ᐃᖃᓗᐃᑦ, ᓄᓇᕗᑦ − ᒫᑦᓯ 6, 2019 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᓴᖅᑭᑎᑦᑎᕗᑦ ᓂᕿᓂᑦ ᐊᐅᓚᑦᑎᔾᔪᑎᖃᕐᓂᕐᒧᑦ ᐊᒻᒪᓗ ᐊᖑᓇᓱᖃᑦᑕᓃᕐᒨᖓᔪᓂᑦ ᐅᓂᒃᑳᓂᑦ ᐱᔾᔪᑎᖃᖅᑐᑎᒃ ᓯᕗᓂᔅᓴᑎᓐᓅᖓᔪᓂᑦ, ᐋᖅᑭᐅᒪᒍᑎᔅᓴᓂᑦ ᐱᓇᓱᐊᕈᑎᖏᓐᓂᒃ ᓄᓇᕗᒥ ᓂᕿᓄᑦ ᐊᑲᐅᙱᓕᐅᕈᑕᐅᖃᑦᑕᖅᑐᓂᑦ.

ᐅᑭᐅᖅᑕᖅᑐᒥ, ᐅᖃᐅᓯᖃᖅᑐᖃᕋᐃᒻᒪᑦ ᓂᖀᑦ ᒥᔅᓵᓄᑦ ᐱᔾᔪᖃᓗᐊᖃᑦᑕᕐᖓᑕ ᓂᕿᓂᑦ ᐊᔪᕐᓴᖃᑦᑕᓂᕐᒥᒃ, ᓴᖅᑭᖅᑕᐅᓂᖏᑦ ᓄᑖᑦ ᑲᓇᑕᒥ ᓂᖀᑦ ᒥᔅᓵᓄᑦ ᐊᑐᐊᒐᐃᑦ ᐱᕕᔅᓴᖅᑖᕈᑕᐅᒻᒪᑦ ᓄᑖᓂᑦ ᐱᓇᓱᐊᕈᑎᔅᓴᓂᑦ ᓂᕿᑦᑎᐊᕙᓕᕆᓂᕐᒧᑦ ᐊᒻᒪᓗ ᓂᕆᖃᑦᑕᓂᕐᒧᑦ ᑲᓇᑕᒥ. ᕿᑭᖅᑕᓂᒃᑯᑦ ᑐᙵᓱᑦᑎᑦᑎᕗᑦ ᑕᒪᑐᒥᖓ ᐊᓯᔾᔨᕐᓂᐅᔪᒥᑦ, ᐃᓚᖃᖅᑐᓂ ᑕᒪᓐᓇ ᑐᑭᓯᐅᒪᓂᕋᕐᓂᕐᒥᒃ ᓄᓇᖓᓐᓂ ᓂᕿᑖᕆᕙᑦᑕᖏᑦ ᐆᒻᒪᑦᑎᐊᕆᓐᓇᖅᑑᔭᕆᐊᔅᓴᖏᓐᓂᒃ ᐃᓕᖅᑯᓯᖅᑎᒍᑦ ᓂᕈᐊᒐᐅᖃᑦᑕᕐᓂᖏᓐᓂᒃ.

“ᓄᓇᕗᑦ ᑕᒪᑐᒥᖓ ᐃᓱᒪᒋᔭᖃᖃᑦᑕᓂᕐᒥᒃ ᐃᓱᒪᑖᖔᕆᐊᖃᕐᖓᑕ ᓂᕿᔅᓴᖃᑦᑎᐊᕆᐊᖃᕐᓂᕐᒥᒃ ᓂᕿᓂᑦ ᐊᐅᓚᑦᑎᒍᑎᖃᕐᓂᖔᒧᑦ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖏᔪᖅᑳᖓᑦ ᐸᐅᓗᓯ ᐊᕿᐊᕈᖅ. “ᐃᒫᒃ ᑐᑭᓕᒃ ᐱᔪᓐᓇᕐᓯᑎᑦᑎᓂᖅ ᐃᓄᓐᓂᑦ ᓂᕆᑎᑦᑎᖃᑦᑕᓂᐊᕐᖓᑕ ᓄᓇᖅᑲᑎᑦᑎᓐᓂᒃ.”

