(ᔪᓚᐃ 26, 2017 – ᐃᖃᓗᐃᑦ, ᓄᓇᕗᑦ) – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᐱᒍᓱᑉᐳᑦ ᑐᑭᑖᕈᑕᐅᕋᑖᖅᑐᒥᒃ ᐃᖅᑲᖅᑐᐃᕕᔾᔪᐊᕐᒥ ᑲᓇᑕᒥ ᓇᓗᓇᐃᕐᓯᓪᓗᑎᒃ ᐱᔪᓐᓇᐅᑎᖓᓐᓂᒃ ᐃᓄᐃᑦ ᑐᑭᓯᒋᐊᕐᕕᐅᑦᑎᐊᖃᑦᑕᕆᐊᖃᕐᓂᖏᓐᓂᒃ ᐊᒻᒪᓗ ᐅᐱᒍᓱᑉᐳᑦ ᑲᖏᖅᑐᒑᐱᒻᒥᐅᑦ Hᐊᒪᓚᒃᑯᖏᓐᓂᒃ ᐊᒻᒪᓗ ᐊᖑᓇᓱᑦᑐᓕᕆᔨᒃᑯᖏᓐᓂᒃ ᑐᑭᑖᕈᑕᐅᑦᑎᐊᕐᓂᖓᓂᒃ ᐃᖅᑲᖅᑐᐃᕕᒃᑰᑎᑦᑎᒍᑎᒋᓚᐅᖅᑕᖓ ᔫᓂ 2014ᒥ ᑐᑭᑖᕈᑎᖃᓚᐅᕐᓯᒪᑎᓪᓗᒋᑦ ᑲᓇᑕᒥ ᐆᒻᒪᖅᑯᓯᕆᓂᕐᒧᑦ ᑲᑎᒪᔩᑦ ᐃᖅᑲᕐᓂᐊᕐᓗᑎᒃ ᖃᐅᔨᓴᕈᓐᓇᕐᓂᕋᐃᓂᕐᒥᒃ ᐅᖅᓱᐊᓗᔅᓴᓂᑦ ᒑᓯᔅᓴᓂᓪᓗ.

ᐃᖅᑲᖅᑐᐃᕕᔾᔪᐊᑉ ᑲᓇᑕᒥ ᑐᑭᑖᕈᑎᖓ ᐊᑐᕈᓐᓃᑎᑦᑎᕗᖅ 2015ᒥ ᑐᑭᑖᕈᑎᒋᔪᔭᖓᓐᓂᒃ ᒐᕙᒪᑐᖃᒃᑯᑦ ᐃᖅᑲᖅᑐᐃᕕᖓᑕ ᐊᔪᐃᓐᓇᕆᐊᒃᑲᓐᓂᕈᑕᐅᕙᑦᑐᓄᑦ ᓈᓚᒍᒪᔪᙱᒻᒪᑕ Hᐊᒪᓚᒃᑯᑦ ᐊᖑᓇᓱᑦᑐᓕᕿᔨᒃᑯᓪᓗ ᐃᖅᑲᖅᑐᐃᕕᒃᑰᑎᑦᑎᒍᑎᖓᑕ ᐆᒻᒪᖅᑯᓯᕆᓂᕐᒧᑦ ᑲᑎᒪᔩᑦ ᑐᑭᑖᕈᑎᒥᓂᖓᑕ ᒥᔅᓵᓄᑦ. ᐊᑐᕈᓐᓃᖅᑎᑕᐅᑎᓪᓗᒍ 2015ᒥ ᑐᑭᑖᕈᑕᐅᓚᐅᕐᓯᒪᔪᖅ, ᑲᓇᑕᒥ ᐃᖅᑲᖅᑐᐃᕕᔾᔪᐊᖅ ᑐᑭᓯᓇᕐᓯᑎᑦᑎᕗᑦ ᒪᓕᒐᖅᑎᒍᑦ ᐊᑐᖅᑕᐅᒐᔪᑦᑐᒥᒃ ᐊᒻᒪᓗ ᐊᑐᖅᑕᐅᖃᑦᑕᕆᐊᓕᓐᓂᑦ ᑐᑭᓯᒋᐊᕐᕕᖃᖃᑦᑕᓂᕐᒥᒃ ᓄᓇᖃᖅᑐᑐᖃᐅᔪᓂᑦ ᓄᓇᓕᓐᓂᑦ.

