ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᑲᑎᒪᔨᖏᑦ ᑲᑎᒪᔭᕇᖅᑐᑦ
ᐃᖃᓗᐃᑦ, ᓄᓇᕗᑦ, ᒫᑦᓯ 6, 2025- ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ (QIA) ᑲᑎᒪᔨᖏᑦ ᑲᑎᒪᔭᕇᖅᑐᑦ ᐅᓪᓗᒥ. ᐊᒥᓱᓂᑦ ᐱᖁᔨᕗᖔᕈᑎᓂᑦ ᑲᔪᓯᑎᑦᑎᖃᑦᑕᖅᑲᐅᔪᑦ ᑲᑎᒪᓂᖏᓐᓂ, ᐱᔾᔪᑕᐅᓗᐊᖅᑐᑦ ᐅᑯᐊ:
– ᓈᒻᒪᒋᔭᐅᓂᖏᑦ ᕿᑭᖅᑕᓂᒃᑯᑦ 2025-2026 ᐊᕐᕌᒍᒥ ᑮᓇᐅᔭᖅᑑᑎᔅᓴᖏᑦ ᑕᐃᒫᒃ ᐅᓂᒃᑳᖑᓂᖏᑦ ᒪᓕᑦᑐᒋᑦ ᑲᑎᒪᔨᓄᑦ
– ᓈᒻᒪᒋᔭᐅᓂᖏᑦ ᓴᓂᕐᕙᐃᖁᓪᓗᒋᑦ ᑮᓇᐅᔭᓂᑦ ᓄᓇᖃᖅᑳᖅᑐᓄᑦ ᐅᖃᐅᓯᓕᕆᓂᕐᒧᑦ ᑐᕌᖓᔪᓂᑦ, ᓄᓇᕗᑦ ᑐᙵᕕᒃᑯᓐᓂᑦ ᑐᓂᔭᐅᓯᒪᔪᓂᑦ, $5.2 ᒥᓕᐊᓐᓄᑦ ᑎᑭᐅᒪᔪᑦ ᐱᓕᕆᐊᔅᓴᓄᑦ ᐃᑲᔫᑎᐅᓂᐊᖅᑐᓄᑦ ᑕᓱᐃᓂᕐᒧᑦ, ᓇᖅᑭᑎᑦᑎᓂᕐᒧᑦ, ᐋᖅᑭᐅᒪᑎᑦᑎᓂᕐᒧᑦ, ᐊᒻᒪᓗ ᐱᔪᓐᓇᕐᓯᑎᑦᑎᒋᐊᒃᑲᓂᕐᓂᕐᒧᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ
– ᓈᒻᒪᒋᔭᐅᓂᖏᑦ ᓴᓂᕐᕙᐃᖁᓪᓗᒋᑦ ᐊᓯᒃᑲᓐᓂᖏᓐᓂᒃ ᑮᓇᐅᔭᓂᑦ ᑲᓇᑕᒥ ᐃᓄᓐᓄᑦ ᐃᓅᓯᕐᒥᒃ ᓴᐱᓕᖃᑦᑕᖁᔨᒐᑎᒃ ᐸᕐᓇᐅᑎᓂᑦ, ᓄᓇᕗᑦ ᑐᙵᕕᒃᑯᓐᓄᑦ ᑐᓂᔭᐅᓯᒪᔪᓂᑦ, $5 ᒥᓕᐊᓐᓄᑦ ᑎᑭᐅᒪᔪᑦ ᑲᒪᔾᔪᑎᔅᓴᐅᓪᓗᑎᒃ ᐃᓄᓐᓂᑦ ᐱᕙᓪᓕᐊᑎᑦᑎᓂᕐᒧᑦ ᐊᒻᒪᓗ ᐃᓅᓯᖃᑦᑎᐊᓂᕐᒧᑦ ᐃᑲᔪᖅᑕᐅᔾᔪᑎᒋᒋᐊᓕᖏᓐᓂᒃ
