(ᐃᖃᓗᐃᑦ, ᓄᓇᕗᑦ, ᐄᐳᓗ 26, 2017) – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᓇᓱᐊᕈᒪᒐᔭᖅᑐᓂᑦ ᐱᓇᓱᐊᖁᔨᓕᕐᒥᒻᒪᑕ 2017-2018ᒥ ᔮᓐ ᐊᒪᕈᐊᓕᒃ ᐃᓕᓐᓂᐊᕈᓯᐊᔅᓴᓂᑦ ᐃᓕᓐᓂᐊᕈᓯᐊᔅᓴᑦ ᐅᐱᒍᓲᑕᐅᓪᓗᑎᒃ ᐱᓇᓱᐊᕈᑎᒋᖃᑦᑕᕐᓯᒪᔭᖏᓐᓂᒃ ᔮᓐ ᐊᒪᕈᐊᓕᐅᑉ ᐃᓅᓯᖃᑦᑎᐊᑲᓐᓂᖁᓪᓗᒋᑦ ᐃᓄᐃᑦ ᓄᓇᕗᒥᐅᑕᐃᑦ.

“ᐃᓕᓐᓂᐊᕈᓯᐊᔅᓴᑦ ᐅᕙᓐᓄᑦ ᐃᑲᔫᑎᖃᓪᓚᕆᓚᐅᖅᑐᑦ,” ᐅᖃᖅᑐᖅ ᓂᐅᒪ ᑳᒃᔅ, ᐊᕐᕌᓂ ᐃᓕᓐᓂᐊᕈᓯᐊᖅᑖᓚᐅᕐᓯᒪᔪᖅ.

ᑳᒃᔅ ᑐᖏᓕᐊᓂ ᐊᕐᕌᒍᒥ ᐃᓕᓐᓂᐊᓕᖅᑐᖅ ᐊᕙᑎᓕᕆᓂᕐᒥ ᐃᓕᓐᓂᐊᓂᕐᒥ ᐅᑭᐅᖅᑕᖅᑐᒥ ᓯᓚᑦᑐᓴᕐᕕᒻᒥ, ᐅᖃᖅᑐᖅ ᑲᑐᔾᔨᖃᑎᒌᒃᑯᓐᓂ ᐃᓕᓐᓂᐊᕈᓯᐊᖅᑖᕆᓚᐅᖅᑕᖏᑦ ᐃᓕᓐᓂᐊᖏᓐᓇᕈᑎᒋᔪᓐᓇᓚᐅᕐᖓᒋᑦ.

“ᐃᓕᓐᓂᐊᕈᑎᓐᓄᑦ ᐊᖑᒻᒪᑎᑦᑎᐊᕈᑎᒋᖃᑦᑕᓚᐅᖅᑕᒃᑲ ᐃᑲᔫᑎᖃᖅᑐᑎᒃ ᐸᐃᕆᔨᖃᕐᓂᕐᒧᑦ ᐊᑭᓕᕐᓱᐃᔾᔪᑎᒋᒋᐊᓕᓐᓄᑦ ᐊᒻᒪᓗ ᐃᓕᓴᕕᒻᒥ ᓱᓇᒃᑯᑖᕆᒃᑲᓐᓂᕆᐊᓕᓐᓄᑦ ᐊᒻᒪᓗ ᑭᓱᑐᐃᓐᓇᕐᓄᑦ ᐊᑐᕆᐊᓕᓐᓄᑦ ᐃᓕᓐᓂᐊᑕᕐᓂᒃ.”

ᔮᓐ ᐊᒪᕈᐊᓕᒃ ᐃᓕᓐᓂᐊᕈᓯᐊᔅᓴᑦ ᐱᓇᓱᐊᕋᔅᓴᐅᒻᒪᑕ ᓄᓇᑖᖃᑕᐅᓯᒪᔪᓄᑦ ᐃᓕᓐᓂᐊᖅᑎᓄᑦ ᕿᑭᖅᑕᓂ ᓄᓇᓕᓐᓂᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᕐᓂᐅᓴᔪᓄᑦ. ᑲᑐᔾᔨᖃᑎᒌᒃᑯᑦ ᓯᕗᓪᓕᐸᐅᑦᑎᐅᔾᔨᖃᑦᑕᓂᐊᖅᑐᑦ ᐱᓇᓱᐊᕈᑕᐅᓯᒪᔪᓂᑦ ᓯᓚᑦᑐᓴᕐᕕᒻᒧᑦ ᐃᓕᓐᓂᐊᕆᐊᕐᓂᐊᖅᑐᓄᑦ ᐃᓄᐃᑦ ᐅᖃᐅᓯᖓᓐᓂᒃ ᐃᓕᖅᑯᓯᖓᓐᓂᓪᓗ ᐊᑐᖅᑎᑦᑎᒋᐊᒃᑲᓐᓂᕈᑕᐅᓂᐊᖅᑐᓂᑦ.