“ᑖᓐᓇ ᑐᑭᑖᕈᑎᖓ ᑲᓇᑕᒥ ᖁᕝᕙᓯᓐᓂᕐᐹᑉ ᐃᖅᑲᖅᑐᐃᕕᐅᑉ ᓇᓗᓇᐃᕈᑕᐅᕗᖅ ᑲᑐᔾᔨᖃᑎᒌᒃᑯᑦ ᐋᖅᑭᐅᒪᔾᔪᑎᖓᓂᒃ ᑕᐃᒪᙵᑦ ᐱᒋᐊᓚᐅᕐᓯᒪᒻᒪᑕ, ᐃᓄᐃᑦ ᑐᑭᓯᒋᐊᕐᕕᐅᑦᑎᐊᕆᐊᖃᕐᓯᒪᒻᒪᑕ ᐃᖅᑲᕐᓂᐊᕐᓗᑎᒃ ᖃᐅᔨᓴᖅᑐᖃᓚᐅᙱᓐᓂᖓᓂ ᓄᓇᑦᑎᓐᓂ,” ᐅᖃᖅᑐᖅ ᑲᑐᔾᔨᖃᑎᒌᒃᑯᑦ ᐊᖏᔪᖅᑳᖓᑦ ᐸᐅᓗᓯ ᐊᕿᐊᕈᖅ.

ᑲᑐᔾᔨᖃᑎᒌᒃᑯᑦ ᐊᑲᕐᓴᖐᓐᓇᖃᑦᑕᓚᐅᕐᖓᑕ ᑲᓇᑕᒥ ᐆᒻᒪᖅᑯᓯᕆᓂᕐᒧᑦ ᑲᑎᒪᔨᓂᑦ, ᓴᓇᕕᓕᕆᔨᓄᑦ ᐊᒻᒪᓗ ᒐᕙᒪᒃᑯᓐᓂ ᑭᒡᒐᖅᑐᐃᔨᓄᑦ ᐱᔾᔪᑎᒋᓪᓗᒍ ᑐᑭᓯᒋᐊᕐᕕᖃᑦᑎᐊᕐᓯᒪᙱᓗᐊᕐᓂᖏᓐᓂᒃ ᐃᓄᓐᓂᑦ ᑲᒪᒋᔭᐅᔪᓐᓇᓂᐊᕐᖓᑕ ᐃᓄᐃᑦ ᐃᓱᒫᓘᑎᖏᑦ ᐱᔾᔪᑎᒋᓪᓗᒍ ᐃᖅᑲᕐᓂᐊᕐᓂᖅ ᖃᐅᔨᓴᕐᓗᑎᒃ.

ᑮᓇᐅᔭᓂᑦ ᐃᑲᔫᑎᖃᓚᐅᕐᓯᒪᓪᓗᑎᒃ ᒪᓕᒐᓕᕆᔾᔪᑎᓄᑦ ᐊᑭᓕᐅᑎᔅᓴᓂᑦ ᑲᖏᖅᑐᒑᐱᒻᒥᐅᓄᑦ ᐅᖃᐅᓯᔅᓴᖏᓐᓂᓪᓗ ᑐᓴᖅᑕᐅᑎᑦᑎᕙᑦᑐᑎᒃ ᒪᓕᒐᓕᕆᔾᔪᑕᐅᑎᓪᓗᒍ ᑐᑭᓯᒋᐊᕐᕕᖃᑦᑎᐊᕆᐊᖃᕐᓂᖏᑕ ᒥᔅᓵᓄᑦ, ᑲᑐᔾᔨᖃᑎᒌᒃᑯᑦ ᐃᑲᔪᕐᓰᖏᓐᓇᓚᐅᖅᑐᑦ Hᐊᒪᓚᒃᑯᓐᓂ ᐊᖑᓇᓱᑦᑐᓕᕆᔨᒃᑯᓂᓪᓗ ᑕᒪᓐᓇ ᑲᒪᒋᔭᐅᓂᖓᓂ.

