ᐃᖃᓗᐃᑦ, ᓄᓇᕗᑦ − ᔮᓐᓄᐊᓕ 9, 2019 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᖁᕕᐊᓱᑉᐳᑦ ᐱᒋᐊᖅᑎᑦᑎᔭᕆᐊᔅᓴᖅ ᐃᓄᒃᑎᑐᑦ ᐃᓚᒌᓄᑦ ᐅᖃᓕᒫᖃᑦᑕᕈᑎᔅᓴᓂᑦ ᐱᓇᓱᐊᕈᑎᑖᖅᑲᐅᖓᓐᓂᒃ ᐃᓚᒋᔭᐅᓪᓗᓂ ᐃᐱᑎᑭ ᐱᓕᕆᐊᖓᓐᓄᑦ.

ᐃᓚᒌᓄᑦ ᐅᖃᓕᒫᖃᑦᑕᕈᑎᔅᓴᓂᑦ ᐱᓇᓱᐊᕈᑎᖓᑦ ᐱᔾᔪᑎᓕᒃ ᐃᓄᒃᑎᑑᕐᓂᕐᓴᐅᖃᑦᑕᖁᓪᓗᒋᑦ ᐊᖏᕐᕋᖏᓐᓂ, ᑕᒪᕐᒥᒃ ᓱᕈᓰᑦ ᕿᑐᕐᖓᓖᓪᓗ/ᐸᐸᑦᑎᕙᑦᑐᓪᓗ ᖁᕕᐊᓱᐊᓗᑎᒃ ᐱᓕᕆᖃᑎᒌᖃᑦᑕᓂᐊᕐᖓᑕ ᐃᓕᑉᐸᓪᓕᐊᓯᓐᓈᕐᓗᑎᒃ ᐃᓄᒃᑎᑐᑦ ᐅᖃᐅᓯᕐᓂᑦ ᖃᐅᔨᔭᕆᐅᕐᐸᓪᓕᐊᔭᖏᓐᓂᒃ ᐊᒻᒪᓗ ᐅᖃᖅᑕᐅᔾᔪᓯᖏᓐᓂᒃ. ᑖᓐᓇ ᓄᑖᖅ ᐱᓕᕆᐊᖑᓂᐊᖅᑐᖅ ᐱᒋᐊᖅᑎᑕᖅ ᐃᑲᔪᖅᑎᖃᖅᑐᑎᒃ ᓄᓇᕗᑦ ᒐᕙᒪᒃᑯᖏᓐᓂ ᐃᓕᓐᓂᐊᕐᓂᓕᕆᔨᒃᑯᓐᓂᑦ, ᐊᒻᒪᓗ ᐃᓚᖃᖅᑐᑎᒃ ᐱᓇᓱᐊᕈᑎᔅᓴᓕᐊᖑᓯᒪᔪᓂᑦ ᐃᑲᔪᖅᑎᖃᖅᑐᑎᒃ ᐅᖃᓕᒫᒐᓕᐅᖅᑎᐅᕙᑦᑐᓂᑦ Inhabit Media−ᑯᓐᓂᒃ.

“ᖁᕕᐊᒋᓪᓚᕆᑦᑕᕋ ᑖᓐᓇ ᐱᓕᕆᐊᖅ ᐱᔾᔪᑎᒋᓪᓗᒍ ᓯᕗᒧᐊᑦᑎᑦᑎᒍᑕᐅᕙᓪᓕᐊᒻᒪᑦ ᕿᑭᖅᑕᓂᒃᑯᑦ ᑲᑦᑐᖓᐃᕐᓯᒪᒍᑎᖓᓐᓂᒃ ᓱᕈᓯᓛᓂᑦ ᐃᓕᓐᓂᐊᕆᐅᕐᓴᑎᑦᑎᖃᑦᑕᓂᕐᒧᑦ ᐊᒻᒪᓗ ᐱᓪᓚᑦᑖᓂᑦ ᐱᓕᕆᔾᔪᑎᔅᓴᖃᕈᑕᐅᓂᐊᖅᑐᓂ ᐃᓚᒌᓄᑦ ᐃᓄᒃᑎᑑᖃᑦᑕᕐᓂᖅ ᐊᑐᖅᑕᐅᑦᑎᐊᖏᓐᓇᖁᓪᓗᒍ ᐊᖏᕐᕋᖏᓐᓂ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖓᔪᖅᑳᖓᑦ, ᐸᐅᓗᓯ ᐊᕿᐊᕈᖅ.

