ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓴᖅᑭᑎᑦᑎᕗᑦ ᐆᑦᑐᕋᐅᑕᐅᓂᐊᖅᑐᒥᒃ ᓄᓇᓕᓐᓂᑦ ᖃᐅᔨᓴᖃᑦᑕᓂᕐᒧᑦ ᐱᓕᕆᐊᖑᓂᐊᖅᑐᒥᒃ ᒥᑦᑎᒪᑕᓕᒻᒥ.

ᑭᐅᔾᔪᑎᒋᓪᓗᒍ ᓄᓇᓕᓐᓂᑦ ᐃᓱᒫᓘᑕᐅᓯᒪᔪᓄᑦ ᐃᖅᑲᕐᓂᐊᕐᓗᑎᒃ ᖃᐅᔨᓴᖅᑐᖃᑐᐃᓐᓇᕆᐊᖃᕐᓂᖓᓂᒃ ᐊᒻᒪᓗ ᐅᓯᑲᑦᑕᖃᑦᑕᖅᑐᑦ ᐅᒥᐊᕐᔪᐊᑦ ᐊᒥᓱᕈᒃᑲᓂᕐᓂᐊᕆᐊᔅᓴᖏᓐᓂᒃ ᐊᒻᒪᓗ ᓱᕐᕋᐃᒍᓐᓇᕐᓂᖓ ᐊᖑᓇᓱᖃᑦᑕᕐᓂᖏᓐᓂᒃ ᐃᒪᕐᒥᐅᑕᕐᓂᑦ ᐆᒪᔪᓂᑦ, ᑲᑐᔾᔨᖃᑎᒌᒃᑯᑦ ᐃᖅᑲᓇᐃᔭᖅᑎᑦᑎᓂᐊᖅᑐᑦ ᑎᓴᒪᓂᑦ ᐊᕙᑎᓕᕆᓂᕐᒥᒃ/ᓂᕐᔪᑎᓂᑦ ᖃᐅᔨᓴᖃᑦᑕᓂᕐᒥᒃ ᐃᖅᑲᓇᐃᔮᖃᖃᑦᑕᓂᐊᖅᑐᑎᒃ ᓇᓪᓕᑭᑕᖃᑦᑕᕐᓗᑎᒃ ᑕᖅᑮᑦ ᓇᓪᓕᑕᕐᕕᖏᑎᒍᑦ ᐋᖅᑭᓯᒪᓗᑎᒃ.

ᖃᐅᔨᓴᖃᑦᑕᕐᓂᕐᒥ ᓄᐊᑦᑎᖃᑦᑕᓂᐊᖅᑐᑦ ᑐᑭᓯᐅᒪᔾᔪᑎᒋᓂᐊᖅᑕᖏᓐᓂᒃ ᐊᖑᓂᒃᑕᐅᕙᑦᑐᓂᑦ ᐆᒪᒧᓂᑦ ᖃᐅᔨᓴᖃᑦᑕᕐᓗᑎᒃ. ᑲᑎᑦᑎᕙᓪᓕᐊᓂᐊᕐᖓᑕ ᑎᑎᖅᑲᓂᑦ ᑕᑯᓐᓈᖅᑕᖏᑎᒍᑦ ᐊᒻᒪᓗ ᐱᐅᓯᖏᓐᓂᒃ ᖃᐅᔨᖃᑦᑕᕐᓂᖏᑎᒍᑦ ᐊᒻᒪᓗᑦᑕᐅᖅ ᑕᒻᒪᕇᒃᑯᑎᑎᒍᑦ ᑐᑭᓯᖃᑦᑕᕐᓗᑎᒃ ᐅᐊᑦᑎᓗᑎᒃ ᓇᒧᙶᖃᑦᑕᕐᓂᖏᓐᓂᒃ ᐊᒻᒪᓗ ᐊᒥᓲᓂᖏᓐᓂᒃ ᓂᕐᔪᑏᑦ ᐃᓄᓐᓄᑦ ᓂᕿᒋᔭᐅᕙᑦᑐᑦ.

ᖃᐅᔨᓴᖅᑎᐅᖃᑦᑕᓂᐊᖅᑐᑦ ᐊᑭᓕᕐᓱᖅᑕᐅᓗᑎᒃ ᐃᖅᑲᓇᐃᔭᖅᑎᑕᐅᓂᐊᕐᖓᑕ ᐱᓇᓱᐊᕈᓯᑕᒫᑦ ᐊᑭᓕᖅᑕᐅᖃᑦᑕᕐᓗᑎᒃ ᐃᑲᔫᑎᖃᕐᓂᖏᓐᓄᑦ ᐊᑭᓕᕐᓱᖅᑕᐅᖃᑦᑕᕐᓗᑎᒃ ᒑᓯᑖᕈᑎᖏᑦ ᐊᒻᒪᓗ ᓴᓇᔭᐅᖃᑦᑕᕆᐊᖃᕐᓂᖏᑦ ᓱᓇᒃᑯᑖᖏᑕ.

ᐱᓕᕆᐊᖅ ᑮᓇᐅᔭᖃᖅᑎᑕᖅ ᑲᑐᔾᔨᖃᑎᖃᖅᑐᑎᒃ ᓄᓇᕗᒥ ᖃᐅᔨᓴᖃᑦᑕᓂᕐᒧᑦ ᐸᕐᓇᐅᑎᑎᒍᑦ ᐊᒻᒪᓗ ᑕᕆᐅᓕᕆᔨᓂᑦ ᐅᑭᐅᖅᑕᖅᑐᒥ.

