ᖁᕕᐊᓲᑎᖃᕐᓂᖅ ᐃᓄᓐᓄᑦ ᓯᕗᓕᖅᑕᐅᔪᓂᒃ ᓄᖑᓗᐊᑦᑕᐃᓕᑎᑦᓯᓂᕐᒧᑦ ᐃᓕᖅᑯᓯᓕᕆᓂᕐᒧᑦ ᑲᔪᓯᑎᑦᓯᓂᕐᒥᒃ

ᐃᖃᓗᐃᑦ, ᓄᓇᕗᑦ – ᐊᒋᓯ 15, 2023 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᐱᒍᓱᑦᑐᑎᒃ ᐆᒻᒪᑎᒥᓐᓂᒃ ᐱᒃᑯᒋᕙᒌᖅᐳᑦ ᐃᓄᐃᑦ ᓯᓚᕐᔪᐊᕐᒥ ᑲᑎᒪᔨᖏᑕ−ᑲᓛᖡᑦ ᓄᓈᑦ ᑐᓂᔭᐅᓚᐅᕐᖓᑕ ᓄᓇᕐᔪᐊᒥ ᑲᑐᔾᔨᖃᑎᒌᑦ ᐱᕙᓪᓕᐊᑎᑦᓯᓂᕐᒧᑦ ᐱᓕᕆᐊᖓᑎᒍᑦ 2023 ᓄᓇᕐᔪᐊᒥ ᓵᓚᖃᐅᓯᐊᖓᓂᒃ ᐱᓕᕆᖃᑦᑕᖅᓯᒪᓂᖏᓐᓄᑦ ᓯᕗᒧᒋᐊᖅᑎᑦᓯᓂᕐᒧᑦ ᓯᕕᑐᔪᒥ, ᐃᓄᓐᓄᑦ ᓯᕗᓕᖅᑕᐅᔪᒥ ᓴᐳᒻᒥᔮᖅᑕᐅᔪᒥ ᐱᑭᐊᓚᓱᕐᓱᐊᖅ “ᐅᑭᐅᖅᑕᖅᑐᒥ ᐅᕝᕙᓘᓐᓃᑦ “ᐅᑭᐅᖅᑕᖅᑐᒥ ᐃᒪᕕᒻᒥ ᓴᕐᕙᖓᓂ.” ᑖᓐᓇ ᐃᓕᓴᕆᔭᐅᒍᑎᖓ ᓇᓗᓇᐃᖅᓯᔪᖅ ᑐᙵᕕᓪᓚᕆᐅᓂᖏᓐᓂᒃ ᐃᓄᓐᓄᑦ ᓯᕗᓕᖅᑕᐅᔪᑦ ᐱᒋᐊᖅᑎᑕᐅᓯᒪᔪᑦ ᐊᔭᐅᖅᑐᐃᒍᑎᖃᕐᓂᕐᒧᑦ ᓴᐳᒻᒥᔮᕆᓂᕐᒧᑦ, ᓄᓇᒦᖔᖅᑐᓂᓪᓗ ᐋᖅᑭᐅᒪᔾᔪᑎᑦᓴᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓄᓇᕐᔪᐊᑉ ᓵᖓᓐᓂ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖁᕕᐊᓲᑎᖃᖅᑯᑦ ᐊᑦᑐᐃᓂᖃᓪᓚᕆᑦᓯᒪᓂᖓᓂᒃ ᐃᓄᐃᑦ ᓯᓚᕐᔪᐊᒥ ᑲᑎᒪᔩᑦ ᑲᓛᖡᑦ ᓄᓈᓐᓂ ᐊᒻᒪᓗ ᐱᑭᐊᓚᓱᕐᒧᐊᖅ ᑲᑎᒪᔨᖏᑕ, ᓂᕆᐅᓐᓂᖃᑦᓯᐊᖅᑐᓂ ᐱᒋᐊᖅᑎᑕᐅᓯᒪᔪᖅ ᐱᔾᔪᑎᖃᖅᑐᓂ ᓴᐳᒻᒥᔮᕆᓂᕐᒧᑦ ᐅᑭᐅᖅᑕᖅᑐᒥ ᐆᒪᔪᓐᓇᖅᑐᓕᒫᑦ ᐊᕙᑎᖏᓐᓂᒃ ᐱᕚᓪᓕᖅᑎᑦᓯᓂᕐᒧᓪᓗ ᐃᓄᐃᑦ ᐃᓕᖅᑯᓯᖏᑎᒍᑦ ᑲᔪᓯᒍᑎᖃᕐᓂᕐᒥᒃ ᖃᓄᐃᑦᑕᐃᓕᓂᕐᒧᓪᓗ.

