ᐃᖃᓗᐃᑦ, ᓄᓇᕗᑦ − ᓯᑎᐱᕆ 4, 2019 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᒫᓐᓇ ᑐᓂᓯᔭᐅᖃᑦᑕᕈᓐᓇᓯᒻᒥᔪᑦ ᑐᔅᓯᕋᐅᑎᓂᑦ 2019-2020 ᓯᓚᑦᑐᓴᕐᕕᒻᒥ ᐃᓕᓐᓂᐊᓂᕐᒧᑦ ᐃᓕᓐᓂᐊᕈᓯᐊᔅᓴᓄᑦ. ᑕᒫᓂ ᐊᕐᕌᒍᒥ ᑕᕝᕙᓂᔅᓴᐃᓐᓈᖅᑐᓂᑦ ᐊᑐᕋᔅᓴᐅᑎᐊᖅᑐᓂᑦ ᖃᕋᓴᐅᔭᒃᑯᑦ ᑐᔅᓯᕋᐅᑎᓂᑦ ᑎᑎᕋᕐᕕᔅᓴᓂᑦ ᐃᓘᓐᓇᖏᓐᓂᒃ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᖁᑎᒋᕙᑦᑕᑎᓐᓂᒃ.

ᐱᖓᔪᒋᓕᕐᖓᒍ ᐊᕐᕌᒍᒥ ᕿᑭᖅᑕᓂᒃᑯᑦ ᐃᑲᔫᓯᐊᔅᓴᖃᖅᑎᑦᑎᓂᕐᒥᒃ $200,000ᓂᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓂᑦ ᐃᓚᓕᐅᑎᓯᒪᓪᓗᑎᒃ ᒫᓐᓇ $5,000/ᐊᕐᕌᒍᑕᒫᑦ ᔮᓐ ᐊᒪᕈᐊᓕᒃ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᖁᑎᒋᕙᑦᑕᖏᓐᓄᑦ. 80 ᕿᑭᖅᑕᓂᒃᑯᓐᓂ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᑦ $2,500/ᐊᕐᕌᒍᒫᑦ, ᑐᓂᔭᐅᕙᒻᒪᑕ ᓯᕗᓪᓕᕐᐹᑐᐃᓐᓇᕐᓄᑦ−ᑐᔅᓯᕋᐅᓯᐅᕐᐸᑦᑐᓄᑦ ᐃᓕᓐᓂᐊᖅᑎᓄᑦ ᕿᑭᖅᑕᓂ ᓄᓇᓕᓐᓃᙶᕐᓯᒪᔪᓄᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᙳᓱᑦᑐᓄᑦ.

$5,000 ᔮᓐ ᐊᒪᕈᐊᓕᒃ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᑦ ᐅᐱᒍᓲᑕᐅᕙᒻᒪᑕ ᐱᓇᓱᐊᕈᑎᒋᓯᒪᔭᖏᓐᓂᒃ ᔮᓐ ᐊᒪᕈᐅᓕᐅᑉ ᐃᓅᓯᖃᑦᑎᐊᖁᓪᓗᒋᑦ ᐃᓄᐃᑦ ᓄᓇᕗᒻᒥᐅᑕᐃᑦ. ᕿᑭᖅᑕᓂᒃᑯᑦ ᓯᕗᓪᓕᐸᐅᑦᑎᐅᔾᔨᖃᑦᑕᓂᐊᖅᑐᑦ ᑐᔅᓯᕋᐅᑎᓂᑦ ᓯᓚᑦᑐᕐᓴᕕᒻᒥ ᐃᓕᓐᓂᐊᖅᑎᐅᓂᐊᖅᑐᓄᑦ ᐊᑐᖅᑎᑦᑎᒋᐊᒃᑲᓐᓂᕈᑕᐅᓂᐊᖅᑐᓄᑦ ᐃᓄᐃᑦ ᐅᖃᐅᓯᖓᓐᓂᒃ ᐃᓕᖅᑯᓯᖓᓐᓂᓪᓗ.

ᐊᑐᕐᓗᒍ ᖃᕋᓴᐅᔭᒃᑯᑦ ᕿᑭᖅᑕᓂᒃᑯᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓄᑦ ᑐᔅᓯᕋᐅᓯᐅᕈᑎᖓ, ᐃᓕᓐᓂᐊᖅᑏᑦ ᑐᔅᓯᕋᐅᓯᐅᖃᑦᑕᕈᓐᓇᖅᑐᑦ ᓇᓪᓕᐊᓐᓄᑐᐃᓐᓇᖅ ᐅᕝᕙᓘᓐᓃᑦ ᑕᒪᒃᑮᓐᓄᒃ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓂᑦ. ᖃᐅᔨᒪᑦᑎᐊᓂᐊᖅᑯᓯ, ᑐᓂᓯᓂᐊᕈᔅᓯ ᑐᔅᓯᕋᐅᒻᒥᑦ ᐃᓘᓐᓇᑎᒃ ᐱᖃᓯᐅᑎᓯᒪᔭᕆᐊᓖᑦ ᐃᑲᔫᑎᓖᑦ ᑎᑎᖅᑲᐃᑦ ᐱᖃᓯᐅᔾᔭᐅᒋᐊᖃᕋᔭᕐᒥᒻᒪᑕ.

