ᕿᑭᖅᑕᓂᒃᑯᑦ ᓴᖅᑭᑎᑦᑎᕗᑦ ‘ᑲᒪᒋᔭᐅᕙᓪᓕᐊᔪᓂᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᓃᙶᕐᓯᒪᔪᓂᑦ’ ᐅᓂᒃᑳᓂᑦ
ᐃᖃᓗᐃᑦ, ᓄᓇᕗᑦ − ᒫᑦᓯ 6, 2019 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓴᖅᑭᑎᑦᑎᕗᑦ ‘ᑲᒪᒋᔭᐅᕙᓪᓕᐊᔪᓂᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᓃᙶᕐᓯᒪᔪᓂᑦ’ ᐅᓂᒃᑳᓂᑦ ᑎᑎᕋᕐᓯᒪᓪᓗᑎᒃ ᐸᕐᓇᐅᑎᖏᑦ ᒪᒥᐊᕝᕕᐅᓪᓚᑦᑖᖁᔨᓪᓗᑎᒃ ᐊᒻᒪᓗ ᑲᒪᒋᔭᖃᕆᐊᕐᓂᐊᕐᓂᖏᓐᓂᒃ ᐊᑐᓕᖁᔨᔾᔪᑕᐅᓯᒪᔪᓂᑦ ᑎᑎᕋᖅᑕᐅᓯᒪᔪᓂᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᓂᑦ.
ᐱᔾᔪᑎᒋᓪᓗᒍ ᓴᐃᒻᒪᖃᑎᒌᓐᓂᖅ, ᕿᑭᖅᑕᓂᒃᑯᑦ ᓇᓗᓇᐃᕐᓯᔾᔪᑎᖃᕈᒪᒻᒪᑕ ᑐᑭᓯᓯᒪᓂᕋᕐᓂᖏᓐᓂᒃ ᐅᓪᓗᒥ ᐊᐅᓚᑦᑎᔾᔪᓯᖅᑎᑐᑦ ᐱᐅᓯᕆᔭᐅᕙᓕᖅᑐᓂᑦ ᐅᑭᐅᖅᑕᖅᑐᒥ ᐱᕕᖃᖁᓪᓗᒋᑦ ᐃᓄᐃᑦ ᐃᓱᒪᒋᔪᓐᓇᐃᕐᓯᓂᕐᒥᒃ ᐊᒻᒪᓗ ᒪᒥᓴᕈᑎᖃᕐᓂᕐᒥᒃ (ᓴᐃᒻᒪᕈᑎᖃᕐᓂᕐᒥᒃ). ᓴᐃᒻᒪᖃᑎᒌᓐᓂᖅ, ᐃᓄᓐᓄᑦ ᓄᓇᕗᑦ ᕿᑭᖅᑕᓂ ᐊᕕᑦᑐᕐᓯᒪᕕᖓᓐᓄᑦ, ᐃᒫᒃ ᑐᑭᖃᕐᖓᑦ ᑲᒪᒋᔭᖃᕐᓂᖅ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐱᔭᕇᕈᑎᖏᓐᓂ ᐅᓂᒃᑳᕆᓯᒪᔭᖏᓐᓂᒃ: ᑎᑭᐅᑎᓂᖅ ᓴᐃᒻᒪᖃᑎᒌᓐᓂᕐᒧᑦ (2010).
