ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖑᖃᑕᐅᔪᖅ ᐊᑖᓂ ᓄᓇᕗᑦ ᑐᙵᕕᒃᑯᑦ ᑎᒥᖁᑎᖓᓂᑦ; ᐱᖃᑎᖏᑦ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᑦ ᐊᒻᒪ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ.

ᑲᑐᔾᔨᖃᑎᒋᔭᕗᑦ ᑲᑐᔾᔨᖃᑎᒋᑦᓯᐊᖅᐸᒃᑕᕗᑦ, ᓱᕐᓗ ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᐊᒻᒪᓗ ᐃᓄᐃᑦ ᐅᑭᐅᖅᑕᖅᑐᕐᒥᐅᑕᐅᖃᑎᒌᑦ ᑲᑎᒪᔨᖏᑦ, ᐊᒻᒪᓗ ᐊᔾᔨᒌᙱᑦᑐᓂᒃ ᐳᖅᑐᓕᕇᖅᑐᓂᒃ ᒐᕙᒪᐅᔪᓂ, ᑭᒡᒐᖅᑐᖅᖢᒋᑦ ᐃᓄᐃᑦ, ᐃᓄᐃᑦ ᓄᓇᖓᓂ.

20,000ᑲᓴᐅᔪᑦ ᐃᓄᐃᑦ ᓄᓇᖃᖅᑐᑦ ᕿᑭᖅᑕᓂ, 78ᐳᓴᓐᑎᖏᑦ ᐃᓄᓪᓚᕆᐅᓪᓗᑎᒃ. ᕿᑭᖅᑕᓂ ᐃᓄᐃᑦ ᐃᓕᖅᑯᓯᕐᒥᓂ ᐊᑐᑦᓯᐊᖅᑐᑦ ᐊᒃᑐᖅᑕᐅᓯᒪᒐᓗᐊᖅᑎᓪᓗᒋᑦ ᖃᓄᐃᓕᐅᕐᓂᕐᓘᑕᐅᓚᐅᖅᓯᒪᔪᓂᑦ ᑕᐃᔅᓱᒪᓂ, ᐃᓕᖅᑯᓯᕗᑦ ᐅᖃᐅᓯᕗᓪᓗ ᐊᑐᖅᑕᐅᑦᓯᐊᖅᑐᑦ ᓄᓇᓕᖕᓂ. ᐃᓕᖅᑯᓯᕐᒥ ᐅᒃᐱᕆᔭᐅᔪᑦ ᓱᕐᓗ ᐊᒥᖅᑳᕐᓂᕐᒥᒃ ᒥᓇᖅᓯᖃᑦᑕᕐᓂᕐᒥᒃ ᐃᓐᓇᕐᓂ ᐊᒻᒪᓗ ᑲᑐᔾᔨᖃᑎᒌᖕᓂᖅ ᐊᑐᖅᑕᐅᑦᓯᐊᖅᑐᑦ ᐃᓅᓯᕆᔭᐅᔪᓂ ᓄᓇᓕᖕᓂ.

ᙱᓂᖅᑖᖅᑎᑦᓯᕙᒃᑐᒍᑦ ᕿᑭᖅᑕᓂ ᐃᓄᖕᓂᑦ ᐊᑐᓕᖅᑎᑦᓯᖃᑦᑕᖁᓪᓗᒋᑦ ᓇᖕᒥᓂᖅ ᐋᖅᑭᒍᑎᒃᓴᓂ ᐱᐅᓯᒋᐊᕈᑕᐅᓂᐊᖅᑐᒥ ᕿᑭᖅᑕᓂ ᓄᓇᓕᖕᓂᓗ.