ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐱᓇᓱᐊᒐᖃᐃᓐᓇᕐᓂᐊᖅᐳᑦ ᓱᓕ ᐃᑲᔪᖅᑐᐃᓗᑎᑦ ᓂᕿᖃᑦᑎᐊᕐᓂᐊᕐᓂᖏᖕᓂᑦ ᐃᓄᐃᑦ ᐊᒻᒪᓗ ᐊᓯᒥᓂᒃ ᑕᑯᖃᑦᑕᕆᐊᖃᙲᓐᓇᖅᑎᓪᓗᒋᑦ ᓄᕙᒡᔪᐊᕐᓇᖅ-19 ᐱᓪᓗᒍ ᐊᑦᑐᖅᑕᐅᓂᖃᖅᑐᑦ ᓄᓇᓖᑦ ᓄᑖᕐᓂᑦ ᓂᕿᓂᒃ ᑲᑎᖅᓱᖅᓯᒪᔪᓂᑦ ᑐᓂᐅᖅᑲᖅᑕᐅᔾᔪᑎᒃᓴᓂᑦ ᐃᑲᔪᕐᓂᐊᓕᖅᑐᑦ ᕿᑭᖅᑕᓂᒃᑯᑦ ᐸᖕᓂᖅᑑᕐᒥ. ᕿᑭᖅᑖᓗᖕᒥᐅᑦ ᐃᓄᐃᑦ ᐸᖕᓂᖅᑑᕐᒃᒥᐅᑕᐃᑦ ᐱᔪᓐᓇᖅᑐᑦ ᑕᒪᒃᑯᓂᖓ ᓂᕿᓂᑦ ᑲᑎᖅᓱᖅᑕᐅᓯᒪᔪᓂᑦ ᐊᑭᖃᖅᑎᒋᔪᑦ ᐃᒪᓐᓇᓂᑦ $400.

“ᐅᓗᕆᐊᓇᐃᓐᓇᕐᓂᖓ ᓄᕙᒡᔪᐊᕐᓇᖅ-19 ᖁᕕᐊᓱᒡᕕᐅᑎᓪᓗᒍ ᓇᓗᖅᑯᑎᖃᖅᑎᑦᑎᓯᒪᕗᖅ ᖃᓄᐃᓕᐅᕐᓂᐊᕐᓂᑦᑎᓐᓂᒃ,” ᐅᖃᖅᑐᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖓᔪᖅᑳᖓᑦ ᐅᓛᔪᖅ ᐊᑭᓱᒃ, “ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓂᕆᐅᑉᐳᑦ ᑕᒪᒃᑯᐊ ᓂᖀᑦ ᐅᕿᓪᓕᕚᓪᓕᖅᑎᑦᑎᓂᐊᕐᒪᑕ ᕿᑭᑖᓗᖕᒥᐅᓂᑦ ᐃᓄᖕᓂᑦ ᐃᓚᒌᑦᑐᓄᑦ ᐃᑲᔫᑎᖃᕋᔭᕐᓂᖏᖕᓄᑦ.”

“ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᓕᕆᐊᖃᐃᓐᓇᕐᓂᐊᖅᓯᒪᕗᑦ ᓄᓇᓕᑦᑎᓐᓂ ᖃᓄᐃᓕᐅᕈᑎᖃᕆᐊᓯᑲᐅᑎᒋᓗᑎᑦ,” ᐅᖃᖅᑐᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᑲᑎᒪᔨᖓ ᑭᒡᒐᖅᑐᐃᔪᖅ ᐸᖕᓂᖅᑑᕐᒥ ᓵᓕ ᖁᒻᒧᐊᑦᑐᖅ. ᓄᓇᓕᕗᑦ ᓴᙱᔫᒻᒪᑦ ᐊᒻᒪᓗ ᐃᓄᐃᑦ ᑭᒃᑯᑐᐃᓐᓇᐃᑦ ᐋᓐᓂᐊᖅᑕᐃᓕᒪᑎᑕᐅᓂᖏᖕᓄᑦ ᒪᓕᒋᐊᖃᕐᓂᖏᑦ ᑎᓕᓯᔾᔪᑎᓕᐊᕆᔭᐅᓯᒪᔪᓂᑦ ᒪᓕᒃᑯᑎᑦ ᐱᐅᓛᖑᕗᖅ ᐸᖕᓂᖅᑑᖅ ᐅᓗᕆᐊᓇᖅᑐᒦᓗᐊᖁᓇᒍ.”

