ᐃᖃᓗᐃᑦ, ᓄᓇᕗᑦ, ᒪᐃ 31, 2022 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ (ᕿᑭᖅᑕᓃᒃᑯᑦ) ᑲᑎᒪᔨᖏᑦ ᑲᑎᒪᒻᒪᑕ ᐃᖃᓗᓐᓂ ᑕᕝᕙᓂ ᐱᓇᓱᐊᕈᓯᑦᑎᓐᓂ ᐊᖅᓴᖅᓃᑦ ᑐᔪᕐᒥᕕᐅᑉ ᑲᑎᒪᕐᔪᐊᖅᕕᖓᓂ.
ᒪᕐᕉᓕᖅᑲᖓᔪᓂᑦ ᐅᖃᐅᓯᖃᓛᖅᑐᑦ ᐊᐅᓪᓚᖅᑐᑎᑦ ᐋᓐᓂᐊᕕᓕᐊᖅᐸᑦᑐᓂᑦ ᐊᒻᒪᓗ ᖃᖓᑕᓲᑦ ᖃᖓᒃᑯᑦ ᑎᑭᖃᑦᑕᕐᓂᕆᕙᑦᑕᖏᓐᓂᑦ ᑕᕝᕙᓂ ᐱᓇᓱᐊᕈᓯᑦᑎᓐᓂ, ᑖᒃᑯᐊ ᕿᑭᖅᑕᓃᒃᑯᑦ ᑲᑎᒪᔨᖏᑦ ᐱᓕᕆᖃᑎᖃᕋᓱᐊᖏᓐᓇᕐᒪᑕ ᓄᓇᕗᑦ ᒐᕙᒪᖓᓂᑦ ᐊᓯᖏᓐᓂᓪᓗ ᑎᒥᐅᔪᓂᑦ ᐱᕚᓪᓕᖅᑎᒐᓱᐊᖅᑐᒍ ᕿᑭᖅᑕᓂ ᐊᕕᑦᑐᖅᓯᒪᓂᖓ ᖃᐅᔨᒪᑦᑎᐊᕋᓱᐊᖅᑐᑎᒃ ᐱᔨᑦᑎᕋᐅᑎᐅᔪᑦ ᐃᓄᓐᓄᑦ ᓈᒻᒪᒋᔭᒃᓴᐅᒐᓗᐊᕐᒪᖔᑕ.
ᐅᐊᑦᓯᐊᕈᒃᑲᓐᓂᑦ ᑕᕝᕙᓂ ᐅᓪᓛᕐᒥ, ᕿᑭᖅᑕᓃᒃᑯᑦ ᑲᑎᒪᔨᖏᑦ ᖃᓄᐃᓕᖓᓕᕐᒪᖔᑕ ᓇᓗᓇᐃᖅᑐᐃᕕᐅᓂᐊᖅᑐᑦ ᓄᓇᕗᑦ ᒐᕙᒪᖓᑕ ᐋᓐᓂᐊᖅᑕᐃᓕᓕᕆᓂᕐᒧᑦ ᒥᓂᔅᑕᖓᓄᑦ, ᔮᓐ ᒪᐃᓐ, ᐅᖃᐅᓯᖃᕐᓗᓂ ᐱᕙᓪᓕᐊᓂᕆᓯᒪᔭᖏᓐᓂᑦ ᓴᖅᑭᖅᐸᓪᓕᐊᓯᒪᔪᓂᓪᓗ ᐋᓐᓂᐊᕕᓕᐊᖅᑐᓂᑦ ᐊᐅᓪᓚᖅᑐᓕᕆᓂᕐᒥ ᕿᑭᖅᑕᓂ.