– ᓈᒻᒪᒋᔭᐅᓂᖏᑦ ᒪᓂᒪᑎᑦᑎᒍᑕᐅᕙᑦᑐᓄᑦ ᐊᖏᖃᑎᒌᒍᑎᓂᑦ ᑖᒃᑯᓄᖓ ᐅᖃᓕᒫᒐᓕᐅᖅᑎᓄᑦ Inhabit Media ᑲᒪᒋᔭᖃᐃᓐᓇᖁᓪᓗᒋᑦ ᐅᖃᐅᓯᖅᐳᑦ ᑐᓵᓗᒍ ᐱᓕᕆᐊᖓᓐᓂ ᐊᒻᒪᓗ ᐊᓯᖏᓐᓂᒃ ᐅᖃᐅᓯᕐᒥᒃ ᐅᖃᕆᐅᕐᓴᑎᑦᑎᖃᑦᑕᓂᕐᒧᑦ ᑐᕌᖓᔪᓂᑦ ᑐᓴᕋᔅᓴᑎᒍᑦ ᐊᒻᒪᓗ ᐅᖃᓕᒫᒐᓕᐊᕆᕙᑦᑕᖏᑎᒍᑦ
– ᓈᒻᒪᒋᔭᐅᓂᖏᑦ ᓄᑖᕐᒥᒃ ᕿᑭᖅᑕᓂᒃᑯᓐᓂᑦ ᖃᐅᔨᒪᔭᐅᔭᕆᐊᖃᙱᑦᑐᑦ ᒥᔅᓵᓄᑦ ᐊᑐᐊᒐᕐᓂᑦ ᑕᐃᒫᒃ ᕿᑭᖅᑕᓂᒃᑯᑦ ᖃᐅᔨᒪᑦᑎᐊᓂᐊᕐᖓᑕ ᖁᕝᕙᓯᓐᓂᕐᐹᖓᓂᒃ ᐋᖅᑭᓯᒪᔪᓂᑦ ᖃᐅᔨᒪᔭᐅᔭᕆᐊᖃᙱᑦᑐᓂᑦ ᐊᒻᒪᓗ ᑐᑭᓯᓇᑦᑎᐊᖁᓪᓗᒋᑦ ᑐᓂᓯᔭᐅᖃᑦᑕᕐᓂᖏᓐᓄᑦ, ᑐᖅᑯᕐᓯᓯᒪᖃᑦᑕᕐᓂᖏᓐᓄᑦ ᐊᒻᒪᓗ ᐊᑐᖃᑦᑕᕐᓂᖏᓐᓄᑦ ᑭᒃᑯᑐᐃᓐᓇᐃᑦ ᒥᔅᓵᓄᑦ ᑐᑭᓯᓯᒪᔾᔪᑎᔅᓴᓂᑦ
– ᓈᒻᒪᒋᔭᐅᓂᖏᑦ ᓴᖑᑎᑕᐅᖁᓪᓗᒋᑦ $4 ᒥᓕᐊᓐ ᐊᖑᓇᓱᑦᑎᓄᑦ ᐃᑲᔫᓯᐊᔅᓴᑦ ᑮᓇᐅᔭᑦ ᐊᑭᓕᐅᑕᐅᓛᕐᖓᑕ ᓇᐅᑦᑎᕐᓱᖅᑎᓄᑦ ᑐᖅᑲᑕᕐᕕᔅᓴᓄᑦ ᓴᓇᔭᐅᓂᐊᖅᑐᓄᑦ, ᐊᑐᕐᒃᑕᐅᖃᑦᑕᓛᕐᒃᑐᑎᒃ ᓄᐊᑦᑎᓪᓗᑎᒃ ᐃᑳᔪᕐᒃᑐᐃᓗᑎᒃᓗ ᐊᓯᕙᕐᒃᑐᓕᕆᓂᕐᒨᖓᔪᓄ ᓂᕿᖃᑦᑎᐊᓂᕐᒨᖓᔪᓄᓪᓗ ᖁᑦᑎᑦᑐᒥ.