14-ᖓᓐᓂ ᓄᓇᕐᔪᐊᒥ ᓵᓚᖃᐅᓯᐊᑦᓴᖅ, ᐱᒋᐊᖅᑎᑕᐅᓯᒪᔪᖅ ᓄᓇᕐᔪᐊᒥ ᑲᑐᔾᔨᖃᑎᒌᑦ ᐱᕙᓪᓕᐊᑎᑦᓯᓂᕐᒧᑦ ᐱᓕᕆᐊᖓᑎᒍᑦ, ᓴᖅᑭᔮᕆᐊᖅᑎᑦᓯᒍᑕᐅᕙᑦᑐᖅ ᐊᓯᔾᔨᖅᓯᕙᓪᓕᐊᓂᒃᑯᑦ ᐊᔭᐅᖅᑐᐃᒍᑎᖃᕐᓂᕐᒧᑦ ᓄᓇᖃᖅᑳᖅᑐᒥᓂᕐᓄᑦ ᓄᓇᓕᓐᓂᓗ ᑲᒪᒋᔭᖃᕐᓂᕐᒧᑦ ᓄᓇᕐᔪᐊᒥ ᐊᑦᓱᕈᕐᓇᖅᑐᒃᑰᕈᑕᐅᔪᓂᒃ. ᑕᕝᕙᓂ ᐊᕐᕌᒍᒥ ᐃᓕᓴᕆᔭᐅᔪᑦ ᓇᓗᓇᐃᖅᓯᔪᑦ ᓴᙱᓂᖃᕐᓂᖓᓂᒃ ᓴᓇᑐᓂᕐᒥᒃ, ᓄᓇᒦᖔᖅᑐᓂᒃ ᐋᖅᑭᐅᒪᔾᔪᑎᑦᓴᓂᒃ ᓴᙱᓂᖅᑖᖅᓯᒪᒍᓐᓇᖁᓪᓗᒋᑦ ᓄᓇᓖᑦ ᓄᓇᓕᓐᓂ ᐱᕙᓪᓕᐊᑎᑦᓯᒍᓐᓇᓂᕐᒧᑦ ᑐᕌᒐᖏᓐᓂᒃ ᐱᕚᓪᓕᖅᑎᑦᓯᓂᕐᒧᓪᓗ ᓴᐱᓕᖅᑕᐃᓕᒍᓐᓇᓂᕐᒥᒃ, ᓵᖓᔭᐅᒐᓗᐊᖅᑎᓪᓗᑕ ᓇᓗᓇᐃᖅᑐᓄᑦ ᑮᓇᐅᔭᓕᕆᓂᕐᒧᑦ, ᐊᕙᑎᓕᕆᓂᕐᒧᑦ, ᒐᕙᒪᓕᕆᓂᕐᒧᑦ, ᐃᓄᓕᕆᓂᕐᒧᓪᓗ ᐊᕝᕕᐊᕈᑕᐅᔪᓂᒃ.

ᑐᙵᕕᖓᒍᑦ, ᐱᑭᐊᓚᓱᕐᓱᐊᖅ ᐃᓄᓐᓄᑦ ᓯᕗᓕᖅᑕᐅᓗᓂ ᓴᐳᒻᒥᔮᕆᔭᐅᓗᓂ ᓱᕈᖅᑕᐅᑦᑕᐃᓕᓗᓂᓗ ᓇᓗᓇᐃᖅᑕᐅᓯᒪᓂᐊᖅᑐᖅ ᐃᒪᕕᒻᒥ ᐊᕙᑎᖏᓐᓂᒃ ᐃᒪᕕᒻᒥᓗ ᐆᒪᔪᓐᓇᖅᑐᓕᒫᑦ ᐊᕙᑎᖏᓪᓗ ᐅᑯᓂ ᑭᖑᕚᕆᔭᑦᑎᓐᓄᑦ. ᐊᑕᖏᖅᑐᒃᑯᑦ ᓄᓇᓕᓐᓂ ᑐᓴᕆᐊᕐᕕᖃᖃᑦᑕᓂᒃᑯᑦ ᐃᓚᒋᔭᐅᓗᑎᒃ ᒪᒃᑯᑦᑐᐃᑦ, ᐃᓐᓇᒻᒪᕇᑦ, ᐊᖑᑏᑦ, ᐊᕐᓇᐃᓪᓗ, ᐱᑭᐊᓚᓱᕐᓱᐊᖅ ᑲᑎᒪᔨᖏᑦ ᑐᓂᓯᒪᔪᑦ ᓴᐳᒻᒥᔮᕆᓂᕐᒧᑦ ᐊᕙᑎᑦᑎᓐᓂᒃ ᓱᕈᐃᑦᑕᐃᓕᓂᕐᒧᑦ ᑕᒫᓂ ᐊᕙᑎᑦᑎᓐᓂ ᐊᑑᑎᖃᓪᓚᕆᑦᑐᒥᒃ ᐊᕕᑦᑐᖅᓯᒪᓂᑦᑎᓐᓂ ᓴᐳᒻᒥᔮᕆᓂᕐᒧᓪᓗ ᑐᙵᕕᐅᓂᖓᒍᑦ ᐊᑑᑎᖃᕐᓂᖓᓂᒃ ᒪᑭᒪᐃᓐᓇᑎᑦᓯᓂᕐᒧᑦ ᐅᑭᐅᖅᑕᑐᒥ ᓄᓇᓕᑦᑎᓐᓂᒃ.