ᐊᕐᕌᒍᑕᒫᑦ ᐃᓕᓐᓂᐊᕈᓯᐊᖅᑖᖑᖃᑦᑕᓂᐊᖅᑐᑦ $5,000.00. ᑖᓐᓇ ᒪᑐᕕᔅᓴᓕᒃ ᐋᒡᒌᓯ 18, 2017.

“ᐃᓕᓐᓂᐊᕈᓯᐊᔅᓴᑦ ᐱᕈᕐᐸᓪᓕᐊᑎᑕᐅᔪᑦ ᓯᕗᓂᔅᓴᑎᓐᓄᑦ ᕿᑭᖅᑕᓂ ᐃᓄᓐᓄᑦ ᑐᕌᖓᓪᓗᑎᒃ,” ᐅᖃᖅᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ ᐊᖏᔪᖅᑳᖅ ᐸᐅᓗᓯ ᐊᕿᐊᕈᖅ.

“ᐃᓕᓐᓂᐊᕐᓂᖅ ᐊᖅᑯᑕᐅᒻᒪᑦ ᒪᑭᑕᑦᑎᐊᕈᑕᐅᓂᐊᖅᑐᓂ ᐃᓅᓱᑦᑐᖁᑎᑦᑎᓐᓄᑦ ᐊᒻᒪᓗ ᑲᑐᔾᔨᖃᑎᒌᒃᑯᓐᓂ ᐃᑲᔪᖃᑦᑕᕈᒪᒻᒥᒐᑦᑕ ᐃᓅᓱᑦᑐᖁᑎᑦᑎᓐᓂ ᑐᕌᒐᖏᓐᓄᑦ ᑎᑭᐅᑎᑎᑦᑎᖃᑦᑕᓂᕐᒥᒃ.”

ᒪᓕᒐᐅᖃᑦᑕᓂᐊᖅᑐᑦ ᔮᓐ ᐊᒪᕈᐊᓕᒃ ᐃᓕᓐᓂᐊᕈᓯᐊᔅᓴᓄᑦ ᐱᓇᓱᐊᕐᓂᕐᒧᑦ:

• ᐱᓇᓱᐊᖅᑐᑦ ᓄᓇᕗᑦ ᑐᙵᕕᒃᑯᓐᓂ ᐃᓚᒋᔭᐅᔾᔪᑎᖃᕆᐊᓖᑦ ᐊᒻᒪᓗ ᓄᓇᑖᖃᑕᐅᓯᒪᓗᑎᒃ ᓄᓇᕗᒥ ᐊᖏᕈᑎᓄᑦ ᕿᑭᖅᑕᓂ ᓄᓇᓕᓐᓂᑦ.
• ᐃᓕᓐᓂᐊᖅᑏᑦ ᐊᑎᓕᐅᕐᓯᒪᔭᕆᐊᓖᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑎᐅᓗᑎᒃ, ᐃᓕᓐᓂᐊᕐᓗᑎᓪᓗ ᐃᓕᓐᓂᐊᕐᓗᑎᒃ ᐊᑐᖅᑎᑦᑎᒋᐊᒃᑲᓂᕐᓂᕐᒥᒃ ᐃᓄᐃᑦ ᐅᖃᐅᓯᖓᓐᓂᒃ ᐃᓕᖅᑯᓯᖓᓐᓂᓪᓗ ᓯᑎᐱᕆᒥ ᔮᓐᓄᐊᓕᒥᓗ ᐱᒋᐊᕐᕕᖃᖅᑐᑎᒃ ᐃᓕᓐᓂᐊᕐᕕᐅᕙᑦᑑᓐᓂᒃ.
• ᐃᓕᓐᓂᐊᖅᑏᑦ ᐊᖑᒻᒪᑎᑎᑦᑎᐊᕆᐊᓖᑦ ᐃᓕᓐᓂᐊᖅᑕᓕᒫᖏᓐᓂᒃ ᐊᒻᒪᓗ ᐊᖑᒻᒪᑎᑎᑦᑎᑎᐊᕐᓗᑎᒃ ᖁᕝᕙᓯᓐᓂᕆᒋᐊᓕᖏᓐᓄᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᐊᑏ ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᓯᐅᕋHᐃ,

ᐊᖏᔪᖅᑳᖅ ᑐᓴᐅᒪᖃᑦᑕᐅᑎᓂᕐᒧᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

szerehi@qia.ca

(867) 975.8413

1.800.667.2742