ᓄᓇᒥ ᐱᓱᑦᑎᓂᑦ ᐊᕙᑎᓕᕆᓂᕐᒧᑦ ᐱᔭᕆᐊᑭᓪᓕᑎᑦᑎᔩᑦ ᐊᒻᒪᓗ ᑕᕆᐅᕐᒥ ᐊᕙᑎᓕᕆᓂᕐᒧᑦ ᐱᔭᕆᐊᑭᓪᓕᑎᑦᑎᔩᑦ ᖃᐅᔨᓴᕐᐸᑦᑐᑦ ᓱᕐᕋᐃᕙᓪᓕᐊᓂᖏᓐᓂᒃ ᐹᕕᓐᓛᓐᑯᓐᓂ ᓄᓘᔮᓂᑦ ᐅᔭᕋᓐᓂᐊᕐᓂᖓᑕ ᕿᑭᖅᑖᓘᑉ ᐅᐊᓐᓇᖓᓂ ᑲᑎᒪᒻᒪᑕ ᑕᒫᓂ ᐱᓇᓱᐊᕈᓯᕐᒥ ᐋᑐᕚᒥ.

ᐱᔭᕆᐊᑭᓪᓕᑎᑦᑎᔩᑦ ᖃᐅᔨᓇᓱᑉᐸᑦᑐᑦ ᐱᔾᔪᑕᐅᕙᑦᑐᓂᑦ ᓲᕐᓗ ᑕᕆᐅᕐᒥᐅᑕᕐᓂᑦ ᑎᒻᒥᐊᓂᑦ ᖃᐅᔨᓴᖃᑦᑕᓂᕐᒥᒃ ᓲᕐᓗ ᐊᑉᐸᐃᑦ, ᑎᕋᑎᕌᑦ, ᑭᒡᒐᕕᐊᕐᔪᐃᑦ, ᑲᖑᐃᑦ ᐊᒻᒪᓗ ᑕᕆᐅᕐᒥᐅᑕᐃᑦ-ᒥᑏᑦ. ᒥᑦᑎᒪᑕᓕᐅᑉ ᕿᑭᖅᑖᓗᐊ, ᑖᓐᓇ ᐅᐊᓐᓇᖓᓃᑦᑐᖅ ᐃᓱᐊᓂ ᕿᑭᖅᑖᓗᒻᒥ, ᐊᒥᓲᓂᕐᐹᓄᑦ ᐃᕙᕕᐅᕙᒻᒪᑦ ᑲᙳᕐᓄᑦ ᑲᓇᑕᒥ ᐅᑭᐅᖅᑕᖅᑑᑉ ᐅᐊᓐᓇᕐᐸᓯᐊᓂ.

ᑕᕆᐅᕐᒥᐅᑕᕐᓂᑦ ᑎᒻᒥᐊᓂᑦ ᖃᐅᔨᓴᖃᑦᑕᓲᖑᒻᒪᑕ ᓇᒥᑐᐃᓐᓇᓕᒫᑦᑎᐊᖅ ᓄᓘᔮᓕᕆᓂᐅᑉ ᐊᕙᑖᓂ ᐃᓚᒋᔭᐅᕙᑦᑐᓂ ᐊᑐᕆᐊᖓ ᐅᔭᕋᓐᓂᐊᕐᕕᒻᒨᖓᔪᖅ, ᐅᔭᕋᓐᓂᐊᕐᕕᒻ, ᕿᙳᐊᓂ ᐅᓯᓕᕐᓱᐃᕕᒻᒥ ᐅᔭᕋᑦᑕᐸᑦᑕᖏᓐᓂᒃ.

ᑖᒃᑯᐊ ᑲᑐᔾᔨᖃᑎᒌᑦ ᑲᒪᒋᔭᖃᖃᑦᑕᕐᒥᔪᑦ ᐊᓪᓚᙳᐊᓂᑦ ᖃᐅᔨᓴᖃᑦᑕᓂᕐᒥᒃ Bruce Head-ᒥ ᖃᓂᒋᔭᖓᓂ ᕿᙳᐊᑕ. ᖃᐅᔨᓴᖃᑦᑕᓲᑦ ᒪᕐᕈᐊᑎᖅᑐᑎᒃ ᐊᕐᕌᒍᑕᒫᑦ, ᐊᑕᐅᓯᐊᖅᑐᑎᒃ ᐅᐱᕐᖔᒃᑯᑦ ᓯᑯᐃᕋᑖᒥᓂᐅᑎᓪᓗᒍ ᐅᒥᐊᕐᔪᐊᑦ ᑎᑭᓚᐅᖅᑎᓐᓇᒋᑦ ᓱᓕ ᐊᒻᒪᓗ ᐊᑕᐅᓯᐊᒃᑲᓂᖅᑐᑎᒃ ᐊᐅᔭᒃᑯᑦ ᐅᒥᐊᕐᔪᐊᑦ ᐅᓯᓕᕐᓱᐃᓕᖅᑎᓪᓗᒋᑦ ᓴᕕᕋᔭᔅᓴᓂᑦ. ᖃᐅᔨᓴᖃᑦᑕᕐᓂᖅ ᖃᐅᔨᓴᕈᑕᐅᕙᑦᑐᖅ ᐊᒥᓱᓂᑦ ᑕᕆᐅᕐᒥᐅᑕᕐᓂᑦ ᐆᒪᔪᓂᑦ ᐊᒻᒪᓗ ᖃᓄᖅ ᐱᐅᓯᖃᖃᑦᑕᕐᒪᖓᑕ ᐅᓯᑲᑦᑕᐸᑦᑐᑦ ᐱᓕᕆᓂᖏᓐᓄᑦ.