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓂᕿᓂᑦ ᑲᑎᖅᓱᖅᓯᒪᔪᓂᑦ ᐋᑦᑎᖃᑦᑕᓂᐊᖅᑐᑦ ᐸᖕᓂᖅᑑᕐᒥ ᐱᓕᕆᖃᑎᖃᕐᓗᑎᑦ ᐸᖕᓂᖅᑑᖅ ᐃᓄᐃᑦ ᑯᐊᐸᒃᑯᖏᖕᓂᑦ. ᑮᓇᐅᔭᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᓄᕙᒡᔪᐊᕐᓇᖅ-19 ᐊᐃᑦᑑᑕᐅᓕᖅᑎᓪᓗᒍ ᖃᓄᐃᓕᐅᕈᑎᖃᕆᐊᕈᑎᕗᑦ ᑕᐃᑲᙶᖅᑐᑦ ᑲᓇᑕᑉ ᒐᕙᒪᖓᑕ ᓄᓇᖃᖅᑳᖅᓯᒪᔪᑦ ᓄᓇᓖᑦ ᐃᑲᔪᖅᑐᖅᑕᐅᓂᖏᖕᓄᑦ ᑮᓇᐅᔭᖁᑎᒋᔭᐅᔪᓂᑦ.

ᐅᕝᕙ ᐅᑯᐊ ᖃᓄᐃᓕᐅᕈᑕᐅᓂᐊᖅᑐᑦ ᓂᕿᑖᖅᑎᑦᑎᖃᑦᑕᕐᓗᑕ:

• ᐱᒋᐊᕐᓗᒍ ᑎᓰᕝᕙ 26, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᑯᐊᐸᒃᑯᑦ ᓂᕿᓂᑦ ᐋᑎᕆᒋᐊᓯᓛᖅᑐᑦ.
• ᓂᖀᑦ ᐋᑎᖅᑕᐅᒐᔭᖅᑐᑦ ᐃᓄᖕᓂᑦ ᑕᑯᙱᓪᓗᑎᑦ ᐊᑐᓂ ᐃᓄᐃᑦ ᐃᒡᓗᖏᖕᓅᖅᑕᐅᓗᑎᑦ ᐸᖕᓂᖅᑑᕐᒥ

ᐃᓄᐃᑦ ᐊᒥᓱᑦ ᐃᓚᒌᑦᑐᑦ ᐃᒡᓗᒥᐅᑕᐅᖃᑎᒌᑦᑐᑎᑦ ᐊᐱᕆᔭᐅᕗᑦ ᖃᐅᔨᒃᑲᕐᓗᑎᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᓄᓇᓕᒻᒥᐅᓂᑦ ᐱᓕᕆᖃᑎᖃᖅᑎᖏᖕᓂᑦ ᑐᑭᓯᒋᐊᒃᑲᓐᓂᖁᓪᓗᑎᑦ ᖃᓄᒃᑲᓐᓂᖅ ᐃᑲᔪᖅᑐᖅᑕᐅᒃᑲᓐᓂᕈᓐᓇᕋᔭᕐᒪᖔᕐᒥᒃ.

ᑐᑭᓯᒋᐊᒃᑲᓐᓂᖁᓪᓗᑎᑦ ᑕᒪᔅᓱᒪᑉ ᐱᓕᕆᐊᑉ ᒥᒃᓵᓄᑦ, ᖃᕋᓴᐅᔭᒃᑯᑦ ᑎᑎᕋᕈᓐᓇᖅᑐᑎᑦ ᐅᕗᖓ: COVID-19@qia.ca ᐅᕝᕙᓘᓐᓃᑦ ᐅᖄᓚᓗᑎᑦ ᐅᕗᖓ: 1-867-975-8383.

ᑕᑯᓂᐊᕐᓗᒍ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐃᑭᐊᖅᑭᕕᖓ ᐅᕙᓂ qia.ca ᑐᑭᓯᒋᐊᒃᑲᓐᓂᖁᓪᓗᑎᑦ ᐊᒻᒪᓗ ᖃᐅᑕᒫᑦ ᑐᓴᕋᒃᓴᓂᑦ ᓄᑖᕐᓂᑦ ᐅᖃᓕᒫᖁᓪᓗᑎᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒃᑲᕐᓗᒍ:
ᕕᓪ ᕼᐊᑉᑭᓐᔅ, ᑐᑭᒧᐊᑦᑎᑦᑎᔨᐅᑲᐃᓐᓇᖅᑐᖅ ᑐᓴᐅᒪᖃᑦᑕᐅᑎᔪᓕᕆᔨᒃᑯᓐᓂ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
whopkins@qia.ca
867.975.8413 ᐅᕝᕙᓘᓐᓃᑦ
1.800.667.2742