ᐃᓄᓐᓄᑦ, ᐅᑭᐅᖅᑕᖅᑐᒥᐅᓄᑦ, ᐱᖅᑯᓯᖅᑎᒍᑦ ᓂᕆᑦᑎᐊᖃᑦᑕᕐᓂᖅ ᐃᒫᒃ ᑐᑭᖃᕐᖓᑦ ᐱᒻᒪᕆᐅᒋᔭᐅᓗᐊᙳᐊᖅᑐᑎᒃ ᐆᒪᔪᐃᑦ ᐃᖃᓗᐃᓪᓗ ᓂᕿᔅᓴᖅᑖᖑᕙᑦᑐᑦ ᐊᕙᑎᑦᑎᓐᓂ ᓄᓇᓂᑦ ᐃᒫᓂᓪᓗ. ᓄᓇᓕᐅᓕᖅᑐᓄᑦ ᐊᐅᓪᓛᑎᑦᑎᓯᒪᓂᖅ ᑲᓲᒪᒍᑕᐅᒍᓐᓃᕐᓯᒪᒻᒪᑦ ᐊᒥᓱᓄᑦ ᐃᓄᓐᓄᑦ ᐱᖅᑯᓯᖏᓐᓂᒃ ᓂᕿᔅᓴᓂᖃᑦᑕᕈᓯᕐᓂᑦ. ᑕᒪᓐᓇ ᐱᔾᔪᑎᒋᓪᓗᒍ, ᓄᓇᕗᑦ ᐊᔅᓱᕈᕈᑎᖃᕐᖓᑦ ᓂᕿᓂᑦ ᐊᔪᕐᓴᓪᓚᕆᖃᑦᑕᓂᕐᒥᒃ 70 ᐳᓴᓐᑏᑦ ᐅᖓᑖᓃᑦᑐᑦ ᓄᓇᕗᒻᒥᐅᑦ ᓂᕿᓂᑦ ᐊᔪᕐᓴᖃᑦᑕᖅᑐᑎᒃ.

ᓂᕿᓂᑦ ᐊᐅᓚᑦᑎᓕᖅᑲᑕ ᓄᓇᕗᒻᒥ ᐃᒫᒃ ᑐᑭᖃᕐᖓᑦ ᐃᑲᔪᕐᓰᓂᖅ ᓂᕿᔅᓴᓯᐅᖅᑎᐅᕙᑦᑐᓂᑦ, ᐋᖅᑮᒋᐊᒃᑲᓂᕐᓂᖅ ᑲᓲᒪᒍᑕᐅᕙᑦᑐᓂᑦ ᓂᕿᔅᓴᕐᓯᐅᖃᑦᑕᓂᕐᒥᒃ ᐃᓕᖅᑯᓯᖃᕐᓂᕐᒧᑦ, ᐊᒻᒪᓗ ᐱᕙᓪᓕᐊᑎᑦᑎᓗᑎᒃ ᐊᐅᓚᔾᔪᑎᔅᓴᓂᑦ ᐱᑕᖃᕆᐊᓕᓐᓂᑦ ᑕᐃᒫᒃ ᐃᓄᐃᑦ ᐊᐅᓚᑦᑎᒍᓐᓇᕐᓯᓂᐊᕐᖓᑕ ᓄᓇᑦᑎᓐᓂ ᓂᕿᑖᖑᔪᓐᓇᐸᑦᑐᓂᑦ.

ᕿᑭᖅᑕᓂᒃᑯᑦ ᓂᕿᓂᑦ ᐊᐅᓚᑦᑎᔾᔪᑎᖃᕐᓂᕐᒧᑦ ᐊᖑᓇᓱᖃᑦᑕᓂᕐᒨᖓᔪᓪᓗ ᐅᓂᒃᑳᑦ ᑕᑯᑎᑦᑎᒻᒪᑕ ᓄᓇᕗᒻᒥᑦ ᓄᓇᖓᓐᓂ ᓂᖀᑦ ᐊᑐᐃᓐᓇᐅᑦᑎᐊᖃᑦᑕᕐᓂᖏᓐᓂᒃ ᓂᕈᐊᒐᐅᔪᓐᓇᐸᑦᑐᑎᒃ ᐃᓚᒌᓄᑦ ᐊᒻᒪᓗ ᐊᖑᓇᓱᖃᑦᑕᕐᓂᖅ ᐊᑑᑎᖃᖅᑐᓂ ᖃᐅᑕᒫᑦ ᐃᓅᓯᕆᔭᐅᓪᓗᓂ. ᕿᑭᖅᑕᓂᒃᑯᑦ ᑐᕌᒐᓖᑦ ᐃᓄᓕᒫᑦ ᕿᑭᖅᑕᓂ ᓄᓇᓖᑦ ᐋᖅᑭᓯᒪᑦᑎᐊᖅᑐᒥᒃ ᐊᒻᒪᓗ ᓯᕕᑐᔪᒨᖓᔪᒥᒃ ᐊᑐᐃᓐᓇᖃᖁᔨᓪᓗᑎᒃ ᓄᓇᖏᓐᓂ ᐊᖑᓂᑦᑕᐅᕙᑦᑐᓂᑦ ᓂᕿᔅᓴᖅᑖᖑᕙᑦᑐᓂᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᐊᑏ ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᔨᐅᕋHᐃ,

ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᖃᑦᑕᓂᕐᒧᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

szerehi@qia.ca

867.975.8413

1.800.667.2742

ᓂᕿᓂᑦ ᐊᐅᓚᑦᑎᔾᔪᑎᖃᕐᓂᖅ ᐊᒻᒪᓗ ᓂᕿᔅᓴᕐᓯᐅᖃᑦᑕᕐᓂᖅ