“ᕿᑭᖅᑕᓂᒃᑯᑦ ᕿᓄᔾᔪᑎᖃᕐᖓᑕ ᑲᓇᑕᐅᑉ ᒐᕙᒪᒃᑯᖏᓐᓄᑦ ᑲᒪᒋᔭᖃᓕᑕᐃᓐᓇᖁᓪᓗᒋᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐅᓂᒃᑳᓕᐊᕆᓯᒪᔭᖏᓐᓂᒃ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖏᔪᖅᑳᖓᑦ, ᐸᐅᓗᓯ ᐊᕿᐊᕈᖅ, “ᐱᓗᐊᖅᑐᒥᑦ, ᕿᓄᕕᒋᓕᕋᑦᑎᒍ ᒐᕙᒪᑐᖃᒃᑯᑦ ᒪᒥᐊᓐᓂᖃᑐᐃᓐᓇᖁᓇᒋᑦ ᑕᐃᔅᓱᒪᓂ ᐱᑦᑎᐊᖏᔾᔪᑕᐅᓯᒪᔪᓄᑦ ᑭᓯᐊᓂᓕᑦᑕᐅᖅ ᐊᑐᓕᖅᑎᑦᑎᖁᓪᓗᒋᑦ ᖃᓄᖅᑑᕈᑎᐅᓂᐊᖅᑐᓂᑦ ᐃᑲᔫᑎᖃᕐᓂᐊᖅᑐᓂᑦ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ ᑎᑭᐅᑎᖁᓪᓗᒋᑦ ᐃᓅᓯᓕᕆᓂᕐᒥ, ᐃᓕᖅᑯᓯᓕᕆᓂᕐᒥ ᒪᑭᒪᓇᓱᐊᕈᑎᓕᕆᓂᕐᒥ ᑲᒪᒋᔭᖃᕈᓐᓇᕐᓯᓂᕐᒧᑦ ᓇᒻᒥᓂᖅ ᓯᕗᓂᔅᓴᑎᓐᓂ.”
ᐊᕐᕌᒍᒐᓴᐅᓕᖅᑐᓂᑦ, ᑲᓇᑕᒥᐅᑦ ᒐᕙᒪᒃᑯᖏᑦ ᕿᐱᓗᖃᑦᑕᕐᓯᒪᒻᒪᑕ ᐃᓄᐃᑦ ᖃᐅᔨᓴᖁᔨᖃᑦᑕᑎᓪᓗᒋᑦ ᖃᓪᓗᓈᑦ ᐱᐅᓯᔅᓴᔭᖏᓐᓂᑦ ᐊᐅᓚᑦᑎᔾᔪᓯᕐᓂᑦ ᐊᓯᕈᐃᒍᑕᐅᓯᒪᓪᓚᕆᑦᑐᓂᑦ ᐃᓄᐃᑦ ᓄᓇᖓᓐᓂ ᐊᒻᒪᓗ ᐱᖅᑯᓯᖏᓐᓂᒃ ᐃᓅᓯᖏᓐᓂ 1950ᒥ 1975ᒧᑦ. ᐃᓄᐃᑦ ᐱᕕᖃᓚᐅᕐᓯᒪᙱᑦᑐᑦ ᓵᙵᑦᑎᒍᑎᖃᕐᓂᕐᒧᑦ ᑲᓇᑕᒥᐅᑦ ᒐᕙᒪᒃᑯᖏᓐᓂᑦ ᐊᐅᓪᓛᕈᒪᑎᓐᓇᒋᑦ ᐊᐅᓪᓛᖅᑎᑕᐅᒐᓱᐊᒡᒐᓚᐅᕐᓯᒪᓂᖏᓐᓂᒃ, ᕿᒻᒦᔭᖅᑕᐅᓂᒥᓂᖏᓐᓂᒃ, ᐊᓯᖏᓐᓂᓪᓗ ᐊᐅᓪᓛᑎᑦᑎᒍᑕᐅᓯᒪᔪᓂᑦ.