ᑕᒫᓂ ᐊᕐᕌᒍᒥ, ᐊᑐᓂᑦ ᒥᑭᔫᑕᐅᓂᕐᐹᓂᑦ ᐃᓕᓐᓂᐊᖅᑏᑦ ᕿᑭᖅᑕᓂ ᓄᓇᓕᓐᓂᑦ ᑐᓂᔭᐅᓂᐊᖅᑐᑦ ᐃᓚᒌᓄᑦ ᐅᖃᓕᒫᖃᑦᑕᕈᑎᔅᓴᓂᑦ, ᒪᑯᐊᖑᓂᐊᖅᑐᑎᒃ:

• ᐃᐱᑎᑭ ᓇᖕᒪᒃ
• ᐱᓕᕆᔾᔪᑎᔅᓴᐃᑦ ᐅᖃᓕᒫᒐᕋᓛᑦ
• ᖃᐅᑕᒫᑦ ᐱᓕᕆᔾᔪᑎᔅᓴᐃᑦ ᐸᐃᑉᐹᒦᑦᑐᑦ
• ᐃᓄᒃᑎᑐᑦ ᑎᑎᖅᑲᓕᕆᔾᔪᑏᑦ
• ᕿᓪᓕᖅᑐᒦᑦᑐᑦ ᐃᓄᒃᑎᑑᖓᔪᑦ ᓱᕈᓯᕐᓄᑦ ᐃᙱᐅᓰᑦ
• ᐊᖏᕐᕋᒥᐅᑕᐃᑦ ᒥᔅᓵᓄᑦ ᓂᐱᑎᒐᐃᑦ
• ᐃᓄᒃᑎᑑᖓᔪᑦ ᐅᖃᓕᒫᒐᑦ

ᕿᑭᖅᑕᓂᒃᑯᑦ ᐃᐱᑎᑭ ᐱᓕᕆᐊᖓᑦ ᐱᔾᔪᑎᖃᓗᐊᖅᑐᑦ ᐱᓕᕆᐊᔅᓴᓂᑦ ᐃᑲᔫᑎᖃᕐᓂᐊᖅᑐᓂᑦ ᓱᕈᓯᓛᕐᓂᑦ ᐃᓕᓐᓂᐊᕆᐅᕐᓴᑎᑦᑎᖃᑦᑕᓂᕐᒧᑦ ᐊᒻᒪᓗ ᐸᐃᕆᕕᓕᕆᓂᕐᒧᑦ ᑐᕌᖓᔪᓂᑦ ᕿᑭᖅᑕᓂ ᓄᓇᓕᓐᓂᑦ. ᐊᓯᖏᑦ ᐃᐱᑎᑭ−ᒥ ᐱᓕᕆᐊᔅᓴᑦ ᑲᒪᒋᔭᐅᓂᐊᖅᑐᑦ ᑕᒫᓂ ᐊᕐᕌᒍᒥ ᐅᑯᐊᖑᕗᑦ: ᐊᐅᓚᑦᑎᓂᕐᒧᑦ ᐃᓕᓐᓂᐊᕐᓂᖅ ᐸᐃᕆᕕᓐᓄᑦ ᑲᑎᒪᔨᓄᑦ, ᐸᐃᕆᕕᒻᒥ ᐊᐅᓚᑦᑎᔩᑦ ᑲᑎᒪᓂᖓᑦ, ᐊᒻᒪᓗ ᐃᓄᑐᖃᐃᑦ ᐸᐃᕆᕕᓐᓅᖅᑎᑕᐅᖃᑦᑕᓂᐊᕐᓂᖏᑦ ᐆᑦᑐᕋᐅᑕᐅᓗᓂ ᐱᓕᕆᐊᖑᓂᐊᖅᑐᖅ.

ᐃᐱᑎᑭ ᐱᓕᕆᐊᖅ ᑲᔪᓯᒍᓐᓇᕐᓯᓯᒪᔪᖅ ᑮᓇᐅᔭᖅᑖᕐᓯᒪᓪᓗᑎᒃ ᒪᑭᒋᐊᖅᑕ ᐃᓄᓐᓂᑦ ᐃᓕᓐᓂᐊᑎᑦᑎᖃᑦᑕᓂᕐᒧᑦ ᑎᒥᖓᓐᓂ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᔨᐅᕋHᐃ, ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

szerehi@qia.ca

867.975.8413

1.800.667.2742