“ᕿᑭᖅᑕᓂᒃᑯᓐᓂ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᖁᑎᕗᑦ ᐱᕙᓪᓕᐅᑎᑎᑦᑎᓪᓚᕆᖃᑦᑕᖅᑐᑦ ᐃᓅᓯᖏᓐᓂᒃ ᕿᑭᖅᑕᓂ ᓄᓇᓖᑦ ᐃᓕᓐᓂᐊᖅᑏᑦ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖏᔪᖅᑳᖓᑦ ᐸᐅᓗᓯ ᐊᕿᐊᕈᖅ, “ᐃᑲᔪᕐᐸᑦᑐᑦ ᐃᓅᓱᑦᑐᓂᑦ ᐊᑭᑦᑐᐸᓪᓕᐊᖏᓐᓇᑎᓪᓗᒋᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᕈᑕᐅᕙᑦᑐᑦ ᐃᑲᔫᑎᖃᕐᐸᑦᑐᑦ ᐊᑭᓕᐅᑕᐅᕙᑦᑐᑎᒃ ᐅᖃᓕᒫᒐᕐᓄᑦ ᐊᓯᖏᓐᓄᓪᓗ ᐱᓕᕆᔾᔪᑕᐅᔭᕆᐊᖃᕐᐸᑦᑐᓄᑦ ᐃᓕᓐᓂᐊᕐᓂᖏᓐᓂ.”

ᒪᑐᕕᔅᓴᖓ ᑐᔅᓯᕋᐅᓯᐅᕐᓂᕐᒧᑦ ᓇᒡᒐᔾᔭᐅ, ᓯᑎᐱᕆ 30, 2019.

ᒪᓕᑦᑕᐅᖃᑦᑕᕆᐊᓖᑦ ᐃᓘᓐᓇᖏᓐᓄᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᖅᑖᕋᓲᑎᓄᑦ:

• ᑐᔅᓯᕋᖅᑐᑦ ᐊᑐᖅᑐᒥᒃ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ ᐃᓚᒋᔭᐅᔾᔪᑎᖃᕆᐊᓖᑦ ᐊᒻᒪᓗ ᐃᓅᓗᑎᒃ ᓄᓇᕗᑦ ᐊᖏᖃᑎᒌᒍᑎᖏᑦ ᒪᓕᓪᓗᒋᑦ ᕿᑭᖅᑕᓂ ᓄᓇᓕᓐᓂᑦ ᓄᓇᖃᕐᓗᑎᒃ

• ᐃᓕᓐᓂᐊᖅᑏᑦ ᓄᓇᖃᓪᓚᑦᑖᕆᐊᓖᑦ ᓇᓕᑐᐃᓐᓇᖏᓐᓂ 13ᓂᑦ ᕿᑭᖅᑕᓂ ᓄᓇᓕᖏᓐᓂ − ᐊᖏᓚᐅᖃᑦᑕᕋᓗᐊᕐᒥᔪᑦ ᐃᓕᓐᓂᐊᖅᑎᓂᑦ ᐊᓯᖏᓐᓂᑦ ᓄᓇᓕᓐᓂᑦ ᐊᑎᓕᐅᖅᑕᐅᓯᒪᑎᓪᓗᒋᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑎᐅᓂᖏᓐᓂ

• ᑐᓂᓯᖃᑦᑕᕆᐊᓖᑦ ᓇᓗᓇᐃᒃᑯᑕᕐᒥᒃ ᐃᓕᓐᓂᐊᖅᑎᐅᖃᑕᐅᓂᐊᕐᓂᖓᓂᒃ ᓯᓚᑦᑐᓴᕐᕕᒻᒥ

• ᐃᖅᑲᓇᐃᔭᖅᑐᕐᓯᐅᑎᖓᑕ ᓈᓴᐅᑖ

ᒪᓕᑦᑕᐅᖃᑦᑕᕆᐊᓖᑦ ᐃᓚᒃᑲᓐᓂᖏᑦ ᔮᓐ ᐊᒪᕈᐊᓕᒃ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓅᖓᔪᑦ:

• ᐃᓕᓐᓂᐊᖅᑏᑦ ᐊᑎᓕᐅᖅᑕᐅᓯᒪᔭᕆᐊᓖᑦ ᓯᓚᑦᑐᓴᕐᕕᒻᒥ, ᐃᓕᓐᓂᐊᕐᓂᐅᓴᓗᑎᓪᓗ ᐊᑐᖅᑎᑦᑎᒋᐊᒃᑲᓐᓂᕈᑕᐅᓂᐊᖅᑐᒥᒃ ᐃᓄᑦᑎᑐᑦ ᐅᖃᐅᓯᕐᒥᒃ ᐃᓕᖅᑯᓯᕐᒥᓪᓗ ᓯᑎᐱᕆᒥ ᔮᓐᓄᐊᓕᒥᓗ ᐃᓕᓐᓂᐊᕐᓇᐅᓛᖅᑑᓐᓂᒃ

