(ᐅᑐᐱᕆ 10, ᐃᖃᓗᐃᑦ, ᓄᓇᕗᑦ) – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᖁᕕᐊᓱᑉᐳᑦ ᓇᓗᓇᐃᕐᓯᔭᕆᐊᔅᓴᖅ ᐱᔭᕇᑦᑎᐊᒥᒻᒪᑕ ᐊᕐᕌᒍᑕᒫᕐᓯᐅᒻᒥ ᑲᑎᒪᕕᔾᔪᐊᕐᓂᖓᓐᓂ. ᑲᑎᒪᔩᑦ ᐅᖓᕙᕆᐊᕐᓯᓚᐅᕐᖓᑕ ᑲᑎᒪᓂᖏᓐᓂᒃ ᑲᑎᒪᔾᔪᑎᔅᓴᓕᒫᖏᑦ ᑲᑎᒪᔾᔪᑕᐃᓐᓇᐅᔪᓐᓇᓂᐊᕐᖓᑕ ᐊᒻᒪᓗ ᐱᖁᔨᕗᖔᕈᑎᓕᒪᖏᑦ ᑲᔪᓯᑎᑕᐅᔪᓐᓇᓂᐊᕐᖓᑕ.

ᑲᑎᒪᒍᑎᒋᖃᑦᑕᓚᐅᖅᑕᖏᑦ ᑕᒫᓂ ᐊᕐᕌᒍᒥ ᐱᔾᔪᑎᖃᖃᑦᑕᓚᐅᖅᑐᑦ ᐊᓯᔾᔨᕈᑕᐅᓯᒪᔪᓂᑦ ᑕᒫᓂ ᓄᓇᖃᕐᕕᑎᓐᓂ ᒫᓐᓇᕋᑖᖅ ᑲᑎᒪᒍᑎᒋᖃᑦᑕᓚᐅᖅᑕᖏᑦ ᑕᒪᒃᑯᐊ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ, ᐃᓄᒃᑎᑐᑦ ᐅᖃᐅᓯᖅ, ᐱᓇᓱᐊᕈᑎᔅᓴᓂᑦ ᕿᓂᕐᓂᖅ, ᐃᖅᑲᕐᓂᐊᖅᑐᓄᑦ ᐱᓕᕆᒍᑕᐅᕙᑦᑐᓂᑦ ᐊᒻᒪᓗ ᐱᒋᐊᕐᐸᓪᓕᐊᓂᖏᓐᓂᒃ ᑮᓇᐅᔭᓕᐅᕋᓱᑦᑐᑎᒃ ᐊᐅᓚᓂᐅᔪᑦ ᓄᓘᔮᓂᑦ.

ᑲᑎᒪᔭᕇᓕᖅᑎᓪᓗᒋᑦ ᑲᑎᒪᔩᑦ ᐊᖏᖃᑎᒌᑦᑐᐃᓐᓇᐅᔪᔪᑦ ᐃᓱᒪᒋᔭᖏᓐᓂᒃ ᑕᒪᒃᑯᐊ ᐱᓕᕆᐊᑦ ᑲᔪᓯᑦᑎᐊᖃᑦᑕᕈᓐᓇᓂᐊᕐᖓᑕ ᑭᓯᐊᓂ ᓄᓇᖃᕐᕕᑎᓐᓂ ᓱᓕᔪᒥᒃ ᑲᑐᔾᔨᖃᑎᒌᓐᓂᖃᑦᑎᐊᓂᕐᒥᒃ ᐋᖅᑮᑉᐸᑕ ᑕᐃᒫᒃ ᐃᓄᐃᑦ ᐱᓇᓱᐊᕈᓐᓇᖃᑦᑕᓂᐊᕐᖓᑕ ᐊᒻᒪᓗ ᐊᖅᑯᓯᐅᕆᖃᑦᑕᓂᐊᕐᖓᑕ ᐱᓇᓱᐊᕋᔅᓴᓄᑦ ᒪᓕᓪᓗᒋᑦ ᑕᑯᓐᓇᙳᐊᒐᐅᓯᒪᔪᑦ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓃᑦᑐᓂᑦ (ᓄᓇᑖᕈᑎᓂᑦ). ᕿᑭᖅᑕᓂᒃᑯᑦ ᑲᑎᒪᔨᖏᑦ ᑐᑭᓯᓇᑦᑎᐊᓚᐅᕐᒥᔪᑦ ᐱᖃᑕᐅᑎᑦᑎᓂᖅ ᐃᓄᓐᓂᑦ ᐃᓚᒋᔭᐅᓗᓂ ᐱᓕᕆᐊᕐᒥ ᐸᕐᓇᐃᓂᕐᒧᑦ, ᐱᓕᕆᐊᓂᑦ ᐸᕐᓇᑕᐅᒌᕐᓯᒪᔪᓂᑦ ᐊᑐᖃᑦᑕᙱᖔᕐᓗᑎᒃ ᐊᒻᒪᓗ ᓇᓗᓇᐃᕋᔅᓴᐅᓕᖅᑎᑕᐅᓯᒪᕙᒌᖅᑐᓂᑦ, ᐊᖅᑯᑎᓪᓗᐊᑕᐅᙳᓱᒻᒪᑦ ᐃᓄᓐᓂᑦ ᐃᑲᔪᖅᑐᐃᕙᓪᓕᐊᓂᕐᒧᑦ.