ᓂᕈᐊᕋᔅᓴᓕᐅᖅᑐᖃᓚᐅᕐᒥᔪᖅ ᐅᑯᓄᖓ ᑲᑎᒪᔨᐅᕕᓐᓄᑦ: ᖃᐅᓱᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒻᒧᑦ ᑲᑐᔾᔨᓪᓗᑎᒃ ᐸᕐᓇᐃᓂᕐᒧᑦ ᒥᕐᖑᐃᓯᕐᕕᓕᕆᓂᕐᒧᓪᓗ ᑲᑎᒪᔨᕋᓛᕐᓄᑦ (ᑑᕇᓐ ᑲᓪᓗᒃ ᒪᒃᑖᓄ), ᐊᒡᒍᑎᓐᓂ ᒥᕐᖑᐃᓯᕐᕕᒻᒧᑦ ᑲᑐᔾᔨᓪᓗᑎᒃ ᐸᕐᓇᐃᓂᕐᒧᑦ ᒥᕐᖑᐃᓯᕐᕕᓕᕆᓂᕐᒧᓪᓗ ᑲᑎᒪᔨᕋᓛᕐᓄᑦ, (ᓇᐃᓴᓈ ᕿᓪᓚᕐᒃ), ᑲᑭᕙᒃᑯᑦ ᑐᓐᓂᖅᑯᓯᐊᔅᓴᓄᑦ ᐊᑐᖅᑐᐊᕋᔅᓴᓄᓪᓗ ᐊᔪᐃᓐᓇᕆᐊᒃᑲᓐᓂᕈᑎᓄᑦ ᑲᑎᒪᔨᕋᓛᖏᓐᓄᑦ (ᒪᓄ ᑯᓄᒃ), ᐊᒻᒪᓗ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ (ᔫᓱᐊ ᐋᕆᐊᕐᒃ).
ᓂᕈᐊᕋᔅᓴᓕᐅᖅᑐᖃᕐᓯᒪᙱᒻᒪᑦ ᓄᓇᕗᒻᒥ ᒪᑭᓐᓇᓱᐊᖅᑏᑦ ᑲᑐᔾᔨᖃᑎᒌᖏᓐᓄᑦ, ᐊᒻᒪᓗ ᖃᐅᓱᐃᑦᑐᕐᒥ ᒥᕐᖑᐃᓯᕐᕕᒻᒧᑦ ᑲᑐᔾᔨᓪᓗᑎᒃ ᐸᕐᓇᐃᓂᕐᒧᑦ ᒥᕐᖑᐃᓯᕐᕕᓕᕆᓂᕐᒧᓪᓗ ᑲᑎᒪᔨᕋᓛᕐᓄᑦ, ᑕᐃᒪᐃᒻᒪᑦ ᑖᓐᓇ ᓴᖅᑭᖅᑎᑕᐅᒃᑲᓐᓂᓛᖅᑐᖅ ᓱᓕ ᐊᑕᐅᓯᕐᒥ ᓂᕈᐊᕋᐅᔅᓴᐅᔪᒥᒃ ᐱᔪᒐᕐᓴᐅᑕᐅᓗᓂ. ᐊᑏ ᑕᑯᓂᐊᕐᔫᒥᔭᒐᖃᑦᑕᕆᔅᓯ ᐃᓄᓕᒫᓄᑦ ᑐᓴᕋᔅᓴᓂᑦ ᐊᒻᒪᓗ ᕿᑭᖅᑕᓂᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖓᓐᓄᑦ ᓂᕈᐊᕋᔅᓴᓕᐅᕐᓂᐅᑉ ᒥᔅᓵᓄᑦ ᑎᑎᖅᑲᓂᑦ ᑕᒪᒃᑯᓄᖓ ᑲᑎᒪᔨᐅᕕᐅᕙᑦᑐᓄᑦ.
ᑐᓴᕋᔅᓴᐃᑦ ᒥᔅᓵᓄᑦ ᑐᑭᓯᒋᐊᕈᒪᔪᓄᑦ, ᑐᑭᓯᒋᐊᕐᕕᐅᖃᑦᑕᕐᓕ:
ᑭᐅᕋᓐ ᕙᓚᕋᑎ
ᑐᑭᒧᐊᑦᑎᑦᑎᔨ, ᑐᓴᐅᒪᖃᑦᑕᐅᑎᒍᑎᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
(ᐅ) 867.975.8398 ᐊᑭᖃᙱᑐᒃᑯᓘᓐᓃᑦ 1.800.667.2742
kflaherty@qia.ca