“ᓄᓇᕐᔪᐊᒥ ᓵᓚᖃᐅᓯᐊᑦᓴᒥᒃ ᓵᓚᖃᕐᓂᖏᑦ ᓇᓗᓇᐃᖅᓯᒍᑕᐅᓪᓚᕆᑦᑐᖅ ᓯᕗᓕᖅᑎᐅᑦᓯᐊᕐᓂᖏᓐᓂᒃ ᑐᓂᓯᒪᓂᖏᓐᓂᓪᓗ ᑲᑐᔾᔨᖃᑎᕗᑦ ᐃᓄᐃᑦ ᓯᓚᕐᔪᐊᒥ ᑲᑎᒪᔨᑕ ᑲᓛᖡᑦ ᓄᓈᓐᓂ,” ᐅᖃᖅᓯᒪᔪᖅ ᐊᖏᔪᖅᑳᖅ ᐅᓚᔪᒃ ᐊᑭᓱᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂ. “ᑖᓐᓇ ᐃᓕᓴᖅᓯᒍᑕᐅᔪᖅ ᓇᓗᓇᐃᖅᓯᒍᑕᐅᔪᖅ ᑲᑐᔾᔨᖃᑎᒌᓐᓂᒃᑯᑦ ᐋᖅᑭᐅᒪᔾᔪᑎᖃᕈᓐᓇᓂᕐᒥᒃ ᐃᓄᓐᓄᑦ ᓯᕗᓕᖅᑕᐅᔪᓄᑦ ᓴᐳᒻᒥᔮᕆᓂᕐᒧᑦ ᐅᑭᐅᖅᑕᖅᑐᒥ. ᐊᑕᖏᖅᑐᑕ ᐊᑦᓱᕉᑎᒋᔭᕗᑦ ᐃᓕᖅᑯᓯᖅᑎᒍᑐᐃᓐᓇᐅᖏᑦᑐᖅ ᐱᒻᒪᕆᐅᓂᓖᑦ ᑭᓯᐊᓂᑦᑕᐅᖅ ᐱᒻᒪᕆᐅᓂᖃᕐᒥᔪᑦ ᐃᒪᕕᒻᒥ ᓱᕈᐃᑦᑕᐃᓕᒪᓂᕐᒧᑦ ᑲᒪᒋᔭᖃᕐᓂᒧᓪᓗ ᐊᑦᓱᕈᕐᓇᖅᑐᒃᑰᕈᑕᐅᔪᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ. ᖁᕕᐊᓱᑦᑐᒍᑦ ᑲᑐᔾᔨᖃᑎᕗᑦ ᑲᓛᖡᑦ ᓄᓈᓐᓂ ᖄᒃᑲᓐᓂᖓᒍᑦ ᐱᓕᕆᔾᔪᑎᑦᓴᖅᑖᕐᓂᐊᕐᖓᑕ ᑲᔪᓯᒍᑎᖃᕈᓐᓇᖁᓪᓗᒋᑦ ᑕᒪᑐᒥᖓ ᐊᑑᑎᖃᒻᒪᕆᑦᑐᒥᒃ ᐱᓕᕆᐊᒥᒃ.”

