ᐃᖃᓗᐃᑦ, ᓄᓇᕗᑦ – ᓄᕕᐱᕆ 14, 2017 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᑲᑐᔾᔨᖃᑎᒌᖏᑦ) ᑲᑐᔾᔨᖃᑎᖃᖅᑐᑎᒃ ᑖᒃᑯᓂᖓ ᐹᕕᓐᓛᓐ ᓴᕕᕋᔭᔅᓴᒥᒃ ᐅᔭᕋᓐᓂᐊᖅᑏᑦ, ᑲᓇᑕᐅᑉ ᒐᕙᒪᒃᑯᖏᑦ, ᓄᓇᕗᑦ ᒐᕙᒪᒃᑯᖏᑦ ᐊᒻᒪᓗ ᑲᑭᕙᒃᑯᑦ ᓴᖅᑭᑎᑦᑎᒻᒪᑕ ᐃᑲᔫᑎᑖᖅᑲᐅᓂᑦ ᐃᓄᓐᓄᑦ ᐃᖅᑲᓇᐃᔭᕐᓂᕐᒧᑦ ᐃᓕᓐᓂᐊᓂᕐᒧᓪᓗ ᑐᕌᖓᔪᓂᑦ.

ᕿᑭᖅᑕᓂ ᐱᓕᒻᒪᔅᓴᐃᓂᕐᒧᑦ ᐃᓕᓐᓂᐊᓂᕐᒧᓪᓗ ᐃᖅᑲᓇᐃᔮᔅᓴᓄᑦ ᑲᑐᔾᔨᖃᑎᒌᒍᑕᐅᔪᖅ (Q-STEP), ᐋᖅᑭᓱᖅᑕᐅᓯᒪᔪᖅ ᐃᖅᑲᓇᐃᔮᖅᑖᖃᑦᑕᖁᓪᓗᒋᑦ ᐃᖅᑲᓇᐃᔮᔅᓴᖃᕆᐊᓖᑦ ᐃᓄᐃᑦ ᐱᔾᔪᑎᒋᓪᓗᒋᑦ. ᑖᓐᓇ ᐃᑲᔫᑎ ᐃᓕᒃᑲᓐᓂᕈᑕᐅᙳᓱᒻᒪᑦ ᕿᑭᖅᑕᓂ ᓄᓇᓕᓐᓂᑦ, ᑲᒪᒋᔭᖃᓗᐊᕐᓂᐊᖅᑐᑎᒃ ᐃᓕᓐᓂᐊᑎᑦᑎᓂᕐᒥᒃ ᐅᔭᕋᓐᓂᐊᕐᓂᓕᕆᕕᒻᒥ, ᑎᓴᒪᓂᑦ ᐊᕐᕌᒍᓂᑦ ᐊᑐᕐᓂᐊᖅᑐᓂ ᒫᑦᓯ 2021ᒥ ᐱᔭᕇᕐᕕᔅᓴᖃᖅᑐᓂ.

