ᐱᒃᑯᒍᓱᓪᓚᕆᑦᑐᒍᑦ ᕿᑭᖅᑕᓂ ᓄᓇᓕᓐᓃᙶᕐᓯᒪᔪᓂᑦ ᐃᓄᓐᓂᑦ ᐃᓕᓐᓂᐊᖃᑕᐅᓚᐅᖅᑐᓂᑦ ᕿᑭᖅᑕᓂ ᐱᓕᒻᒪᔅᓴᐃᓂᕐᒥ ᐃᓕᓐᓂᐊᑎᑦᑎᓂᕐᒥᓪᓗ ᐃᖅᑲᓇᐃᔮᔅᓴᓄᑦ ᑲᑐᔾᔨᖃᑎᒌᒍᑕᐅᔪᒥ (ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᖅ). ᕖᕝᕗᐊᓕ 11ᖑᑎᓪᓗᒍ, ᕿᑭᖅᑕᓂᒃᑯᑦ ᐊᖓᔪᖅᑳᖓᑦ, ᐸᐅᓗᓯ ᐊᕿᐊᕈᖅ, ᓂᐅᕐᕈᔪᒻᒪᑦ ᕿᑭᖅᑕᓂ ᓄᓇᓕᓐᓃᙶᕐᓯᒪᔪᑦ ᐃᓄᐃᑦ ᐃᓕᓐᓂᐊᕐᕕᖓᓐᓄᑦ ᓄᓇᒃᑰᕈᑎᕐᔪᐊᓂᑦ ᐊᖁᑎᐅᓂᕐᒧᑦ ᐃᓕᓐᓂᐊᕐᕕᒻᒥ ᒧᐊᕆᔅᕘᒡᒥ, ᐋᓐᑎᐅᕆᐅᒥ. ᐊᖓᔪᖅᑳᖅ ᐊᕿᐊᕈᖅ ᑲᑎᖃᑎᖃᔪᔪᖅ ᐱᔭᕇᕐᓯᕋᑖᔪᔪᓂᑦ ᐊᒻᒪᓗ ᐃᓕᓐᓂᐊᖅᑎᐅᓂᐊᓕᕐᒥᔪᓂᑦ ᐅᖃᐅᔾᔨᒋᐊᕆᐊᖅᑐᕐᓯᒪᓪᓗᓂ ᐃᓱᒻᒪᑲᓐᓂᖁᓪᓗᒋᑦ ᐊᒻᒪᓗ ᐃᓕᓐᓂᐊᑦᑎᐊᖁᓇᓛᖁᓪᓗᒋᑦ ᐃᓕᓐᓂᐊᕐᓂᖏᓐᓂ ᐊᒻᒪᓗ ᐃᖅᑲᓇᐃᔮᖅᑖᕈᒪᓪᓗᑎᒃ ᐱᓇᓱᐊᕈᑎᖏᓐᓂ.

ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᖅ ᐱᓇᓱᐊᕈᑕᐅᔪᖅ ᐃᓕᑉᐹᓪᓕᕈᑕᐅᕙᒻᒪᑕ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ, ᑲᒪᒋᖃᓗᐊᕐᐸᑦᑐᑎᒃ ᐃᓕᓐᓂᐊᑎᑦᑎᖃᑦᑕᓂᕐᒥᒃ ᐅᔭᕋᓐᓂᐊᕐᓂᓕᕆᕕᒻᒥ. ᑖᓐᓇ ᐃᓕᓐᓂᐊᕈᑕᐅᕙᑦᑐᖅ ᐊᖅᑯᑎᐅᕙᒻᒪᑦ ᐱᔭᕇᕐᓯᕙᑦᑐᓄᑦ ᐱᕙᓪᓕᐊᒍᑎᖃᕐᓂᕐᒥᒃ ᐃᖅᑲᓇᐃᔮᕆᖃᑦᑕᓂᐊᖅᑕᖏᓐᓄᑦ ᐅᔭᕋᓐᓂᐊᕐᕕᒻᒥ ᐊᒻᒪᓗ ᐊᓯᖏᓐᓂᒃ ᓴᓇᕕᐅᕙᑦᑐᓂᑦ.

ᐃᓄᐃᑦ ᐊᑎᓕᐅᖃᑦᑕᕈᓐᓇᖅᑐᑦ ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᒥ ᕿᑭᖅᑕᓂᒃᑯᑦ ᐃᖅᑲᓇᐃᔭᖅᑎᐅᔪᓐᓇᖅᑐᓂᑦ ᐊᑎᓕᐅᕐᕕᐅᕙᑦᑐᒥ, ᑐᑦᑕᕐᕕᒃ. ᑖᓐᓇ ᖃᕋᓴᐅᔭᒃᑯᑦ ᐊᑐᖅᑕᐅᔪᓐᓇᐸᑦᑐᖅ ᐃᖅᑲᓇᐃᔮᔅᓴᓂᑦ ᓴᖅᑭᑎᑦᑎᕕᖃᕐᒥᔪᖅ ᐊᒻᒪᓗ ᐊᒥᓱᓂᑦ ᐊᑭᖃᙱᑦᑐᓂᑦ ᖃᕋᓴᐅᔭᒃᑯᑦ−ᐃᓕᓐᓂᐊᕋᔅᓴᖅᑕᖃᐅᕆᓪᓗᓂ, ᐊᒻᒪᓗᑦᑕᐅᖅ ᐃᓕᓐᓂᐊᕋᔅᓴᓂᑦ ᓴᖅᑭᔮᖅᑎᑦᑎᖃᑦᑕᕆᓪᓗᑎᒃ ᓲᕐᓗ ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᒥᒃ. ᐅᕙᑦᑎᓐᓄᑦ ᐅᖃᖃᑦᑕᕆᔅᓯ ᑎᑎᕋᕐᓗᓯ ᐅᕗᖓ Tuttarvik@QIA.ca ᑐᑭᓯᒃᑲᓂᕐᓂᐊᕋᔅᓯ.

ᑖᓐᓇ ᐱᓕᕆᐊᖅ ᑮᓇᐅᔭᖅᑖᖅᑎᑕᐅᓯᒪᔪᖅ ᐃᓚᖓᓂ ᑲᓇᑕᐅᑉ ᒐᕙᒪᒃᑯᖏᓐᓂᑦ.