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᑦᓱᕉᑎᖃᐃᓐᓇᕐᓂᖏᑦ ᐱᓕᕆᐊᖏᓐᓄᑦ ᐱᑭᐊᓚᓱᕐᓱᐊᖅ ᑲᑎᒪᔨᖏᑕ ᓇᓗᓇᐃᖅᓯᒍᑕᐅᔪᖅ ᓱᕐᕋᐃᑦᑐᒥᒃ ᑐᓂᓯᒪᓂᖏᓐᓂᒃ ᐃᑲᔪᖅᓱᐃᓂᕐᒧᑦ ᐃᓄᓐᓄᑦ ᓯᕗᓕᖅᑕᐅᔪᓂᒃ ᐱᒋᐊᖅᑎᑕᐅᓯᒪᔪᓂᒃ ᑲᓱᖅᑎᑦᓯᒍᑕᐅᕙᑦᑐᓂᒃ ᐃᓕᖅᑯᓯᑦᑎᓐᓂᒃ ᖁᓛᒎᕈᑕᐅᕙᑦᑐᓂᓪᓗ ᒐᕙᒪᓕᕆᓂᕐᒧᑦ ᑭᒡᓕᓕᐅᖅᑕᐅᕙᑦᑐᓂᒃ. ᐊᑕᖏᖅᑐᑕ ᑕᑯᒍᒪᔭᕗᑦ ᐸᖅᑭᑦᓯᓂᕐᒧᑦ ᐃᓄᓐᓄᑦ ᓯᕗᓕᖅᑕᐅᔪᓂᒃ ᐊᐅᓚᑦᓯᒍᓯᐅᔪᒥᒃ ᐱᑭᐊᓚᓱᕐᓱᐊᒥᒃ ᑐᙵᕕᐅᔪᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᓱᓕᔪᕆᔭᖏᓐᓂᒃ ᑐᑭᓯᐅᒪᔭᖃᕐᓂᕐᒧᑦ ᐃᓄᐃᑦ ᐸᖅᑭᑦᓯᔾᔪᓯᖏᓐᓂᒃ ᓴᐳᒻᒥᔮᕆᓂᕐᒧᓪᓗ ᐃᓄᐃᑦ ᓯᕗᓕᕆᔭᑦᑕ ᓄᓇᖏᓐᓂᒃ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓱᓕ ᑲᔪᖏᑦᓯᐊᖅᑐᑦ ᑲᑐᔾᔨᖃᑎᖃᐃᓐᓇᕐᓂᐊᕐᓂᕐᒥᓂᒃ ᐃᓄᐃᑦ ᓯᓚᕐᔪᐊᒥ ᑲᑎᒪᔨᖏᓐᓂᒃ ᑲᑐᔾᔨᖃᑎᖏᓐᓂᓪᓗ ᑲᓛᖡᑦ ᓄᓈᓐᓂ ᓯᕗᒧᒋᐊᖅᑎᑦᓯᓂᕐᒧᑦ ᐱᑭᐊᓚᓱᕐᓱᐊᒥᒃ ᑐᙵᕕᐅᓂᐊᕐᓗᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᕕᑦᑐᖅᓯᒪᓂᖓᓂ ᐱᓕᕆᔾᔪᓯᒋᓂᐊᖅᑕᖏᓐᓄᑦ ᐃᒪᕕᒻᒥ ᐊᐅᓚᑦᓯᓂᕐᒧᑦ, ᐃᓄᐃᑦ ᐸᖅᑭᑦᓯᔾᔪᓯᖏᓐᓂᒃ, ᑐᕌᒐᖃᖅᑐᓂᒃ ᐊᑭᑐᔫᑎᓕᐅᕐᓂᕐᒧᑦ, ᑮᓇᐅᔭᖃᖅᑎᓯᖏᓐᓇᓂᕐᒧᑦ, ᐃᖃᓪᓕᕿᓂᕐᒧᓪᓗ ᓴᐃᒻᒪᖃᑎᒌᒍᑎᖃᖅᐸᓪᓕᐊᓂᕐᒧᑦ ᑲᑐᔾᔨᖃᑎᒌᒍᑎᖃᕐᓂᒃᑯᑦ ᓲᕐᓗ ᑮᓇᐅᔭᓕᕆᓂᕐᒧᑦ ᐱᓕᕆᐊᖅ ᑕᐃᒪᙵᓕᒫᒧᑦ.

ᖃᕆᓴᐅᔭᒃᑯᑦ 2023 ᓄᓇᕐᔪᐊᒥ ᓵᓚᖃᐅᓯᐊᑦᓴᒥᒃ ᐱᖃᑕᐅᔪᑦ ᑕᑯᒋᐊᖅᑕᐅᒍᓐᓇᖅᑐᑦ ᐅᕙᓂ:

https://www.equatorinitiative.org/2023/07/21/meet-the-winners-of-the-equator-prize-2023/

ᐱᕙᓪᓕᐊᔪᓕᕆᔩᑦ ᐊᐱᖅᓱᕈᒪᑉᐸᑕ, ᖃᐅᔨᒋᐊᕐᕕᒋᓗᒍ:

ᐅᐃᓕᐊᒻ ᕼᐊᑉᑭᓐᓂᔅ,
ᐊᐅᓚᑦᓯᔨ, ᑐᓴᕋᑦᓴᓕᕆᓂᕐᒧᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
whopkins@qia.ca
867.975.8413 or
1.800.667.2742