ᑲᓇᑕᐅᑉ ᒐᕙᒪᒃᑯᖏᑦ, ᐱᓕᒻᒪᔅᓴᐃᓂᕐᒧᑦ ᐊᒻᒪᓗ ᑲᑐᔾᔨᖃᑎᒌᓐᓂᕐᒧᑦ ᑮᓇᐅᔭᑎᒍᑦ, ᑮᓇᐅᔭᖃᖅᑎᑦᑎᒍᑕᐅᓂᐊᖅᑐᑦ $7.9 ᒥᓕᐊᓐᓂᑦ ᐃᓕᓐᓂᐊᑎᑦᑎᒍᑕᐅᓗᑎᒃ 360ᓂᑦ ᐃᖅᑲᓇᐃᔭᙱᑦᑐᓂᑦ ᐃᓄᓐᓂᑦ ᑖᓐᓇ ᐃᑲᔫᑎ ᐊᖅᑯᑎᒋᓗᒍ. ᐹᕕᓐᓛᓐᑯᑦ ᑮᓇᐅᔭᖃᖅᑎᑦᑎᓂᐊᖅᑐᑦ $9.4 ᒥᓕᐊᓐᓂᑦ ᑮᓇᐅᔭᐅᙱᑦᑐᓂᑦ ᐃᑲᔫᑎᖃᕐᓗᑎᒃ ᑖᔅᓱᒧᖓ ᐃᓕᕆᐊᕐᒧᑦ ᐊᒻᒪᓗ ᑲᑭᕙᒃᑯᑦ ᑮᓇᐅᔭᖃᖅᑎᑦᑎᓂᐊᖅᑐᑦ $1.6 ᒥᓕᐊᓐᓂᑦ ᐃᑲᔫᑎᖃᕐᓗᑎᒃ ᑮᓇᐅᔭᐅᙱᑦᑐᓂᑦ ᑖᔅᓱᒧᖓ ᐱᓕᕆᐊᕐᒧᑦ. ᓄᓇᕗᑦ ᒐᕙᒪᒃᑯᖏᑦ ᐃᑲᔫᑎᖃᕐᓂᐊᖅᑐᑦ ᐊᐅᓚᓂᕐᓄᑦ ᑐᕌᖓᔪᓂᑦ ᑖᔅᓱᒧᖓ ᐃᑲᔫᑎᒧᑦ.

“ᐃᓄᓐᓄᑦ ᐱᓕᕆᔾᔪᑎᔅᓴᖃᖅᑎᑦᑎᓂᖅ ᐊᑐᕆᐊᖃᖃᑦᑕᓂᐊᖅᑕᖏᓐᓂᒃ ᐃᖅᑲᓇᐃᔮᕆᔪᒥᓇᖅᑐᓂᑦ ᐃᖅᑲᓇᐃᔮᖅᑖᖃᑦᑕᖁᓪᓗᒋᑦ ᐊᒻᒪᓗ ᐱᓕᕆᔪᓐᓇᕐᓯᖁᓪᓗᒋᑦ ᑕᒪᓐᓇ ᓯᕗᓪᓕᐸᐅᑦᑎᐅᔾᔭᐅᓯᒪᒻᒪᑦ ᐃᖅᑲᓇᐃᔭᖃᑎᒌᖑᓪᓗᑕ,” ᐅᖃᖅᑐᖅ ᑲᑐᔾᔨᖃᑎᒌᒃᑯᑦ ᐊᖏᔪᖅᑳᖓᑦ, ᐸᐅᓗᓯ ᐊᕿᐊᕈᖅ. “ᐃᓘᓐᓇᑎᒃ ᕿᑭᖅᑕᓂ ᓄᓇᓕᓕᒫᑦ ᐃᓄᐃᑦ ᐊᑑᑎᖃᑦᑎᐊᖅᑐᓂᒃ ᐃᖅᑲᓇᐃᔮᖃᖃᑦᑕᖁᒐᑦᑎᒍ ᐱᓇᓱᐊᒃᑲᓐᓂᕈᑎᒋᖃᑦᑕᓂᐊᖅᑕᖏᓐᓂᒃ, ᐅᓪᓗᒥᓗ ᐃᖅᑲᓇᐃᔮᖑᕙᑦᑐᓂᑦ ᐃᖅᑲᓇᐃᔭᕈᑎᒋᖃᑦᑕᓂᐊᖅᑕᖏᓐᓂᒃ ᐊᒻᒪᓗ ᒪᑭᑕᑦᑎᐊᕈᑎᒋᓂᐊᖅᑕᖏᓐᓂᒃ ᐃᓚᖏᑦ ᐱᔾᔪᑎᒋᓪᓗᒋᑦ.”