ᐊᕐᕌᒍᓂᑦ ᒫᓐᓇᓕᓴᐅᓂᕐᓴᓂᑦ, ᕿᑭᖅᑕᓂᒃᑯᑦ ᐱᖃᑕᐅᖃᑦᑕᕐᓯᒪᒻᒪᑕ ᐊᒥᓱᓂᑦ ᐱᓕᕆᐊᓂᑦ ᑕᒪᒃᑯᓇᓂ ᑐᔅᓯᕋᕐᓯᒪᔪᑦ ᐊᑐᕆᐊᖃᓪᓚᑦᑖᕐᓯᒪᔭᖏᓐᓂᒃ ᐊᑐᕇᕐᓯᒪᓪᓗᑎᐅᖃᑦᑕᕐᖓᑕ ᒪᓕᑦᑐᒋᑦ ᓄᓇᑖᕈᑏᑦ, ᓂᕈᐊᒐᖃᕐᐸᑦᑐᑎᒃ ᐱᖃᑕᐅᑎᑦᑎᓂᕐᒥᒃ ᕿᑭᖅᑕᓂᒃᑯᓐᓂ ᑭᖑᓂᐊᒍᑦ ᑭᓯᐊᓂ. ᕿᑭᖅᑕᓂᒃᑯᑦ ᐅᑉᐱᕈᓱᑦᑐᑦ ᐱᓇᓱᐊᕈᑕᐅᕙᑦᑐᑦ ᐱᓕᕆᐊᕐᒥ ᐸᕐᓇᐃᓂᕐᒧᑦ ᓯᕗᓪᓕᐅᔾᔨᓯᒪᓪᓗᑎᒃ ᖁᓛᓃᑦᑐᓂᑦ ᐃᓄᓐᓂᑦ ᐱᓕᕆᖃᑎᒋᒍᒫᕐᓂᐊᖅᑕᖏᓐᓂᒃ ᑕᑎᔅᓴᐅᔪᓐᓃᕈᑎᒋᕙᒻᒪᒋᑦ ᐊᒻᒪᓗ ᐃᑲᔫᑎᖃᕈᓐᓃᖃᑦᑕᕐᖓᑕ.

ᕿᑭᖅᑕᓂᒃᑯᓐᓄᑦ, ᐃᓄᐃᑦ ᐱᔪᒪᓯᒪᔭᖏᑦ ᑭᖑᓪᓕᐅᔪᒫᕐᓂᐊᕐᓯᒪᙱᒻᒪᑕ. ᐃᓄᐃᑦ ᐱᔪᒪᓯᒪᔭᖏᑦ ᑐᙵᕕᐅᒻᒪᑕ ᓯᕗᓂᔅᓴᓕᐅᕈᑕᐅᓂᐊᖅᑐᑎᓪᓗ ᓈᒻᒪᑦᑐᑎᓪᓗ ᐱᔪᓐᓇᐅᑎᖏᓐᓄᑦ ᐅᑉᐱᕆᔭᖏᓐᓄᓪᓗ ᐅᓪᓗᒥ ᐃᓄᖏᑕ.

-###-

ᑐᓴᕋᔅᓴᓄᑦ ᑐᑭᓯᒋᐊᕐᕕᔅᓵᒃ:
ᒨᑦ ᕗᑐᕋᓐᑦ
ᑐᓴᐅᒪᖃᑦᑕᐅᒍᑎᓕᕆᔨ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
867.975.8400
1.800.667.2742
mbertrand@qia.ca