ᒪᕐᕉᒃ ᐊᕙᑎᓕᕆᓂᕐᒧᑦ ᐱᔭᕆᐊᑭᓪᓕᑎᑦᑎᔩᒃ ᑲᑎᒪᖃᑦᑕᓲᑦ ᒪᕐᕈᐊᑎᖅᑐᑎᒃ ᐊᕐᕌᒍᑕᒫᑦ ᑲᒪᒋᔭᖃᕐᓂᐊᕐᖓᑕ ᐱᓕᕆᓂᕆᕙᑦᑕᖏᓐᓂᒃ. ᓯᕗᓪᓕᕐᐹᒥ, ᑕᒫᓂ ᐅᑭᐊᔅᓵᖑᓂᐊᖅᑐᒥ, ᐱᔭᕆᐊᑭᓪᓕᑎᑦᑎᔩᑦ ᑲᑎᒪᓛᖅᑐᑦ ᓄᓘᔮᓂᑦ ᑕᑯᔪᓐᓇᓂᐊᕐᖓᑕ ᐱᓕᕆᓂᐅᔪᒥᒃ.

ᓄᓇᒥ ᐱᓱᑦᑎᓄᑦ ᐱᔭᕆᐊᑭᓪᓕᑎᑦᑎᔩᑦ ᑲᑎᒪᔨᖏᑦ ᐅᑯᓇᙶᕐᓯᒪᔪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᒥᑦᑎᒪᑕᓕᒻᒥ ᐆᒪᒧᕐᓂᐊᑎᒃᑯᑦ, ᐹᕕᓐᓛᓐ ᓴᕕᕋᔭᔅᓴᒥᒃ ᐅᔭᕋᓐᓂᐊᖅᑏᑦ, ᐊᕙᑎᓕᕆᔩᑦ ᐊᒻᒪᓗ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ ᐱᓕᕆᔩᑦ ᑲᓇᑕᒥ, ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ. ᓄᓇᕐᔪᐊᕐᒥ ᐆᒪᔪᓕᕆᓂᕐᒧᑦ ᑮᓇᐅᔭᖃᖅᑎᑦᑎᔩ – ᑲᓇᑕᒥ ᓈᓚᒋᐊᖅᑐᕐᓯᒪᒍᓐᓇᐸᑦᑐᑦ.

ᑕᕆᐅᕐᒥ ᐊᕙᑎᓕᕆᓂᕐᒧᑦ ᐱᔭᕆᐊᑭᓪᓕᑎᑦᑎᔩᑦ ᑲᑎᒪᔨᖏᑦ ᐅᑯᓇᙶᕐᓯᒪᔪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᒥᑦᑎᒪᑕᓕᒻᒥ ᐆᒫᔪᕐᓂᐊᑎᒃᑯᑦ, ᐹᕕᓐᓛᓐ ᓴᕕᕋᔭᔅᓴᒥᒃ ᐅᔭᕋᓐᓂᐊᖅᑏᑦ, ᐃᒪᕐᒥᐅᑕᓕᕆᔨᒃᑯᑦ, ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ, ᐊᕙᑎᓕᕆᔩᑦ ᐊᒻᒪᓗ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ ᐱᓕᕆᔩᑦ ᑲᓇᑕᒥ, ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ. ᓄᓇᕐᔪᐊᕐᒥ ᐆᒪᔪᓕᕆᓂᕐᒧᑦ ᑮᓇᐅᔭᖃᖅᑎᑦᑎᔩ – ᑲᓇᑕᒥ ᓈᓚᒋᐊᖅᑐᕐᓯᒪᒍᓐᓇᐸᑦᑐᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑭᒡᒐᑐᖅᑕᐅᕙᑦᑐᑦ ᑖᒃᑯᓇᓂ ᑲᑎᒪᓂᕐᓂᑦ ᒪᕐᕉᓐᓄᒃ ᐃᖅᑲᓇᐃᔭᖅᑏᓐᓄᒃ ᐊᒻᒪᓗ ᒪᕐᕉᓐᓄᒃ ᐱᔭᕆᐊᑐᔪᓕᕆᓂᕐᒧᑦ ᐅᖃᐅᔾᔨᒋᐊᖅᑏᓐᓄᒃ.