ᑲᑐᔾᔨᖃᑎᒌᒃᑯᑦ ᐋᖅᑭᔅᓱᐃᓯᒪᔪᑦ ᐃᓄᓐᓂᑦ ᐃᖅᑲᓇᐃᔭᖅᑎᒋᔭᐅᔪᓐᓇᖅᑐᓂᑦ ᑐᑭᓯᐅᒪᔾᔪᑎᔅᓴᖃᕐᕕᒻᒥᒃ, ᑐᑦᑕᕐᕕᒃ, ᑖᓐᓇ ᑐᑦᑕᕐᕕᓪᓗᐊᑕᐅᖃᑦᑕᓂᐊᖅᑐᖅ ᐃᑲᔫᑎᖃᖃᑦᑕᕐᓗᓂ ᐃᖅᑲᓇᐃᔭᖅᑎᖃᕐᐸᑦᑐᓄᑦ ᕿᓂᖃᑦᑕᑎᓪᓗᒋᑦ ᐃᓄᓐᓂᑦ ᐃᓕᓯᒪᔪᓂᑦ ᐃᖅᑲᓇᐃᔭᖅᑎᔅᓴᓂᑦ ᐅᕝᕙᓘᓐᓃᑦ ᐃᓕᓐᓂᐊᑐᔅᓴᓂᑦ ᐃᓕᓐᓂᐊᕋᔅᓴᖅᑕᖃᖅᑎᓪᓗᒍ.

“ᐹᕕᓐᓛᓐᑯᑦ ᐊᖏᓂᕐᐹᖑᖃᑕᐅᒻᒪᑕ ᓇᒻᒥᓂᕐᓱᖅᑐᑎᒃ ᐃᖅᑲᓇᐃᔭᖅᑎᖃᕐᐸᑦᑐᓂᑦ ᓄᓇᕗᒥ ᐊᒻᒪᓗ ᐊᖏᕐᓯᒪᓪᓗᑎᒃ ᑲᔪᓯᑎᑦᑎᒍᒪᓂᕐᒥᒃ ᐃᖅᑲᓇᐃᔭᖅᑎᖃᖃᑦᑕᓂᕐᒥᒃ ᐃᓕᓐᓂᐊᑎᑦᑎᖃᑦᑕᓂᕐᒥᓪᓗ ᐃᓄᓐᓂᑦ ᕿᑭᖅᑕᓂ ᓄᓇᓕᓐᓂᑦ. ᑖᓐᓇ ᐃᑲᔫᑎ ᐱᓕᕆᐊᖑᓂᐊᖅᑐᖅ ᐃᑲᔫᑎᖃᙳᓱᑦᑐᖅ ᐹᕕᓐᓛᓐᑯᓐᓄᑦ ᐊᒻᒪᓗ ᑲᑐᔾᔨᖃᑎᒋᕙᑦᑕᑎᓐᓄᑦ ᐋᖅᑭᔅᓱᐃᓂᕐᒥᒃ ᓄᑖᓂᑦ ᐃᖅᑲᓇᐃᔮᔅᓴᐅᖃᑦᑕᓂᐊᖅᑐᓂᑦ ᐱᓕᒻᒪᔅᓴᕈᑕᐅᖃᑦᑕᓂᐊᖅᑐᓂᓪᓗ, ᑐᕌᖓᓗᐊᖅᑐᓂᑦ ᐃᓄᓐᓄᑦ ᓄᓘᔮᓂᑦ ᐅᔭᕋᓐᓂᐊᕐᕕᑦᑎᓐᓄᑦ. ᑕᒪᒃᑯᐊ ᐱᓇᓱᐊᕋᔅᓴᐅᓂᐊᖅᑐᑦ ᒪᑯᐊᖑᒻᒪᑕ ᓴᓇᔪᓕᕆᔨᐅᓂᕐᒥᒃ ᐃᓕᓐᓂᐊᕐᓂᖅ ᐊᒻᒪᓗ ᖃᓄᐃᑦᑐᑐᐃᓐᓇᕐᓂᑦ−ᐃᓕᓐᓂᐊᓯᒪᒍᑕᐅᔭᕆᐊᓖᑦ ᓱᓇᒃᑯᑖᓄᑦ ᐊᖁᑎᐅᓂᕐᒧᑦ ᐱᓕᕆᐊᖑᕙᑦᑐᑦ,” ᐅᖃᖅᑐᖅ ᕗᕋᐃᔭᓐ ᐱᐊᓂ, ᐊᖏᔪᖅᑳᖅ ᐊᐅᓚᑦᑎᔨᒻᒪᕆᐅᓪᓗᓂᓗ ᐹᕕᓐᓛᓐ ᓴᕕᕋᔭᔅᓴᒥᒃ ᐅᔭᕋᓐᓂᐊᖅᑎᓂᑦ.