• 500ᓂᑦ−ᐅᖃᐅᓯᖅᑕᓕᒻᒥᒃ ᑎᑎᕋᕐᓯᒪᓗᓂ ᐱᔾᔪᑎᖃᕐᓗᓂ ᖃᓄᖅ ᑲᔪᓯᑎᒍᒪᒐᔭᙳᐊᖅᑕᑎᑦ ᐱᓇᓱᐊᕈᑎᒋᒍᒪᓕᓚᐅᕐᒪᖔᕐᐱᒋᑦ ᔮᓐ ᐊᒪᕈᐊᓕᒃ ᐊᒻᒪᓗ ᓄᓇᕗᑦ ᐊᖏᖃᑎᒌᒍᑎᖏᑦ ᐱᔾᔪᑎᒋᓪᓗᒋᒃ

• ᒫᓐᓇᓕᓴᕐᒥᒃ ᐱᔪᒐᕐᓴᐅᑎᓐᓂᒃ

• ᓇᓕᖅᑲᖏᓐᓂᒃ ᒫᓐᓇᓕᓴᕐᓂᑦ ᐃᓕᓐᓂᐊᕈᑎᒥᓂᕐᐱᑦ ᓇᓕᖅᑲᖏᓐᓂᒃ

• ᒪᕐᕉᓐᓂᒃ ᑐᑭᓯᑎᑦᑎᒋᐊᕈᑏᓐᓂᒃ ᑎᑎᖅᑳᓐᓂᒃ ᐃᕝᕕᑦ ᐃᓕᓴᐃᔨᒥᓂᖓᓂᒃ, ᓯᓚᑦᑐᓴᕐᕕᒻᒥ ᐃᓕᓴᐃᔨᖓᓂᒃ ᐅᕝᕙᓘᓐᓃᑦ ᐃᖅᑲᓇᐃᔭᕐᕕᒥᓂᕐᓂᑦ ᐃᓕᓐᓂᒃ ᖃᐅᔨᒪᑦᑎᐊᖅᑐᒥᒃ

• ᐃᓕᓐᓂᐊᖅᑏᑦ ᐋᖅᑭᐅᒪᑎᑦᑎᑦᑎᐊᕆᐊᓖᑦ ᐃᓘᓐᓇᖏᓐᓂᒃ ᐃᓕᓐᓂᐊᕈᑎᖏᓐᓂᒃ ᐊᒻᒪᓗ ᖄᖐᓯᒪᓗᑎᒃ ᖁᕝᕙᓯᓐᓂᖏᓐᓂᒃ ᐊᑐᖅᑕᐅᒐᔪᑉᐸᑦᑐᓂᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᖅᑖᕈᓐᓇᕈᒪᓂᐊᖅᑲᑕ.

ᖃᕋᓴᐅᔭᒃᑯᑦ ᑐᔅᓯᕋᐅᓯᐅᕈᑦ ᐅᕙᙵᑦ ᐊᑐᖅᑕᐅᔪᓐᓇᖅᑐᖅ: https://www.qia.ca//iu/%E1%91%90%E1%94%85%E1%93%AF%E1%95%8B%E1%90%85%E1%91%8F%E1%91%A6-%E1%90%83%E1%93%95%E1%93%90%E1%93%82%E1%90%8A%E1%93%82%E1%95%90%E1%92%A7%E1%91%A6-%E1%90%83%E1%91%B2%E1%94%AB%E1%93%AF%E1%90%8A%E1%94%85/?fbclid=IwAR1UaiTDBeuQxG99njax-4RTEQ7zhVmtBcNABMiqJ1rb0rUTCL86wLRrJBo

ᐃᓕᓐᓂᐊᖅᑏᑦ ᐃᑲᔪᖅᑕᐅᔭᕆᐊᖃᖅᑲᑕ ᐱᔭᕇᕐᓯᓂᕐᒥᒃ ᑲᑐᔾᔨᖃᑎᒌᒃᑯᓐᓂ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓄᑦ ᑐᔅᓯᕋᐅᑎᓂᑦ, ᐅᖃᕐᕕᖃᕈᓐᓇᖅᑐᑦ ᑲᑐᔾᔨᖃᑎᒌᒃᑯᑦ ᓄᓇᓕᓐᓂᑦ ᑐᓴᐅᒪᑎᑦᑎᔨᖏᓐᓂᒃ.

ᑐᑭᓯᒋᐊᕈᒪᒍᔅᓯ ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᔨᐅᕋHᐃ,

ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

szerehi@qia.ca

867.975.8413 ᐅᕝᕙᓘᓐᓃᑦ

1.800.667.2742