ᑭᓯᐊᓂᓕ ᐃᒪᐃᓕᐅᖔᓚᐅᕐᓯᒪᔪᑦ, ᒐᕙᒪᒃᑯᑦ ᑎᓕᓯᓚᐅᕐᓯᒪᔪᑦ ᑲᓇᑕᒥᐅᑦ ᐸᓖᓯᒃᑯᖏᓐᓂᑦ ᖃᐅᔨᓴᖁᓪᓗᒋᑦ ᑕᐃᒪᐃᓕᐅᕐᓂᕋᐃᒍᑕᐅᓯᒪᔪᓂᑦ ᐊᒻᒪᓗ ᐅᓂᒃᑳᓕᐅᖁᓪᓗᒋᑦ ᒪᓕᒐᓕᐅᕐᕕᔾᔪᐊᕐᒧᑦ. ᕿᑭᖅᑕᓂᒃᑯᑦ ᖁᓅᒻᒥᓪᓚᕆᓚᐅᕐᓯᒪᔪᑦ ᐸᓖᓯᒃᑯᑦ ᐅᓂᒃᑳᓕᐊᖏᓐᓄᑦ, ᐊᐳᕈᑎᖃᔪᒻᒪᑕ ᐃᓪᓗᐊᓄᖔᖅ ᐊᒻᒪᓗ ᕿᐱᓗᒍᑎᖃᖅᑐᑎᒃ ᐃᓄᐃᑦ ᓱᖅᑯᐃᒋᔭᖏᓐᓄᑦ ᑕᐃᔅᓱᒪᓂ ᐊᑐᖅᑕᐅᓯᒪᔪᓄᑦ
ᑖᒃᑯᐊ ᐱᔾᔪᑎᒋᓪᓗᒋᑦ, ᕿᑭᖅᑕᓂᒃᑯᑦ ᐋᖅᑮᓚᐅᕐᓯᒪᔪᑦ ᐃᓛᒃᑰᖅᑐᓂᑦ ᓱᓕᔪᒥᒃ ᑭᓪᓕᓯᓂᐊᖅᑎᐅᓂᐊᖅᑐᓂᑦ ᓄᐊᑦᑎᓂᐊᕐᖓᑕ ᓱᖅᑯᐃᒋᔭᐅᔪᓂᑦ ᑕᐃᔅᓱᒪᓂ ᐊᑐᖅᑕᐅᓚᐅᕐᓯᒪᔪᓂᑦ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ ᐊᕐᕌᒍᐃᑦ ᐊᑯᓐᓂᖏᓐᓂ 1950 ᐊᒻᒪᓗ 1975. ᑕᒫᓂ 350ᖏᓐᓃᑦᑐᑦ ᐃᓄᐃᑦ ᐃᓚᒋᔭᐅᓚᐅᕐᓯᒪᒻᒪᑕ ᐃᓄᓕᒫᓂᑦ ᓈᓚᓐᓂᖃᖅᑎᓪᓗᒋᑦ ᓱᓕᔪᑦ ᓴᖅᑭᖅᑕᐅᓂᐊᕐᖓᑕ ᑲᓇᑕᐅᑉ ᒐᕙᒪᒃᑯᖏᑕ ᐊᑐᐊᒐᖏᑕ ᐱᓕᕆᔾᔪᓯᖏᑕᓗ ᒥᔅᓵᓄᑦ.
ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐱᔭᕇᕈᑎᖏᑦ ᐅᓂᒃᑳᑦ ᐱᔾᔪᑎᖃᕐᖓᑕ ᐱᒐᓱᓂᑦ ᐊᕐᕌᒍᓂᑦ ᐊᐱᕐᓱᕈᑕᐅᓯᒪᔪᓂᑦ, ᐅᓂᒃᑳᕈᑕᐅᓯᒪᔪᓂᑦ, ᐊᒻᒪᓗ ᐃᑦᑕᕐᓂᓴᕐᓂᑦ ᖃᐅᔨᓴᕈᑕᐅᓯᒪᔪᓂᑦ ᐊᑐᕐᓯᒪᔭᖏᑕ ᒥᔅᓵᓄᑦ ᕿᑭᖅᑕᓂ ᓄᓇᓖᑦ ᐃᓄᐃᑦ ᒫᓐᓇᐅᓕᖅᑐᖅ ᐊᐅᓚᑦᑎᔾᔪᓯᐅᓕᖅᑐᓂᑦ.
ᐅᓪᓗᒥᒧᑦ ᑎᑭᑦᑐᒍ, ᑲᓇᑕᐅᑉ ᒐᕙᒪᒃᑯᖏᑦ ᑭᐅᓪᓚᑦᑖᕐᓯᒪᙱᒻᒪᑕ ᓱᓕ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᓄᑦ ᐊᒻᒪᓗ ᖃᐅᔨᒍᑎᒋᓯᒪᔭᖏᓐᓄᑦ.
ᑐᑭᓯᒋᐊᒃᑲᓐᓂᕈᒪᒍᔅᓯ, ᐊᑏ ᑐᑭᓯᒋᐊᕐᕕᐅᖃᑦᑕᕐᓕ:
ᓰᒪ ᓴHᐊ ᔨᐅᕋHᐃ, ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᖃᑦᑕᓂᕐᒧᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
szerehi@qia.ca
867.975.8413
1.800.667.2742