“ᓂᕆᐅᑉᐳᒍᑦ ᐃᖅᑲᓇᐃᔭᖃᑎᖃᖃᑦᑕᕐᓂᐊᕆᐊᔅᓴᖅ ᑲᑐᔾᔨᖃᑎᒋᕙᑦᑕᑎᓐᓂᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ, ᑲᑭᕙᒃ ᑲᑐᔾᔨᖃᑎᒌᖏᓐᓂ, ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓂ ᐋᖅᑭᔅᓱᐃᖃᑦᑕᕐᓂᐊᕋᑦᑕ ᐊᑐᓕᖅᑎᑦᑎᖃᑦᑕᕐᓗᑕᓗ ᓄᑖᓂᑦ ᐃᑲᔫᑎᓂᑦ.”

ᐹᕕᓐᓛᓐᑯᑦ ᓂᕆᐅᑦᑐᑦ ᐃᖅᑲᓇᐃᔭᖅᑎᑖᓛᕆᐊᔅᓴᖅ 25ᓂᑦ ᐃᓄᓐᓂᑦ ᑕᕝᕙᙵᑦ ᐃᓕᓐᓂᐊᕇᖅᑐᓂᑦ ᐃᖅᑲᓇᐃᔮᔅᓴᓄᑦ ᐅᐸᓗᖓᐃᕐᓯᒪᓂᕐᒧᑦ ᐃᓕᓐᓂᐊᓂᕐᒥ. ᓯᕗᓪᓕᐅᔾᔨᖃᑦᑕᓂᐊᖅᑐᑦ ᐃᖅᑲᓇᐃᔭᖅᑎᑖᖃᑦᑕᓂᕐᒥᒃ ᕿᑭᖅᑕᓂ ᐱᓕᒻᒪᔅᓴᐃᓂᕐᒧᑦ ᐃᓕᓐᓂᐊᓂᕐᒧᓪᓗ ᐃᖅᑲᓇᐃᔮᔅᓴᓄᑦ ᑲᑐᔾᔨᖃᑎᒌᒍᑕᐅᔪᒥ ᐃᓕᓐᓂᐊᕐᓯᒪᔪᓂᑦ.

ᑲᑐᔾᔨᖃᑎᒌᒍᑕᐅᔪᒥ ᑐᕌᒐᐃᑦ:

• ᐊᒥᓱᕈᒃᑲᓐᓂᖁᓪᓗᒋᑦ ᐃᓄᐃᑦ ᐃᖅᑲᓇᐃᔭᖅᑎᐅᕙᑦᑐᑦ ᓄᓘᔮᓂᑦ ᐅᔭᕋᓐᓂᐊᕐᕕᒻᒥ
• ᐋᖅᑭᔅᓱᐃᓗᑎᒃ ᐱᔨᑦᑎᕋᐅᑎᖃᕐᓗᑎᓪᓗ ᐃᓕᓐᓂᐊᕈᑎᔅᓴᓂᑦ ᐃᖅᑲᓇᐃᔭᙱᑦᑐᓄᑦ ᐃᓄᓐᓄᑦ, ᑐᕌᖓᓗᐊᖅᑐᓂᑦ ᐊᕐᓇᓄᑦ ᐃᓅᓱᑦᑐᓄᓪᓗ.
• ᐃᓄᓐᓂᑦ ᓇᓗᓇᐃᒃᑯᑕᖅᑖᕈᑕᐅᖃᑦᑕᓂᐊᖅᑐᓂᑦ ᐊᒻᒪᓗ ᐊᓯᖏᓐᓄᑦ ᐊᑐᖃᑦᑕᕈᓐᓇᓂᐊᖅᑕᖏᓐᓂᒃ ᐱᓕᒻᒪᔅᓴᐃᖃᑦᑕᕐᓗᑎᒃ ᐃᓕᑎᑦᑎᖃᑦᑕᕐᓗᑎᓪᓗ ᐃᖅᑲᓇᐃᔮᖅᑖᕋᓱᐊᖃᑦᑕᕈᓐᓇᓂᐊᕐᖓᑕ ᐊᓯᖏᓐᓂᒃ ᐃᖅᑲᓇᐃᔮᔅᓴᓂᑦ ᓴᖅᑭᖅᑕᐅᓯᒪᔪᓂᑦ.
• ᓴᓇᓗᑎᒃ ᐃᓄᐃᑦ ᐃᖅᑲᓇᐃᔭᖅᑎᐅᕙᑦᑐᑦ ᒥᔅᓵᓄᑦ ᑐᑭᓯᒋᐊᕈᑎᖃᕐᕕᒻᒥᒃ (ᑐᑦᑕᕐᕕᒃ) ᐃᑲᔫᑎᖃᖃᑦᑕᓂᐊᖅᑐᒥᒃ ᐃᖅᑲᓇᐃᔭᖅᑎᖃᕐᐸᑦᑐᓄᑦ ᕿᓂᖅᑎᓪᓗᒋᑦ ᐃᓕᓐᓂᐊᕐᓯᒪᔪᓂᑦ ᐃᓄᓐᓂᑦ ᐃᖅᑲᓇᐃᔭᖅᑎᔅᓴᓂᑦ.

ᐅᔾᔨᕐᓇᓗᐊᕐᓂᖏᑦ ᐃᓕᓐᓂᐊᑎᑦᑎᒍᑕᐅᖃᑦᑕᓂᐊᖅᑐᓂᑦ ᑖᓐᓇ ᐊᖅᑯᑎᒋᓪᓗᒍ ᑲᑐᔾᔨᖃᑎᒌᒍᑕᐅᔪᖅ

• ᐃᖅᑲᓇᐃᔮᔅᓴᓄᑦ ᐅᐸᓗᖓᐃᕐᓯᒪᓂᕐᒥᒃ ᐃᓕᓐᓂᐊᕐᓂᖅ
• ᐅᖁᒪᐃᑦᑐᓕᕆᔾᔪᑎᓂᑦ ᐊᖁᑎᐅᓂᕐᒥᒃ ᐃᓕᓐᓂᐊᕐᓂᖅ
• ᓴᓇᔪᓕᕆᔨᐅᓂᕐᒥᒃ ᐃᖅᑲᓇᐃᔮᖃᓛᕐᓂᐊᓂᕐᒧᑦ ᐃᓕᓐᓂᐊᕐᓂᖅ
• ᐅᔭᕋᓐᓂᐊᕐᕕᒻᒥ ᐃᖅᑲᓇᐃᔭᕐᕕᐅᔭᕆᐊᖃᓲᓂᑦ ᐊᒻᒪᓗ ᐃᓘᓐᓇᖏᓐᓅᖓᔪᓂᑦ ᐃᓕᓐᓂᐊᕐᓂᖅ

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᓯᐅᕋHᐃ

ᐊᖏᔪᖅᑳᖅ ᑐᓴᐅᒪᖃᑦᑕᐅᑎᓂᕐᒧᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

E:szerehi@qia.ca

Ph:(867) 975.8413

Ph:1.800.667.2742