ᖃᐅᑉᐸᑦ, ᕿᑭᖅᑕᓃᒃᑯᑦ ᑲᑎᒪᔨᖏᑦ ᖃᓄᐃᓕᖓᓕᕐᒪᖔᑕ ᓇᓗᓇᐃᖅᑐᐃᕕᐅᓛᖅᑐᑦ ᑲᓇᐃᑎᐊᓐ−ᓄᐊᑦᑯᓐᓂᑦ ᐅᖃᐅᓯᖃᕐᓗᑎᒃ ᐱᔭᕆᐊᑐᔪᖅᓯᐅᕐᓂᐅᕙᑦᑐᓂᑦ ᐃᓄᓐᓄᑦ ᓄᓇᖏᓐᓂ ᐱᓪᓗᒋᑦ ᖃᖓᒃᑯᑦ ᖃᖓᑕᓲᒧᑦ ᑎᑭᑕᐅᖃᑦᑕᕐᓂᖏᑦ ᐊᒻᒪᓗ ᑭᓱᑐᐃᓐᓇᐃᑦ ᑎᑭᑎᑕᐅᒐᓱᐊᖅᑎᓪᓗᒋᑦ ᓄᓇᓕᓐᓄᑦ ᖃᖓᑕᓲᒃᑯᑦ.
ᑕᒪᒃᑮᒃ ᖃᓄᐃᓕᖓᓕᕐᒪᖔᑕ ᓇᓗᓇᐃᖅᑐᐃᓃᒃ ᑲᑎᒪᔨᓄᑦ ᑭᒃᑯᑐᐃᓐᓇᕐᓄᑦ ᒪᑐᐃᖓᓛᖅᑐᑦ ᐊᒻᒪᓗ ᑕᑯᒃᓴᐅᑦᑕᐅᑎᒋᓗᑎᒃ ᕿᑭᖅᑕᓃᒃᑯᑦ ᖃᕋᓴᐅᔭᒃᑯᑦ ᐳᓚᐅᑎᕕᖓᓂ ᐸᐃᔅ−ᕗᒃᒥ ᐊᒻᒪᓗ ᔫᒻ−ᑯᑦ ᖃᕋᓴᐅᔭᒃᑯᑦ ᑲᓱᖅᕕᒃᓴᐅᒋᓪᓗᑎᒃ ᐃᓄᒃᑎᑐᑦ ᐊᒻᒪᓗ ᖃᓪᓗᓈᑎᑐᑦ ᑕᑯᒃᓴᐅᔪᑦ.
ᑲᑎᒪᔾᔪᑎᒃᓴᐃᑦ ᑕᕝᕙᓂ ᐱᓇᓱᐊᕈᓯᕐᒥ ᑲᑎᒪᔪᓄᑦ ᐊᑐᖅᑕᐅᓂᐊᖅᑐᑦ ᓱᓕ ᑕᑯᔪᒪᒍᒃᓯᐅᒃ, ᖃᕋᓴᐅᔭᒃᑯᑦ ᐃᑭᐊᖅᑭᕕᑦᑎᓐᓄᑦ ᐳᓛᕆᐊᕈᓐᓇᖅᑐᓯ ᐅᕙᓂ qia.flywheelsites.com .
ᐱᕙᓪᓕᐊᔪᓕᕆᔩᑦ ᖃᐅᔨᒋᐊᕈᒪᑉᐸᑕ, ᐅᓇ ᖃᐅᔨᒃᑲᖅᑕᐅᔪᓐᓇᖅᑐᖅ:
ᕿᐊᕋᓐ ᕙᓚᕋᑎ,
ᑐᑭᒧᐊᒍᑎᒃᓴᓄᑦ ᑐᓴᐅᒪᖃᑦᑕᐅᑎᓕᕆᓂᕐᒧᑦ ᑐᑭᒧᐊᖅᑎᑦᑎᔨ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(ᐅᖄᓚᐅᑖ) 867.975.8398 ᐅᕝᕙᓘᓐᓃᑦ ᐊᑭᖃᓐᖏᑐᒃᑯᑦ 1.800.667.2742