ᐃᓘᓐᓇᑎᒃ ᑎᑎᖅᑲᐃᑦ ᐱᔭᐅᔪᑦ ᖃᕋᓴᐅᔭᒃᑯᑦ ᓄᓇᙳᐊᓕᕆᔾᔪᑎᒨᖅᑲᖅᑕᐅᖃᑦᑕᓂᐊᖅᑐᑦ ᑕᖅᑭᑕᒫᑦ ᓄᓇᙳᐊᑦ ᒥᔅᓵᓄᑦ ᐋᖅᑭᔅᓱᐃᔾᔪᑕᐅᖃᑦᑕᓂᐊᕐᖓᑕ ᐊᒻᒪᓗ ᐅᓂᒃᑳᓕᐅᕈᑕᐅᖃᑦᑕᕐᓗᑎᒃ ᖃᓄᐃᑦᑐᑐᐃᓐᓴᕐᓄᑦ ᓄᓇᓖᑦ ᐱᕚᓪᓕᕈᑎᖃᖁᓪᓗᒋᑦ. ᑎᑎᖅᑲᐃᑦ ᐃᑲᔫᑎᖃᕈᓐᓇᕐᖓᑕ ᖃᐅᔨᒃᑲᐃᒍᑕᐅᓗᑎᒃ ᐃᓄᓐᓄᑦ ᑐᑭᑖᕈᑎᖃᖃᑦᑕᓂᐊᖅᑎᓪᓗᒋᑦ ᐊᑐᐊᒐᕐᓂᑦ, ᓂᐱᒋᔭᐅᖃᑦᑕᕐᓂᖏᓐᓄᓪᓗ, ᐊᐅᓚᑦᑎᓂᕐᒧᓪᓗ ᐱᔾᔪᑕᐅᔪᓂᑦ ᐊᑦᑐᐃᓂᖃᕐᐸᑦᑐᓂᑦ ᐃᓄᐃᑦ ᐱᔪᓐᓇᐅᑎᖏᓐᓄᑦ.

ᑲᑐᔾᔨᖃᑎᒌᒃᑯᑦ ᐃᓕᓐᓂᐊᑎᑦᑎᓛᖅᑐᑦ ᓯᕗᓪᓕᕐᓂᑦ ᑎᓴᒪᓂᑦ ᖃᐅᔨᓴᖅᑎᐅᓂᐊᖅᑐᓂᑦ ᓯᕙᑖᕐᕕᒻᒥ, ᒪᐃ 6 ᐊᒻᒪᓗ ᑲᒪᒋᔭᖃᓛᖅᑐᑎᒃ ᐱᓕᕆᓪᓚᑦᑖᕐᓗᑎᒃ ᓈᑏᖑᔭᕐᕕᒻᒥ, ᒪᐃ 7. ᑭᖑᓂᐊᒍᑦ ᖃᐅᔨᓴᖅᑏᑦ ᓄᐊᑦᑎᕙᓪᓕᐊᓯᓛᖅᑐᑦ ᑐᑭᓯᐅᒪᔾᔪᑎᔅᓴᓂᑦ ᐱᓇᓱᐊᕈᓯᑕᒫᑦ. ᐆᑦᑐᕋᐅᑕᐅᓪᓗᓂ ᐱᓕᕆᐊᖅ ᐊᕐᕌᒍᒥ ᐊᑕᐅᓯᕐᒥᒃ ᓈᕆᓂᐊᖅᑐᒋᔭᖅ ᐅᐃᒍᔭᐅᒍᓐᓇᕋᔭᖅᑐᓂ ᒪᓕᓪᓗᒋᑦ ᑮᓇᐅᔭᖃᖅᑎᑕᐅᓂᖏᑦ.

ᐃᖅᑲᐅᒪᓪᓗᒍ ᐊᑦᑕᕐᓇᖅᑐᒦᑎᑦᑎᑕᐃᓕᓂᕐᒧᑦ ᐱᓇᓱᐊᕈᓯᖓ, ᕿᑭᖅᑕᓃᒃᑯᑦ ᖃᐃᖁᔨᓯᒪᓚᐅᕐᒪᑕ ᐅᖃᓪᓚᖕᓂᐊᖅᑐᒥ ᐃᖅᑲᓇᐃᔭᖅᑎᓂ ᐊᑦᑕᕐᓇᖅᑐᒦᑎᑦᑎᑕᐃᓕᓂᕐᒧᑦ ᐊᒻᒪᓗ ᐊᑭᓕᐅᓯᐊᒃᓴᖅᑖᖅᑎᑦᑎᓂᕐᒧᑦ ᑲᒥᓴᖏᓐᓂᑦ ᓯᐊᕐᕆᖃᑦᑕᓂᕐᒥᒃ/ᖁᐊᔭᕿᖃᑦᑕᓂᕐᒥᒃ, ᐹᓪᓚᖃᑦᑕᓂᕐᒥᒃ ᐃᔪᒃᑲᖃᑦᑕᓂᕐᒥᓪᓗ.