ᐊᒻᒪᓗᑦᑕᐅᖅ, ᑲᑐᔾᔨᖃᑎᒌᒃᑯᑦ ᐳᓚᕋᖃᑦᑕᓚᐅᖅᑐᑦ ᐃᓕᓐᓂᐊᑎᑦᑎᕙᑦᑐᑎᓪᓗ ᓄᓇᓕᓐᓂᑦ ᐱᔾᔪᑕᐅᔪᓂᑦ ᓄᐊᑦᑎᕙᓪᓕᐊᓂᐊᕐᖓᑕ ᐃᓱᒪᒋᔭᖏᓐᓂᒃ ᐃᓄᐃᑦ ᓱᕐᕋᐃᓂᕆᓂᐊᖅᑕᖓᑕ ᒥᔅᓵᓄᑦ ᐃᖅᑲᕐᓂᐊᕐᓗᑎᒃ ᖃᐅᔨᓴᓕᖅᑲᑕ ᐃᓅᓯᖏᓐᓂᒃ ᐊᕙᑎᖓᓐᓂᓪᓗ.

ᒫᓐᓇ, ᑲᑐᔾᔨᖃᑎᒌᒃᑯᑦ ᐃᖅᑲᓇᐃᔭᖃᑎᓖᑦ ᓄᓇᖃᖅᑳᕐᓯᒪᔪᓕᕆᔨᑦ ᐅᑭᐅᖅᑕᖅᑐᒥᐅᓕᕆᔨᓂᓪᓗ (ᐃᓄᓕᕆᔨᑐᖃᒃᑯᓐᓂ) ᑲᓇᑕᒥ, ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ ᐊᒻᒪᓗ ᓄᓇᕗᒥ ᐊᕙᑎᓕᕆᓂᕐᒧᑦ ᑲᑎᒪᔨᓂᑦ ᓯᕗᓕᕐᓯᑎᓪᓗᒋᑦ ᑐᑭᒧᐊᒍᑎᔅᓴᓂᑦ ᐊᕙᑎᓕᕆᓂᕐᒥ ᖃᐅᔨᓴᕐᓂᐊᓂᕐᒧᑦ ᓴᓐᓂᕈᑎᐅᑉ ᐃᒪᖓᓂ ᐊᒻᒪᓗ ᕿᑭᖅᑖᓘᑉ ᐃᑭᕋᓴᖓᓂ.  ᑲᑐᔾᔨᖃᑎᒌᒃᑯᑦ ᐃᖅᑲᓇᐃᔮᖃᕐᓂᐊᖅᑐᑦ ᐃᖅᑲᓇᐃᔭᖃᑎᖃᐃᓐᓇᕐᓗᑎᒃ ᓄᓇᓕᓐᓂᑦ ᓇᓗᓇᐃᖅᑐᐃᓂᕐᒥᒃ ᐊᒻᒪᓗ ᓄᐊᑦᑎᓂᕐᒥᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑕᒪᒃᑯᐊ ᐃᓚᓕᐅᔾᔭᐅᒐᔭᕐᖓᑕ ᑐᑭᒧᐊᒍᑎᔅᓴᓂᑦ ᐊᕙᑎᓕᕆᓂᕐᒥ ᖃᐅᔨᓴᕐᓂᕐᒥ ᐃᓚᒋᔭᐅᓗᓂ ᓇᓗᓇᐃᖅᑐᐃᓂᕐᒥᒃ ᐊᕙᑎᑦᑎᓐᓂ ᐊᓐᓂᕆᔭᐅᓗᐊᖅᑐᓂᑦ ᐃᓄᓐᓄᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐋ ᓯᐊᕆHᐃ

ᐊᖏᔪᖅᑳᖅ ᑐᓴᐅᒪᖃᑦᑕᐅᑎᓂᕐᒧᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

szerehi@qia.ca

(867) 975.8413

1.800.667.2742